10
Sinuguˈ ni Isus Mpanaw su Pitu Puluˈ buˈ Duaˈ Tawan Sakupen
1 Mendadi tubus nitu, duun pa paduni tinduˈ nu Kaunutan pitu puluˈ buˈ duaˈ tawan, sinuguˈen ilan meguna diniin pigdeduaˈ tawan, adun tukiden nilan laaway su ngag lunsud maikaˈ saˈ gembagel, adin su sungunen dadema laaway. 2 Miktaluˈ si Isus di nga sakupen, “Naa ki sengkuˈ, gembagel gupia sia, laak meliang dai getaw meglegani dun.a Kaas penenebi amu tu Megbebayaˈ, su gapuˈ nu sengkuˈ, adun suguˈenen pai ngag duma getaw meglegani. 3 Mendadi,” maaˈ laung pa ni Isus, “panaw namu! Dagid pektalentenay niu ini. Ki kesuguˈu diniu mpanaw, petanggiˈu amu di karniru mingingelet di nga mendapaˈ dun. 4 Naa ndaˈi uiten niu pitaka, saˈ gambag, pia sepatus. Mukaˈ ndiˈ amu melangan megabitabit dig dalan. 5 Adin sug bekna balay mekpepenaik diniu, udasay niu su getaw dun. Taluˈ niu, ‘Pepianani nga getaw dini.’ 6 Dayun su getaw dig balay kia, saˈ pangay tu tantu kepia, naa mpianan tuˈu. Laak saˈ kanaˈ pangay tu kepia, ndiˈ dadema mpianan. 7 Naa kig balay kia pepenaiken amu dun, ditu laak amu tuun. Adin su gikteb ilaken nilan diniu, aan niu, mukaˈ su painum diniu, inum niu dadema. Puˈ ki getaw megabang di ngag dumanen, mbantang gestuan di kaˈaanen. Mukaˈ ndiˈ amu peglelegalin dig lain. 8 Naa pia adinig lunsud medetengan niu, dayun penembaˈen amu dun, naa pia alanduni ilaken diniu dia, ndiˈ amu mekalangalang maan dun. 9 Pauliˈay niu su nga megladu dig lunsud kia, mukaˈ taluˈ niu dinilan, ‘Mesempel na diniu su Keglekaunutan nu Megbebayaˈ.’ 10 Adin sug lunsud medetengan niu, dayun ndiˈ menembaˈ diniu, naa angay amu diag duuni tebuˈan dun, pektaluˈ amu, 11 ‘Paa, pia sug lepup lupaˈ mineket di geksud nami, punasen nami, adun metakesiˈanig lunsud kini. Laak talentenay niu ini, mesempel na diniu su Keglekaunutan nu Megbebayaˈ!’” 12 Diksuˈ ni Isus su taluˈen, “Taman taluˈu diniu, saˈ mateng su Gendaw nu Kengukum nu Megbebayaˈ di tibaˈan getaw, tumuˈ megaan pai ginukuman tug lunsud Sodoma kitu, sabayaˈ di ginukuman tug lunsud kia ndiˈ menembaˈ diniu!”
Gembageli Ginukuman tu nga Memilas dini Isus
13 Kaliˈ pektaluˈ si Isus, “Paa, yamu pa di nga getaw Corasin mukaˈ getaw Betsaida, mekelelaatlelaat amu! Puˈ su nga mekesalebuˈ pinggulaulau dig lunsud niu, saˈ pinenggiˈ ditu mipenggulaula Tiro mukaˈ Sidon dengantu, aba, su nga getaw ditu, migdedaliˈ ilan sia memekseluk saku dakus meglebug gabu dig lawas nilan, tuˈus tu kegbiksuˈ nilan sia tu salaˈ nilan! 14 Kaas saˈ mateng ki Gendaw nu Kengukum nu Megbebayaˈ di tibaˈan getaw, tumuˈ megaan pa su ginukuman di nga getaw Tiro mukaˈ Sidon kitu, sabayaˈ di ginukuman diniu. 15 Mukaˈ yamu dadema di nga getaw Capernaum! Petaasen ma niu siai tindeg niu, sampay medepet amu ditu gekbus langit? Baa, lebuˈen amu tug linaw gapuy!”
