1 Ngalɔkta senɛ, hirkona hunde sekete gulsa doraa Tumuye chirkan zinggoa lɔma diram, aga ku dhere.2-3 Na hira ku gulsa doraa Tumu any kete na rding ninggɛna na kagama tɛri dhɔnɛ sɔng, na kete na zugu ngamarɛayo na bhaka ba chɛɛ, kete na bhɛka rɛa nɛnɛ, kete na lamana kɔmɔn, kete na gaa bhɛa madhɛa zugo, kete na ngadhutioyoo na lalugɛ ngaɛkɛnyanao, kete na ɛsɛda zugo na lɔga gɛrsa ngamesonoo, kete na birinya ngayeloo,4 na kete na lɔma zuga gɛnyɛ chɛɛ, na kete na dhɔngɛa erroa gɛnyɛ na igomɛsɛnɛa chɛɛ.5 Hunde kesɛa hiri zuga gɛnyɛ chɛɛ ngalɔmoyeo, anda bhɛa seno kaliyey doraa Tumu ale ɔana ɛnɛng?6 Na hira ngani yɛbhana Tumu ja, ngabɛrano na alinɛnɛ dora Tumu ke ngaya ale dhunggurɛ sara Tumu na yagɛ mɛnɛngiyɔ wurtɔye.7 Na nɔng bhɛa kenno ngakujuktay lɔga gɛrsa ko gaa mɛnɛngiiny maya bhɛa zuga yɛbhɛa lɔga Tumu a hira challa. 8 Na yɔk zuga buynɔ kɔbhɛa gulsachina alinɛnɛa doraa Tumu maya agga ɛsɛdhɛa lɔga ɛlla chɛɛ na kɛngɛrsa, maya agga shutayɔ ngadhutiyɛayo, maya ngormɛna birinyany ngayo.9 Na lɔga kɛbhɛgɛa bhɛa kɛyɛbhɛa Tumu maya ngɛrɛ lɔga challa ko ga gɛrsa na gaɛ chɛɛ.10 Na ga sabbɔ yɔk kilowo, na hunde kargi na te zuga, zugo ngawolokɛayoye, anye kete zuga kashɛa zuga alinɛnɛa dora Tumu. 11 Na koyɔk tɛroa gɛ maya agga ɛsɛdhɛa lɔga ɛlla chɛɛ na kɛngɛrsa, maya agga zugo ngakedhɛayo oo maya agga ngadhutiyɛayo, maya agga lɔkte mesɛye kumulɔng kɛyɛbha.12 Na zuga kashɛa Tumu doraa nɛnɛ bhoy maya agga hɛyɛa tero dhɔnɛ dhɔnɛ na irogitɛa erroa gɛ oo ibhɛa zuga ɛlla kari chɛɛ. 13 Na zuga kashɛa Tumu doraa nɛnɛ hunde me chɛeye, ale ko, na anna bu toynɛna ko na bu dhungguro ke ngaya yɛbhɛ Yesus kirisose.14-15 Na chɔɔ hunde ko kɛtɛhɛn bhɛa keni kasayɛung chaw, sabbɔ keni taga ngalɔkta hunde kesɛa lɔ lɔkte ibhonyɛ gɔraye, na nɔng bhee kɔgɔdhagɛiny ngalɔktaye, a bhɛa keni zuga doraa Tumu kumulɔng oo ngazukta ku bara Tumuye, kumulɔng katakte hunde doraa Tumu bhakɛ ɛnɛngge oo hunde Tumu a hira lɔga ku dhere kumulɔngge. 16 Na lɔga ngani dhuguninyana kɛyɛbhɛa Tumu bibiyo a ngagiya, nɔng kirisos annaa bere kuno huna hiriguny. Yɔk ngalɔkta kagga kuloyɔ hunde dha bere me lɔga hinno Tumu ku dhereye, nɔng dha bere orɛ zuga eko Tumu. Nɔng kirisos chɔɔ bere kamatɛsɛa zugo, na yɛbta zuga ngabaya kumulɔng, na kaytɛa tumɔ diramɔ.