Ɛmɛye va kan oxo Yesu se do ɛcɛ etɔn wu
20
1 Gbeɖokpo, hwexenu na Yesu lo kplan onu otogun la nɔ le Mawu we oxwegbe bo do jla Ɛwɛn Nywɛ la nɔ, ovɔsantɔ ɖaxo Mawutɔnye, osɛnkplan-ɛmɛtɔye kpodo otomɛhyɔnye, tɛkpɔ-ɛ. 2 Ye bo kan-ɛ se tun mɔ: «Ɛcɛ ŋukɔ lɛ o nɔ do wasi onu mɛ ye alo onu lɛ na we ɛcɛ mɛ la? Lɔ-ɛ na mí.» 3 E bo ɖo e wu na ye tun mɔ: «Mɔ can, ko na kan oxo ɖokpo mi se, na mi a ɖo e wu na-a. 4 Onu lɛ dɔn Jan ɖo dan tun ni boo va yi lɛ Mawu we ɛsin na ɛmɛye? Mawu wɛ loo alo ɛgbɛtɔye?» 5 Vɔ, ye bo jɛ lilɔ ji na yenɔniɔye tun mɔ: «Na mí lɔ tun Mawu wɛ, e na kan mí se tun mɔ ɛlɛ jɔ na mí ɔn do kan do e ji jaa? 6 Na mí mɔ lɔ tun ɛgbɛtɔye wɛ, otogun la seŋu na tɔ ɛkpɛn mí a bo do hu mí, ɖo, ye kan do e ji tun Jan bo nyi oxolɔɖonyitɔ Mawutɔn.» 7 Mi wɛ dɔn, ye ɖo e wu na Yesu tun mɔ: «Mí ɔn nyɔ ɛmɛ xeni ɖo-e ɖodan!» 8 Yesu bo tun mɔ: «Mɔ can, ko ɔn lɔ ɛmɛ xeni na-a ɛcɛ, na ko do wasi onu mɛ laye na mi nɔ.»Yesu do olo do oglelɛtɔ danuwatɔye wu
9 E mɛ godo, Yesu do olo xe na otogun la: «Dahwe ɖe, do vɛntinye do ogle etɔn mɛ, bo sɔ na kpama na oglelɛtɔ ɖeye. E bo sɔn yi omɔ ji na azan susu. 10 Xena sinsyɛn laye we gbingbɛn we ganmɛ va su, e dɔn odansɔvi ɖe ɖodan oglelɛtɔ laye kɔn, na ye a do ni-i sinsyɛn xeye ni nyi axɔtu etɔn. Oglelɛtɔ laye, xo odansɔvi la, bo nya-ɛ alɔ toto. 11 E mɔ dɔn odansɔvi bu ɖodan, ye mɔ xo-e, bo zun-i, bo nya-ɛ alɔ toto. 12 E mɔ dɔn odansɔvi atɔngɔ ɖodan. Oglelɛtɔ laye do afɔku-i, bo dɔn-ɛ tɔn le ogle la mɛ. 13 Vɛngletɔ la bo lɔ tun mɔ: “Naɖe ko na hɛn ɖo? Ko na dɔn ovi tɛye xena ko yi owan na taŋu ɖodan, tanyɔ, ye na ɖo sisi ni-i.” 14 Vɔ, xena oglelɛtɔ laye kpɔn-ɛ, ye lɔ na yenɔniɔye tun mɔ: “Ɛɛn hɛɛn! Ovi xeni ka va sɔ cinɔ la nɔ mɛ, mí a hu-i, cinɔ la ba do nyi míatɔn.” 15 Ye dɔn-ɛ tɔn le ogle la mɛ, bo hu-i.»
Yesu bo kan ye se tun mɔ: «Fifi ɖe, ɛlɛ vɛngletɔ la na wa na ye? 16 E na va, a bo hu oglelɛtɔ laye seŋu, a bo sɔ ogle la sɔ na kpama na ɛmɛ buye.»
Xena ye se oxo mɛ la, ye bo lɔ tun mɔ: «Ni ká jɔ kpɔn gbeɖe!» 17 Vɔ, Yesu kɔ ŋukunsin, bo kpɔn ye, bo lɔ na ye tun mɔ: «Mawu we oxo la lɔ tun mɔ:
“Ɛkpɛn xena oxɔwatɔye gbɛ,
Mi wɛ va trɔ zun azwe ji we ɛkpɛn.”
