12
Kaunutan nu Gendaw Pelali si Isus
1 Naa benaˈ ndaˈ maiben, duuni Gendaw Pelali, minayan si nga Isus di pegimulanan trigo. Naa megutem dema su nga sakupen, mikpuun ilan mengetes tu trigo, dayun nilan pekaanay. 2 Mendadi ki nga Pariseo, benaˈ minitaˈ nilan su kengetes nu nga sakup ni Isus tu trigo, laung nilan diniin, “Paa, bentayay mu pa daan kig baalen ni nga sakup mu kiin! Ki Gendaw Pelali, binandu dinita ditu Misulat Palinta nu Megbebayaˈ duunig baalen ta di gendaw kini!”
3 Kaliˈ sembag si Isus dinilan, “Baa, pia da. Puˈ si David kanugdiin, ndaˈ ba niu mbasa ki pinggulaulanen dadema saˈ migutem, ilan nu ngag dumanen? 4 Puˈ sumiled si David ditug Balay Pengedapan tu Megbebayaˈ, inaanen su pan ginilak ditu Megbebayaˈ, ilan nu ngag dumanen. Asa binandu dinilan ki pan kia, puˈ misulat ditu Palinta nu Megbebayaˈ, ndaˈiduni maan dun, subay su laak ngag belian.a 5 Keduaˈen, ndaˈ ba niu dadema mbasa ki sala sinulat ditu Palinta nu Megbebayaˈ, puˈ su ngag belian dengantu, kada Gendaw Pelali, duun daig baalen nilan ditu seled nug Balay Pengedapan tu Megbebayaˈ? Maˈantu, lepeng pimilas nilan su Misulat Palinta mekatag di Gendaw Pelali, laak pia maˈantu, ndaˈ dailan dema mekesalaˈ di pegitaˈen nu Megbebayaˈ. 6 Naa taman taluˈu diniu, duun nai mituaˈ dini, metaas pa dig Balay Pengedapan tu Megbebayaˈ. 7 Mukaˈ duuni sinulat ditu Taluˈ nu Megbebayaˈ, laung, ‘Iini mauyaˈan ku, lelaatan niu su samataw niu, sabayaˈ su ngag betang ilaken niu dinaan.’ Kaas saˈ sia mesabut niu gupia ki misulat kia, ndiˈ niu sia pegdenaˈay nga sakupu kini, ndaˈ ilan mekesalaˈ. 8 Puˈ naan kini, kig Bataˈ nu Kilawan, naani Kaunutan megbayaˈ dig baalen nu kilawan metaang di Gendaw Pelali.”
Piuliˈan ni Isusi Getaw Mingupesi Sedibaluy Kemeten
9 Benaˈ minundas si Isus, minangay di simbaan nu getaw Judea. 10 Naa mitaang duuni getaw dia, mingupesi sedibaluy kemeten. Mendadi ki ngag duma getaw dia, mauyaˈan nilan, duun siai gempia dangat nilan dini Isus. Kaliˈ ilan saak diniin, “Naa saˈ metaang di Gendaw Pelali, biwang ba dinita ditu Misulat Palinta nu Megbebayaˈ, meneguliˈ ita?”
11 Sinaak dayun ni Isus, “Naa saˈ pinenggiˈ duuni sala tawan diniu duuni karnirunen, dayun melabuˈ di medalem luak su karnirunen, metaang di Gendaw Pelali, ndiˈen ba selebeten dayun, adun guunenen? 12 Naa su getaw, metaas pa tananig lagaˈen, sabayaˈ nu karniru! Kagina maˈantu, biwang ditu Misulat Palinta nu Megbebayaˈ, pepianan tai samataw ta metaang di Gendaw Pelali.” 13 Laung dayun ni Isus di mingupesi kemeten kia, “Naa, tenggal mui kemet mu.”
Tinggalen dayun, mukaˈ miuliˈan, ndaˈ nai pegisuanen tug dibaluy kemeten. 14 Naa ki nga Pariseo kini, benaˈ minitaˈ nilan, mingguaˈ ilan dayun dia. Migyagayaga ilan dayun, minengaw ilan bian nilan mekpatay dini Isus.
Su Pimiliˈ Sesuguˈen nu Megbebayaˈ
15 Mendadi kaliˈ mesuunay ni Isus sug delendeman kia nu nga Pariseo, migawaˈ dia. Melaun gupia getaw miglendug diniin. Dayun su kelaun mimegladu, pineguliˈanen, 16 laak pimeeken ilan, adun ndiˈ nilan pesuun di ngag lain getaw ki pinggulaulanen. 17 Iini pigbuninen dun, puˈ adun menuud su pisulat dengantu nu Megbebayaˈ ditu Taluˈen, ki sinulat nu pimuunanen si Isaias, laungen,
18 “Kini su pimiliˈu sesuguˈen ku,
ki petailen ku, leliagenu dun gupia.
