5 Xena Silasi kpodo Timɔte kpo sɔn Masedwanu we oto mɛ bo va, Pɔlu sɔ eɖe do san ovɔ blebu na Mawu we oxo la. E nɔ ɖe onu gɔnmɛ na Jwifuye nɔ tun Yesu bɛ bo nyi Klisu la. 6 Vɔ, Jwifuye site kpan ŋukɔn-ɛ bo lo zun-i nɔ, mi wɛ, e hunhun awu etɔn we ofinzɔye bo lɔ na ye tun mɔ: «Na e ji onu ɖe na mi, mi ba sɔ kpan. E ɔn mɔ kan mɔ. Bɛ sɔn fifi ɛmɛ xeye ni ɔn nyi Jwifuye kɔn wɛ ko na yi.» 7 Pɔlu bo tɔn le okplityɔn la, bo sɔn yi dahwe xena ye nɔ yɔ tun Titusi Jusitusi we oxwegbe, e bo nɔ vɔ Mawu. Oxwe etɔn la bo le aha na Jwifuye we okplityɔn la tututu. 8 Ganke, Klisipusi xeni kpa ɛcɛ na okplityɔn la, bo kan do Xwetɔ la ji emyɔ kpodo xwedo etɔn zɛtɛye. Kɔlɛntitɔ susuye xeni ɖo oto Pɔlu, yee can bo kan do Xwetɔ la ji, ye bo lɛ Mawu we ɛsin na ye.

9 Le ozan ɖe mɛ, Xwetɔ la lɔ na Pɔlu le ɖiɖexlɛ ɖe mɛ tun mɔ: «Ká mɔ vɔ o, lɔ oxo nɔ kpoŋu a bo ká mɔ bɔ onu. 10 Ɖo, mɔ ŋutɔ ko le kpo we, ɛmɛ ti ko ɖo alɔ wu we nɔ a do wa onu nyanyla ɖe kpo we nɔ, ɖo ɛmɛ susu wɛ nyi tɛye le toxo xe la mɛ.» 11 Pɔlu bo nɔ Kɔlɛnti la na oxwe ɖokpo kpodo sunzan ɛdɛn, bo do kplan Mawu we oxo la ɛmɛye nɔ.

12 Hwexenu na Galyɔn ɖu oga le Akayi we kansinmɛ, Jwifuye ɖo ogbe do okpɔ, bo site kpan ŋukɔn Pɔlu, bo dɔn-ɛ yi ɛhwɛ ŋukɔn. 13 Ye bo lɔ tun mɔ: «Dahwe xe lo do ɛmɛye nɔ, na ye a do sɛn Mawu kpo walɔ xena osɛn la gbɛ.» 14 Oxo wɛ Pɔlu ka lɔ nɔ kpoŋu, Galyɔn la bo yi oxo bo ɖo e wu na Jwifu laye tun mɔ: «Jwifuye, na e do nyi tun danu ɖe alo onu nyanyla ɖaxo ɖe we oxo wɛ, ko na ɖo oto mi ganji ɖi lena e jɛ ɖo ha. 15 Vɔ, xena e nyi tun onudindɔn do oxogbeye, nyikɔye kpodo osɛn miatɔnye wu wɛ, e kan miye ŋutɔ. Ko ɔn kan na ɖɔ onu mɛ ye we ɛhwɛ!» 16 Mi wɛ, Galyɔn la nya ye le ɛhwɛɖɔxwe la. 17 Ye ɛmɛ zɛtɛye bo wle Sosutɛnu xeni kpa ɛcɛ na Jwifuye we okplityɔn la, bo xo-e nɔ le ɛhwɛɖɔxwe la we ŋukɔn, vɔ, Galyɔn ɔn kɛ onu do e mɛ na ye.

18 Pɔlu mɔ nɔ Kɔlɛnti la dindyɔn ɖe, e mɛ godo, e lɛ le nɔvi xɔsetɔye kɔn, bo do otɔjihun emyɔ kpodo Plisili kpo Akilasi kpo, ye bo do sɔn yi Sili we kansinmɛ. Vɔ, e bo o xwlɛ ota le Sankle ɖo e fyan jɔgbe ɖe na Mawu. 19 Xena ye va yi jɛ Efɛzu, Pɔlu lɛ le Plisili kpodo Akilasi kɔn. E bo yi Jwifuye we okplityɔn bo do va yi lɔ oxo kpo Jwifu laye. 20 Ye bo lɔ ni-i tun mɔ: «Nɔ mia kɔn viɖe!» Vɔ Pɔlu ko yi ogbe. 21 E lɛ le ye kɔn, bo lɔ na ye tun mɔ: «Ko na trɔ va mía kɔn na Mawu jlo.» E bo do otɔjihun le Efɛzu we toxo la mɛ bo sɔn. 22 Xena Pɔlu va yi jɛ Sezale, e va yi do ogbe na agunviye le Jeluzalɛmu gbɔxwe, e mɛ godo, e bo trɔ sɔn yi Antyɔcu xeni le Sili we kansinmɛ. 23 E nɔ blɛ viɖe, zaan, e bo trɔ sɔn. E bo gbɔn Galasi kpodo Fliji we otoye mɛ ɖe kplɔ ɖe do, bo do do hɔnhlɔn lanmɛ na onukplanvi zɛtɛye.

24 Jwifu ɖe, xena ye ji le Alɛsandri, ye bo nɔ yɔ-ɛ tun Apolosu, e va Efɛzu. Ɛmɛ ɖe wɛ e nyi, bo bi do ɛɖɛ nu, e bo nyɔ Winwlan Kinkwɛn laye nwyɛɖe. 25 Ye o kplan-ɛ lena ye na zɔn gbɔn Xwetɔ la we omɔ ji ɖo. E nɔ jla Yesu we oxo la, a bo kplan ɛmɛye do ojlɛ nu kpodo zozo kpo, vɔ, Jan we ɛsin xena e lɛ na ɛmɛ, jan wɛ e nyɔ. 26 E bo jɛ oxo lilɔ ji kpodo kan do e ji kpo le Jwifuye we okplityɔn la. Xena Plisili kpodo Akilasi kpo ɖo oto-e vɔ, ye kplɔ-ɛ, bo mɔ va yi ɖe Mawu we omɔ la we oxo gɔnmɛ ni-i ganji. 27 Xena Apolosu jlo na yi Akayi we kansinmɛ, nɔvi xɔsetɔye ni-i ojidido, bo wlan wema do asi ni-i na onukplanvi Akayitɔnye a do yi-i nywɛɖe. Xena e va yi jɛ kansin la mɛ, dogbɔn Mawu we ɛfɛnu mɛ, e kpedo ɛmɛ xeye ni va kan do Xwetɔ la ji ye wu taŋu. 28 Ɖo agbaŋugba wɛ e nɔ ɖe xlɛ Jwifuye le kpo hɔnhlɔn kpo tun oxo yetɔnye bo nyi ojo, e bo nɔ ɖe xlɛ dogbɔn Winwlan Kinkwɛnye mɛ tun Yesu bɛ bo nyi Klisu la.