4
Pingindanan nu Palin si Isus
1 Naa mendadi kini si Isus, minuliˈ genat ditu tubig Jordan, pingepuˈan na nug Balakat nu Megbebayaˈ. Benaˈ ndaˈ maiben, inabay dayun si Isus nug Balakat nu Megbebayaˈ mekpanawpanaw tug limawaˈ. 2 Saananen dia, pingindanan nu Palin si Isus seled paat puluˈ gebii. Laak gikteb nu kegbebenwanen dia, ndaˈ siben aan si Isus. Kaas benaˈ mitektaki paat puluˈ gebii, migutem gupia.
3 Mendadi, miktaluˈ su Palin dini Isus, “Mendadi, yaˈa sug Bataˈ nu Megbebayaˈ, daw. Naa saˈ pinenggiˈ metuud, naa kig batu kinuˈ, pebaluy mu daw pan.”
4 Dagid sumimbag si Isus, laungen, “Paa, duuni sinulat ditu Misulat Taluˈ nu Megbebayaˈ, laung, ‘Kanaˈ gaan laaki ketubuˈan nu kilawan.’”
5 Naa saˈ maˈantu, pituad pelum nu Palin si Isus, pinitaˈen dayun diniin selingka su kelaunan peglegediˈan dinig dibabaw lumbang. 6 Miktaluˈ pelum su Palin dini Isus, “Naa kig launanen kiin, yaˈa nai begayan ku dun, yaˈai pebiaˈen ku dun, mukaˈ daniˈa su kelaunlaun kelengasen. Puˈ naani pigwekilan dun, kaas pia taˈ taway duni pegwekilan ku dun, naan dai metau dun. 7 Kaas saˈ mengamuyuˈa dinaan, daniˈa na su kelaunanen.”
8 Dagid sumimbag si Isus, laungen, “Duun pagidi misulat, ‘Su Kaunutan mu Megbebayaˈ laaki penluˈudan mu, ndaˈig lain temuyen mu.’”
9 Mendadi, iwit na pelum nu Palin si Isus tu Jerusalem, piˈindegen dayun ditu tampusan ditaas nug Balay Pengedapan tu Megbebayaˈ. Miktaluˈ dayun su Palin diniin, “Saˈ metuud puˈ yaˈa tuˈu sug Bataˈ nu Megbebayaˈ, naa sampaka diag lupaˈ. 10 Puˈ duuni misulat ditu Taluˈ nu Megbebayaˈ, laung, ‘Suguˈen nu Megbebayaˈ su nga sesuguˈenen getaw langit megingat diniˈa.’ 11 Mukaˈ duun pa pagidi misulat, ‘Sipupuun ka nilan, adun ndiˈa meseknun dig batu.’”
12 Dagid sumimbag si Isus, laungen, “Duun pagidi misulat, ‘Su Kaunutan mu Megbebayaˈ, ndiˈ mu pengindanay mekatag di tinaluˈen.’”
13 Naa benaˈ mitubus si Isus penulayay sia di kelaun gininisan kengindan dun, bilengan pa deliˈ nu Palin.
Mikpuun Mektituluˈ si Isus tu Prubinsya Galilea
14 Naa saˈ maˈantu, mipuliˈ si Isus ditu Galilea, ginuungan, sabaˈ pingepuˈan nug Balakat nu Megbebayaˈ. Mileep dig lumibut benwa sug dengeganen. 15 Minamal mektituluˈ dia nga simbaan nu getaw Judea, enalen dadema nu kelaun getaw.
Pimilas si Isus tug Lunsud Nazaret
16 Naa minateng puliˈ si Isus ditu Nazaret, sug lunsud tandaˈ mitenudanen. Benaˈ sala Gendaw Pelali, minangay si Isus tu simbaan nu getaw Judea, maaˈ nug betaden. Benaˈ dia seled simbaan, migindeg adun megbasa di Misulat Taluˈ nu Megbebayaˈ. 17 Mendadi, tinulun diniin su sinulat nu pimuunan nu Megbebayaˈ si Isaias. Kaliˈ belatay ni Isus su sinulat, minitaˈen ki misulat dakus binasanen, laungen,
18 “Naan, pingepuˈanu nug Balakat nu Kaunutan Megbebayaˈ,
puˈ tinduˈu niin megukit Gempia Petenday tu nga gempusuk getaw.
Pimuunanu niin adun petendayu tu nga dinaap sug bian kebeluy dinilan.
Pimuunanu niin adun petendayu tu ngag buta sug bian keneguliˈ di mata nilan.
Sinuguˈu niin tu nga getaw pilaatan, adun lukatu dinilan
19 dakus pesuun ku dinilan su taun nu kegawen nu Kaunutan Megbebayaˈ di nga kilawan.”
20 Benaˈ mitubusen besaay, linulun puliˈ ni Isus su sinulat, inuliˈen di sala tawan migabang dia. Migingkud puliˈ si Isus, pinentengan gupia nu kelaun getaw dia simbaan. 21 Kaliˈ pektaluˈ si Isus di nga getaw dia, “Mendadi, ki misulat kini di Taluˈ nu Megbebayaˈ, minuud gupia nandaw, pebian di kegbasau dun diniu.”
22 Saˈ maˈantu, didial si Isus nu kelaun getaw dia. Misebuˈan ilan ditu melengas gupia taluˈen. Dagid maaˈ laung pa nilan, “Asa ki getaw kini, kanaˈ bain sug bataˈ laak ni Jose?”
