Yesu do olo do ɛhwɛɖɔtɔ nyanyla ɖe wu
18
1 Yesu do olo ɖe na onukplanvi etɔnye, a do ɖe xlɛ ye tun ye bo ɖo na nɔ xo ɛɖɛ nɔ tɛgbɛ-tɛgbɛ, gbɔjwɛ ma ɖo. 2 E lɔ tun mɔ: «Toxo ɖe le, ɛhwɛɖɔtɔ ɖe, xeni ɔn nɔ vɔ Mawu, e ko nɔ si ɛmɛ ɖe, bo le toxo la mɛ. 3 Nahwe okposi ɖe can bo le toxo la mɛ. Ganmɛ-ganmɛ, okposi la nɔ va ɛhwɛɖɔtɔ la kɔn, a bo lɔ ni-i tun mɔ: “Gbo ɛhwɛ jijɔ na-a do kpan ŋukɔn kɛntɔ tɛye.” 4 Ɛhwɛɖɔtɔ la bo gbɛ na azan nɛmu-nɛmu ɖe. E mɛ godo, e bo va lɔ le eɖe mɛ tun mɔ: “Ko ɔn nɔ vɔ Mawu, ko ko nɔ si ɛmɛ ɖe, 5 ganke xena e nyi tun okposi mɛ lo do hannu na-a nɔ, ko na gbo ɛhwɛ jijɔ ni-i. Na e ɔn nyi mɔsinha, e na do hannu na-a nɔ gbɔɔn agbɔ ba va kpe-o seŋu.”» 6 Yesu bo mɔ yi e ji tun mɔ: «Mi se oxo xena ɛhwɛɖɔtɔ nyanyla mɛ lɔ! 7 Fifi ɖe, Mawu ɔn na gbo ɛhwɛ jijɔ na ɛmɛ cincan etɔnye, xeye ni nɔ do axwa nɔ, bo nɔ do byɔ-ɛ alɔgɔ le oklo kpodo ozan kpo nɔ wɛɛ? E ɔn yawu kpɔn ye kɔn nɔ wɛɛ? 8 Ko lo lɔ na mi nɔ tun mɔ, bleŋu wɛ e na gbo ɛhwɛ jijɔ na ye. Vɔ ɖe, hwexenu na Ɛgbɛtɔ we Ovi la na va, e na kpɔn xɔsetɔye le nyixɔ la ji?»Yesu do olo do Falizitɔ kpodo takwɛjɔtɔ wu
9 E mɔ do olo xe na ɛmɛ xeye ni nɔ yɔ yeɖe tun ɛmɛ jijwɛye a bo dovɔn ɛmɛ gbokpweye nɔ ye. 10 «Ɛmɛ owe yi Mawu we oxwegbe a do va yi xo ɛɖɛ. Ɛmɛ ɖokpo nyi Falizitɔ, ɛmɛ owegɔ la bo nyi takwɛjɔtɔ. 11 Falizitɔ la, bo nɔ ote, bo xo ɛɖɛ le oji etɔn mɛ nɔ tun mɔ: “O! Mawu, ko do ɛkpɛ na we, ɖo, ko ɔn le ɖi ɛmɛ gbokpweye ha, ye nyi fyanfinnɔye, onu nyanylawatɔye kpodo afɔ do ogbe tɔye; ɛkpɛ na we, ɖo, ko ɔn le ɖi takwɛjɔtɔ mɛ ha can. 12 Ko nɔ bla onu zɔn owe le kwɛsiɖa la mɛ, ko bo nɔ na ale xena ko nɔ ɖu zɛtɛye we maɖowo.” 13 Takwɛjwɛtɔ la bo jɛ ovo daan, e ko jlo tun he a kɔ ŋukunsin a do kpɔn jiŋukunsin can, vɔ, e bo xo alɔ akɔn nu nɔa, bo lɔ nɔ tun mɔ: “Awo! Mawu, kpɔn dɔŋuɖunu na-a, mɔ xeni nyi onu nyanylawatɔ.” 14 Ko lo lɔ na mi nɔ tun mɔ: Mawu yi takwɛjɔtɔ la ɖi ɛmɛ jijwɛ ha, e bo sɔn yi oxwe etɔn gbe. Vɔ, Falizitɔ la tɔn ɔn nyi mɔsinha. Ɖo, ɛmɛ ɖekpekpe xeni na kɔ eɖe do yi oji, ye na zin-i do odo, vɔ, ɛmɛ ɖekpekpe xeni na hwe eɖe, ye na kɔ-ɛ do yi oji.»
