¹ Mo Apa:ma: niki pa:ta: pukima: homa:la:eki tieke handa:pe. Ipika: pukima: homa:la: ekita: ota: tieke aneke yalo hata:ta: nikita: Koda:na: wekiwandiki lelememe. Kota: koto ekina: nikita: ota: ipika: wekiwandikie. Doeki tekena:ta: do kenke wanda:halima:ta: Koda: na handelemeeki yalo niki make na handelememe. ² Ota: yaka ta:ma:ni sunuo. Nikita: ameta: Koda:na: wekiwandiki ya:la:pate pa mo wetepena: halo polome ekita: a̱i̱ na peneme yaala:me. Koto pa:la:pate mo Ketiso opolo ipilia: dina:ta: nikita: ipikima: kone handulumeke. Pa ekipeke ipikita: ota: ipika: hala:eki nika: lekema: handolo polome ekina: loa:me. ³ Pea: epima: Ketiso pa:ta: dupiki hone puao haya:ka:na:ta: kota: koto somema: mo Ketisota: ala:ta: ma:nda: na ta̱lolo hata: pa yako peaa hala: tupa: ipiki make ha̱i̱ peaama:na: pa yako peatiki pu hala:me.

⁴ Ma:nda: epita: hoke hau pia:ka:na:ta: Koda:na: pi ula:eki yamba:la:la:me. Pa ekipeke hoke hauta: Koda:na: pi ula:eki yamba:la:la: ekie. ⁵ Ketiso opolo epeeke ekita: nika: hoke hau mea bawaluekema: a:pa:la:me. Kutupa ipiki pa:ta:ta: hokeeki ma:nda: na ula:me laa hone wilimime. ⁶ Koto ekina: ma:nda: epi Ketiso yaapo hone homeke wia ta:ma:ni pu haya:ka:na:ta: kota: koto someta: hoke hau pa na pu hala:me. Pate ma:nda: epita: hoke hau pa putia pea:ka:na:ta: kota: koto someta: Ketiso ota: na handa:la: make hone na ula:me.

⁷ Yaka wekiwandikio. Ma:nda:ma: iki na makeaena: lapa:peke. Ma:nda: epima: ota: hau pia:ka:na:ta: kota: koto someta: mo Ketiso pa:la: tupa: tikitiki piki some hala:me. ⁸ Pate ma:nda: epima: hoke hau pa putia pea:ka:na:ta: koto someta: mo Hoke Temokona:eki hala:me. Pa ekipeke mo Hoke Temokoma:ta: kini pitolo kone hoke hau pa:leke loa:me. Mo Koda:na: Eiyeke opolo a:pa:la: ekita: ota: doeki tekena: pa:la:me. Mo Hoke Temokoma: pa:la:eki hoeyaaluekema: pa:la:me.

⁹ Ma:nda: epita: Koda:na: eiyeke haya:ka:na:ta: kota: hoke hau pa na putia pu hala:me. Pa ekipeke Koda:na: da:ta:la:eki kone ipiki pa:ta: pila:me. Kutupa Koda:ta: ipika: Apa: yaalo ipikana:ma: hoke hau pa putia pua:peke na ya:la:me. ¹⁰ Mo Koda:na: wekiwandiki pita: mo Hoke Temokona: wekiwandiki yaapo ata:ka: tieke pa:la: ekita: dupae. Ma:nda: epima: mo ota: hau na pu o ipika: yankeke pukima: na homo pia:ka:na:ta: ipikita: Koda:na: weki na hala:me.

¹¹ Ikana:ma: mo hande kini pitolo hata: titina: opimi pita: doe. Nikana:ma:ta: ma:nda: ma:nda: pa:ta: pukima: homa: alualu pu hapa:peke ya:la:me. ¹² Nikita: mo hande Keinima: na hando hapa:peke ya:la:me. Ipikita: mo Hoke Temokona:eki hata: ipika: hameke Eipolo kone lu homaeyekeme. Pa ekipeke lu homaeyekepe. Do ekina:yeke loa:me. Mo ipika: pieke hau manuta: tikitiki na pitolo haena: ipika: hamekena: hau manuta: tikitiki pikieki yaalo piekeme.

