Yesu kpodo nyɔnu Samalitɔ ɖe kpo kpe
4
1 Yesu nyɔ-ɛ tun Falizitɔye bo se tun e bo na na ɛmɛ susu bo lo trɔ zun onukplanviye nɔ hugan Jan, e bo mɔ lɛ Mawu we ɛsin na ɛmɛye nɔ hugan-ɛ. 2 -Vɔ, le oxojɔxo mɛ, emyɔ ŋutɔ hɛn lɛ Mawu we ɛsin la na ɛmɛye nɔ, onukplanvi etɔnye wɛ.- 3 Mi wɛ e lɛ le Yude we kansinmɛ, bo sɔn yi Galile. 4 Vɔ, e ɖo na gbɔn Samali. 5 E va yi jɛ Samali we toxo ɖe mɛ, xena ye nɔ yɔ tun Sicaa, ofi la ɔn mɔ dɛn do nyixɔ xena Jakɔbu sɔ na ovyɛ Jozɛfu le saa wua. 6 Jakɔbu we dotwɛ bo le blɛ la. Xena omɔ zinzɔn la kpe agbɔ na Yesu, e gbɔjwɛ xlɔn onyi le dotwɛ la we aha. Ogan weve mɔsinha wɛ lo xo nɔ le hwe la nu. 7 Nyɔnu Samalitɔ ɖe va, na do va dun ɛsin. Mi wɛ Yesu lɔ ni-i tun mɔ: «Na-a ɛsin ma nu.» 8 Le ogan mɛ la mɛ, onukplanvi etɔnye bo yi toxo la mɛ, a do va yi xɔ onuɖuɖu do va. 9 Nyɔnu samalitɔ la, bo kan Yesu se tun mɔ: «Naɖe lɛ myɔ xeni nyi Jwifu na va byɔ ɛsin nunu mɔ xeni nyi samalitɔ ɖo?» -Ɖo Jwifuye kpodo Samalitɔ laye ɔn nɔ jɛ okpɔ.- 10 Yesu bo ɖo e wu ni-i tun mɔ: «Na o do nyɔ onunina Mawutɔn, bo nyɔ ɛmɛ xeni lɔ na we nɔ tun na-a ɛsin ma nu wɛ, myɔ hwɛ tantyan wɛ na byɔ-ɛ ɛsin, e ba na we ɛsin xeni nɔ na ɛgbɛ.» 11 Nyɔnu la bo ɖo e wu na Yesu tun mɔ: «Ɛmɛɖaxo! O ɔn hɛn tɔka bo na do dun ɛsin, dotwɛ la bo mɔ tito. Fifi, bɔ lɛ o na kpɔn ɛsin xeni nɔ na ɛgbɛ ɛmɛ la le? 12 Mía dagbwa Jakɔbu wɛ kun dotwɛ xe na mí le saa, emyɔ ŋutɔ bo nu ɛsin etɔn, vikpɛ etɔnye kpodo kanlin etɔnye can bo nu ɛsin xe la. Fifi, myɔ o hugan mía dagbwa Jakɔbu la wɛɛ?» 13 Yesu ɖo e wu ni-i tun mɔ: «Ɛmɛ ɖekpekpe xeni nu ɛsin mɛ, kɔmyɔ na mɔ ci-i, 14 vɔ, ɛmɛ xeni na nu ɛsin xena ko na ni-i, kɔmyɔ ɔn mɔ ci-i nɔ kpɔn gbeɖe. Ɛsin xena ko na ni-i la, na trɔ zun otɔjɔtyɔn le e mɛ. Otɔjɔtyɔn mɛ la mɛ wɛ Ɛgbɛ Mavɔmavɔ nɔ tɔn sɔn.» 15 Nyɔnu la bo lɔ ni-i tun mɔ: «Ɛmɛɖaxo, be bo na-a ɛsin mɛ la, na kɔmyɔ ko mɔ do ci-u nɔ ke, e mɛ, ko ko mɔ va ɛsin dun gbe le bwɛ nɔ ɖe.»16 Yesu lɔ ni-i tun mɔ: «Va yi yɔ suwe na mi a va bwɛ.» 17 Nyɔnu la bo ɖo e wu ni-i tun mɔ: «Ko ɔn ɖo osu mɔ!» Mi wɛ Yesu lɔ ni-i tun mɔ: «Ɛhwɛ tɔwe jɔ, na o do lɔ tun he bo ɔn ɖo osu. 18 Ɖo, o ɖe osu atun va yi; ŋusunglo xe we oxɔ mɛ na o le fifi, ko mɔ nyi suwe. Oxo mɛ na o lɔ mɛ, oxojɔxo wɛ.»
