4
Pingindanan nu Palin si Isus
1 Naa ndaˈ maiben, kini si Isus, inabay nug Balakat nu Megbebayaˈ tug limawaˈ, adun pengindanan nu Palin. 2 Benaˈ ditug limawaˈ si Isus, mikpuasa paat puluˈ gebii, ndaˈ siben aan, dayun migutem gupia. 3 Mendadi ki Palin kini, mikpesempel dini Isus, miktaluˈ diniin, “Mendadi, yaˈaig Bataˈ nu Megbebayaˈ, daw. Naa saˈ pinenggiˈ metuud, naa ki ngag batu kinuˈ, pebaluy mu daw nga pan.”
4 Dagid sumimbag si Isus, laungen, “Paa, duuni sinulat ditu Misulat Taluˈ nu Megbebayaˈ, laung, ‘Kanaˈ gaan laaki ketubuˈan nu kilawan. Iini mekpetubuˈ tantu di getaw, su kelaun teluˈen nu Megbebayaˈ.’”
5 Naa saˈ maˈantu, iwit na pelum nu Palin si Isus tu Jerusalem, sug lunsud pimiliˈ nu Megbebayaˈ, piˈindegen dayun ditu tampusan ditaas nug Balay Pengedapan tu Megbebayaˈ. 6 Miktaluˈ dayun su Palin diniin, “Saˈ metuud puˈ yaˈa tuˈuig Bataˈ nu Megbebayaˈ, naa sampaka diag lupaˈ. Puˈ duuni misulat ditu Taluˈ nu Megbebayaˈ, laung,
‘Suguˈen nu Megbebayaˈ su nga sesuguˈenen getaw langit megingat diniˈa.
Sipupuun ka nilan,
adun ndiˈa meseknun dig batu.’”
7 Dagid sumimbag si Isus, laungen, “Duun pagidi misulat, ‘Su Kaunutan mu Megbebayaˈ, ndiˈ mu pengindanay mekatag di tinaluˈen.’”
8 Mendadi, iwit na pelum nu Palin si Isus di metaas gupia bentud, pinitaˈen dayun diniin su kelaunan nasud mukaˈ peglegediˈan dinig dibabaw lumbang, sampay su kelengasen. 9 Miktaluˈ dayun su Palin, “Naa kig launanen kiin, gelaˈen ku begay diniˈa, saˈ menginluluda di gedapan ku, mengamuyuˈ dinaan.”
10 Dagid sumimbag si Isus, laungen, “Paa, pegawaˈa diin, Satanas! Puˈ duun pa pagidi misulat, ‘Su Kaunutan mu Megbebayaˈ laaki penluˈudan mu, ndaˈig lain temuyen mu.’”
11 Saˈ mideksuˈ mektaluˈ si Isus, bilengan dayun nu Palin. Duun dayuni nga sesuguˈen nu Megbebayaˈ getaw langit mituaˈ, pigebangan nilan si Isus.
Mikpuun Mektituluˈ si Isus tu Prubinsya Galilea
12 Naa pisuunan si Isus puˈ si Juan kiin, masiˈ pinirisu. Mendadi benaˈ misuunanen, migawaˈ si Isus dia, mipuliˈ ditu prubinsya Galilea. 13 Ndaˈ na pegbenwa ditug lunsud Nazaret, ditu pelum minuliˈ Capernaum, lunsud dia geksid Linaw Galilea, sakup benwa ni Zabulon mukaˈ ni Neftali dengantu. 14 Dia minuliˈ si Isus, adun menuud su sinulat dengantu ditu Misulat Taluˈ nu Megbebayaˈ nu pimuunanen si Isaias, laungen,
15 “Aa naa, ki nga sakup kiin nug benwa ni Zabulon mukaˈ ni Neftali,
ditu mesempel dagat, ditug dipag Jordan,
ditu Galilea, benwa dadema nu nga kanaˈ getaw Judea!
16 Ilan kiin, migbenwa ilan di medelem,
dagid minitaˈ na nilan ki tiag, medelag gupia.
Sakup ilan nug benwa nu kepatay, mileman ilan dun,
dagid midelagan nailan nu tiag.”
17 Mendadi benaˈ mikauliˈ si Isus dia Galilea, pikpuunanen na ki kektituluˈen. Kaliˈ pektaluˈ, “Peksikesuun amu, puˈ ki Keglekaunutan nu Megbebayaˈ, pikpuunan na!”
Pisakup ni Isusi Paat Tawan Menelisedaˈ
18 Naa duuni gendaw, mikpanaw si Isus dia geksid Linaw Galilea. Sinegayen mpanaw, duunig duaˈ tawan menelisedaˈ mipegitaˈen, pekpenadap ilan diag linaw. Mekpated ilan, ngalan nilan si Simon sala ngalanen si Pedro mukaˈ si Andres. 19 Mendadi sinabi ilan ni Isus, laungen, “Pegdunut amu dinaan. Kanaˈ na sedaˈi peglaaman niu, puˈ getaw na, adun sumakup ilan dinaan.” 20 Lemen laak midengeg nug duaˈ tawan kini su tinaluˈ ni Isus, bileng nilan dayun su sadap nilan, migdunut ilan tuˈu dini Isus, suminakup nailan diniin.
21 Naa benaˈ minundas pa si Isus, duun pelumi mipegitaˈen duaˈ tawan mekpated dadema, si Santiago mukaˈ si Juan, gamaˈ nilan si Sebedeo. Dia ilan duaˈ sekayan nilan, ilan nu gamaˈ nilan kia si Sebedeo, pengendamen nilan su pukut nilan. Inggat ilan dayun ni Isus sumakup diniin. 22 Sikna midengeg nilan, binilin nilan dayun su sekayan nilan sampay su gamaˈ nilan, dayun ilan duaˈ megdunut dini Isus, suminakup nailan dema diniin.
Mikpetuˈun mukaˈ Migukit si Isus sampay Mineguliˈ tu nga Migladu
23 Naa mendadi si Isus, lineepen su tibuuk prubinsya Galilea kia, mikpetuˈun dia nga simbaan nu getaw Judea mukaˈ migukit di Gempia Petenday puˈ pikpuunan na su Keglekaunutan nu Megbebayaˈ. Pineguliˈanen pa pagid su nga migladu, pia alandunig leduunen atawaka kulang dig lawasen. 24 Saˈ maˈantu, misigwag sug dengeganen, sampay tu tibuuk benwa Siria, kaas iwit ditu niin su kelaun getaw misaitan. Adin su milegenan, pia alanduni puunanen, saˈ leduun saˈ silunuˈan menulay, saˈ binabuy sampay su pilung, pineguliˈan ni Isus gelaˈ. 25 Kaas melaun gupia getaw duminunut diniin. Sug duma, getaw Galilea, sug duma, genat ilan tu Sepuluˈ Lunsudan mukaˈ tu Jerusalem, dakus tug liwagan Judea, sampay tug dipag Jordan.