¹ Yaka wekiwandiki ikana:ma: hokeeki na pulu peleme tupa: I̱ma: doeki iki pa:ta: laasome. Pate ma:nda: epima: hokeeki pia:ka:na:ta: kota: nika: hau peaaso hata: Apa: pa:ta: honke lawaasa: some ma:nda: hala:me. Ipikita: tikitiki piki some Yesu Ketiso hala:me. ² Kutupa Ketisota: nika: hoke hau paeyawala: ekina: tekee. Nika: hoke hau homeke dia:ya:la:pate pa paeyao sikina: hoke hau make loa:me.

³ Kutupa nikana:ma: Koda:na: pi ula: ekimanu opua puma:ka:na:ta: kota: ipiki handoloma:me laa nika: hone uluma:me. ⁴ Pate ma:nda:ma: alo hata: alota: I̱ma:ta: ipiki handolota alo kone ipika: pi ula: ekimanu na opua pia:ka:na:ta: kota: kutu pita:la: someta: yayapiki pi ala: some make mo ota: pi ala: ekita: ipiki pa:ta: na ula:me. ⁵ Pate ma:nda: epima: Koda:na: pi opua pua:tiki pita:la: someta: kota: ipiki Koda: pa:ta: puki hala:la: ekita: ota: anekema: handaa ula:me. Nikita: Koda: ame̱le̱ ta:ma:ni poloma:me laa hone uluekema: pea:pekeeki dupa. ⁶ Ma:nda: epima: Koda: yaapo ta:ma:ni pea halome lea:ka:na:ta: kota: ipikita: mo Yesu Ketisoma: pieke tupa: kone hao pelia:peke ya:la:me.

⁷ Yaka pukipiki yankeke tonuo. Iki pa:ta: I̱ma: do laaso pi ula: ekita: panakeeki dia:me. Mo kini pitolo hata: hande amba: wia haeme pi ula:eki konee. Koto amba: pi ula: ekita: ika: amba: hande opeleme ekimanue. ⁸ Koto pa:la:pate I̱ma: ame do laaso pi ula: ekita: panakeekie. Pa ekipeke ipika: ota: ekita: Ketiso pa:ta: make iki pa:ta: make handoloma:me. Kota: mo timba: ala: ekita: amba: lombei pita:la:me. Kutupa mo ota: pa̱a̱ pa:la: ekita: amba: pa̱a̱ pita:la:me.

⁹ Ma:nda: epima: ipikita: mo pa̱a̱ pa:la:eki pa:ta: halome alo kone ipika: kame honditi pia:ka:na:ta: kota: ipikita: ame do make timba: leke pa:ta: ha pelia hala:me. ¹⁰ Pate manda: epima: ipika: kame pa:ta: pukima: homea:ka:na:ta: kota: ipikita: mo pa̱a̱ pa:la:eki pa:ta: hala:me. Koto ekina: ipiki pa:ta:ta: hoke hau pu tialo pa:la: ekita: ota: ma:nda: na ula:me. ¹¹ Pate ma:nda: epima: ipika: yankeke honditi pia:ka:na:ta: ipikita: timba: leke pa:ta: hala:me. Ipikita: koto pa:ta: pominolo hata: timba: la:la: ekima: leke holu peala: ekiyalo hata:ta: ipika: pula: pota:ta: hone na ula:me.

¹²  Yaka wekiwandikio. Mo Ketisona: bikina: ika: hoke hauta: amba: paeyawala: ekina: I̱ma: iki pa:ta: do pi laasome. ¹³ Yaka apa:titio. Iki pa:ta: do pi laaso ekita: pa mo ota: titina: kini pea a:pa pa hao hala: someta: ikana:ma: hone wilimi ekina: loa:me. Panake haliweki iki pa:ta: do pi laasome. Paa ekipeke ikana:ma:ta: mo Hoke Temoko bepolaleme ekina: loa:me.

¹⁴ Yaka wekiwandikio. Iki pa:ta: do pi laaso ekita: ikana:ma: Apa: Koda: handa hone wilimi ekina: loa:me. Yaka apa:titio. Iki pa:ta: do pi laaso ekita: pa mo ota: titina: kini pea a:pa paa hao hala: someta: ikana:ma: hone wilimi ekina: loa:me. Panake haliweki iki pa:ta: do pi laaso ekita: pa mo Koda:na: pi iki pa:ta: e pokolo haena: iki honkopu hasememe. Kutupa ikana:ma:ta: mo Hoke Temoko bepolaleme ekina: loa:me.