Yesu lɔ oxo do vikpɛye wu
15 Ɛmɛye bo hɛn vifɛye can va na Yesu nɔ, e ba do ɖo alɔ ye ji. Xena onukplanvi etɔnye kpɔn ɖo mɔsinha, ye gbɛ na ɛmɛ laye nɔ. 16 Vɔ, Yesu bo na ogbe, ye bo kɔ vifɛ laye do va e kɔn, e bo lɔ tun mɔ: «Mi jo vikpɛye do na ye a va kɔn ye, mi bo ká mɔ tu omɔ na ye o, ɖo, Mawu we Xɔluɖuɖu la nyi ɛmɛ xeye ni le ɖi vikpɛye ha tɔn. 17 Le oxojɔxo mɛ, ko lo lɔ na mi nɔ, na ɛmɛ ɖe ɔn yi Mawu we Xɔluɖuɖu la ɖi lena vikpɛvi na yi-i ɖo ha, e ɔn kpewu ɖyɛ e mɛ nɔ.»
Dɔkunnɔ ɖe va kan oxo Yesu se sɔn Ɛgbɛ mavɔmavɔ wu
18 Jwifuye we oga ɖe bo kan Yesu se tun mɔ: «Onukplan-ɛmɛtɔ nywɛ, ɛlɛ ko na wa a do kpɔn Ɛgbɛ Mavɔmavɔ?» 19 Yesu bo lɔ ni-i tun mɔ: «Ɛlɛ jɔ o do yɔ-ɔ tun ɛmɛ nywɛ? Ɛmɛ ti ɔn nyi ɛmɛ nywɛ zɛgbɔn Mawu ɖokpo gee wu. 20 O nyɔ osɛn laye: ká do afɔ ogbe; ká hu ɛmɛ; ká fin ɛfin; ká ɖe kunu nyanyla do ɛmɛ ɖe wu; bu didawe kpodo nawe kpo.» 21 Dahwe la bo lɔ tun mɔ: «Sɔn hwanjavi mɛ tɛye gbɔɔn wɛ ko o nɔ zɔn do osɛn mɛ la zɛtɛye ji le.» 22 Xena Yesu ɖo oto-e vɔ, e lɔ ni-i tun mɔ: «Onu ɖokpo mɔ hwe do we: sa onu xena o ɖo zɛtɛye, o ba ma oho la na ayanɔye, o ba do ɖo dɔkun le jiŋukunsin. E mɛ godo, o ba va, a bo kplɔ-ɔ do.» 23 Xena dahwe la se oxo mɛ la, e ci onulilo mɛ, ɖo dɔkunnɔ ɖaxo ɖe wɛ e nyi. 24 Xena Yesu kpɔn ɖo mɔsinha, e lɔ tun mɔ: «E na syɛnxu na ɛmɛ xeye ni ɖo dɔkunye, na do ɖyɛ Mawu we Xɔluɖuɖu mɛ! 25 Ɖo, cinwib we otro mɛ gbingbɔn na fa na osɔkpotɔnɔ sɔ hugan tun dɔkunnɔ a ɖyɛ Mawu we Xɔluɖuɖu la mɛ.» 26 Ɛmɛ xeye ni lo ɖo oto-e nɔ ye bo lɔ tun mɔ: «Vɔ ɖe, onu lɛ na kpɔn hwlɛngan?» 27 Yesu bo ɖo e wu tun mɔ: «Onu xena ɛgbɛtɔye ɔn kpewu, Mawu nɔ kpewu.» 28 Piyɛ bo lɔ tun mɔ: «Kpɔn, míye, mí jo onu xena mí ɖo zɛtɛye do, bo kplɔ we do.» 29 Yesu ɖo e wu na ye tun mɔ: «Le oxojɔxo mɛ, ko lo lɔ na mi nɔ, na ɛmɛ ɖe jo oxwe do, bo jo osyɛ, nɔvyɛye, ɛmɛ etɔnye alo vikpɛye do, do Mawu we Xɔluɖuɖu la wu, 30 Mawu na ni-i onu xeye na e jo do laye we donu nɛmu ɖe le ɛgbɛ xe mɛ, a bo mɔ ni-i Ɛgbɛ Mavɔmavɔ le ɛgbɛ xeni gbɔn nɔ mɛ.»