Oxo mɛ la we gɔnmɛ ɖe?
18 Ɛmɛ ɖekpekpe xeni na flɛ jɛ ɛkpɛn mɛ la ji, ɛmɛ la na kankan, mi wɛ ɛmɛ xe ji na ɛkpɛn mɛ la na flɛ jɛ, ɛkpɛn la li-i kpɔɖɔ-kpɔɖɔ.»
Ye sɔ takwɛ we oxo do ɖo omɔ na Yesu
19 Osɛnkplan-ɛmɛtɔye kpodo Mawu we ovɔsantɔ ɖaxoye bo kpɔn onu jɛ e wu tun heye bɛ Yesu bo do olo mɛ la na, ye bo kan nɔ na wle-e le oganxixo mɛ la mɛ, vɔ, ye bo vɔ otogun la. 20 Ye bo jɛ Yesu cicɔ ji. Mi wɛ, ye dɔn ɛmɛye ɖodan ye ba nɔ do cɔ-ɛ le ɛyɛmɛ. Ɛmɛ mɛ laye ba wa onu nɔ ɖi ɛmɛ xeye ni ɔn le ayi nyanyla ɖe ji ha, a bo do kpɔn ofɛn ɖe le oxo etɔn mɛ. Do e mɛ la wu, ye ba do sɔ-ɛ sɔ do alɔ mɛ na otokplɔtɔ xeni ɖo ɛcɛ a do ɖɔ ɛhwɛ. 21 Ɛmɛ mɛ laye bo kan oxo-e se tun mɔ: «Onukplan-ɛmɛtɔ, mí nyɔ-ɛ tun o nɔ lɔ oxo a bo kplan onu ɛmɛ do omɔ jijwɛ ji, o ɔn nɔ nɔ ɛmɛ ɖe ji, vɔ, o nɔ kplan onu ɛmɛ do Mawu we omɔ la wu le oxojɔxo mɛ. 22 Osɛn míatɔn ɖe omɔ na mí tun míye bo tu takwɛ na Seza+ \fr 20:22 \ft Le hwemɛnu, ye nɔ sɔ nyikɔ na xɔlu ɖaxo Hlɔmatɔnye tun Seza.?» 23 Xena Yesu kpɔn tun omɔ ɖiɖo we oxo bɛ, e lɔ na ye tun mɔ: 24 «Mi sɔ ohogan ɖe sɔ xlɛ-ɔ. Oyɛ kpodo nyikɔ onutɔn lɛ le e ji?» Ye bo ɖo e wu tun mɔ: «Sezatɔn wɛ.» 25 Mi wɛ Yesu lɔ na ye tun mɔ: «Mi sɔ onu xeni nyi Sezatɔn a sɔ na Seza, a bo sɔ onu xeni nyi Mawutɔn a sɔ na Mawu.» 26 Le otogun la we ŋukɔn, ye ɔn kpewu kpɔn ofɛn ɖe le oxo etɔn mɛ, vɔ, oxo ɖo oxo wu etɔn kpaca ye, ye bo gbɔjwɛ bɔ onu.
