¹ Naa benaˈ lain gendaw, mikpungun na pelum ditu ni Isus ki melaun gupia getaw. Mendadi, benaˈ migelaˈ nai gaan nilan, sinabi ni Isus su nga sakupen. Benaˈ mikpesempel ilan diniin, kaliˈ pektaluˈ si Isus, ² “Milelaatu di nga melaun getaw kini, puˈ telu endaw na, ndaˈ ilan pesuay dinaan, dayun migelaˈ na demaig balun nilan. ³ Saˈ dema pauliˈen ku ilan ndaˈ ilan mekaˈaan, belunusan ilan dig dalan, puˈ duma kiin, melayuˈi pigenatanen.”

⁴ Dagid kaliˈ sembag su nga sakup ni Isus, “Sir, kig benwa kini, limawaˈ. Saˈ maˈantu, adin ta ma elapayi gaan, paan ta sia di nga melaun getaw kini?”

⁵ “Naa, sanu buuki pan niu diin?” sinaak ni Isus.

Kaliˈ ilan sembag, “Pitu buuk.”

⁶ Mendadi, pimaingkud dayun ni Isus su nga getaw diag lupaˈ. Benaˈ mikaingkud nailan, inalap dayun ni Isus ki pitu buuk pan kia, dayun mekpaladpalad tu Megbebayaˈ. Benaˈ mitubus mekpaladpalad, pikpetapetanen su pan, piktukiden dayun pegilasay tu nga sakupen, adun pengilaken nilan tu nga getaw. Piktukidtukid nilan dayun pemegay ditu nga melaun getaw.

⁷ Duun pagidi giwit nilan santaˈ buuk mekaikaˈ sedaˈ. Mikpaladpalad dadema si Isus tu Megbebayaˈ mekatag dig bataˈ sedaˈ kia. Mitubusen penenebiay, pikilasilas dadema su sedaˈ ditu nga getaw. ⁸ Minaan dayun su nga melaun getaw, mukaˈ mibesug ilan. Pingikpes dayun nu nga sakup ni Isus su sawad nu nga getaw maan, pitu dig bukag pai samaˈ nilan. ⁹ Naa su nga getaw mikaˈaan dun, duun saani paat ngibu tawan. Saˈ maˈantu, benaˈ mitubus ilan maan, ¹⁰ piuliˈ ni Isus su nga melaun getaw, duminangan dayun tu sekayan, ilan nu nga sakupen, minangay ilan tug benwa Dalmanuta.

¹¹ Naa duuni nga Pariseo minangay kumitaˈ dini Isus, mikpuun ilan dayun meglantugiˈ diniin. Ki nga Pariseo kini, minengi ilan dini Isus mekesalebuˈ tuˈus genat tu Megbebayaˈ. Puˈ pengindanan nilan si Isus. ¹² Dagid benaˈ midengeg ni Isus, migbagel ginaa dayun, kaliˈ pektaluˈ, “Paa, yamu pa di getaw nemun, mauma dema menengi mamu mekesalebuˈ tuˈus? Taman taluˈu diniu, ndaˈiduni mekesalebuˈ tuˈus paitaˈ diniu nga getaw nemun!”

¹³ Saˈ maˈnia, migawaˈ dayun dinilan si Isus, duminangan puliˈ ditu sekayan, duminipag diag linaw.

¹⁴ Naa benaˈ sumikat nailan dumipag diag linaw, milingawan nu nga sakup ni Isusi megbalun pan, salabuuk laaki pan nilan dia sekayan. ¹⁵ Mendadi benaˈ tuminulak nailan, mikpegad si Isus dinilan, laungen, “Ki petulin nu nga Pariseo mukaˈ ni Herodes di pan, peglengilamay niu.”^a

¹⁶ Benaˈ midengeg nu nga sakupen, kaliˈ ilan pegyagayaga, laung nilan, “Kaas tinaluˈeni maˈnia, puˈ ndaˈiduni pan ta.”

¹⁷ Laak dagid misuunan ni Isusi pigyagayaga nilan kia. Kaliˈ pektaluˈ dinilan, “Paa, mauma pelum megyagayaga amu mekatag di pan, saˈ ndaˈidun diniu? Masiˈ ndiˈ pa niu mesabut? Aba, metegas gupiai gulu niu? ¹⁸ Duun siai mata niu, masiˈ ndiˈ amu gusay mekengitaˈ? Duun siai telinga niu, ndiˈ damu gusay mekedengeg?” Sinaaken dayun dinilan, “Milingawan ba niu ¹⁹ su kemetau tug lima buuk pan, ki piˈaan dayun tug lima ngibu tawan kitu? Dayun sanu belanan pai samaˈ dun, su pingikpes niu dun kitu?”

Kaliˈ ilan sembag, “Sepuluˈ buˈ duaˈ dig belanan.”

²⁰ Sinaak pagid ni Isus dinilan, “Mukaˈ su kemetau tu pitu buuk pan, ki piˈaan pelum tu paat ngibu tawan, sanu bukag ma pelumi pingikpes niu tu sawad nilan maan?”

Laung nilan, “Pitu dig bukag.”

²¹ Laung dayun ni Isus dinilan, “Saˈ maˈantu, mauma ndaˈ niu gusay mesabut?”

