8 Mi wɛ nyɔnusi laye ɖoŋudo Yesu we oxoye wu. 9 Xena ye lɛ le yɔgun la to, ye va yi lɔ oxo mɛ laye seŋu na onukplanvi weɖokpo laye kpodo ɛmɛ gbokpweye kpo. 10 Nyɔnusi laye wɛ nyi Malya Madalatɔn, Jani, Malya xeni nyi Jaki we onɔ. Nyɔnusi buye can, bo lɔ oxo mɛ laye na ɛmɛ dindɔn laye. 11 Vɔ, oxo mɛ laye bo le ɖi onumanywɛtɔ we oxo ha doŋu na ɛmɛ dindɔn laye, ye ko kan do nyɔnusi laye we oxo ji. 12 Ganke, Piyɛ bo site, bo do odun do yi yɔgun la to, bo dɛ okɔ bo do kpɔn yɔgun la mɛ, vɔ, avɔvinu xeye na ye do bla ocɔ la, jan wɛ e kpɔn le nyixɔ mɛ. E mɛ godo, e bo sɔn, onu xeni jɔ laye bo lo kpaca-ɛ nɔ.

13 Mi wɛ le gbegbe mɛ la, onukplanvi owe ɖeye, lo yi otota ɖe mɛ nɔ, ye bo nɔ yɔ otota la tun Emayusi. Kɔxwe mɛ la bo dɛn le Jeluzalɛmu we toxo mɛ wu na kpɛntin weɖokpo ha. 14 Ye bo lo lɔ oxo nɔ sɔn onu xeni jɔ la zɛtɛye wu nɔ. 15 Hwexenu na ye lo lɔ oxo nɔ bo lo do aɖikan nɔ, Yesu ŋutɔ tɛkpɔ ye, bo zɔn omɔ kpo ye. 16 Ye bo lo kpɔn-ɛ nɔ, vɔ, onu ɖe bo cɔn ŋukunsin ji na ye, ye ko kpewu do josi-i. 17 E bo lɔ na ye tun mɔ: «Oxo ŋukɔ lɛ mi lo lɔ nɔ le miaɖe mɛ bo do sɔn nɔ?» Ye bo tre, bo le dɔŋuɖunu mɛ taŋu. 18 Ɛmɛ ɖokpo bo le ye mɛ, bo nɔ nyi Klewopasi, e bo ɖo e wu ni-i tun mɔ: «Be myɔ ɖokpo gee jan wɛ le Jeluzalɛmu we toxo mɛ, o ko nyɔ onu xeni jɔ le azan xeye mɛ?» 19 E bo ɖo e wu na ye tun mɔ: «Ɛlɛ nyi onu xeni jɔ la?» Ye bo ɖo e wu ni-i tun mɔ: «Onu xeni jɔ do Yesu Nazalɛtitɔn ji, xeni nyi Mawu we oxolɔɖonyitɔ sinsyɛnxu ɖe, oxo etɔn kpodo onu wiwa etɔnye bo nɔ ɖo hɔnhlɔn, le Mawu kpodo otogun la zɛtɛye we ŋumɛ. 20 Mawu we ovɔsantɔ ɖaxoye kpodo oga míatɔnye bo sɔ-ɛ sɔ do asi na Pilati, ni a do ɖɔ okuhwɛ ni-i, a bo ɖe ogbe na sɔjaye a kan-ɛ, 21 mí bo o lo kpɔn omɔ nɔ tun emyɔ bɛ bo na tun okan na Izrayɛli we otogun la, vɔ, onyihinhɔn atɔn xɛn onu mɛ laye o jɔ. 22 Mɔ bɔ do e wu, nyɔnusi ɖeye xeni le ogbɛ míatɔn mɛ, va gba ayi do na mí. Egbe kɛklɛnu dɛɛn, ye yi yɔgun la to, 23 xena ye ɔn kpɔn ocɔ etɔn, ye va lɔ tun, Mawu we ɛwɛndotɔye bo ze do ŋumɛ na heye, bo lɔ tun e bo le ɛgbɛ. 24 Ɛmɛ míatɔn ɖeye bo yi yɔgun la to, ye bo kpɔn onu laye ɖi lena nyɔnusi laye lɔ ɖo ha, vɔ, emyɔ la ŋutɔ, ye ɔn kpɔn-ɛ.» 25 Mi wɛ, Yesu lɔ na ye tun mɔ: «Zinzin ma ɖotɔye wɛ mi nyi, e nɔ vɛ ɛwu na mi a do kan do oxo zɛtɛye xena Mawu we oxolɔɖonyitɔye lɔ ye ji! 26 Klisu la ɖe, e ɔn ɖo na ɖu aya ɖo mɔsinha, a do ɖyɛ gigo etɔn mɛ wɛɛ?» 27 Mi wɛ, Yesu ɖe onu xena ye wlan do e wu le Mawu we oxo la mɛ gɔnmɛ na ye, bɛ sɔn Mɔyizi we wemaye ji gbɔɔn do jɛ oxolɔɖonyitɔye we wema zɛtɛye ji.

