Zace kpɔn hwlɛngan
19
1 Yesu ɖyɛ Jeliko, bo gbɔn toxo la mɛ va yi nɔ. 2 Dahwe ɖe le toxo la mɛ, ye bo nɔ yɔ-ɛ tun Zace. Dahwe mɛ la wɛ nyi oga na takwɛjɔtɔye, e bo nyi dɔkunnɔ. 3 E jlo na kpɔn ɛmɛ xeni nyi Yesu la. Vɔ, e ɔn kpewu bo kpɔn-ɛ nɔ, ɖo ɛgbɛtɔ susu wɛ le ɛtɛ na Yesu, emyɔ bo mɔ kpokpo. 4 Mi wɛ e do odun jɛ ŋukɔn, bo va yi xɛ otin ɖe ji, a do kpewu kpɔn Yesu la, ɖo blɛ wɛ e na gbɔn a do va yi. 5 Xena Yesu jɛ ofi xena Zace le la, e ɖe okɔ kpɔn jigbe, bo lɔ ni-i tun mɔ: «Zace, jɛ ote bleŋu, ɖo ko ɖo na nɔ oxwe tɔwe gbe le egbe.» 6 Mi wɛ Zace jɛ ote bleŋu, bo yi Yesu kpodo jijwɛ kpo. 7 Xena ɛmɛye kpɔn ɖo mɔsinha, ye jɛ oxo etɔn lilɔ ji, bo tun mɔ: «Mi kpɔn, onu nyanylawatɔ we oxwegbe wɛ e va yi zɛ!»8 Zace va nɔ ote le ŋumɛ na Xwetɔ la bo lɔ ni-i tun mɔ: «Xwetɔ, kpɔn, ko na ma dɔkun tɛyee ɖo owe, a bo sɔ akpa ɖokpo na ayanɔye, ɛmɛ xeye na ko tafu ye, ko na sɔ oho na ko yi le ye si we donu ɛnɛ, a do tu axɔ na ye.» 9 Mi wɛ Yesu lɔ ni-i tun mɔ: «Le egbe, ɛmɛ xeye ni le oxwe xe gbe ye, ye kpɔn hwlɛngan, ɖo myɔ can Ablaxamu we jijimɛ vi wɛ o nyi. 10 Ɖo Ɛgbɛtɔ we Ovi la va, na do kan ɛmɛ xeye ni bu ye, a bo hwlɛn ye gan.»
Yesu do olo do dahwe ɖe xena ye ka sɔ do ɖo xɔlu nɔ wu
11 Xena ɛmɛye lo se oxo mɛ laye nɔ, Yesu mɔ do olo ɖe na ye, ɖo e tɛkpɔ Jeluzalɛmu we toxo la mɛ nɔ, ɛmɛye bo bu-i nɔ tun fifi trololo wɛ Mawu na sɔ Xɔluɖuɖu etɔn la sɔ ɖe xlɛ ha. 12 Mi wɛ, e lɔ na ye tun mɔ: «Dahwe ɖe tɔn sɔn xɔluye we xwedo mɛ. Mi wɛ gbeɖokpo, e yi oto dindyɔn ɖe mɛ, na ye a va yi sɔ-ɛ do ɖo xɔlu, e mɛ godo, e ba trɔ gbɔn va oto etɔn mɛ. 13 Keŋu gbɔxwe e na sɔn, e yɔ odansɔvi etɔn owo, bo sɔ sikaho ɖokpo-ɖokpo na ye, bo lɔ na ye tun ye boo do do ajɔ gbɔɔn do jɛ hwexenu na he bo na lɛkɔ. 14 Vɔ, oto etɔn mɛ tɔye, bo gbɛ owan ni-i taŋu. Mi wɛ, ye sɔ afɔsɔɖotetɔ yetɔnye ɖodan, na ye a do va yi lɔ na ɛmɛ xeni ka ɖo-e xɔlu nɔ la tun mɔ: “Mí ɔn jlo ni a ɖu xɔlu do mía nu.” 15 Ganke ye bo ɖo-e xɔlu. Xena e gbɔn, e yɔ odansɔvi etɔn xeye na e ma