3 Mi wɛ Satana ɖyɛ Yuda xena ye sɔ nyikɔ na tun Isikalyɔtu mɛ. Yuda la bo nyi ɛmɛ ɖokpo le Yesu we onukplanvi weve laye mɛ. 4 E bo va yi ɖo ogbekpɔ kpodo Mawu we ovɔsantɔ ɖaxoye kpodo Mawu we oxwegbe cɔtɔye we ogaye, do lena e na sɔ Yesu la sɔ sa na ye ɖo wu. 5 E bo vivi na ye taŋu, ye bo fyan ajɔgbe tun heye bo na bo tu oho ni-i. 6 Yuda bo yi ogbe, bo lo kan omɔ nɔ, a do sɔ Yesu la sɔ do alɔ mɛ na ye le hwexenu na otogun la ɔn le.

7 Xena ye lo ɖu kpɔnnɔ ma ɖo tinkɛn we oxwe la nɔ, azan va su, ye bo ɖo na hu lɛngbɔviye na Vivayi we oxwe we onuɖuɖu la. 8 Yesu bo dɔn Piyɛ kpodo Jan kpo ɖodan, bo lɔ na ye tun mɔ: «Mi va yi ɖa Vivayi we oxwe we onuɖuɖu la na mí a ɖu-i.» 9 Ye bo kan-ɛ se tun mɔ: «Bɔ lɛ o jlo tun mí a ɖa-ɛ le?» 10 Yesu bo lɔ na ye tun mɔ: «Mi kpɔn, hwexenu na mi na ɖyɛ toxo la mɛ nɔ, mi na kpe dahwe ɖe xeni hɛn ɛsinzɛn do ota. Mi kplɔ-ɛ do gbɔɔn a bo ɖyɛ oxwe xe gbe na e na ɖyɛ. 11 Mi wɛ mi na lɔ na ɛmɛ xeni kpa ɛcɛ na oxwe la tun mɔ: “Onukplan-ɛmɛtɔ la kan we se nɔ tun mɔ: ‘Bɔ lɛ oxɔ xe mɛ na ko na ɖu Vivayi we oxwe we onuɖuɖu la kpodo onukplanvi tɛyee le?’” 12 E bo na sɔ oxɔ ɖaxo ɖe sɔ xlɛ mi le sanŋu ji, ye bo o to onu xeni hyan zɛtɛye do e mɛ. Blɛ la wɛ mi na ɖa onuɖuɖu la le.» 13 Ye bo yi, bo kpɔn onu zɛtɛye ɖi lena Yesu lɔ na ye ɖo ha, ye bo ɖa Vivayi we oxwe we onuɖuɖu la.

14 Xena ogan la xo, Yesu yi tɛnxo, a do ɖu onu kpodo ɛmɛ dindɔn etɔnye. 15 E bo lɔ na ye tun mɔ: «E o jlo-o nɔ taŋu tun ma ɖu Vivayi we oxwe we onuɖuɖu xe la kpo mi, gbɔxwe a se vivɛ, 16 ɖo, ko lo lɔ na mi nɔ tun, ko ɔn mɔ ɖu-i nɔ kpɔn gbeɖe, gbɔɔn do yi hwexenu na onu xena oxwe la nyi na va cɛ sesese le Mawu we Xɔluɖuɖu mɛ.» 17 E bo sɔ kɔkpo xe mɛ na vɛn le, bo do ɛkpɛ na Mawu do e ji, bo lɔ tun mɔ: «Mi yi kɔkpo xe, a bo ma vɛn la le miaɖe mɛ. 18 Ɖo, ko lo lɔ na mi nɔ tun, ko ɔn mɔ nu vɛn ɖe nɔ gbɔɔn do yi hwexenu na Mawu we Xɔluɖuɖu la na va.» 19 E mɛ godo, e sɔ kpɔnnɔ, xena e do ɛkpɛ na Mawu do e ji vɔ, e ma-ɛ, bo sɔ na onukplanvi etɔnye, bo lɔ tun mɔ: «Kpɔnnɔ xe la, wɛ nyi agbaza tɛye xena ye sɔ na do ota na mi, mi nɔ wasi ɖo lesinha, a bo nɔ do ɖoŋudo wu ye.» 20 Mɔsinha ke, xena ye ɖu onu la vɔ, e sɔ kɔkpo xe mɛ na vɛn le la, bo lɔ tun mɔ: «Vɛn xe la wɛ nyi okancica yɔyɔ Mawutɔn dogbɔn ɛhun tɛye xena ye na kɔn do onyi do ota na mi la mɛ.»