16 Laung pa ni Isus tu nga sakupen, “Adini mekineeg diniu, iin dademai mikineeg dinaan. Adini memilas diniu, iin dademai mimilas dinaan. Mukaˈ adini memilas dinaan, mipemilasen dadema su suminuguˈ dinaan.”
Su Kauliˈ nu Pitu Puluˈ buˈ Duaˈ Tawan Sinuguˈ ni Isus Mpanaw
17 Naa ki pitu puluˈ buˈ duaˈ tawan kiin sinuguˈ ni Isus mpanaw, mipuliˈ ilan ditu niin, pinleliag ilan gupia. Kaliˈ ilan pektaluˈ, “Aa naa, Sir, pia su menenulay, masiˈ daagen nami, sabaˈ nu pegbayaˈ mu!”
18 Kaliˈ sumpat si Isus, “Waˈa daan. Naa kiin, iin su minitaˈu mitekaw melabuˈ si Satanas genat tug langit, maaˈ nu kelabuˈ nug letiˈ. 19 Puˈ metuud lai daan, bigayan ku amu pegbayaˈ adun maindegan niui nga mamak atawaka nga gulangulang, dakus daagen niu su gikteb pegbayaˈ nu Kuntra ta, di ndiˈ damu mekendutaˈ dun. 20 Laak dagid pia maˈantu, kanaˈ laak iini pegleliag amu dun, su kedaag niu tu menenulay. Segaga iini pegleliag amu dun, su kepeduma nu ngalan niu mesulat tu nga ngalan nu suminakup ditu gekbus langit.”
Liliag si Isus
21 Naa mitaang dun, liliag patiˈ si Isus, sabaˈ nug Balakat nu Megbebayaˈ. Kaliˈ pektaluˈ si Isus, “Mikpaladpaladu diniˈa, Amaˈ, yaˈai Kaunutan di gekleb langit buˈ lupaˈ. Puˈ su tantu sinuunan kini, iglud mu tu nga getaw metaasi sinuunanen, puˈ iin laaki pisuunan mu dun, ki nga getaw kini maikaˈi sebutenen. Naa melengas da, Amaˈ, puˈ maˈnia dai miuyaˈan mu.”
22 Laung pa padun ni Isus, “Sug lumaun metuud, migelaˈ pegwakil dinaan nu Gamaˈu. Naa naan kini, kig Bataˈen, ndaˈiduni mekesuun dinaan, subay su Gamaˈu laak. Mukaˈ su Gamaˈu, ndaˈidun dademai mekesuun diniin, subay naan laak kini, kig Bataˈen, sampay adin laaki getaw mauyaˈan ku pesuunan ku dun.”
23 Mendadi, minadap si Isus dia nga sakupen, kaliˈ pektaluˈ dinilan, ilan da laak, “Naa, yamu, liliag amu tantu, sabaˈ nu minitaˈ niu kini! 24 Puˈ taman taluˈu diniu, melaun pimuunan nu Megbebayaˈ mukaˈ gadiˈ, taginaa nilan dun sia maitaˈ nilan ki minitaˈ niu kini, dagid ndaˈ nilan maitaˈ. Taginaa nilan dun pagid medengeg nilan ki midengeg niu kini, dagid ndaˈ nilan dadema medengeg.”
Su Sambingay mekatag di Mekesuun Getaw Samaria
25 Mendadi, duuni mekpetuˈun di Misulat Palinta nu Megbebayaˈ minadap dini Isus, puˈ adun pengimanenen sia su metaluˈen. Suminaak dini Isus su mekpetuˈun, “Naa Sir, taˈ alandun mai gempia penggulaulaan ku adun mpedumau tu ketubuˈ ndaˈi tamanen?”
