¹ Mendadi duuni nga Pariseo mukaˈ nga mekpetuˈun di Misulat Palinta nu Megbebayaˈ genat tu Jerusalem, minadap ilan dini Isus, sinaak nilan diniin, ² “Mauma ki nga sakup mu kiin, pimilas nilan sug betad pingumbilin dinita nu nga ginepuˈay ta? Ndiˈ nilan gelaˈen dunutay sug betad ta mekatag di pengingenaw dekag pa aan!”

³ Kaliˈ sembag si Isus dinilan, “Paa, yamu kiin, mauma pimilas niu su palinta nu Megbebayaˈ, iin sungkini dunutan niu, sug daniu betad? ⁴ Puˈ duuni palinta nu Megbebayaˈ, laung, ‘Pegbesaay mu su ginaˈ mu mukaˈ su gamaˈ mu.’ Mukaˈ duun pagidi palinta, ‘Adin su getaw menampalaksa tu ginaˈen atawaka tu gamaˈen, subay petain.’” ⁵ Laung pa ni Isus, “Dagid iinig daniu tituluˈan, saˈ duun siai ginabang begay nu getaw tu ginaˈen atawaka tu gamaˈen, mesuˈat daw teluˈen nu getaw kia, ‘Kini, begay sungkin tu Megbebayaˈ.’ ⁶ Dayun saˈ kiai teluˈen nu getaw, naa sug basanen sia tu gamaˈen, ndiˈ na daw kambat begay diniin. Naa saˈ maˈnia, su Misulat Palinta nu Megbebayaˈ, bileng niu, sinukli niu dun kig daniu laak betad. ⁷ Paa, yamu kiin, tautau mekesuun amu! Misugat amu gupia ditu sinulat pedaan ni Isaias dengantu ditu Taluˈ nu Megbebayaˈ, laungen,

¹⁰ Naa sinabi ni Isus su nga melaun getaw mekpesempel diniin. Benaˈ mikpesempel ilan, kaliˈ pektaluˈ si Isus dinilan, “Pekineegay niu gupia ki teluˈen ku kini, adun mesabut niu gupia! ¹¹ Kanaˈ iini mekesalaˈ dun tu Megbebayaˈ su getaw, ki mekeseled dig babaˈen genat dig liu. Iini mekesalaˈ dun su getaw, ki guaˈ dig babaˈen.”

¹² Naa benaˈ mideksuˈ mektituluˈ si Isus, mikpesempel diniin su nga sakupen, laung nilan, “Sir, ki tinaluˈ mu kia, misuunan mu ma, milaati ginaa dun nu nga Pariseo?”

¹³ Kaliˈ sembag si Isus, “Paa, duuni gendaw mateng, adin su mentubuˈ kanaˈ pimula nu Gamaˈu ditu gekbus langit, bekuten. ¹⁴ Kaas ki nga Pariseo kiin, petuyang na niu ilan! Puˈ maˈniin ilan buta, dayun egaken nilani nga getaw, buta dadema.^a Naa pinenggiˈ meginegakayig duaˈ tawan lungkan buta, dayun buus duunig luak dia gunaan nilan, ndiˈ ba megelaˈ ilan dayun melabuˈ dia?”

¹⁵ Laung ni Pedro, “Naa, Sir, ki sambingay mu kia, pegulug mu dinami.”

¹⁶ Kaliˈ sembag si Isus, “Apelai, pia pamu, ndaˈ dadema niu mesabut? ¹⁷ Ndaˈ ba niu mesabut puˈ pia taˈ alanduni aanen nu getaw, mpalus da laak tu tianen, dayun guaˈ da pelum dig lawasen? ¹⁸ Dagid ki guaˈ dig babaˈen kia, genat tug delendemanen, iin tantui mekesalaˈ dun su getaw. ¹⁹ Puˈ kig delendeman nu getaw, iini pigenatan nu melaat delendeman, su puun nu kegbunuˈ, su kenlelingay, sug dusa, su kegdaaw, su kegbalus, mukaˈ su tampalaksa. ²⁰ Kini tuˈui mekesalaˈ dun su getaw. Laak su kemilas tug betad mekatag di pengingenaw dekag pa aan, kanaˈ mekesalaˈ dun su getaw tu Megbebayaˈ.”