Pepengapuˈu diniin sug Balakatu,
kaas ki melegdeng betad puun dinaan, iini mekpetenday dun tu kelaun bansa.
19 Sug betaden, kanaˈ meksual. Ndiˈ megbeksay,
ndiˈ dadema menekeg mekpelaktag dia tebuˈan.
20 Saˈ su getaw pitanggiˈu di tigbaw mibuyuk, ndiˈen bekluˈen.
Mesama di getaw maaˈ nu suluˈ laak meglekaˈlekaˈ na, ndiˈen dadema pelengen.
Penemalanen su metuud, sampay daagen nu metuud sug limbung,
21 sampay su kelaun bansa nu getaw, sumalig na diniin.”
Ilegan si Isus Pingepuˈan nu Palin
22 Mendadi, duuni sala tawan iwit ditu ni Isus, buta mukaˈ beed pa pagid, sabaˈ silunuˈan menulay. Piuliˈan dayun ni Isusi getaw kia, mikektaluˈ puliˈ mukaˈ mikengitaˈ na. 23 Misebuˈan dayun su melaun getaw dia, sinaak nilan, “Kalukalu iinen na su pedetengen ta Sapuˈ ni David?”
24 Laak ki nga Pariseo, saˈ midengeg nilan, kaliˈ ilan pektaluˈ, “Aa, ki getaw kiin, iini megaganen dun utidayi menenulay, puˈ bigayan ginuung ni Beelsebul, su kaunutan nilan.”b
25 Laak misuunan ni Isus sug delendeman nilan. Kaliˈ pektaluˈ dinilan, “Adin su nasud meksimawiˈ mukaˈ megunay megbunuˈ, ndiˈ maiben metulag. Samanen ki salabuuk lunsud, atawaka salapenan. Saˈ meksimawiˈ mukaˈ meksual, metulag dadema. 26 Naa, maˈantu dadema si Satanas. Saˈ pinenggiˈ utidani menenulay di pegbayaˈ da gusay ni Satanas, naa maˈantu, ndiˈ ba meksimawiˈi peglegediˈanen? Dayun deksuˈanen, ndiˈ ba metulag? 27 Asa teluˈen niu, pengutidan ku su menenulay puun tu pegbayaˈ ni Beelsebul. Keduaˈen, saˈ sia metuud puˈ genat dini Beelsebuli pegbayaˈu mengutid dun, naa su nga sakup niu pelum, adin ba genat su pegbayaˈ nilan? Puˈ ilan, utidan da nilan demai menenulay. Baa, mitakesil amu nu pinggulaula nu nga sakup niu! 28 Laak dagid saˈ iin pasiˈi migbegay dinaan pegbayaˈ mengutid dun, sug Balakat nu Megbebayaˈ, naa maˈananen, mituaˈ na tuˈu diniu ki Keglekaunutan nu Megbebayaˈ.”
29 Mendadi laung ni Isus, “Ki getaw suled tug balay letaban getaw puˈ adun elapenen su pimetangen, mekendutaˈ mai kegalapen tu pimetangen, subay unaanen pa beluday kig letaban kia?c Dayun saˈ megaganen beluday kig letaban kia, naa megaganen tuˈu elapay ki pimetangen kia.”
30 Diksuˈ ni Isus su taluˈen, “Adini getaw kanaˈu sugut, iini kuntrau. Adini ndiˈ megabang dinaan mekpungun sakupu, iini mekpelak dun. 31 Kagina maˈantu, taman taluˈu diniu, su kelaun salaˈ nu kilawan sampay su kelaun keksudiˈen, pedesunen da. Dagid adin su getaw peksudiˈanen sug Balakat nu Megbebayaˈ, kiin, ndiˈ na pedesunen. 32 Adin pagidi getaw meksudiˈ dinaan kig Bataˈ nu Kilawan, pedesunen da dun. Dagid adin su getaw peksudiˈanen sug Balakat nu Megbebayaˈ, ndiˈ na pedesunen nemun, sampay di gendaw kiin ditug binayaˈ gebii buˈ gendaw.”
