¹ Naa duuni nga Pariseo mukaˈ Saduseo minangay kumitaˈ dini Isus, pengimanan nilan sia iin. Saˈ maˈnia, miksaak ilan diniin mekesalebuˈ tuˈus, adun gempantek daw puˈ genat tu Megbebayaˈ su pegbayaˈen. ² Dagid kaliˈ sembag si Isus, [“Paa, yamu kiin, saˈ sungu mesindepi gendaw, iini teluˈen niu, ‘Gempiaig benwa lemaˈ, puˈ gempulaig langit.’ ³ Dayun saˈ siselem, laung niu, ‘Dumupiˈ buus, puˈ gempulaig langit, mukaˈ megdelem.’ Saˈ maˈantu, metau amu mengatuk tuˈus dig langit, dayun ndiˈ niu maulug ki tuˈus dig basa kini nandaw.] ⁴ Paa, yamu pa di nga getaw nemun, medupang amu gupia, memilas amu pelum tu Megbebayaˈ! Penengiin niu dinaani mekesalebuˈ tuˈus, asa daal da laaki tuˈus begay diniu, ki maaˈ nu pinggulaula nu pimuunan nu Megbebayaˈ dengantu, si Jonas.”

Saˈ maˈnia, migawaˈ dinilan si Isus, mipanaw dayun.

⁵ Naa saˈ duminipag si nga Isus diag linaw, milingawan nu nga sakupen megbalun pan. ⁶ Mendadi kaliˈ pektaluˈ si Isus dinilan, “Ki petulin nu nga Pariseo mukaˈ nu nga Saduseo di pan, peglengilamay niu.”

⁷ Benaˈ midengeg nu nga sakupen, kaliˈ ilan pegyagayaga, laung nilan, “Kaas tinaluˈeni maˈnia, puˈ ndaˈ ita kegbalun pan.”

⁸ Laak dagid misuunan ni Isusi pigyagayaga nilan kia. Kaliˈ pektaluˈ dinilan, “Paa, mauma pelum pegyegayegaan niu ki pan, saˈ ndaˈidun diniu? Maikaˈ gupiai kesalig niu dinaan! ⁹ Masiˈ ndaˈ pa niu mesabut? Milingawan ba niu su kemetau tug lima buuk pan, ki piˈaan dayun tug lima ngibu tawan kitu? Dayun sanu belanan pai samaˈ dun, su pingikpes niu dun kitu? ¹⁰ Mukaˈ su kemetau tu pitu buuk pan, ki piˈaan pelum tu paat ngibu tawan, sanu bukag ma pelumi pingikpes niu tu sawad nilan maan? ¹¹ Saˈ maˈantu, mauma dema ndaˈ niu gusay mesabut puˈ kanaˈ nu pani tinaluˈu diniu? Kaas peglengilamay niu daan ki petulin nu nga Pariseo mukaˈ Saduseo di pan!”

¹² Naa dekag pa misabut nu nga sakup ni Isus puˈ kanaˈ nu tantu petulin di pani kenegulen dinilan kia, segaga ki tituluˈan nu nga Pariseo mukaˈ Saduseo.

¹³ Naa minangay si nga Isus tug benwa sakup dig lunsud Cesarea Filipo. Benaˈ ditu nailan, sinaak ni Isus tu nga sakupen, “Mendadi naan kini, kig Bataˈ nu Kilawan, saˈ su gasalu, alanduni ketaluˈ dun nu getaw?”

¹⁴ Kaliˈ sembag su nga sakupen, “Sug duma getaw, teluˈen nilan, yaˈa daw si Juan su Memunag Tubig. Saˈ sug duma mektaluˈ, yaˈa daw si Elias dengantu. Mukaˈ duun pa pagidi mektaluˈ, yaˈa daw si Jeremias, atawaka sala tawan pa pelum pimuunan nu Megbebayaˈ dengantu.”

¹⁵ “Mendadi yamu dema,” sinaak ni Isus, “taˈ mai ketaluˈ niu dun, ki gasalu?”

¹⁶ Sumimbag si Simon Pedro, “Yaˈa na gupia su Tinduˈ nu Megbebayaˈ Meglekaunutan, kig Bataˈ nu Megbebayaˈ ndaˈi gumulen.”