Sadusitɔ ɖeye va kan oxo Yesu se do finfɔn sɔn oku wu
27 Sadusitɔye nɔ lɔ nɔ tun finfɔn sɔn oku bo ɔn le. Ye ɛmɛ ɖeye va tɛkpɔ Yesu bo kan-ɛ oxo xe se: 28 «Onukplan-ɛmɛtɔ, Osɛn xena Mɔyizi wlan na mí xɛn: “Na ɛmɛ ɖe ɖo nyɔnu, e ko ji ovi ti, bo ku, vɔ, nɔvyɛ ŋusunglo xeni jɔ do ɛtɛ ni-i bo le, nɔvyɛ la na sɔ nyɔnu la sɔ ɖe a bo do ji ovi na ɛmɛ xeni ku la.” 29 Fifi, nɔvi ŋusunglo acowe ɖeye nɔ onyi kpɔn. Tantyantɔn ɖe nyɔnu, bo ku ovi ma ji. 30 Nɔvyɛ ŋusunglo owegɔ va sɔ nyɔnu la do sɔ okpo, 31 ɛmɛ atɔngɔ can bo va sɔ do sɔ okpo, mɔsinha wɛ ye ɛmɛ acowe laye seŋu ɖe nyɔnu la, ɖe kplɔ ɖe do, bo ku ovi ma ji. 32 E mɛ godo nyɔnu mɛ la can va ku. 33 Le finfɔn sɔn oku hwenu ɖe, onutɔn lɛ na nyi nyɔnu la, le ye mɛ? Ɖo, ye ɛmɛ acowe laye, ɖe-e bo do ɖo nyɔnu.» 34 Yesu bo ɖo e wu na ye tun mɔ: «Ɛgbɛ xe mɛ we ɛmɛye, nɔ ɖe nyɔnu, a bo ɖe osu. 35 Vɔ, ɛmɛ xeye na Mawu kpɔn tun ye bo jɛ a do fɔn sɔn oku a bo do ɖo mima le ɛgbɛ xeni gbɔn nɔ mɛ, ye ɔn ɖe osu gbɔɔn do ɖe nyɔnu nɔ. 36 Ye ɔn mɔ kpewu ku nɔ can, ɖo, ye na le ɖi Mawu we ɛwɛndotɔye ha. Ye bo nyi Mawu vikpɛye, ɖo, ye fɔn sɔn oku. 37 Ɛmɛ kukuye nɔ fɔn sɔn oku, onu mɛ la wɛ Mɔyizi ɖe sɔ xlɛ le winwlan xe mɛ na e lɔ oxo do klilili xeni le ozo mɛ vɔ e ko bi nɔ la wu, bo do yɔ Xwetɔ la tun, Mawu Ablaxamutɔn, Mawu Izakitɔn kpodo Mawu Jakɔbutɔn. 38 Mawu ɔn nyi ɛmɛ kukuye we Mawu, ɛmɛ le ɛgbɛye we Mawu wɛ e nyi, ɖo, ye le ɛgbɛ seŋu na Mawu.» 39 Osɛnkplan-ɛmɛtɔ ɖeye bo lɔ na Yesu tun mɔ: «Onukplan-ɛmɛtɔ, o lɔ-ɛ nywɛɖe.» 40 Ye ko mɔ xa kan-ɛ oxo ɖe se.
Yesu lɔ oxo do nyikɔ Davidi vyɛ xena ye nɔ yɔ ni-i wu
41 Yesu lɔ na ye tun mɔ: «Naɖe lɛ e nyi ɖo na ɛmɛye nɔ do lɔ nɔ tun Davidi vyɛ kpoŋu jan bɛ Klisu la bo nyi? 42 Davidi ŋutɔ lɔ le Ohan jiji we wema mɛ tun mɔ:
“Mawu Xwetɔ la lɔ na Xwetɔ tɛye tun:
Xlɔn onyi le aɖusi mɛ na-a,
43 Gbɔɔn do yi hwexenu na ko na sɔ kɛntɔ tɔweye
Do wasi afɔɖo-ejinu tɔwe.”
44 Davidi la mɛ yɔ-ɛ nɔ tun Xwetɔ; naɖe e wa do nyi ovyɛ vɔvɔ?»
Yesu ɖo afɔ afɔji na onukplanvi etɔnye do osɛnkplan-ɛmɛtɔye wu
45 Hwexenu na otogun la zɛtɛye lo ɖo oto Yesu nɔ, e lɔ na onukplanvi etɔnye tun mɔ: 46 «Mi cɔ miaɖe do osɛnkplan-ɛmɛtɔye wu, ojlo yetɔn wɛ nɔ nyi tun, ye a ɖi osa nɔ kpodo awu gaga gblɛlɛlɛ le okɔ; ɛmɛye a do ogbe na ye kpodo sisi kpo le dogbaye ji wɛ ye nɔ yi owan na, ye bo mɔ nɔ yi owan na okpo tantyantɔnye ji ninɔ le okplityɔn yetɔnye kpodo agɔɖutyɔnye. 47 Ye nɔ kɛ axwe do onu xena okposiye ɖo ye seŋu ji, ganke, ye ba nɔ xo ɛɖɛ nɔ na oganxixo susu, na ɛmɛye a do kpɔn tun ye bo nyi ɛmɛ nywɛ. Oto xena Mawu na dɔn na ye, e na syɛnxu taŋu.»