sikaho na laye, ni a do kpɔn ale xena ye ɖu. 16 Ɛmɛ tantyantɔn la va, bo tun mɔ: “Xwetɔ, sikaho owo wɛ ko ɖu do ɖokpo la ji.” 17 E bo ɖo e wu ni-i tun mɔ: “E nyɔhwyan, odansɔvi nywɛ wɛ o nyi. Xena o kpewu nɔ ogbeji le onu ovi mɛ, ko sɔ we ɖo oga do toxo owo nu.” 18 Ɛmɛ owegɔ va, bo lɔ tun mɔ: “Xwetɔ, sikaho atun wɛ ko ɖu do ɖokpo la ji.” 19 E mɔ lɔ ni-i tun mɔ: “Myɔ can, ko sɔ we ɖo oga do toxo atun nu.” 20 Odansɔvi bu mɔ va, bo tun mɔ: “Xwetɔ, sikaho tɔwe xɛn, ko butu-i do avɔ mɛ, bo sɔ hwla ɖo onyi na we. 21 Ko vɔ na we nɔ, ɖo ɛhun nylatɔ wɛ o nyi, onu xena o ɔn sɔ ɖo ofi ɖe, wɛ o nɔ va yi sɔ, ɛjinukun xena o ɔn xwa, wɛ o nɔ va yi ɖe.” 22 Xwetɔ la bo ɖo e wu ni-i tun mɔ: “Odansɔvi nyanyla wɛ o nyi, oxo xena myɔ ŋutɔ o lɔ, wɛ ko na do ɖɔ ɛhwɛ na we. O nyɔ-ɛ saa tun ko bo nɔ nyla ɛhun, onu xena ko bo ɔn ɖo do ofi ɖe, bɛ ko bo nɔ va yi sɔ, ɛjinukun xena ko bo ɔn xwa, bɛ ko bo nɔ va yi ɖe. 23 Fifi ɖe, ɛlɛ dɔn na o ɔn do sɔ oho tɛye sɔ ɖo ohoɖoxwe, na ko gbɔn vɔ, ko ba va yi-i kpodo ohojivi kpo?” 24 E bo lɔ na ɛmɛ xeye ni le ofi laye tun mɔ: “Mi yi oho la le e si, a bo sɔ na ɛmɛ xeni ɖo sikaho owo la.” 25 Ye bo ɖo e wu ni-i tun mɔ: “Xwetɔ, sikaho la, owo wɛ o le emyɔ si mɔ!” 26 Xwetɔ la bo ɖo e wu na ye tun mɔ: “Ɛmɛ xe si na onu le, ye na mɔ ni-i do e ji, vɔ, ɛmɛ xe si na onu ɔn le, ye na mɔ yi ovii xeni le e si la.”
27 Xeni nyi kɛntɔ tɛyeetɔn, yee, ɛmɛ xeye ni ɔn jlo tun ma ɖu xɔlu do ye nu saa ye, mi kplɔ ye va bwɛ, a bo gbo ohlo na ye, le ŋumɛ na-a.»
Ɛmɛye do bubu Yesu wu
28 Xena Yesu lɔ oxo mɛ la vɔ, e jɛ ŋukɔn na otogun la, a do sɔn yi Jeluzalɛmu we toxo mɛ. 29 Hwexenu na e tɛkpɔ Bɛtifaje kpodo Betani kpo nɔ, le aha na okpó xe ji na olivutinye le, e dɔn onukplanvi etɔn owe ɖodan 30 bo lɔ tun mɔ: «Mi yi otota xeni le ŋukɔn daan mɛ la mɛ. Na mi ɖyɛ otota la mɛ, mi na kpɔn osɔkɛtɛvi ɖe, xe ji na ɛmɛ ti ɔn xɛ kpɔn. Mi tun-i, a bo sɔ-ɛ va. 31 Na ɛmɛ ɖe kan mi se tun ɛlɛ dɔn mi do tun-i nɔ, mi lɔ ni-i tun mɔ: “Xwetɔ la ɖo ohyan etɔn.”»
