Lɔga Gɛrsa Ko Ga Yɛbhayuny Ko Ga Bariymo
17
1 Na Yesus wagɛsɛ zuga bɛrrana na sɛɛsɛ,
"Lɔga ujukɛa zugo yɔk ngadhɔyinɛwo.
Honydɔ.
Na ngahirronu tɔgɛsɛn zugo lɔga gɛrsa ujukɛa zugoye,
sɛ kiwo rɛ.
2 Inde ibhana ngaerroya chichiyed kon na tɔgɛsɛn lɔga gɛrsa na kemese,
hunde kɛshɛbhtɛsɛ ngo golu na kujuktɛsɛ bhɔgɛ na kere,
a challi.
3 Ngamɛa ibbaya rɛhi!
Nɔng hunde dha goonu ɛdɛyoye,
madhtɔ.
Na hunde shikeny na se 'any kagarayɛye',
ko inye sɛɛsɛ 'any kagarayɛ.'
4 Ko nɔng hunde kɛdɛ lɔga gunyu kaleyɔ jagarɛ kɛngi isabay na koo keseyaginy,
‘wa kɛdɛwaye’,
ko inye ujuk na sɛɛsɛ 'any kagarayɛ' jagarɛ kɛngi isabay.
5 Na seyɛsɛ zuga gɛnyɛ senno kek,
"Iriyey na kɛ̀yɛbhto Tumu gore."
6 Na sɛɛsɛ ꞉Yesusi,
"Hunde tɔlɔmɔ yɛbha bhee chinyi bhɛa hɛta ko bhogoni bhɛa ku kawari toyne na seyɛsɛ ngachamochita,
‘Bana ok chil yirisiyɔ toye’,
bushinya na kɔ na shildɔ.
7 Mɛya igge hunde kona kɔtɔlɔ bariya mesinɛna na kawaga guyɔ wo iwoyɔe,
anda hira ahany senɛsɛn,
‘Tɛa bay na usɛ?’
Ngasenɛnɛno.
8 Senɛsɛn,
‘Ga agagany tila ko bhee kaminɛnɛ.
Na hunde kusɛu na te ushaye,
f ko inye usɛyɔ.’
9 Na nɔng a nganda bariy shik lɔgɔ na mesɛn aha shɛɛye,
nɔng komoru bariya nɛnɛ ngaeterisano.
10 Na ko igge hunde lɔga kèsenagungu messo na te ushaye,
wurtɔ se,
‘Kano barinyaa chicho tɔlɔgɔnyag.
Lɔga kajiy wa kemeso.’"
Lɔga Zuga Ku Tɔmmɔn Ama ꞉Gedhe Na Kìbaysio
11 Na Yesus bana na ogu Yurusalemɔ na dhau ngerreya Samariya ko Gelila.
12 Na hunaa kɔa na dokko ɔr konaye,
zukte am ꞉gedhe ku tɔmmɔn hoya na shili ko rɛna.
13 Na eli Yesus goore na seyɛsɛ,
"Komoru Yesuse,
chirbhisieyɔ!"
14 Na gɔnyu na sɛɛsɛ,
"Ago na dhɔldɛsɛ gɔldangɛaa doraa Tumu rɛhiya gu."
Na hunde chinyi ngani hɛye,
gedhe tururiya gɔrɔ na baya.
15 Na kona aru rɛa nɛnɛ hunde base,
na waga na eterisana Tumuh gɔrɔ gɔrɔ.
16 Nɔng a hira Samariya.
Na koo tɔgɔdhɛ Yesus kɔma na eterisanu.
17 Na sɛɛsɛ ꞉Yesusi,
"Zuga baso wa ngaanno tɔmmɔn?
Na sakal wa ago ori?
18 Ye,
na kuni ꞉inyo hira ana bhichang na eterisani Tumu.
Na yɔk gena ngahonyo?"
19 Na sɛɛsɛ,
"Bana ogoni!
Wa bayɛyo ngaya yɛbhɛanyde."
Lɔga Kunɛa ꞉Tumu Na Kaleɛy Zugo
20 Na kale kona zuga Bhɛrɛsi ghini Yesus na seyɛsɛ,
"Tumu ale zugo lɔ minang?"
Na sɛɛsɛ,
"Nɔng Tumu hunde lɔ zugoye,
kawarre ngakoro.
21 Nɔng a nganda ɛllo kari na lɔ zugoye.
Na bhee senɛo,
‘Tumu se i ngaya.’
‘Se i ngagɔrronu’,
ninggɛ."
22 Na koo sɛɛsɛ zuga bɛrrana ꞉nɛa,
"Nɔng ungge ale lamianyo Hiri Hoynɛ na kɛ̀tɛldɛ kɔ anye kari ihe.
Senno kìtinyandɛy kɔ anye na bhee orɛanyu ninggɛ.
23 Yɔk zugo ale senagungɛ,
‘Hiri Hoynɛ a nganda i ngayaye.’
‘Wa iho ngonu.’
Na ngazuktonu senagungɛ ngangaye,
ngakɔbho.
24 Nɔng Hiri Hoynɛ kalde ale kuguniye,
kɛhɛto ko guya bhadhana na terinyo ba kumulɔng.
Dari ngakuguniwo.
25 Na nɔng maya ga sabɔ Hiri Hoynɛ kɛanyɛ ngatenyda na tiranyɛanyɛ gore.
26-27 Nɔng bɛrgua Nɔa,
anna bere zugo aminɛna na mayinɛna na gamnɛna ko bhee Nɔa tunugɛ gonggul.
Na guyɔ dhagɛ na zugo guyɛ ma rang.
Ngamɛa kɔ anye Hiri Hoynɛ,
bɛrguye ale kuguniye heo ngandonu bere mesɛ ꞉zugu bɛrgua Nɔaye.
28 Ko nɔng bɛrgua Loti anna zugo aminɛna na maynɛna na talnɛna na duginɛna na kɔdhɛa doriyo nganga.
29 Na huna Loti dhɔtta Sodom na kɔa,
anna Tumu dhɔtana goa bo hɛta ko guyɔ na ama zugo rang na garsɛayɔ.
30 Ko nɔng kalde keni kuguyɛy ꞉Hiriyɔ Hoynɛye,
a nganga.
31 Hira iho bhɔ,
dorigiye ngakɔ na ahi dhumana.
Na iho guyɔ,
ɔrɔ ngawogi na ahi dhumana.
32 Ga tunggɛsɛ lɔga tɛriya Loti.
33 Inde hin rɛa nɛnɛye ujuk rɛ.
Inde mar rɛa nɛnɛye nɔng jɔana basey.
34 Nɔng ale ngabartonu zukte ku ramman ungusɛ hayaye dhɔnɛ,
na kona kɛ̀hɛɛyɔ,
kon dhɔynɛyɔ.
35 Tɛrroye ku ramman ngunynɛ bhee dhɔnɛ,
na kona kɛ̀hɛɛyɔ,
kon dhɔynɛyɔ.
36 Zukte ku ramman ɛl guye dhɔnɛ,
na kona kɛ̀hɛɛyɔ,
kon dhɔynɛyɔ."i
37 Na ghini ꞉zuga gɛnyɛ na seyɛsɛ,
"Komoru,
ngangaye,
ngazukta kɛ̀hɛɛ ori?"
Na nɔng sɛɛsɛ,
"Bhɛa lɔma galeya rɛsa dhongga muginɛyɔ."