¹³ Koto ekina: yaka kame tonuo. Do kenke wanda:halima: iki honditi pia:ka:na:ta: na penkilipa:tia pomia:pa:peke. ¹⁴ Mo homa:la:eki mina:pa:lao da:ta:la:eki pa:ta: epoloma: ekita: nika: hone uluma:me. Koto mo nikana:ma: nika: kametonu pa:ta: pukima: homo haloma: ekita: hone ulume laa loa:me. Ma:nda: epima: pukima: na homea:ka:na:ta: ipikita: mo homa:la: ekina: honkopu oto pa:ta: paa hala:me. ¹⁵ Ma:nda: epima: ipika: hameke honditi pia:ka:na:ta: kota: koto someta: hali lu homaasa: somee. Kutupa ika: hone wilimima: mo hali lu homaasa: someta: da:ta:la:eki ipiki pa:ta: na ula:me.

¹⁶ Nikana:ma: mo pukima: homa:la: ekita: dupa ya:ka:ta:me laa hone witoloma: ekina: teketa: Ketisoma:ta: nika: anketeke mea ipika: da:ta:la: ekita: halea:me. Koto ekina:ta: nikana:ma: make nika: da:ta:la: ekima:ta: nika: kametonu tamba: muluekema: pa hala:peke ya:la:me. ¹⁷ Mo hamoko halima: ipika: hameke ala:ta: ma:nda: dia: ya:la:eki handolo hata: kone hameke pa:ta: ipika: puki na halea:ka:na:ta: pa ekieki pea ipikana:ma: Koda: pa:ta: pukima: homolome laa leliepe. ¹⁸ Yaka wekiwandikio. Nika: pukima: homoloma: ekita: kakema: homeke o pima: homeke lapeke na ya:la:me. Dia:me. Koto pukima: homa:la: ekima:ta: pa mo ota:eki peneme yaena: nika: kikima: pitolo hata: homekee. ¹⁹ Kota: kutu pita:la: ekima:ta: mo ota:eki pa:ta: tunaaloma:me laa hone ulumeke. Kutupa dupita:la: ekima:ta: nikana:ma: Koda:na: leke popelekena: puki hana: nokopoloma: ekie. ²⁰ Pate nika: hone tekema: alo hata: nikita: hoke hau poloma:me lea:ka:na:ta: kota: nika: hone uluma: ekita: dupa. Koda:ta: nika: hone paeyaona: aneke hali yaalo ipikana:ma: ala:ta: ala:ta: paeyao hone ula:me.

²¹ Koto ekina: yaka pukipiki ta:ma:ni sunuo. Nika: honema: a:nda: niki hoke hau na poloma:me lea:ka:na:ta: kota: nikita: Koda:na: leke popelekena: puki hana: nokopoloma:me. ²² Nikana:ma:ta: ipika: pi ula: ekimanu opua pitolo make ipiki ta:na: homa: tiaasa: haumanu pua halomeketa: kota: nikana:ma: ipiki pa:ta: honke la:la: alemanu mu haloma:me. ²³ Kutupa ipikana:ma: mo niki pa:ta: pipee ala: ekita: dupa. Nikana:ma: ipika: Eiyeke Yesu Ketiso pa:ta: hone tulao hata: make pa mo hande Yesuma: leeke tupa: kone niki ame̱le̱ pukima: homa: alualu pu hapa:peke. ²⁴  Ma:nda: epima: Koda:na: pi ula: ekimanu opua pia:ka:na:ta: ipikita: Koda: yaapo tunao hala: make Koda:ta: ipiki yaapo tunao hala:me. Kutupa mo Koda:ma: niki pa:ta: Sipitidi ka:leketa: kota: Koda:ta: niki ame̱le̱ tunao hala:me hone uluma:me.