26 Kaliˈ sembag si Isus, “Naa, taˈ alanduni misulat ditu Palinta nu Megbebayaˈ? Taˈi kesabut mu dun?”
27 Kaliˈ sembag su mekpetuˈun di Palinta, laungen, “Kini. Saladuaˈ diniu, petail mu tantu su Kaunutan mu Megbebayaˈ, saˈitada pegwakil mu diniin su tibuuk ginaa mu mukaˈ su tibuuk gimuud mu dakus su gikteb sekeg mu sampay su tibuuk delendeman mu. Mukaˈ pa pagid, petail mu dadema sug duma mu. Su kepetail mu diniin, pelepeng mu di kepetail mu dig lawas mu.”
28 Laung dayun ni Isus, “Aa naa, misugatan mu gupiai sembag mu kiin. Kiai penggulaula mu, adun mpedumaa tuˈu tu ketubuˈ ndaˈi tamanen.”
29 Laak su mengiman sia dini Isus kia, mpauk daagen. Kaas sinaaken na pelum dini Isus, “Asa taˈ adin dunig dumau petailen ku?”
30 Kaliˈ sembag si Isus, “Naa, maˈniniˈ. Duuni getaw mipanaw, pegdiksun pangay tu Jerico genat ditu Jerusalem. Naa selian pekpanawi getaw kini, inapaˈ tulisan. Libasan nu tulisan, bintul nilan padun, dayun nilan belengay, simaˈan nilan ginaa maikaˈ. 31 Naa mendadi mitaang dun, duuni minian diag dalan kia belian nu getaw Judea. Sug belian, benaˈ minitaˈeni tinulis kini, migliaw laak diag dipag dalan, minundas. 32 Benaˈ ndaˈ maiben, duun pelumi sala tawan sapuˈ ni Levi minian dadema dia. Benaˈ minitaˈ nu sapuˈ ni Levi su tinulis, maˈnia dadema, migliaw laak pelum diag dipag dalan, minundas dadema. 33 Laak dagid, duuni getaw Samaria mipanaw, mituaˈ dadema dia. Iin, benaˈ minitaˈen su tinulis, milelaat dun. 34 Mikpesempel dayun diniin mukaˈ binulungen penginumen buˈ lana su ngag banegen, igbeden pa pagid. Dayunen pesakay tu petubuˈenen, inateden di pektulugan nu nga getaw, tinagikulen dia. 35 Benaˈ migendaw, migbegay duaˈ denario tu gapuˈ nu pektulugan kia, laungen, ‘Saˈ mesuˈat, yaˈai pegibaˈ dun. Adin su kulang nu gastu dun, biadan ku da diniˈa saˈ mpuliˈu dini.’”
36 Benaˈ mideksuˈ ni Isus su sambingayen, sinaakanen dayun su mengiman sia diniin di taluˈen, “Naa taˈ ma, alandunig delendeman mu? Ki telu tawan kia, adin ma dinilani mibaal gitunganen duma nu inapaˈ tulisan kia?”
37 Simbag nu mekpetuˈun di Palinta, “Su milelaat diniin.”
Laung ni Isus diniin, “Naa yaˈa, penunggilingay mu dadema.”
Gempiai Piktalentenan ni Maria batul ni Marta
38 Naa sabaˈ ni nga Isus mpanaw, midepet ilan dig lunsud. Naa duunig libun dia, ngalanen si Marta, pinembaˈen si nga Isus ditug balayen. 39 Naa duuni pated ni Marta, ngalanen si Maria. Benaˈ sumiled tug balay su Kaunutan, kini si Maria, migingkud di gedapanen, adun pektalentenanen su teluˈenen. 40 Si Marta pelum, milibuleng patiˈ tu pegulingelenen, puˈ melaun gupia. Mendadi, linabet ni Marta si Isus, laungen, “Naa, Sir, petuyangen mau masiˈ, salau laak megilak, ndiˈ megabangi ngudan ku kiin? Melengas sia teluˈen mu diniin, megabang dinaan!”