6 Hwexenu na Pilati se oxo mɛ la, e kan se tun mɔ: «Galile we kansinmɛtɔ wɛ nyi dahwe xe?» 7 Xena e kpɔn tun Yesu bo sɔn kansin xe mɛ na Elodu kpa ɛcɛ le, e lɔ, ye bo kplɔ-ɛ do yi e kɔn. Hwemɛnu la can, Elodu bo le Jeluzalɛmu we toxo mɛ. 8 Xena Elodu kpɔn Yesu, oji ɖaxo ɖe jɔ-ɛ, ɖo, sɔn hweɖenu gbɔɔn wɛ e jlo na kpɔn-ɛ do onu xeye na e se do e wu nɔ ye wu, e bo ɖo ŋukunsin ote nɔ, a do kpɔn ŋudandonu ɖe xena Yesu na wasi. 9 E bo kan oxo-e se susu, vɔ, Yesu ɔn ɖo oxo ti e wu ni-i. 10 Mawu we ovɔsantɔ ɖaxoye kpodo osɛnkplan-ɛmɛtɔye bo le blɛ, bo lo do ɛhwɛ ni-i nɔ titeŋugbetɔn. 11 Elodu kpodo sɔja etɔnye, bo dovɔn-ɛ, bo ko-e. E mɛ godo, ye bo sɔ awu xeni nyɔhwyan ɖe bo sɔ do ni-i, Elodu bo tun ye boo mɔ kplɔ-ɛ do yi Pilati kɔn. 12 Le gbegbe mɛ la, Elodu kpodo Pilati xeni nyi kɛntɔ saa, bo trɔ zun hadwe.

13 Pilati bo yɔ Mawu we ovɔsantɔ ɖaxoye, otokplɔtɔye kpodo otogun la sɔ kple, 14 bo lɔ na ye tun mɔ: «Mi kplɔ dahwe xe va na-a saa, bo lɔ na-a tun e bo hlu otogun la do e wu nɔ. Mi wɛ, mɔ ŋutɔn kan oxo-e se le ŋumɛ miatɔn, ko ko kpɔn onu nyanyla ɖe bo na do do ɛhwɛ xeye na mi do ni-i nɔ ye. 15 Elodu can ko do ɛhwɛ ɖe ni-i o, ɖo, e mɔ trɔ okɔ ni-i ɖodan mí, mi kpɔn, dahwe xe ɔn wa onu ti xeni jɛ na oku. 16 Mi wɛ dɔn, ko na na ogbe ye ba xo-e, e mɛ godo ko ba jo-e do.» 17 [Vɔ, na ye ka gbɛ ɖu Vivayi we oxwe nɔ, Pilati ɖo na ɖe ogan na ogantɔ ɖokpo^a.] 18 Ɛmɛye bo do axwa nɔ do okpɔ, bo lɔ nɔ tun mɔ: «Hu dahwe xe, a bo ɖe Balabasi tɔn-ɛ na mí!» 19 Balabasi mɛ la, ye bo sɔ-ɛ sɔ do ogankpa mɛ saa, do ogu finfɔn do ɛmɛ wu xeni jɔ saa le toxo la mɛ, kpodo ɛmɛ huhu we oxo wu. 20 Pilati bo mɔ lɔ oxo na ye ke, ɖo, e jlo na jo Yesu do. 21 Vɔ, ye bo do axwa nɔ bo tun mɔ: «Kan-ɛ do otinsoga ji! Kan-ɛ do otinsoga ji.» 22 Pilati bo mɔ kan ye se zɔn atɔngɔ tun mɔ: «Vɔ ɖe, onu nyanyla ŋukɔ lɛ e wa? Ko ɔn kpɔn onu nyanyla ti do e wu xeni jɛ na oku. Mi wɛ dɔn, ko na na na ye na xo-e, e mɛ godo ko ba jo-e do.» 23 Vɔ, ye bo tɛ ɛɖɛ do e ji nɔ kpodo axwa lelele bo do byɔ nɔ tun ye boo kan-ɛ. Axwa yetɔn bo hugan Pilati. 24 E bo sɔ ogbeta a do wasi onu xena ye lo byɔ nɔ. 25 E bo ɖe ogan na ɛmɛ xena ye sɔ do ogankpa mɛ do ogu finfɔn kpodo ɛmɛ huhu we oxo wu, ɛmɛ mɛ la wɛ ye byɔ. Vɔ, e ɖe alɔ le Yesu wu, na onu xena ye jlo do e wu, a do nyi wiwasi.