²¹ Naa migawaˈ na dia si Isus, minangay pelum tug benwa mesempel tug lunsud Tiro mukaˈ Sidon. ²² Mendadi benaˈ minateng ditu si Isus, duuni mikpesempel diniin libun dangen dia laak lain bansa, puˈ getaw Canaan. Migbeksay sug libun, laungen, “Uu Sir, Sapuˈa ni David, lelaatay mau! Puˈ duunig bataˈu libun, silunuˈan menulay, milesayan dun gupia.”

²³ Dagid ndaˈ sembag si Isus, pia sektaang. Minadap diniin su nga sakupen, inubug nilan diniin, “Pawaˈ mu iin! Puˈ peglenduglendug da gusay dinita, meksasak gupia!”

²⁴ Kaliˈ sembag si Isus tug libun kia, “Iini sinuguˈu dun lumusad dinig lumbang, adun pegebangan ku su laak bansa Israel, ki pitanggiˈu di nga karniru mibeleng.”

²⁵ Dagid kig libun kini, mikpesempel dayun dini Isus, minginlulud ditu gedapanen. Laungen, “Sir, gebangay mau dema tuˈu!”

²⁶ Kaliˈ sembag si Isus, “Ndiˈ mpia awiˈ tu gembataˈ su gaanen, adun tikpuˈen dia nga gituˈ.”^b

²⁷ Kaliˈ sembag sug libun, “Metuud la Sir, dagid pia su nga gituˈ, aanen nilan su nga mikulaˈ gaan dia silung nug lemisaan nu gapuˈ nilan.”

²⁸ Sumimbag dayun si Isus, “Aa naa, Dadaˈ, gembageli kesalig mu! Kagina maˈnia, su mauyaˈan mu, mialap mu na.”

Naa, iin da tuˈu su kauliˈay nug bataˈ nug libun kia.

²⁹ Naa minundas si Isus, inunuten su geksid nug Linaw Galilea. Tumiwad dig bentud, dayun migingkud dia. ³⁰ Mendadi melaun gupia getaw minangay dia niin, iwit nilan dadema ditui nga getaw mipilung, ngag buta, nga migisu, ngag beed, mukaˈ melaun pa pemegladu. Adin su iwit nilan dia gedapan ni Isus, pineguliˈanen dayun. ³¹ Misebuˈan gupia su nga getaw ditu minitaˈ nilan, puˈ su kamun beed, mikabit na. Su kamun migisu, miuliˈan na. Su kamun mipilung, mikepanaw na. Dakus su ngag buta kamun, mikengitaˈ na. Kaas inal nilan su Megbebayaˈ pektemuyen nu nga getaw Israel.

³² Mendadi, sinabi ni Isus su nga sakupen. Benaˈ mikpesempel ilan diniin, kaliˈ pektaluˈ si Isus, “Milelaatu di nga melaun getaw kini, puˈ telu endaw na ndaˈ ilan pesuay dinaan, dayun migelaˈ na demaig balun nilan. Naa, mpauku mekpauliˈ dinilan ndaˈ ilan mekaˈaan, puˈ tekaw mbuus belunusan ilan dig dalan.”

³³ Dagid kaliˈ sembag su nga sakup ni Isus, “Sir, kig benwa kini, limawaˈ. Saˈ maˈantu, adin ta ma elapayi gaan, sukal paan ta sia di nga melaun getaw kini?”

³⁴ “Naa, sanu buuki pan niu diin?” sinaak ni Isus.

Kaliˈ ilan sembag, “Pitu buuk, mukaˈ duun pagidi santaˈ buuk mekaikaˈ sedaˈ.”

³⁵ Mendadi, pimaingkud dayun ni Isus su nga getaw diag lupaˈ. ³⁶ Benaˈ mikaingkud ilan, inalap dayun ni Isus ki pitu buuk pan kia mukaˈ su sedaˈ, dayun mekpaladpalad tu Megbebayaˈ. Benaˈ mitubus mekpaladpalad, pikpetapetanen su pan, piktukiden pegilasay tu nga sakupen. Pingilak nilan dayun tu nga melaun getaw. ³⁷ Minaan dayun su kelaun getaw, mukaˈ migelaˈ ilan mbesug. Benaˈ mibesug ilan, kaliˈ pengikpesay nu nga sakup ni Isus su sawad nilan, pitu dig bukag mipenuˈ pa nu samaˈ nilan. ³⁸ Su getaw minaan ditu nga pan, paat ngibu tawanig laki, ndaˈig labeti ngag libun mukaˈ nga gembataˈ.

³⁹ Naa benaˈ mitubus maan su melaun getaw, piuliˈ ilan ni Isus. Duminangan dayun tu sekayan si Isus, minangay tug benwa sakup Magadan.