32 Ɛmɛ xeye na e dɔn ɖodan laye yi, bo kpɔn onu laye pɛpɛpɛ ɖi lena Yesu lɔ na ye ɖo ha. 33 Xena ye tun osɔkɛtɛvi la nɔ, ɛmɛ xeye tɔn ni nyi laye, bo kan ye se tun mɔ: «Ɛlɛ dɔn mi do tun osɔkɛtɛvi la nɔ?» 34 Ye bo ɖo e wu tun mɔ: «Xwetɔ la ɖo ohyan etɔn.» 35 Ye hɛn osɔkɛtɛvi la va na Yesu, xena ye fɔ awu yetɔnye ɖo e ji vɔ, ye sɔ Yesu ɖo e ji. 36 Xena Yesu lo sɔn nɔ, ɛmɛye lo tɛ awu yetɔnye do omɔ la ji nɔ. 37 Le hwexenu na Yesu tɛkpɔ Jeluzalɛmu we toxo la nɔ, bo jɛ ote nɔ sɔn okpó xe ji na olivutinye le, onukplanvi susu gbagbagba kpɔn jijwɛ ɖaxo ɖe, ye bo jɛ Mawu kinkanfu ji, kpodo axwa kpo, do ŋudandonu xeye na ye kpɔn ye wu. 38 Ye bo lɔ nɔ tun mɔ: «Mawu ni do na xɔlu xeni gbɔn nɔ le Xwetɔ la we nyikɔ mɛ! Fifa le jiŋukunsin, gigo na Mawu le jigbe!»
39 Falizitɔ ɖeye le otogun la mɛ, bo lɔ na Yesu tun mɔ: «Onukplan-ɛmɛtɔ, ɖe ogbe tɔ onukplanvi tɔweye na ye a bɔ onu.» 40 Yesu ɖo e wu tun mɔ: «Ko lo lɔ na mi nɔ: na ye mɔ do bɔ onu can, ɛkpɛnye na do axwa.»
Yesu fan avin do ota na Jeluzalɛmutɔye
41 Hwexenu na Yesu tɛkpɔ Jeluzalɛmu we toxo la, bo kpɔn-ɛ ɖodan nɔ, e fan avin do ota ni-i. 42 E bo lɔ tun mɔ: «Awo! Jeluzalɛmutɔye, e do nyi tun miye can o do nyɔ lena mi na hɛn ɖo, a do kpɔn fifa le egbe wɛɛ! Vɔ, o o! Mi xɛn ye sɔ hwla do ŋukunsin miatɔnye. 43 Ɖo azan ɖeye gbɔn nɔ, kɛntɔ miatɔnye na do oglikpa lɛdo mi, ye na trɔ do toxo la, bo na jan mi gbɔn ofi zɛtɛye, 44 ye na crɔn miye kpodo toxo la kpo sesese, ye ko jo ɛkpɛn ɖe do ɖe ji nɔ, ɖo mi ɔn do josi hwexenu na Mawu va bo na do kpedo mia wu.»
Yesu nya onusatɔye le Mawu we oxwegbe
45 Yesu ɖyɛ Mawu we oxwe la gbe, bo jɛ ɛmɛ xeye ni sa onu nɔ ye, nyinya ji. 46 E bo lɔ na ye nɔ tun mɔ: «Mawu we oxo lɔ tun mɔ: “Oxwe tɛye gbe, ɛɖɛxoxwe wɛ e na nyi, vɔ, miye bo va sɔ do wasi jagudaye we okplityɔna.”»