26 Hwexenu na ye lo dɔn Yesu sɔn nɔ, ye kpe dahwe ɖe xeni lɛ kɔ sɔn nugyo. Dahwe mɛ la bo nɔ nyi Simɔ, e bo nyi Silɛnu we kansinmɛtɔ. Ye bo kɔ otinsoga gban la do okɔgbe ni-i gannu-gannu, e ba do hɛn-ɛ le godo na Yesu. 27 Otogun la we ɛmɛ susu gbagbagba bo kplɔ-ɛ do. Le ye mɛ, nyɔnusi ɖeye lo xo alɔ akɔn nu^b nɔ, bo fan avin nɔ do ota ni-i. 28 Yesu bo trɔ kpan ŋukɔn ye bo lɔ na ye tun mɔ: «Nyɔnu Jeluzalɛmutɔnye, mi ká mɔ fan avin na-a, vɔ, mi fan avin na miye ŋutɔye kpodo vikpɛ miatɔnye. 29 Ɖo, mi kpɔn, azanye lo gbɔn nɔ, ye bo na lɔ tun mɔ: “Nyɔnanɔ wɛ nyi ajikponɔye, ɛmɛ xeye ni ɔn ji ovi, ye ko na anɔ ovi ɖe kpɔn!” 30 Mi wɛ ye na jɛ lilɔ ji na okpóye tun mɔ: “Mi hɔ jɛ mía ji!” Ye ba mɔ lɔ na kpokpweye tun mɔ: “Mi cɔn mí!” 31 Ɖo, na ye lo wasi mɔsinha na otinmu nɔ, naɖe lɛ na va nyi otin xuxutɔn?»

32 Ye bo kplɔ danuwatɔ owe ɖeye can do sɔn nɔ, a do va yi hu ye kpodo Yesu.

33 Xena ye va yi jɛ ofi xena ye nɔ yɔ tun «Takya», sɔja laye kan Yesu do otinsoga ji le blɛ, ye bo kan danuwatɔ owe laye can le blɛ, ɖokpo le amyɔ mɛ ni-i, owegɔ la bo le aɖusi mɛ etɔn. 34 Yesu bo tun mɔ: «Otɔ, sɔ ɛhwɛ kɛ ye, ɖo, ye ɔn nyɔ onu xena ye lo wasi nɔ.» Sɔja laye bo wasi ovoɖiɖe bo do ma awu etɔnye. 35 Otogun la bo le blɛ, bo lo kpɔn onu nɔ. Otogaye bo lo ko Yesu nɔ, bo lɔ tun mɔ: «E hwlɛn ɛmɛ buye gan, ni hwlɛn emyɔ ŋutɔ gan, na e nyi Klisu xena Mawu can la!» 36 Sɔja laye can bo ko-e nɔ, ye bo tɛkpɔ-ɛ, a do ni-i vɛn hwinhwan taŋu. 37 Ye bo lɔ ni-i tun mɔ: «Na o nyi Jwifuye we xɔlu, myɔ ŋutɔ bo hwlɛn ɖiwe gan!» 38 Onu winwlan xeni le otinsoga la we jigbe xɛn: «Ɛmɛ xe wɛ nyi Jwifuye we xɔlu.»

