¹ Naa benaˈ mitubus ni Isus tituluˈay su sepuluˈ buˈ duaˈ tawan sakupen, mipanaw, minangay megukit mukaˈ mektituluˈ dia ngag lumibut lunsud.

² Naa si Juan kiin, su Memunag Tubig, benaˈ pitendayan ditu pirisuan mekatag di nga pinggulaula ni Kristu, duun dayuni nga sakup ni Juan sinuguˈen meditu ni Kristu. ³ Mendadi, benaˈ midepet dia ni Isus su nga sinuguˈ, sinaak nilan diniin, “Sir, saˈ mesuˈat, taluˈ mu dinami, yaˈa na tuˈu ki pisuun pedaan ni Juan puˈ lumusad, atawaka megelat pami dig lain?”

⁴ Mendadi, sumimbag si Isus, laungen, “Naa, puliˈ amu ditu ni Juan, ukit niu diniin ki taman minitaˈ niu kini mukaˈ ki midengeg niu. ⁵ Su ngag buta, mikengitaˈ na. Su nga pilung, mikepanaw na. Su nga migladu mekesalebuˈ nuka, miuliˈan na. Su ngag bengel dema, mikedengeg na. Sampay su nga minatay, pitubuˈ na puliˈ. Mukaˈ su gempusuk getaw, inukitan na tu Gempia Petenday. ⁶ Kaas adini getaw ndiˈ memilas dinaan, iini liliag!”

⁷ Mendadi saˈ mipalus su nga pimuunan ni Juan, migukit si Isus tu melaun getaw mekatag dini Juan. Sinaak ni Isus dinilan, “Naa kini si Juan, saˈ linaawan niu iin ditug limawaˈ, alandun mai pedetengen niu diniin? Laung ba niu dun si Juan, maaˈ nu sala puun tigbaw, melemu mpilay nu genus? Kanaˈen. ⁸ Naa saˈ maˈantu, alandun mai pedetengen niu diniin? Laung niu dun puˈ getaw migimakay? Baa, kanaˈen dadema, puˈ su getaw migimakay, subay ditu laak penengaway balay nu nga gadiˈ! ⁹ Mendadi saˈ maˈantu, taˈi pedetengen niu maitaˈ niu? Getaw pimuunan nu Megbebayaˈ? Waˈa lai! Mukaˈ taman taluˈu diniu, kini si Juan, kanaˈ laak pimuunan nu Megbebayaˈ. ¹⁰ Puˈ iinen dadema su mibetang ditu Misulat Taluˈ nu Megbebayaˈ, laung, ‘Miktaluˈ su Megbebayaˈ, Mendadi paunaan ku diniˈa ki pemuunan ku, puˈ adun pengendamenen sug bianan mu.’ ¹¹ Naa taman taluˈu diniu,” laung ni Isus, “genat pa dini Adan sampay nemun, ndaˈi sala tawan metaas pa dini Juan. Laak dagid pia maˈantu, adin su tampusan gembabaˈ sakup di Keglekaunutan nu Megbebayaˈ, iini metaas padun dini Juan. ¹² Puˈ genat tu ketuaˈ ni Juan sampay nemun, ki Keglekaunutan nu Megbebayaˈ, mamaˈ peglumpakan nu melaun gupia getaw, puˈ mektinantu sumakup dun su getaw. ¹³ Naa su Keglekaunutanen, sinulat pedaan nu kelaun pimuunan nu Megbebayaˈ ditu Misulat Taluˈen, dakus sinulat dadema ditu Palinta ni Moises, su ndaˈ pa metuaˈ si Juan. ¹⁴ Dayun si Juan, saˈ petuuden niu saˈ ndiˈ, iini misugat ditu misulat pedaan puˈ duuni pemuunan, ngalanen si Elias, metuaˈ dinig lumbang. ¹⁵ Mendadi, adin sug duuni telinganen, mekineeg dema tuˈu!”

