Mark 16

Jisu inthoinokna

(Mat 28:1-8; Luk 24:1-12; Jon 20:1-10)

¹ Hanchu, Sabbathni avun suoleh chu Mary Magdalene ngei, Jacob nu Mary ngei leh Salomi ngei han Jisu ruok sariek va pol rangin mirimhoi an rochoka. ² Pathianni zinga nisa suok chakin thana an va sea. ³ Lampuia han, “Than baia lung hah tumo mi muluoi pe rang ani hi?” Ti'n anni leh anni anin kerenga. ⁴ Lunglianpa ani sikin. Hanchu, an hong ena, lung hah muluoi sei in an mua. ⁵ Masuole chu than sungah an luta, ruotharte inkhat puonchek insila chang tianga insung an mua, anin lairaka.

⁶ Nikhomrese, aman an kôma, “Mulung min jing noroi; Nazareth Jisu an jemdel pu hah nin rok ani ti ki riat. Ama hah hin om khai maka, an thoinok zoi, enta u, an min jalna hi. ⁷ Atun, se ungla, a ruaisi ngei leh Peter kôma han, ‘Galili ramah nin motona se a ta, nangni a lei ril sa ang han ha munah han mu nin ti’ tin va ril ngei roi’” ati pe ngeia.

⁸ Masuole chu an joka, beidông leh ichi pumin than renga an tana. An chi rei sikin tute kôm ite ril mak ngei.

THURCHISA NGEI MURDI AMONGNA ANI ^a

16:9-20

Mary Magdalene Koma Jisu Anlar

(Mat 28:9-10; Jon 20:11-18)

[ ⁹ Hanchu, Pathianni jingah an thoinokin Mary Magdalene, asung renga ramkhori sari a rujul pe nu kôma a motontaka Jisu anlara. ¹⁰ Hanchu, Mary leh Jisu a ompui ngâi ngei ha ava rila. Anni hah ngâisie leh achapin an lei oma; ¹¹ Mary'n, “Jisu a ring nôka, mu khom ku mu lele” ai ti pe ngei hah an ni ngei in taksôn mak ngeia.

Ruaisi ngei kôm Jisu anlar

(Luk 24:13-35)

¹² Masuole han chu anni laia mi inik ram tiang panin an sea lampuia mel danglam in an kôma anlar nôka. ¹³ Anni hah an hong kira, ruoisi dang ngei an hong rila, nikhomrese, anni khom iem uol mak ngei.

Somleikhat ngei kôma Jisu anlar

(Mat 28:16-20; Luk 24:36-40; Jon 20:19-23)

¹⁴ Anuktaka chu ruoisi somleikhat ngei bu an nek lai takin an kôma anlar nôka. An thoinok suole amu ngei chong takson loin an mulung angar sik leh taksona reng an nei loi sikin anni ngei a ngoa. ¹⁵ An kôma, “Rammuol pumpuia se ungla, mi murdi kôma Thurchisa hih va misir roi. ¹⁶ Tutukhom ama iema Baptisma a chang chu sanminzok in om an ta, tukhom a iem loi chu theiloi intumin om an ti. ¹⁷ A iem ngei chu sininkhel sintheina ranak pek ni antih; ki rimingin ramkhori rujulpei anta; chong tharin chong an tih; ¹⁸ an kut le murul sur an ta, tur nek anta, ite tinoni ngei; damloi chunga an kut bang anta, dam kelen an ti” a tia.

Jisu Invana Akal

(Luk 24:50-53; Sin 1:9-11)

¹⁹ Ankôma, thurchi a misir zoiin Pumapa Jisu Krista chu invânah lakpaiin aoma, Pathian chang tiang a hong insung zoia. ²⁰ Ha anghan, a ruaisi ngei hah an se suoka, muntina thurchi an misir zoia, Pumapa khomin anni ngei a ompui ngeia, an thurchi misir hah adik ti riatnan sininkhel in a mindet tir zoi.]