19 Nyɔnu la bo lɔ ni-i tun mɔ: «Ɛmɛɖaxo, ko kpɔn tun oxolɔɖonyitɔ Mawutɔn wɛ o nyi. 20 Mía dagbwaye sɛn Mawu le okpó xe ji, vɔ mi mɛ Jwifuye, mi bo nɔ lɔ tun ofi xena ye bo na nɔ sɛn Mawu le bɛ bo nyi Jeluzalɛmu.» 21 Yesu bo ɖo e wu ni-i tun mɔ: «Kan do ji ye nyɔnu xe, oganxixo ɖe lo gbɔn nɔ, na e ɔn mɔ nyi okpó xe ji alo Jeluzalɛmu hɛn mi na nɔ va yi sɛn Mawu Otɔ la le. 22 Mi ɛmɛ Samalitɔye, mi ɔn nyɔ ɛmɛ xena mi lo sɛn nɔ, vɔ, mí mɛ Jwifuye, mí nyɔ ɛmɛ xena mí lo sɛn nɔ. Ɖo Jwifuye ji wɛ hwlɛngan gbɔn bo do va. 23 Vɔ, oganxixo ɖe lo gbɔn nɔ, ogan la bo o xo, na Mawusɛntɔ adodweye na sɛn Otɔ la le gbigbɔ mɛ kpodo oxojɔxo mɛ; ɖo Mawusɛntɔ mɛ ha ye wɛ Otɔ la lo kan nɔ. 24 Mawu, Gbigbɔ wɛ e nyi, mi wɛ dɔn ɛmɛ xeye ni nɔ sɛn ye, ɖo na sɛn-ɛ le gbigbɔ kpodo oxojɔxo mɛ.» 25 Nyɔnu la bo ɖo e wu ni-i tun mɔ: «Ko nyɔ-ɛ tun Mɛsiya la na va va -ɛmɛ xena ye nɔ yɔ tun Klisu la-, na e o va va, e na lɔ onu zɛtɛye na mí.» 26 Yesu bo ɖo e wu ni-i tun: «Mɔ ɛmɛ xeni nyi Mɛsiya la xɛn lo lɔ oxo na we nɔ.»
27 Hwe mɛ la nu Yesu we onukplanviye bo trɔ va, e bo kpaca do ye tun Yesu lo lɔ oxo kpodo nyɔnusi nɔ, ganke ye ɛmɛ ti ɔn kan-ɛ se tun mɔ: «“Ɛlɛ o kan nɔ”, alo “oxo ŋukɔ lɛ o lɔ kpo-e nɔ”.» 28 Mi wɛ nyɔnu la jo gbagbwevi etɔn do blɛ, bo yi toxo la mɛ, bo va yi lɔ na ɛmɛye tun mɔ: 29 «Mi va kpɔn dahwe ɖe xɛn, e lɔ onu xena ko wasi zɛtɛye na-a. E ɔn nyi Klisu la hɛn nyi xe wɛɛ?» 30 Ɛmɛye tɔn le toxo la mɛ, bo gbɔn nɔ Yesu kɔn nɔ. 31 Le hwe mɛ la nu, onukplanvi etɔnye bo ɖe kuku ni-i nɔ tun ni boo ɖu onu. Ye nɔ lɔ tun mɔ, «Hlabi, ma ɖu onu o!» 32 Vɔ, emyɔ bo ɖo e wu na ye tun mɔ: «Mɔ, ko ɖo onuɖuɖu ɖe bo na ɖu, vɔ, onuɖuɖu mɛ la, miye, mi ɔn nyɔ-ɛ.» 33 Onukplanvi laye jɛ yenɔniɔye kinkan se ji tun mɔ: «Alo ɛmɛ ɖe hɛn onuɖuɖu va ni-i wɛɛ?» 34 Yesu ɖo e wu na ye tun mɔ: «Onuɖuɖu tɛye wɛ nyi tun ma wasi ɛmɛ xeni dɔn-ɔ ɖodan we ojlo, a bo wa odan etɔn do yi vivɔnu. 35 Osunzan ɛnɛ jan wɛ drɔn ye bo na do ɖe ɛjinukun. Mɔsinha wɛ, miye, mi nɔ lɔ, vɔ, mɔ ko lo lɔ na mi nɔ tun, mi ɖe okɔ a bo kpɔn ogle laye, ɛjinukun laye o bya, bo o su ɖiɖe! 36 Ɛmɛ xeni ɖe ɛjinukun nɔ, e o lo yi axɔtu etɔn nɔ, bo kpli onukun ɖo onyi na Ɛgbɛ Mavɔmavɔ nɔ, e mɛ, onukunxwatɔ kpodo onukunɖetɔ ba do kpɔn jijwɛ do okpɔ. 37 Mi wɛ ye nɔ do do olo ɖe tun: Ɛmɛ bu xwa, ɛmɛ bu bo va ɖe. Oxojɔxo wɛ ye lɔ. 38 Ko sɔ mi ɖodan na mi a va yi ɖe ɛjinukun xe we ota na mi ɔn ɖu aya ti do. Ɛmɛ buye ɖu aya bo wa odan, miye bo va ɖu odan yetɔn we ale.»