21 «Vɔ, ɛmɛ xeni lo sa-a nɔ na kɛntɔ tɛyee, e yi tɛnxo le bwɛ bo lo ɖu onu kpo-o nɔ. 22 Oxojɔxo wɛ, Ɛgbɛtɔ we Ovi la na ku ɖi lena Mawu wasi tito etɔn ɖo ha, vɔ, babaa na ɛmɛ xe we alɔ mɛ na e a nyi sisa gbɔn!» 23 Mi wɛ onukplanvi laye jɛ yenɔniɔye kinkan se ji tun mɔ: «Onu lɛ ka do onu mɛ la sin le mía mɛ nɔ la?»

24 Onukplanvi laye bo jɛ onu dindɔn ji taŋu le yeɖe mɛ, a do nyɔ ɛmɛ xeni nyi ɛmɛ ɖaxo le ye mɛ. 25 Yesu bo lɔ na ye tun mɔ: «Xɔluye nɔ ɖe ogbe do otogun yetɔnye ji nɔ, mi wɛ, otokplɔtɔye nɔ jlo tun ɛmɛye a yɔ ye tun onywɛwatɔye. 26 Miyetɔn ni ká nyi ɖo mɔsinha. Vɔ, ɛmɛ xeni nyi ɛmɛ ɖaxo le mia mɛ, ni le ɖi ɛmɛ xeni nyi vikpɛvi le mia mɛ ha, ɛmɛ xeni nyi oga, ba le ɖi odansɔvi ha. 27 Ɖo, onu lɛ nyi ɛmɛ ɖaxo, ɛmɛ xeni yi tɛnxo bo do ɖu onu nɔ wɛɛ, alo ɛmɛ xeni lo ma onuɖuɖu nɔ wɛɛ? Ɛmɛ xeni yi tɛnxo bo do ɖu onu nɔ hɛn wɛɛ? Ganke, mɔ ko bo le mia mɛ ɖi odansɔvi ha. 28 Miye, mi nyi ɛmɛ xeye ni nɔ kɔn ye le vivɛsise tɛyee mɛ le ogan ɖekpekpe mɛ. 29 Mi wɛ dɔn ko na na miye can Xɔluɖuɖu ɖi lena didaye na-a ɖo ha, 30 na mi a do yi tɛnxo a bo ɖu, a bo nu kpo-o le Xɔluɖuɖu tɛye mɛ, mi bo na xlɔn onyi le xɔlu we okpoye ji a do ɖo kojo na Izrayɛli vikpɛye we akɔta weve laye.»

31 Yesu lɔ na Simɔ Piyɛ tun mɔ: «Simɔ, Simɔ, ɖo ayite! Satana byɔ ogbe, ye bo ni-i, ni a do ta mi ɖi lena ye nɔ ta ɛjinukun ɖo ha. 32 Vɔ, mɔ, ko xo ɛɖɛ na we, na xɔse tɔwe ko mɔ do bu nɔ. Myɔ, hwexenu na o na va trɔ va kɔn ye, do hɔnhlɔn nɔvweye.» 33 Piyɛ bo lɔ tun mɔ: «Xwetɔ, ko le ogbe sisɔ bo na do yi ogankpa mɛ, alo bo na do ku kpo we.» 34 Yesu bo lɔ ni-i tun mɔ: «Ko lo lɔ na we nɔ Piyɛ, goklo ɔn do atan nɔ egbe can, gbɔxwe o na lɔ zɔn atɔn kpetyo tun he bo ɔn nyɔ mɔ.»