23 Benaˈ midengeg ni Isus, kaliˈ sembag, “Mabuˈ teluˈen pa niu dinaan ki penteluˈen nu getaw, laung, ‘Memulung, pauliˈay muig lawas mu. Saˈitada su nga mekesalebuˈ tuˈus midengeg nami pinggulaula ditug lunsud Capernaum, naa iini baal mu pa pagid dinig daan benwa mu.’ 24 Naa metuud daan,” maaˈ laung pa ni Isus, “ki pimuunan nu Megbebayaˈ, kanaˈ mpenembaˈ diag daan benwanen. 25 Naa taluˈu diniu tuˈu, maˈnia dademai mipenggulaula dengantu, su timpu pa ni Elias. Kig benwa Judea kini, ndaˈig dupiˈ dun gikteb telu taun buˈ ginengaˈ, kaas mibianan meliget gutem su tibuuk benwa. Laak pia melaun paig balulibun dinig benwa ta Israel, 26 ndaˈ nu Megbebayaˈ suguˈay si Elias ditu nilan, subay ditu laak sala tawan balulibun tug lain bansa, ditu Sarepta sakup Sidon. 27 Mesama dadema ditu timpu nu pimuunan nu Megbebayaˈ si Eliseo. Melaun pasiˈ sakup Israel pegladu mekesalebuˈ nuka, laak ndaˈidun lain piuliˈanen, daal da ki sala tawan ngalanen si Naaman, getaw Siria.”
28 Mendadi, su melaun getaw dig dialem simbaan, benaˈ midengeg nilani tinaluˈ kia ni Isus, mitutung ilan gangit. 29 Minlibuat ilan megutid dini Isus diag lunsud. Inagak nilan tu gilidan nug bentud tandaˈ pisekan tug lunsud. Benaˈ midepet ilan tu keba, lebuˈen nilan sia si Isus. 30 Laak dagid minguliksuk si Isus di tebenan getaw, mikegliaw dinilan.
Piuliˈan ni Isusi Getaw Piglegetan Menulay
31 Naa tumigbeng si Isus tu Capernaum, sala lunsud na pelum, sakup dadema Galilea. Benaˈ Gendaw Pelali na, mikpetuˈun dia simbaan nu getaw Judea. 32 Saˈ mikpetuˈun si Isus, misebuˈan su nga getaw, puˈ su tituluˈanen, duuni pegbayaˈen. 33 Naa duuni sala tawan dia, piglegetan menulay. Iin, benaˈ minitaˈen si Isus, miktegas dayun, laungen, 34 “Ii, yaˈa Isus kiin, getaw Nazaret, taˈ maig labet mu dinami? Midiniin ka ba mekpatay dinami? Mailalau yaˈa, yaˈa ma su Pimiliˈ nu Megbebayaˈ!”
35 Pimaag ni Isus su menulay, laungen, “Ndiˈa pesasak! Pegawaˈa di getaw kiin!” Naa ki menulay kini, pibuksaken su getaw di gedapan nilan, dayun tuˈu megawaˈ diniin, ndaˈen tanan mpesaitay ki piglegetanen kia.
36 Mendadi su kelaun getaw dia, misebuˈan ilan dun gupia. Laung nilan, “Alandun ini, ki tituluˈan nu getaw kini? Pia su menenulay, duuni ginuungen mukaˈ pegbayaˈen mesuguˈen, mautidan ilan dayun!” 37 Saˈ maˈantu, migleleep ditug lumibut benwa sug dengegan ni Isus.
Pineguliˈan ni Isusi Melaun Getaw
38 Naa benaˈ gumiwaˈ si nga Isus dia simbaan nu getaw Judea, minangay ilan ditug balay ni Simon. Mendadi mitaang dun dema, pegladu ki penugangan ni Simon libun, gembagai panasen. Mendadi, inubug nu nga getaw dini Isus, pegebanganen kig libun kia. 39 Mikpesempel diniin si Isus, sinuguˈen dayun mawaˈ su panasen. Migwanan dayun. Suminambut megbuat sug libun mukaˈ mikpelutuˈ, migilak dayun dini nga Isus.
40 Naa benaˈ sungu na mesindepi gendaw, adini nga getaw duunig dumanen pegladu, pinguit nilan ditu ni Isus, migininisan naig leduun nilan. Pigleteb ia ni Isus depenay, diadia piuliˈanen. 41 Mukaˈ pa padun, melaun getaw piglegetan menenulay, pingutidan dadema ni Isus dinilan su menenulay. Miktegas su menenulay, laung nilan, “Yaˈa sug Bataˈ nu Megbebayaˈ!”
Laak ndaˈ begay ni Isus mektaluˈtaluˈ su menenulay, puˈ misuunan nilan, iin tuˈu su Tinduˈ nu Megbebayaˈ Meglekaunutan.
Su Kegwali ni Isus tu nga Simbaan nu Getaw Judea
42 Naa benaˈ miglegendaw, minawaˈ si Isus diag lunsud, minangay tug limawaˈ. Laak pinengaw nu nga getaw dia. Naa benaˈ mibaangan nilan, inubug nilan sia diniin, ndiˈ na mekpesuay dinilan. 43 Laak kaliˈ pektaluˈ si Isus, “Subay megwali pau dema Gempia Petenday nu Keglekaunutan nu Megbebayaˈ ditu ngag lain lunsud, puˈ iini sinuguˈ dinaan nu Megbebayaˈ.”
44 Naa saˈ maˈantu, minundas si Isus, pegwali dia nga simbaan nug benwa Judea.