39 Samali we toxo mɛ la mɛ tɔ susu kan do Yesu ji do oxo xena nyɔnu la lɔ wu. Ɖo e ɖe kunu tun mɔ: «E lɔ onu xena ko wasi zɛtɛye na-a.» 40 Mi wɛ dɔn, xena Samalitɔye va Yesu kɔn, ye ɖe kuku ni-i tun ni boo nɔ heye kɔn. E bo nɔ blɛ na onyihinhɔn owe. 41 Ɛmɛ susu gbagbagba buye can mɔ kan do Yesu ji, do emyɔ ŋutɔ we oxo xena e lɔ nɔ wu. 42 Ye bo lɔ na nyɔnu la tun mɔ: «Fifi e ɔn mɔ nyi oxo xena o va lɔ na mí ɖoɖyo hɛn dɔn na mi do kan do e ji, míye ŋutɔ mí se oxo etɔn, mí bo nyɔ-ɛ tun emyɔ bɛ bo nyi hwlɛngantɔ ɛgbɛ la tɔn oxojɔxo.»
Yesu gɔ adɔn na xɔsudanwatɔ ɖaxo ɖe vyɛ
43 Xena Yesu nɔ blɛ la na onyihinhɔn owe laye vɔ, e lɛ, bo sɔn yi Galile. 44 Emyɔ ŋutɔ bo o ɖe kunu tun mɔ: «Ye ɔn nɔ do bubu oxolɔɖonyitɔ ti wu le oto emyɔ ŋutɔ tɔn mɛ.» 45 Ganke xena e va yi jɛ Galile, Galiletɔ laye yi-i ganji, ɖo ye kpɔn onu zɛtɛye xena e wasi le Jeluzalɛmu le Vivayi we oxwe la ɖuɖu hwenu, ɖo, yee can va yi ɖu oxwe la.
46 Yesu mɔ trɔ va Kana ke le Galile, ofi xena e sɔ ɛsin do trɔ zun vɛn le. Xɔsudanwatɔ ɖaxo ɖe le Kapɛnawumu, ovyɛ ŋusunglo bo jɛ adɔn nɔ. 47 Xena, dahwe la se tun Yesu bo sɔn Yude bo va Galile, e va yi kpɔn-ɛ, bo ɖe kuku ni-i tun ni boo va Kapɛnawumu, a bo gɔ adɔn na heviye, xeni o le oku we omɔ ji. 48 Mi wɛ, Yesu lɔ ni-i tun mɔ: «Na mi ɔn kpɔn ŋudandonuye kpodo onu kpaca-ɛmɛye, mi ɔn kan do e ji nɔ kpɔn gbeɖe.» 49 Xɔsudanwatɔ la bo ɖo e wu tun mɔ: «Ɛmɛ ɖaxo, na mí ɔn yawu sɔn, ovi tɛye la na ku!» 50 Yesu bo lɔ ni-i tun mɔ: «Va sɔn! Ovi tɔwe gan bo le ɛgbɛ.» Dahwe la kan do oxo xena Yesu lɔ ni-i la ji, e bo jɛ omɔ bo sɔn nɔ. 51 Oxwe la we omɔ ji wɛ e le, mi wɛ odansɔvi etɔnye va kpe-e, bo lɔ ni-i tun ovi etɔn la bo gan. 52 E bo kan ye se tun ogan ŋukɔ mɛ ha lɛ ovi la jɛ ote jaa; ye bo tun: «Swɛ hwedo ɖi ogan ɖokpo mɛ ha, wɛ vivɔ la hɔn ni-i.» 53 Ovitɔ la bo kpɔn tun ogan mɛ la mɛ bɛ Yesu bo lɔ ni-i tun ovi etɔn bo gan. Mi wɛ emyɔ kpodo xwedo etɔn zɛtɛye kan do Yesu ji. 54 Josi owegɔ xena Yesu ɖe xlɛ dogbɔn ŋudandonu wiwasi mɛ, mɛ. E wasi xe la le gbingbɔn etɔn sɔn Yude do va Galile we godo.