¹ Naa benaˈ minitaˈ ni Isus su melaun gupia getaw mipungun dia, subay tumiwad iin dig bentud, dayun migingkud. Piglidungan dayun si Isus nu nga sakupen, ² dayun mikpuun mektituluˈ tu nga getaw.

³ Mendadi kaliˈ pektaluˈ si Isus, “Naa, adin su engkenenen puˈ duuni kulangen tu kekesuunen, liliag iin, puˈ mikesakup tu Keglekaunutan nu Megbebayaˈ!

⁴ “Adin su milegenan, liliag dadema, puˈ pengemuˈen nu Megbebayaˈ!

⁵ “Adin su mekpebabaˈ dig lawasen, liliag dadema, puˈ pitenged diniin su tibuuk lumbang!

⁶ “Adin su megutem mukaˈ kuaun di kekesuunen, liliag dadema, puˈ pebesugen dun nu Megbebayaˈ!

⁷ “Adin su melilelaaten tug dumanen, liliag dadema, puˈ lelaatan dadema nu Megbebayaˈ!

⁸ “Adin su mekesuun gupia dig delendemanen, liliag dadema, puˈ maitaˈen pa su Megbebayaˈ!

⁹ “Adin su mekpeseksud tu samatawen, liliag dadema, puˈ iini paingalan dun nu Megbebayaˈ, bataˈen!

¹⁰ “Adin su pelegetan sabaˈ nu kekesuunen, liliag dadema, puˈ mikesakup na tu Keglekaunutan nu Megbebayaˈ!”

¹¹ Laung padun ni Isus, “Naa saˈ maˈantu, saˈ tampalaksaan amu mukaˈ pelegetan amu dakus duuni membaal mekatag diniu sabaˈ nu kesakup niu dinaan, naa liliag amu. ¹² Kaas saˈ maˈniai mbianan niu, pegleliag amu dun, puˈ duun pai sugda diniu gembagel ditu gekbus langit. Puˈ iini sama niu, su nga pimuunan nu Megbebayaˈ dengantu, puˈ maˈantu dademai kekpeleget dinilan nu getaw.”

¹³ Kaliˈ pektaluˈ si Isus, “Naa yamu, pitanggiˈu amu tu masin nu tibaˈan getaw. Laak ki masin, saˈ meksitebang, kendutaˈen ma dun pekpepuliˈ tu kepaiten? Saˈ kanaˈ na gempait, ndaˈ nai gatagen, benaˈ belengen, maindegan na laak nu getaw.

¹⁴ “Pitanggiˈu damu dema tu suluˈ, medelagan dun su tibaˈan getaw dig lumbang. Mukaˈ kig lunsud pa pagid, saˈ pinenggiˈ dig dibabaw bentud mbetang, medayag gupia nu getaw. ¹⁵ Mesama dadema di suluˈ. Saˈ tutudan, ndiˈ dayun ukluban bandi, segaga betangen dig dempaˈan, adun medelaganen su tibaˈan getaw dia seled nug balay. ¹⁶ Kaas yamu, maˈantu dadema. Subay mekesuun amu, damikian dun tuiag amu di gedapan nu getaw, adun maitaˈ nilan ki penggulaulaan niu melengas, penalan nilan dayun su Gamaˈ niu ditu gekbus langit.”

¹⁷ Kaliˈ pektaluˈ si Isus, “Mendadi, kanaˈ iini delendemen niu puˈ luminusadu dun dinig lumbang adun suklian ku su Palinta nu Megbebayaˈ pisulaten dini Moises mukaˈ tu ngag duma pimuunanen dengantu. Sinangkaliˈ su Palinta, penuuden ku! ¹⁸ Puˈ taman taluˈu diniu, sampay megelaˈ mbeleng su gekleb langit buˈ lupaˈ, ki Palinta, ndiˈ mengkanan sektaang taluˈ, subay megelaˈ menuud. ¹⁹ Kagina maˈantu, pia su tampusan megaan pinalinta, adin su memilas dun mukaˈ tituluˈaneni samatawen memilas da dun dema, iini mbaal tampusan gembabaˈ sakup di Keglekaunutan nu Megbebayaˈ. Dagid adin dema su dumunut tu Palinta mukaˈ mektituluˈ di samatawen dumunut da dun dema, iini mbaal metaas sakup di Keglekaunutan nu Megbebayaˈ. ²⁰ Kaas taman taluˈu diniu, ndiˈ amu mekesakup tu Keglekaunutan nu Megbebayaˈ, subay ki kekesuun niu, metuud pa di kekesuun nu nga mekpetuˈun di Misulat Palinta nu Megbebayaˈ mukaˈ nu nga Pariseo.”