Yesu mɔ lɔ oxo sɔn oku etɔn wu
31 Yesu yɔ onukplanvi weve laye do aha, bo lɔ na ye tun mɔ: «Mi kpɔn, mí lo sɔn yi Jeluzalɛmu nɔ, mi wɛ, onu ɖekpekpe xena oxolɔɖonyitɔye wlan do Ɛgbɛtɔ we Ovi la wu, e na jɔ. 32 Ɖo, ye na sɔ-ɛ sɔ jo na ɛmɛ xeye ni ɔn nyi Jwifuye. Ye na ko-e, a bo do aya ni-i, a bo tun otan do e wu. 33 Ye na do oxa ni-i, a bo hu-i, onyihinhɔn atɔngɔ gbe, e bo na fɔn sɔn oku.» 34 Vɔ, onukplanvi laye ɔn se onu ti gɔnmɛ, oxo la we gɔnmɛsise bɛ do ye, ye ko nyɔ oxo xena Yesu lo lɔ nɔ.
Yesu gɔ adɔn na ŋuvanɔ ɖe le Jeliko we toxo mɛ
35 Xena Yesu lo tɛkpɔ Jeliko we toxo mɛ nɔ, ŋuvanɔ ɖe xlɔn onyi le omɔto bo lo byɔ onu nɔ. 36 Xena ŋuvanɔ la se lena ɛmɛ susuye va yi nɔ ɖo, e kan se tun mɔ: «Ɛlɛ lo jɔ nɔ?» 37 Ye bo lɔ ni-i tun mɔ: «Yesu Nazalɛtitɔn wɛ va yi nɔ.» 38 E do axwa, bo tun mɔ: «Yesu, Davidi vyɛ, kpɔn dɔŋuɖunu na-a!» 39 Ɛmɛ xeye ni zɔn le ŋukɔn nɔ ye, bo do axwa ni-i nɔ, e ba do bɔ onu, vɔ, e bo mɔ do axwa do e ji taŋu, bo tun mɔ: «Davidi vyɛ, kpɔn dɔŋuɖunu na-a!» 40 Yesu bo tre, bo ɖe ogbe tun ye boo kplɔ-ɛ va na he, xena ye kplɔ-ɛ va vɔ, Yesu bo kan-ɛ se tun mɔ: 41 «Ɛlɛ o jlo na ma wasi na we?» E bo ɖo e wu ni-i tun mɔ: «Xwetɔ, na na ma mɔ kpɔn onu!» 42 Mi wɛ Yesu lɔ ni-i tun mɔ: «Mɔ kpɔn onu; do xɔse tɔwe wu, o kpɔn hwlɛngan.» 43 Le e tɛnxo zɔnɖokpo, ŋukunsin hun ni-i, e bo kplɔ Yesu do, bo kanfu Mawu nɔ. Xena otogun la zɛtɛye kpɔn ɖo mɔsinha, ye bo kanfu Mawu nɔ.