35 Yesu bo mɔ kan ye se tun mɔ: «Xena ko sɔ mi ɖodan, oho ma hɛn, oglo kpodo afɔkpa ma hɛn, onu ɖe va yi hu do mi wɛɛ?» Ye bo ɖo e wu tun mɔ: «Onu ti.» 36 Yesu bo lɔ na ye tun mɔ: «Fifi, na ɛmɛ ɖe ɖo oho, ni sɔ-ɛ, na ɛmɛ ɖe ɖo oglo, ni sɔ-ɛ. Ɛmɛ xeni ɔn ɖo dɛnkpwe, ni sa onudido etɔn, a bo do va yi xɔ. 37 Ɖo, ko lɔ na mi nɔ tun mɔ: Onu xena ye wlan, e ɖo na jɔ do ji ye. Ye wlan tun mɔ: “Ye xlɛ-ɛ do onu nyanylawatɔye mɛ.” Do e mɛ la wu, onu xeni kan mɔ, e o ka jɔ nɔ.» 38 Onukplanvi laye bo tun mɔ: «Xwetɔ, dɛnkpwe owe xɛn.» E bo lɔ na ye tun mɔ: «E o kpe.»

39 Yesu tɔn, bo yi okpó xe ji na olivutinye le la, ɖi lena e o nɔ wasi ɖo ha. Onukplanvi etɔnye bo kplɔ-ɛ do. 40 Xena ye va yi jɛ blɛ la vɔ, e lɔ na ye tun mɔ: «Mi xo ɛɖɛ, na mi ko mɔ do jɛ onyi nɔ le hwexenu na tintɛnkpɔn na va.» 41 E mɛ godo, Yesu bo dun yi le ye wu viɖe, e bo jɛ klita, bo xo ɛɖɛ nɔ, 42 bo lɔ tun mɔ: «Otɔ, na o jlo, dɔn vivɛsise we kɔkpo mɛ la tɛ le wu ye. Ganke, ká wasi onu xena ko jlo, vɔ, wasi ojlo tɔwe.» 43 Mi wɛ ɛwɛndotɔ Mawutɔn ɖe sɔn jiŋukunsin, bo ze do ŋumɛ ni-i bo do do-e hɔnhlɔn. 44 Xena Yesu le onulilo mɛ taŋu, e mɔ yi do ɛɖɛ ji nɔ kpodo hɔnhlɔn kpo, ɛdɛn etɔn bo va le ɖi ɛhunkɔn ha, bo ja kɔn do nyigban ji nɔ.

45 Xena e xo ɛɖɛ vɔ, e site bo va yi onukplanvi etɔnye kɔn, e bo kpɔn ye le awlɔn mɛ, ɖo, ye le dɔŋuɖunu mɛ diin. 46 E bo lɔ na ye tun mɔ: «Ɛlɛ jɔ na mi do dɔ awlɔn nɔ? Mi site, a bo xo ɛɖɛ, na mi ko mɔ do jɛ onyi nɔ le hwexenu na tintɛnkpɔn na va.»

47 Hwexenu na Yesu mɔ gbɛ lo lɔ oxo nɔ, mi wɛ ɛmɛ susu ɖeye va tɔn, ɛmɛ xena ye nɔ yɔ tun Yuda, xeni nyi onukplanvi weve laye we ɖokpo, bo le ŋukɔn na ye. E bo tɛkpɔ Yesu bo na do kpla asi okɔ ni-i. 48 Yesu bo lɔ ni-i tun mɔ: «Yuda, Ɛgbɛtɔ we Ovi la wɛ o na kisi na a bo do sɔ-ɛ sɔ sa?» 49 Xena onukplanvi xeye ni le Yesu kɔn ye, kpɔn onu xeni ka jɔ nɔ la, ye lɔ tun mɔ: «Xwetɔ, mí a xu dɛnkpwe ye wɛɛ?» 50 Mi wɛ ɛmɛ ɖokpo xu dɛnkpwe ovɔsantɔ ɖaxo Mawutɔn we odansɔvi, bo kpa aɖusi mɛ we oto ni-i. 51 Vɔ, Yesu yi oxo bo lɔ tun mɔ: «E kpe.» E bo ɖo alɔ oto wu na ɛmɛ la, oto la bo trɔ va lena e le saa. 52 Yesu bo lɔ na Mawu we ovɔsantɔ ɖaxoye, Mawu we oxwegbe cɔtɔye we ogaye kpodo otomɛhyɔnye xeye ni va wiwle-e gbe laye, tun mɔ: «Jaguda wɛ mi ka va wle nɔ bo do hɛn dɛnkpweye kpodo okpoye kpo? 53 Ko le kpo mi tɛgbɛ le Mawu we oxwe la gbe, mi ko wle-o, vɔ, ogan miatɔn wɛ xo; Satana vuvlu mɛ danwatɔ we ogan wɛ.»