¹⁷ “Aa naa, Simon, bataˈa ni Jonas,” laung ni Isus, “leliagenu diniˈa tuˈu! Puˈ kiin, kanaˈ nu kilawani mikpesuun dun diniˈa, puˈ su Gamaˈu ditu gekbus langit! ¹⁸ Mendadi, taman taluˈu diniˈa, yaˈa si Pedro.^a Naa saˈ maˈantu, saˈ baalen ku na kig balayu, saˈitada ki pikumpungan nu nga sakupu, naa kiniig batu gentudan ku nug balayu. Mukaˈ ki pikumpungan kia, ndiˈ na daagen nu kepatay. ¹⁹ Pegwakilu diniˈa su nga gunsiˈ tu Keglekaunutan nu Megbebayaˈ. Naa saˈ maˈantu, adin sug benduun mu dinig dibabaw lumbang, benduun dadema ditu gekbus langit. Adin sug buangen mu dinig dibabaw lumbang, buangen dadema ditu gekbus langit.”

²⁰ Dayun inungub gupia ni Isus su nga sakupen, ndiˈ nilan pekpesuun tu getaw puˈ iin su Tinduˈ nu Megbebayaˈ Meglekaunutan.

²¹ Mendadi, genat di gendaw kia, mikpuun si Isus menluksad tu nga sakupen. Laungen, “Mendadi naan, subay medituunu Jerusalem, dayun melaun pai kekpeleget dinaan nu nga kaunutan nu getaw Judea mukaˈ nu nga kaunutan nug belian nilan kampuˈ nu mekpetuˈun di Misulat Palinta nu Megbebayaˈ. Deksuˈanen, petainu nilan. Laak dagid di ketelu endawen genat di kepatayu, petubuˈenu puliˈ.”

²² Dagid benaˈ midengeg ni Pedro, inabigen si Isus, dayun pimaagen, laungen, “Kaunutan, penensili kanaˈ maˈantu! Ndiˈ mesuˈat maˈniai mbianan mu!”

²³ Laak dagid si Isus, liningayen si Pedro, kaliˈ pektaluˈ diniin, “Pegawaˈa dinaan, Satanas! Mauma pegdaangan mau sia? Puˈ kig delendeman mu kiin, kanaˈ genat tu Megbebayaˈ, puˈ delendeman laak nu kilawan!”

²⁴ Kaliˈ dayun pektaluˈ si Isus tu nga sakupen, “Mendadi, saˈ duuni getaw mauyaˈanen sumakup dinaan, subay teliudanen sug daniin delendeman, pisanenen dayun ki kurusen, dakus dumunut gusay dinaan. ²⁵ Puˈ adini mpauk megwakil gumulen dinaan, mbeleng diniin su ketubuˈ ndaˈi tamanen. Adin su pegwakilen dinaan su gumulen sabaˈ nu kesakupen dinaan, iin, malapen sungkin su ketubuˈ ndaˈi tamanen. ²⁶ Puˈ pia pa malap nu getaw su tibuuk lumbang, dayun mbeleng diniin su ketubuˈ ndaˈi tamanen, naa alandun bai gatagen? Ndaˈidun! Puˈ saˈ mbeleng na di getaw su ketubuˈ ndaˈi tamanen, duun bai mbayaden, adun melekaten sia puliˈ su ketubuˈen? ²⁷ Puˈ ndiˈ na maiben, naan kini, kig Bataˈ nu Kilawan, lumusadu puliˈ, medayag na su kelengas nu pegbayaˈ nu Gamaˈu, maitaˈ di tiagu, dumau su nga sesuguˈen ku getaw langit. Dayun saˈ matengu, sugdaan ku su nga getaw saladuaˈ, mbantang tu pinggulaulanen, gempia saˈ melaaten.” ²⁸ Diksuˈ ni Isus su taluˈen, “Taman taluˈu diniu, yamu nga getaw pegindeg dini nandaw, duun diniui ndiˈ matengi gumulen, meduaˈ matanen meglekaunutan nau tuˈu, naan kini, kig Bataˈ nu Kilawan.”