28 Xena ye tɛkpɔ otota xe mɛ na onukplanvi laye lo yi nɔ, Yesu wasi ɖi ɛmɛ xeni lo yi dindyɔnnu nɔ ha. 29 Vɔ, ye zin e ji nɔ, bo lɔ nɔ tun mɔ: «Nɔ mía kɔn, ohwe lo yi oxɔ nɔ, ozan bo ka do nɔ.» Yesu bo ɖyɛ oxwe la gbe, a do nɔ blɛ la kpo ye. 30 Hwexenu na e yi tɛnxo a do ɖu onu kpo ye, e sɔ kpɔnnɔ la, bo xo ɛɖɛ do e ji, bo ma-ɛ, bo sɔ na ye. 31 Mi wɛ, ŋukunsin yetɔn hun, ye bo nyɔ-ɛ tun Yesu bɛ, vɔ, e bo bu le ŋumɛ na ye. 32 Ye bo lɔ na yenɔniɔye nɔ tun mɔ: «Hwexenu na e lo lɔ oxo na mí nɔ le omɔ ji, bo do ɖe Mawu we oxo la gɔnmɛ na mí nɔ ɖe, akpakpa ɔn sɔ mí nɔ wɛɛ?»

33 Le e tɛnxo zɔnɖokpo, ye site, bo trɔ sɔn yi Jeluzalɛmu, bo va yi kpɔn onukplanvi weɖokpo laye kpodo ɛmɛ xeye ni le ye kɔn ye, ye bo le okpli. 34 Yee bo lɔ na onukplanvi owe laye tun mɔ: «Oxojɔxo wɛ, Xwetɔ la fɔn sɔn oku, e bo ze do ŋumɛ na Simɔ!» 35 Onukplanvi owe laye can bo lɔ onu xeni jɔ do ye ji le omɔ ji na ye, kpodo lena ye do josi Yesu ɖo le hwexenu na e lo ma kpɔnnɔ nɔ.

36 Hwexenu na ye lo lɔ oxo ɖo mɔsinha nɔ, Yesu ŋutɔ bo ze le dodomɛ na ye, bo lɔ na ye tun mɔ: «Fifa ni nɔ kpo mi!» 37 Ye bo vɔ gbɔɔn, e ɔn le ti, ye bo bu-i tun yɛfunnu wɛ ye kpɔn nɔ ha. 38 Vɔ, Yesu bo lɔ na ye tun mɔ: «Ɛlɛ jɔ na ayi do gbado na mi nɔ? Ɛlɛ jɔ na mi do xo onu kpɔn le oji miatɔnye mɛ nɔ? 39 Mi kpɔn alɔ kpodo afɔ tɛyee, mɔ ŋutɔ wɛ ma. Mi ɖo alɔ wu ye, a bo kpɔn, yɛfunnu ɖe ɔn ɖo agbaza gbɔɔn do ɖo oxu le lanmɛ, ɖi lena mi lo kpɔn nɔ tun ko bo ɖo ɖo ha.» 40 Xena e lɔ mɔsinha vɔ, e bo sɔ alɔ kpodo afɔ etɔnye sɔ xlɛ ye. 41 Vɔ, do jijwɛ xe mɛ na ye le wu, ye ɔn kan do e ji nɔ hɔnɖyo, e bo mɔ gbɛ kpaca ye nɔ, mi wɛ Yesu lɔ na ye tun mɔ: «Mi ɖo onuɖuɖu ɖe le bwɛ?» 42 Ye bo sɔ ohwe hwihwi gbigbo ɖe ni-i. 43 E bo yi-i, bo ɖu-i le ŋumɛ na ye. 44 E mɛ godo, e bo lɔ na ye tun mɔ: «Oxo xena ko nɔ lɔ na mi nɔ le hwexenu na ko le mia kɔn la mɛ. Mi wɛ nyi tun mɔ: “E le vivɛɖe tun onu zɛtɛye xena ye wlan do wu ye le Mɔyizi we Osɛn la mɛ, le oxolɔɖonyitɔye kpodo Ohan jiji we wemaye mɛ, ɖo na jɔ.”» 45 Mi wɛ e hun tagbɔ na ye, ye ba do se Mawu we oxo la gɔnmɛ. 46 E bo lɔ na ye tun mɔ: «Onu xena ye wlan le Mawu we oxo la mɛ xɛn: “ Klisu la na ɖu aya, e bo na fɔn sɔn oku le onyihinhɔn atɔngɔ gbe. 47 Ye bo na jla le nyikɔ etɔn mɛ na otogunye seŋu, bɛ sɔn Jeluzalɛmu we toxo mɛ, tun, ye boo ɖɔli jijɔ na Mawu a bo sɔ ɛhwɛ yetɔnye a sɔ kɛ ye. 48 Miye wɛ nyi onu mɛ laye we kunuɖetɔye. 49 Mɔ, ko na sɔ onu xe we ajɔgbe na didaye fyan, a sɔ ɖodan mi. Vɔ, miye, mi nɔ toxo la mɛ gbɔɔn do yi hwexenu na mi na yi Mawu we hɔnhlɔn.”»

50 E mɛ godo, Yesu kplɔ ye gbɔɔn do yi Betani we otota we aha, e bo kɔ alɔye bo xo fifa we ɛɖɛ na ye. 51 Hwexenu na e xo fifa we ɛɖɛ na ye nɔ, e dun yi le ye wu, Mawu bo kɔ-ɛ do sɔn yi jiŋukunsin. 52 Mi wɛ, xena onukplanvi laye do onu odo ni-i vɔ, ye trɔ sɔn yi Jeluzalɛmu we toxo la mɛ kpodo jijwɛ ɖaxo ɖe. 53 Ye bo nɔ nɔ Mawu we oxwe la gbe le ogan ɖekpekpe mɛ, a bo kanfu Mawu nɔ.