²² Maˈantu, midepet na si nga Isus tug lunsud Betsaida. Benaˈ minateng ilan, duuni sala tawan buta iwit nu nga getaw ditu ni Isus. Pinengi nilan dayun diniin, depenanen kig buta kia. ²³ Mendadi, piguidanen di kemet sug buta, dayunen egakay ditug liu nug lunsud. Benaˈ miliu nilan sug lunsud, liwayan ni Isus su mata nug buta. Genaten luayay, dipenanen dayunig buta kia, kaliˈen saakay, “Naa ma, duun taˈi minitaˈ mu?”

²⁴ Kaliˈ tingagig buta kia, laungen, “Mikaitaˈ nau getaw, laak dagid maˈniin palas gayu pekpanawpanaw.”

²⁵ Pinuliˈan na pelum ni Isus depenay su matanen. Mininggas dayun mekimanig buta kia. Mukaˈ miuliˈan nai matanen, mipalasen gupiaig launan mesugat matanen. ²⁶ Piuliˈ dayun ni Isus su kamun mibuta, dunut binduanen, laungen, “Ndiˈa gusay mpuliˈ diag lunsud kia.”

²⁷ Naa minundas na si Isus, ilan nu nga sakupen, minangay ilan tu nga mikapuluˈ balay sakup dig lunsud Cesarea Filipo. Mendadi, sinegay nilan dig dalan, sinaak ni Isus tu nga sakupen, “Mendadi naan kini, saˈ su gasalu, alanduni ketaluˈ dun nu getaw?”

²⁸ Kaliˈ sembag su nga sakupen, “Yaˈa daw si Juan su Memunag Tubig. Saˈ sug duma mektaluˈ, yaˈa daw si Elias dengantu. Mukaˈ duun pa pagidi mektaluˈ, yaˈa dawi sala tawan pa pelum pimuunan nu Megbebayaˈ dengantu.”

²⁹ “Mendadi yamu dema,” sinaak ni Isus, “taˈ mai ketaluˈ niu dun, ki gasalu?”

Sumimbag si Pedro, “Yaˈa na gupia su Tinduˈ nu Megbebayaˈ Meglekaunutan.”

³⁰ Laak dagid inungub ni Isus su nga sakupen, ndiˈ nilan pekpesuun tu getaw ki gasalen kia.

³¹ Mendadi, genat di gendaw kia, mikpuun si Isus mektuˈun di nga sakupen, laungen, “Naan, kig Bataˈ nu Kilawan, melaun pai kekpeleget dinaan. Mukaˈ pemilasenu pa pagid nu nga kaunutan nu getaw Judea mukaˈ su nga kaunutan nug belian nilan kampuˈ nu mekpetuˈun di Misulat Palinta nu Megbebayaˈ. Deksuˈanen, petainu nilan. Laak dagid di ketelu endawen genat di kepatayu, metubuˈu puliˈ.” ³² Pinluksad gupia ni Isus dinilan ki tinaluˈen kini. Dagid benaˈ midengeg ni Pedro, inabigen si Isus, dayun pimaag ni Pedro si Isus mekatag di tinaluˈen kia mbiananen sungu. ³³ Laak dagid si Isus, liningayen su nga sakupen, pimaagen dayun si Pedro, laungen, “Pegawaˈa dinaan, Satanas! Puˈ kig delendeman mu kiin, kanaˈ genat tu Megbebayaˈ, puˈ delendeman laak nu kilawan!”

³⁴ Naa, sinabi ni Isus su nga melaun getaw sampay su nga sakupen. Benaˈ misempel ilan, kaliˈ dayun pektaluˈ si Isus, “Mendadi, saˈ duuni getaw mauyaˈanen sumakup dinaan, subay teliudanen sug daniin delendeman, pisanenen dayun ki kurusen, dakus dumunut gusay dinaan.^{b 35} Puˈ adini mpauk megwakil gumulen dinaan, mbeleng diniin su ketubuˈ ndaˈi tamanen. Adin su pegwakilen dinaan su gumulen sabaˈ nu kesakupen dinaan dakus tu kegukiten di Gempia Petenday, iin, malapen sungkin su ketubuˈ ndaˈi tamanen. ³⁶ Puˈ pia pa malap nu getaw su tibuuk lumbang, dayun mbeleng diniin su tantu ketubuˈ, naa alandun bai gatagen? Ndaˈidun! ³⁷ Puˈ saˈ mbeleng na di getaw su ketubuˈ ndaˈi tamanen, duun bai mbayaden, adun melekaten sia puliˈ su ketubuˈen? ³⁸ Puˈ su getaw nemun, memilas ilan tu Megbebayaˈ mukaˈ mikesalaˈ ilan. Naa adini getaw mpiid mangken di kesakupen dinaan mukaˈ di taluˈu di gendaw kini, naa naan, kig Bataˈ nu Kilawan, mpiid dau dema mangken diniin sakupu saˈ lumusadu puliˈ dini. Mukaˈ saˈ lumusadu puliˈ, maitaˈ na di tiagu su kelengas nu pegbayaˈ nu Gamaˈu, dumau su nga pinaas sesuguˈenen getaw langit.”