54 Xena ye wle Yesu vɔ, ye kplɔ-ɛ do yi Mawu we ovɔsantɔ ɖaxo we oxwegbe. Piyɛ bo le dindyɔnnu daan bo do kplɔ ye do nɔ. 55 Ye bo bɔ ozo do gaji le oxwe la gbe, ɛmɛye bo xlɔn onyi do okpɔ bo do xu ozo la nɔ. Piyɛ bo xlɔn onyi le ye mɛ. 56 Nyɔnuvi odansɔvi ɖe, bo kpɔn Piyɛ le onyi xixlɔn le ozo la we aha. E bo kpɔn-ɛ nɔ trulululu bo lɔ tun mɔ: «Dahwe mɛ can nɔ kplɔ Yesu do!» 57 Vɔ, Piyɛ bo mɔ́, bo lɔ tun mɔ: «Nahwe, ko ɔn nyɔ-ɛ.» 58 Zaanɖe, ɛmɛ bu mɔ kpɔn Piyɛ bo lɔ ni-i tun mɔ: «Myɔ can, o le onukplanvi etɔnye mɛ.» Piyɛ bo lɔ tun mɔ: «Dahwe, ko ɔn le ye mɛ.» 59 Oganxixo ɖokpo ha bo va yi, ɛmɛ bu bo mɔ zin oxo do e ji tun mɔ: «Ko kan do e ji taŋu tun, dahwe mɛ, nɔ kplɔ-ɛ do, ɖo Galiletɔ wɛ e nyi.» 60 Piyɛ bo ɖo e wu tun mɔ: «Dahwe, ko ɔn nyɔ oxo xena o lo lɔ nɔ.» Zɔnɖokpo kpoŋu, xena e mɔ gbɛ lɔ oxo nɔ, goklo bo do atan. 61 Xwetɔ la bo trɔ, bo kpɔn Piyɛ. Mi wɛ Piyɛ flin oxo xena Xwetɔ la o lɔ ni-i le saa. E lɔ ni-i saa tun mɔ: «Gbɔxwe na goklo na do atan le egbe, o na gbɛ-ɔ zɔn atɔn kpetyo.» 62 Piyɛ bo tɔn le oxwe la gbe, bo fan avin vivɛɖe.

63 Ɛmɛ xeye ni lo cɔ Yesu nɔ ye, lo ko-e nɔ, bo lo xo-e nɔ. 64 Ye nɔ cɔn onu ŋumɛ ni-i, a bo kan-ɛ se tun mɔ: «Xena e nyi tun Oxolɔɖonyitɔ wɛ o nyi, lɔ ɛmɛ ni xo we na mí» 65 Ye bo lɔ oxo nyanyla susu buye ni-i bo do zun-i.

66 Xena ŋukɔn ɖe, otomɛhyɔnye, Mawu we ovɔsantɔ ɖaxoye kpodo osɛnkplan-ɛmɛtɔye, va kpli, ye bo kplɔ Yesu do va ɛhwɛɖɔtɔ ɖaxoye we ŋukɔn. 67 Ye bo kan-ɛ se tun mɔ: «Myɔ wɛ nyi Klisu la? Lɔ na mí.» E bo lɔ na ye tun mɔ: «Na ko mɔ do lɔ na mi can, mi ɔn kan do e ji nɔ gbeɖe, 68 na ko mɔ kan oxo mi se can, mi ɔn ɖo e wu na nɔ gbeɖe. 69 Bɛ sɔn fifi, Ɛgbɛtɔ we Ovi la na xlɔn onyi le aɖusi mɛ na Mawu hɔnhlɔn zɛtɛyetɔ.» 70 Ye ɛmɛ zɛtɛye bo lɔ ni-i tun mɔ: «Be myɔ, wɛ nyi Mawuvyɛ la?» E bo lɔ na ye tun mɔ: «Mi mɛ mi lo lɔ nɔ, mi wɛ ko nyi.» 71 Mi wɛ ye lɔ tun mɔ: «Mí mɔ hyan kunu ɖiɖe ɖe wɛɛ? Míye ŋutɔ wɛ se, e bo lɔ kpodo onu etɔn kpo.»