²¹ Naa mendadi, miktituluˈ si Isus, laungen, “Misuunan niu puˈ dengantu, tinituluˈ tu nga getaw su palinta, laung, ‘Ndiˈa pekpatay. Adin su mekpatay, ukuman.’ ²² Laak dagid iin pa paduni taluˈu diniu nandaw, adin su getaw mangit di samatawen, ukuman dadema. Adin su menampalaksa dig dumanen, dengaten ditu Pikumpungan nu Metaas Gukum nu getaw Judea. Adin su getaw mektaluˈ dig dumanen, ‘Benguˈbenguˈen ka,’ mekangay tug linaw gapuy su mektaluˈ dun. ²³ Kaas saladuaˈ diniu, saˈ diaan ka gentudan gilak megilaka sia tu Megbebayaˈ, dayun melabuˈ dig delendeman mu puˈ duunig laatan ginaa nug duma mu diniˈa, ²⁴ naa ndiˈ mu pa ilakay sug betang mu. Subay bilinen mu deliˈ dia mesempel di gentudan gilak, puˈ laaway mu pa deliˈ sug duma mu kia adun megeksud amu, dekaga pa mpuliˈ megilak tu Megbebayaˈ.”

²⁵ Laung ni Isus, “Saˈ duuni dumangat diniˈa, dedeliˈay mu pengamuyuˈay, selian niu duaˈ dia pa dalan pangay tu pengukuman. Puˈ tekaw mbuus saˈ mateng amu ditu pengukuman, pegwakila niin dayun tu kuis. Dayun pegwakila pelum tu pulis. Deksuˈanen, pirisuun ka. ²⁶ Taman taluˈu diniˈa, ndiˈa na mekeguaˈ tu pirisuan, subay megelaˈ mu pa sia biaday su selaˈan mu, ndiˈ na engkanan, pia selaad siin.”

²⁷ Pibundas gusay ni Isus su taluˈen, “Mendadi, misuunan niu puˈ duuni palinta ditu Misulat Taluˈ nu Megbebayaˈ, laung, ‘Ndiˈ a pegdusa.’ ²⁸ Dagid duun pa paduni taluˈu diniu nandaw, pia laak pegenlengan da nu getawig libun, saˈ tebiaˈ dialem ginaanen mayak dun, naa kiin, mikesalaˈ dusa. ²⁹ Kaas saladuaˈ diniu, saˈ pegdaangan ka, ki mata mu dapit lintui mekesabaˈ dun, naa asak mui mata mu kiin, beleng mu dayun! Puˈ melengas pa diniˈa saˈ salabuukig lisu mata mu, sabayaˈ su tibuuk lawas mu, lebuˈen tug linaw gapuy. ³⁰ Mukaˈ pagid saˈ pegdaangan ka, ki kemet mu pelum dapit lintui mekesabaˈ dun, naa putuk mui kemet mu kiin, beleng mu dayun! Puˈ tumuˈ pa pungkula, sabayaˈ mekauliˈ tug linaw gapuy su tibuuk lawas mu.^a

³¹ “Naa duun pagidi palinta, laung, ‘Adin sug laki belengenen su sawanen, subay mekpebaal pa keligenan tuˈus dun, begayen dayun ditu sawanen.’ ³² Dagid iin pa paduni taluˈu diniu nandaw, adin sug laki belengenen su sawanen, asa ndaˈ penlelingay sug libun, dayun saˈ duun pelumig lain laki menginsawa dun, naa kiin, mikesalaˈ dusa sug libun, laak sug bekna sawaneni mikesabaˈ dun. Mukaˈ padun saˈ megbeleng su senlangan, adin dayunig lain laki menginsawa pelum dig libun kia, naa mikesalaˈ dadema dusa.