39 Danuwatɔ laye we ɖokpo xena ye kan do otinsoga ji, bo lo zun Yesu nɔ tun mɔ: «Myɔ hɛn nyi Klisu la wɛɛ? Myɔ ŋutɔ hwlɛn ɖiwe gan, a bo hwlɛn míye can gan.» 40 Vɔ, danuwatɔ owegɔ la bo gbɛ onu ni-i nɔ tun mɔ: «O ɔn nɔ vɔ Mawu can, myɔ xena ye ɖɔ okuhwɛ ɖokpo ŋumyɔ la na! 41 Míyetɔn, e le osɛn nu, ɖo, mí lo yi axɔtu xeni jɛ na onu xena mí do sin ye nɔ, vɔ, emyɔ ɔn wa onu nyanyla ti.» 42 E bo mɔ lɔ tun mɔ: «Yesu, ɖoŋudo wu ye, le hwexenu na o na va ɖi xɔlu ha.» 43 Yesu bo ɖo e wu ni-i tun mɔ: «Le oxojɔxo mɛ, ko lo lɔ na we nɔ, le egbe, o na nɔ aha na-a le gbɔjwɛ tɛnxo^c adodwe la.»

44 Ogan weve ha wɛ lo xo nɔ kpoŋu, vuvlu bo do le nyixɔ la ji seŋu na oganxixo atɔn mɔsinha. 45 Vuvlu bo cɔn ŋumɛ na ohwe. Avɔ ɖaxo^d xeni le Mawu we oxwe la gbe, bo ma ɖo owe sɔn jigbe gbɔɔn bo va yi odo. 46 Yesu bo do axwa sinsyɛnxu ɖe, bo lɔ tun mɔ: «Otɔ, ko sɔ gbigbɔ tɛye sɔ do alɔ mɛ na we.» Xena e lɔ oxo mɛ laye vɔ, e bo myɔ onu. 47 Xena sɔjaga la kpɔn onu xeni jɔ la, e lɔ tun mɔ: «Gigo na Mawu! Dahwe xe, ɛmɛ jijwɛ wɛ e nyi saa oxojɔxo!» 48 Xena ɛmɛ zɛtɛye xeni va onu kpinkpɔn gbe ye, kpɔn onu xeni jɔ mɛ laye vɔ, ye trɔ sɔn nɔ bo lo xo alɔ akɔn nu nɔ. 49 Ɛmɛ zɛtɛye xeni o nyɔ Yesu saa ye, kpodo nyɔnu xeye ni kplɔ-ɛ do ye sɔn Galile we kansinmɛ gbɔɔn ye, ye bo le dindyɔnnu bo do kpɔn onu xeye ni jɔ nɔ laye.

50 Vɔ, dahwe ɖe le ɛhwɛɖɔtɔye mɛ, ye bo nɔ yɔ-ɛ tun Jozɛfu. Ɛmɛ nywɛ wɛ e nyi, bo mɔ nyi ɛmɛ jijwɛ. 51 E ɔn ɖo alɔ le onu xena ɛhwɛɖɔtɔ gbokpweye wa kpodo ogbeta xena ye sɔ ye mɛ. E bo nyi Alimate we toxo mɛ tɔ, Alimate la bo nyi Jwifuye we toxo. E bo lo tre kpɔn Mawu we Xɔluɖuɖu nɔ. 52 Jozɛfu la bo yi Pilati kɔn, bo do va yi byɔ ogbe a do kɔ Yesu we ocɔ. 53 E bo ɖe ocɔ la jɛ ote le otinsoga la ji, bo sɔ avɔ bo do butu-i, bo ɖi-i do yɔgun xena ye ta do ɛkpɛn ɖaxo ɖe mɛ. Ye ko ɖi ɛmɛ ti do yɔgun la mɛ kpɔn. 54 Jijlaɖozangbe na Jwifuye we gbɔjwɛzan wɛ, gbɔjwɛzan la bo o tɛkpɔ nɔ. 55 Nyɔnusi xeye ni zɔn omɔ kpodo Yesu sɔn Galile gbɔɔn ye, bo kplɔ Jozɛfu do. Ye bo kpɔn yɔgun la, kpodo lena ye sɔ Yesu we ocɔ sɔ do e mɛ ɖo. 56 E mɛ godo, ye bo trɔ sɔn yi oxwegbe, bo va yi kan ami sisi kpodo celu hwɛnnywɛye, bo sɔ ɖo alɔ ji. Mi wɛ le gbɔjwɛzan la gbe, ye gbɔjwɛ ɖi lena Osɛn la byɔ ɖo ha.