¹⁵ Do kenkena: hau o do kenkena: ula: alemanu pa:ta: pukima: na homa:peke. Ikana:ma: do kenkena: ula: alemanu pa:ta: pukima: homemeka:na:ta: kota: Koda: pa:ta: pukima: na homelememe. ¹⁶ Do kenkena: ula: ala:ta: ala:ta: paeyaota: pa mo lopa hala: lokena: hone pa:la: ekimanu make wanda:halina: lekema: handolo pukima: homa:la: hau make wanda:halima: ta:na:ma: homaa biki tieke wiaasa: alemanu make koto ale paeyao siki homeke a:nda: Apa: pa:ta: na a:pa:la:me. Koto hau paeyaona: teketa: do kenkena: ekie. ¹⁷ Kutupa do kenke make do kenkena: ula: wanda:halina: hone pa:la: alemanu paeyao make koto alemanu paeyao sikita: paeta:la:me. Pate ma:nda: epima: Koda:na: hone pa:la:eki peaasa: someta: hoto paeyao da:ta hao halieke.

¹⁸ Yaka wekiwandikio. Paetolo nateta: teke pa:ta:e. Mo Ketisona: a:nda: tunkiliki hali ipilieke laata: iki pa:ta: amba: ta opuaeya: handa:e. Koto ekina: ameta: mo Ketisona: a:nda: tunkiliki tapake wopu amba: opolo epelememe. Koto ekina: ameta: paetolo nateta: teke pa:ta: ya:ka:ta:me laa nika: hone uluma:me. ¹⁹ Koto wanda:halita: ota: nika: homhomeke hone wia mombololoma:eki tukiki pa:ta: epea:pate pa na apa:taememe. Koto ekina: ikana:ma: niki mina:pa:lalememe. Iki a:nda: nika: mombololoma:eki pa:ta: apa:taemekena: yoluta: kota: niki ame̱le̱ mandakena: halo pimime. Pate ika: pa mina:pa:laemeketa: ota: ma:nda: hondo niki ame̱le̱ na apa:talemeeki peneme yaasememe.

²⁰ Kutu pimipate pa ya wekiwandikio. Ikita: mo hande Ketisoma: kua:neala: Holi Sipitidi amba: koto miniki halememe. Koto ekina: iki paeyaoma:ta: mo ota: ekita: hone wilimime. ²¹ I̱ma: iki pa:ta: tameiya: laaso ekita: pa ikana:ma: mo ota:eki hone na wilimiki yeke dia:ya:la:pate pa mo hone wilimiki handa pueme. Kutupa make mo yayapikieki ma:nda:ta: mo ota:eki pa:ta: na ipula:me laata: hone ika: wilimiki pua:me.

²² Koto ekina: mo yayapiki pi ala: someta: epi ya:ka:ta:pe. Pa ma:nda: epima: Yesuta: mo Ketiso dia:me ala: some lataa. Dupiki someta: Ketisona: a:nda: tunkiliki somee. Ipikana:ma:ta: Ateke make Eiyeke make hoki wala:la:me. ²³ Ma:nda: epima: a:nda: mo Eiyeke hoki walea:ka:na:ta: kota: Ateke make hoki wala:la:me. Ma:nda: epima: Eiyeke a:nda: pukima: homea:ka:na:ta: kota: Ateke make pukima: homa:la:me.

²⁴ Koto ekina: hone wopu witolo hata: mo hande titina: kini pitolo hata: opimi pi ika: puki pa:ta: mondu hapa:peke. Ikana:ma: a:nda: koto opimi pi pa u haemeka:na:ta: kota: ikita: mo Eiyeke pita: ipika: Ateke yaapo ame̱le̱ hoto paeyao ta:ma:ni pea halimikie. ²⁵ Kotota: mo hande Ketisoma: niki pa:ta: kulueke laa pi la: wia: ekita: Da:ta:la:eki lataa.

²⁶ I̱ma:ta: do laaso ekita: mo iki makealuekema: taapeleme wanda:halina:eki iki pa:ta: do laaso handa:e. ²⁷ Koto pa:la:pate iki pa:ta:ta: Ketisoma: ipika: Sipitidi amba: ka:la:me. Koto ekina: ipika: Sipitidi iki pa:ta: a:nda: pita: pelia haena:ta: iki wala:peke some ma:nda:ta: weiya:peke na ya:la:me. Pa ekipeke mo Sipitidima:ta: iki pa:ta: hau paeyao walieke. Kutupa ipikana:ma: wala:la: ekita: yayapikieki dia:ya:la:pate ota:ekie. Koto ekina: kota: mo Sipitidima: wala:la:eki opua pitolo hata: make Ketiso pa:ta: ta:ma:ni pu pelia hapeke ya:la:me.

²⁸ Ota:e. Yaka wekiwandikio. Ipiki yaapo ta:ma:ni pea hapee. Pa ekipeke ipiki opolo epea:ka:na:ta: nikita: honkopu haasa: ekima: tumbulu pa:la: tupa: loa:me. Kutupa koto mo ipilia: natena:ta: ipiki handolo hata: yaala:ma: na homolo polome tupa: loa:me. ²⁹ Ketisota: tikitiki pa:la:me laata: ika: hone wilimime. Kota: ma:nda: epi ameda tikitiki piki hau pu haya:ka:na:ta: Koda:na: wekiwandikie laata: ika: hone witolo pelememe.