³³ “Naa misuunan niu puˈ duun pagidi palinta tu getaw dengantu, laung, ‘Ndiˈa sumapa dig balus. Adin su pesaden mu tu Kaunutan Megbebayaˈ, tumanay mu.’ ³⁴ Dagid iin pa paduni taluˈu diniu nandaw, saˈ masad amu, ndiˈ amu sapa. Saladuaˈ diniu, ndiˈa daan sapa sembayan mu sug langit, puˈ iini gingkudan nu Megbebayaˈ. ³⁵ Ndiˈa dadema sapa, sembayan mu sug lumbang, puˈ iinig bendayan nu Megbebayaˈ. Dakus su Jerusalem dadema, ndiˈa dadema sapa sembayan mu, puˈ iinig lunsud nu Tampusan Metaas Gadiˈ, su Megbebayaˈ. ³⁶ Ndiˈa daan sapa, pia sembayan mu su gumul mu. Puˈ su kilawan, kanaˈ iini megbayaˈ tu gumulen. Puˈ pia su sebalu tug buuk mu, kanaˈ yaˈai megbayaˈ di keputiˈen. ³⁷ Kaas pengakuˈ na laak amu atawaka pegbelibad amu, daal daia. Puˈ saˈ sumapa amu, midunutan niu su mauyaˈan nu Palin.

³⁸ “Naa misuunan niu pa pagid puˈ duuni palinta, laung, ‘Saˈ duuni getaw mekpebuta di samatawen, su mikpebuta, butaan dadema. Mesama di getaw meksepuˈ ngisi nu samatawen, sepuˈan dadema ngisi.’ ³⁹ Dagid iin pa paduni taluˈu diniu nandaw, saˈ pelaatan amu, ndiˈ amu suliˈ. Kaas saladuaˈ diniu, saˈ pinenggiˈ depiˈen ka di muluˈ mu dapit lintu, pedapiˈ mu dun pa pagid su sedibaluy muluˈ mu ditug duminapiˈ diniˈa. ⁴⁰ Saˈ duuni dumangat diniˈa, iini peluaten diniˈa ki suub mu, begay mu dun pa pagid su kamisita mu, peduma mu padun su suub mu. ⁴¹ Saˈ duuni pebaba diniˈa nu getaw sala kilumitru, baba mu duaˈ kilumitru. ⁴² Saˈ duuni menengi diniˈa, begayay mu. Saˈ duuni medam diniˈa, pedam mu.

⁴³ “Naa misuunan niu pa pagid su penteluˈen dengantu, laung, ‘Petail mu sug duma mu. Su kuntra mu, bentaay mu.’ ⁴⁴ Laak kinii taluˈu diniu nandaw, ki nga kuntra niu, petail da niu dema. Ki nga mekpeleget diniu, penenebiay niu mpianan. ⁴⁵ Puˈ saˈ maˈniai penggulaulaan niu, mengemaˈan amu tu Gamaˈ niu ditu gekbus langit dig betad. Puˈ daniin betad, pedelaganen gendaw su mekesuun getaw mesama di nga melaat getaw, begayanen dupiˈ su gempiaig betaden mesama da di nga melaatig betaden. ⁴⁶ Puˈ saˈ iin da laaki petailen niu su mekpetail diniu, bantang bamu sugdaan dun nu Megbebayaˈ? Puˈ pia su nga melimbung mendawat buis, mekpetail dailan dema tu nga mekpetail dinilan! ⁴⁷ Mukaˈ saˈ iin laaki penembaˈen niu su nga sambat niu, penalan bamu dun? Pia su kanaˈ mekpetuud tu Megbebayaˈ, maˈnia dademaig betad nilan! ⁴⁸ Yamu dagid, subay menggangeti kekesuun niu, maaˈ dadema nu Gamaˈ niu ditu gekbus langit, mekesuun tantu.”