¹⁶ Sinumpatan gusay ni Isus su taluˈen, laungen, “Mendadi ki getaw nemun, alandun mai penenggiˈan ku dun? Petanggiˈu di gembataˈ pemeglingkulu pegayep dia padiˈan. Beksayan nilan su nga samambataˈ nilan, laung nilan, ¹⁷ ‘Mauma saˈ minlantuyan ami diniu, ndaˈ amu peksabay? Dayun saˈ miksulang ami, mauma ndaˈ amu pelum pengaduy?’ ¹⁸ Puˈ mituaˈ si Juan,” laung ni Isus, “iinig betaden mekpuasa mukaˈ ndiˈ minum mekebulek. Laung dayun nu nga getaw, ‘Pingepuˈan menulay!’ ¹⁹ Tubus itu naan kini, kig Bataˈ nu Kilawan, mituaˈu pelum, betadu maan dau mukaˈ minum dau dema. Laung pelum nu getaw, ‘Paa, bentayay pa daan niu, medalu masiˈ maan mukaˈ penenatan meginum, sambaten pa paduni nga mendawat buis mukaˈ ngag duma mekesesalaˈ getaw!’ Laak dagid ki tantu sinuunan genat tu Megbebayaˈ, mailala dia penggulaulaan nu megdunut dun.”

²⁰ Naa su getaw sakup di ngag lunsud dia tandaˈ melaun mekesalebuˈ pinggulaula ni Isus, ndaˈ ilan gusay peksikesuun. Mendadi, pimaag ilan ni Isus, laungen, ²¹ “Paa, yamu pa di nga getaw Corasin mukaˈ getaw Betsaida, mekelelaatlelaat amu! Puˈ su nga mekesalebuˈ pinggulaulau dig lunsud niu, saˈ pinenggiˈ ditu mipenggulaula Tiro mukaˈ Sidon dengantu, aba, su nga getaw ditu, migdedaliˈ ilan sia memekseluk saku dakus meglebug gabu dig lawas nilan, tuˈus tu kegbiksuˈ nilan sia tu salaˈ nilan! ²² Kaas taman taluˈu diniu, saˈ mateng ki Gendaw nu Kengukum nu Megbebayaˈ di tibaˈan getaw, tumuˈ megaan pa su ginukuman di nga getaw Tiro mukaˈ Sidon kitu, sabayaˈ di ginukuman diniu! ²³ Mukaˈ yamu dadema di nga getaw Capernaum! Petaasen ma niu siai tindeg niu, sampay medepet amu ditu gekbus langit? Baa, lebuˈen amu tug linaw gapuy! Puˈ su mekesalebuˈ pinggulaulau dig lunsud niu, saˈ pinenggiˈ mibaal ditu Sodoma dengantu, naa ditu pa sia sug lunsud kia sampay da dun nemun, ndaˈ sia ukumay!” ²⁴ Diksuˈ ni Isus su taluˈen, “Taman taluˈu diniu, saˈ mateng su Gendaw nu Kengukum nu Megbebayaˈ di tibaˈan getaw, tumuˈ megaan pai ginukuman tug lunsud Sodoma kitu, sabayaˈ di ginukuman diniu!”

²⁵ Naa mitaang dun, minenabi si Isus, laungen, “Mikpaladpaladu diniˈa, Amaˈ, yaˈai Kaunutan di gekleb langit buˈ lupaˈ! Puˈ su tantu sinuunan kini, iglud mu tu nga getaw metaasi sinuunanen, puˈ iin laaki pisuunan mu dun, ki nga getaw kini maikaˈi sebutenen. ²⁶ Naa melengas da, Amaˈ, puˈ maˈnia dai miuyaˈan mu.”

²⁷ Laung padun ni Isus, “Sug lumaun metuud, migelaˈ pegwakil dinaan nu Gamaˈu. Naa naan kini, kig Bataˈen, ndaˈiduni suminambat dinaan, subay su Gamaˈu laak. Mukaˈ su Gamaˈu, ndaˈidun dademai suminambat diniin, subay naan laak kini nug Bataˈen, sampay adin laaki getaw mauyaˈan ku pesambatu dun.”

²⁸ Laung ni Isus, “Mendadi, pedini namu naan, adin diniuig bilayan sabaˈ megbaba gembegat, puˈ naan, peleliin ku amu. ²⁹ Iini baba niu, ki pebabau diniu, mukaˈ pektuˈun amu dinaan. Puˈ sug betadu, mesumayaˈ, mukaˈ mekpebabaˈu dig lawasu. Kaas saˈ medini amu naan, mekengulali amu tuˈu. ³⁰ Puˈ ki pepisan ku diniu, melemu maban. Ki pebabau diniu dema, megaan.”