Ɛmɛ dindɔn Yesutɔnye we
Odanwiwa
We wema
Oxotaɖiɖe
Ɛwɛnnywɛjlatɔ Lwiki xeni kplɔ Pɔlu do bo do wa Mawu we odan (2 Tim 4:11; Fil 1:24), bo mɔ nyi doto (Kol 4:14), wɛ wlan ɛmɛ dindɔn Yesutɔnye we odanwiwa we wema. Ye hɛn ye na mɔ nɔ yɔ wema xe la tun Gbigbɔ Kinkwɛn we odanwiwa, ɖo wema la lɔ oxo sɔn Gbigbɔ Kinkwɛn wu taŋu. E wlan wema la ɖodan ɛmɛ ɖaxo Tewofili ɖi lena e o wlan Klisu we Ɛwɛn Nywɛ we wema atɔngɔ bo sɔ ɖodan-ɛ ɖo ha. Le Wema la mɛ, e lɔ Yesu Klisu we sinsɔn yi jiŋukunsin we oxo, bo lɔ lena Gbigbɔ Kinkwɛn jɛ ote le agun la we titɔ e ji ɖo kpodo lena e zan ɛmɛ dindɔn laye, Piyɛ wɛ, Jan alo Jaki wɛ, le Ɛwɛn Nywɛ la jijla mɛ kpo hɔnhlɔn kpo na ŋudandonuye kpodo onukpaca-ɛmɛye bo do jɔ. E mɔ lɔ lena ye ɖe ofun na xɔsetɔ tantyantɔnye ɖo gbɔɔn ɛmɛ dindɔn ɖeye bo ku, kpodo lena Pɔlu can ɖe ofun na agun la gbɔɔn do yi hwexenu na e va trɔ jimɛ. Wema la mɔ lɔ odan xena Pɔlu wasi, omɔji xeye na e yi ye bo do wa Mawu we odan la, kpodo lena ye ɖe ofun ni-i ɖo gbɔɔn do yi hwexenu na ye va wle-e do ogankpamɛ.
Lena wema la ma ɖo xɛn:
1-8. Lwiki lɔ lena Yesu sɔn yi jiŋukunsin ɖo, lena Gbigbɔ Kinkwɛn jɛ ote ɖo kpodo lena agun tantyan la bɛ ɖo.
9-12. E lɔ lena Pɔlu trɔ ji mɛ le Damasi we omɔ ji ɖo, kpodo lena Ɛwɛn Nywɛ we ohɔn la hun na ɛmɛ xeye ni ɔn nyi Jwifuye ɖo.
13-14. E lɔ oxo do Pɔlu we omɔji xena e yi tantyan bo do va yi wa Mawu we odan wu.
15:1-35. E lɔ oxo do onudindɔn xeni va nɔ onyi le Mawu we odan la wiwa mɛ gbɔɔn ye bo va yi ɖɔ ɛhwɛ la le Jeluzalɛmu.
15:36-18:22. E lɔ oxo do Pɔlu we omɔji owegɔ xena e yi bo do va yi wa Mawu we odan, wu.
18:23-21:14. E lɔ oxo do Pɔlu we omɔji atɔngɔ xena e yi bo do va yi Mawu we odan, wu.
21:15-28:31. E lɔ oxo do Pɔlu we omɔji bu xena e yi bo do va yi wa Mawu we odan, wu. Hwemɛnu e lɛ le Jeluzalɛmu bo do sɔn yi Hlɔma.