Ukumen su Getaw mekatag di Mitaluˈen
33 Kaliˈ pektaluˈ si Isus, “Naa su melengas bunga gayu, subay ditu penengaway melengas dadema gayu. Su pelum melaat gayu, melaat dademaig bunganen. Kaas saˈ peksimaˈen su gayu, iini kimanan, kig bunganen. 34 Paa, yamu pa di nga mamak! Mauma teluˈen niu su gempia, asa melaat amu getaw? Puˈ ki taluˈ nu getaw, iini megbuas dig delendemanen. 35 Kaas saˈ mekesuun getawi mektaluˈ, naa gempiai metaluˈen. Su pelum medupang getaw, melaat dademai metaluˈen.
36 “Taman taluˈu diniu, saˈ mateng su Gendaw nu Kengukum nu Megbebayaˈ di tibaˈan getaw, ukumen su getaw mekatag di taman mitaluˈen, kampuˈ nu milaksapen laak metaluˈ. 37 Kaas saladuaˈ diniu, saˈ ukumen ka na nu Megbebayaˈ, iini peksimaˈen, ki mitaluˈ mu, adun gempantek saˈ mbantanga ukuman saˈ kanaˈ.”
Su Mbianan nu Getaw Memilas dini Isus
38 Naa mendadi, duuni nga mekpetuˈun di Misulat Palinta nu Megbebayaˈ mukaˈ nga Pariseo, laung nilan dini Isus, “Sir, saˈ mesuˈat, penggulaula mu dawi mekesalebuˈ tuˈus di pegbayaˈ mu, puˈ bentayan nami.”
39 Dagid kaliˈ sembag si Isus, “Paa, yamu pa di nga getaw nemun, medupang amu gupia, memilas amu pelum tu Megbebayaˈ! Penengiin niu dinaani mekesalebuˈ tuˈus, asa daal da laaki tuˈus begay diniu, ki maaˈ nu pinggulaula nu pimuunan nu Megbebayaˈ dengantu si Jonas. 40 Puˈ si Jonas, telu gebii diag dagat, tug dialem tian nu gembagel sedaˈ. Naa naan kini, kig Bataˈ nu Kilawan, maˈantu dadema, subay telu gebiiu dig dialem lupaˈ. 41 Kaas saˈ mateng su Gendaw nu Kengukum nu Megbebayaˈ di tibaˈan getaw, naa su nga getaw dengantu sakup Ninibe, mbantang ilan megindeg tumakesil diniu nga getaw nemun. Puˈ saˈ tinituluˈan ilan ni Jonas, miksikesuun ilan. Naa yamu kiin, duun kinii mituaˈ diniu, metaas pa dini Jonas! 42 Mukaˈ saˈ mateng na tuˈu su Kengukum di tibaˈan getaw, naa sug Bai pa pagid tug benwa Seba dengantu, mbantang dadema megindeg tumakesil diniu! Puˈ daniin, miktegel mpanaw dinig benwa ta Israel, melayuˈ gupia dig benwanen, puˈ adun mekineeg ditu telisebuten tituluˈan ni Adiˈ Salomon. Mendadi yamu, taman taluˈu diniu, duun kinii mituaˈ diniu, metaas pa dini Salomon!
43 “Mendadi su menulay,” laung ni Isus, “saˈ utidan di getaw, leepenen dayunig benwa ndaˈi tubig dun menengaw pelelianen. Naa benaˈ ndaˈiduni mbaanganen, 44 maaˈ laungen dig dialem ginaanen, ‘Tumuˈ muliˈ nau tug balay kia pigenatan ku.’ Naa benaˈ mateng puliˈ tug balay kia, aba, metaanganen ndaˈ nai pegbenwa dun, siniligan na sug balay dakus pinikpesan. 45 Saˈ maˈantu, mangay dayun dumanen menenulay pitu buuk, melaat pa dun diniin, dayun megelaˈ ilan muliˈ dia. Kaas deksuˈanen, su kebetang nu getaw kia piglegetan salabuuk da sia menulay, melaat pa tug bekna mipenggulaulanen. Naa ki mpenggulaulanen kia, maˈantu dademai mbianan pa nu getaw nemun, melaat gupiaig betad nilan.”
Su Tantu Ginaˈ ni Isus mukaˈ Pateden
46 Naa benaˈ sinegay pa ni Isus mektituluˈ tu nga getaw, minateng su ginaˈen mukaˈ su nga pateden. Pegindeg ilan diag liu, pisabi nilan dayun si Isus. [ 47 Mendadi, pisuun dayun dini Isus, laung nu getaw, “Sir, su ginaˈ mu mukaˈ su nga pated mu, pegindeg ilan diag liu, peksebiin ka nilan.”]