¹ Naa benaˈ Sabadu na, su Gendaw Pelali nu nga getaw Judea, benaˈ misindep nai gendaw, si Maria Magdalena mukaˈ si Maria ginaˈ ni Santiago, su ketelunen si Salome, minangay ilan menaluy nga pagemut, adun penguklausen nilan sia ditug bangkay ni Isus. ² Mendadi benaˈ siselem na gendaw Duminggu, lemen laak sumibangi gendaw, minangay ilan tuˈu ditu sangyab libengan dini Isus. ³ Selian diin pailan dalan, migyagayaga ilan, laung nilan, “Naa sug batu tinakep ditu sangyab, buus ndaˈi meglulid dun dinita.” ⁴ Laak dagid benaˈ misempel nailan dia sangyab, kaliˈ ilan tingag, sug batu tinakep tu sangyab, masiˈ linulid na. Asa gembagel gupia batu kitu. ⁵ Dayun sumuut dia sangyabi ngag libun kia. Aba, duuni minitaˈ nilan begutaw diag dialem, pegingkud dia dapit lintu nu sangyab, peksuub melambung, gemputiˈ suub. Mipatiˈ dayun mendeki ngag libun kia.

⁶ Laak kaliˈ pektaluˈ dinilan ki getaw kia, “Naa, ndiˈ amu mendek. Puˈ suunan ku iini penengaun niu sia si Isus, ki getaw Nazaret, sug linansang di kurus kitu. Naa, ndaˈ nain dini. Mitubuˈ na puliˈ. Bentayay pa daan niu, kinuˈ da sia su pibelilidan nilan diniin. ⁷ Naa, uliˈ amu, ukitay niu dayun su nga sakupen kampuˈ ni Pedro, maˈniniˈi taluˈ niu. ‘Si Isus, miguna na diniu ditu Galilea. Mpegitaˈ da niu ditu, maaˈ da nu gandang tinaluˈen diniu.’”

⁸ Maˈantu, migawaˈ dia sangyab su ngag libun, miglaguy ilan dayun. Sinaaban ilan sabaˈ tiklab nilan. Mukaˈ pia sala tawan, ndaˈiduni inukitan nilan dun su minitaˈ nilan, puˈ sabaˈ gendek nilan.

[ ⁹ Naa su ketubuˈ puliˈ ni Isus, sikna siselem dig bekna gendaw nu simana, saˈitada su gendaw Duminggu. Kig bekna pinitaˈan ni Isus genat tu ketubuˈen puliˈ, iin si Maria Magdalena, su gandang pingutid ni Isus diniini pitu buuk menenulay. ¹⁰ Mendadi si Maria, benaˈ mikpaitaˈ diniin si Isus, minangay dayun megukit tu nga getaw tatap dumuma dini Isus. Saˈ minateng si Maria ditu nilan, mitaanganen pekpengaduy ilan, milegenan ilan patiˈ. ¹¹ Laak dagid pia pa midengeg nilan puˈ mitubuˈ puliˈ si Isus, mukaˈ mikaitaˈ dun gupia si Maria, pia maˈantu, ndaˈ dailan gusay pekpetuud dun.

¹² Mendadi genat itu, benaˈ lain gendaw puliˈ, mikpaitaˈ si Isus dig duaˈ tawan sakupen saanan nilan dig dalan, pegangay ilan tug buid. Laak sala na pelumi palas ni Isus. ¹³ Mendadi, benaˈ minitaˈ nilan iin, mipuliˈ ilan ditu nga samasakup nilan, inukit nilan dayun dinilan. Laak dagid su ngag duma sakup ni Isus, ndaˈ dailan gusay pekpetuud dun.

¹⁴ Mendadi tigaˈwan, mikpaitaˈ na pelum si Isus ditu sepuluˈ buˈ sala peneliganen, saanan nilan maan. Pigbeluˈan ilan dayun ni Isus puˈ sabaˈ ndaˈi kekpetuud nilan mukaˈ metegasi gulu nilan, puˈ mauma ndaˈ ilan pekpetuud ditu mikaitaˈ diniin puˈ tetubuˈ na puliˈ.

¹⁵ Mendadi, miktaluˈ si Isus tu nga peneliganen, laungen, “Panaw amu, leep niu su tibuuk lumbang, pegukit niu dig launan kilawan dinig dibabaw benwa ki Gempia Petenday. ¹⁶ Adin dayun su mekpetuud dun mukaˈ mekpebunag tubig, iini megawen. Dagid adin pelum su ndiˈ mekpetuud, iini ukuman.” ¹⁷ Kaliˈ pagid pektaluˈ si Isus, “Naa ki nga mekpetuud, baalen nilani nga mekesalebuˈ penggulaula. Pengutidan nilani menenulay pebian di pegbayaˈu, sampay mekabit ilan lain pikebitan, ki ndaˈ nilan mainsan pektuˈunay. ¹⁸ Saˈ mpeguidan nilani mamak, mesama saˈ mekainum ilan bulit, ndiˈ ilan mekendutaˈ dun. Sampay depenan nilan su nga pegladu, mauliˈan dadema.”

¹⁹ Naa mendadi, ki Kaunutan kiin si Isus, benaˈ mideksuˈen su pekteluˈenen tu nga peneliganen, pilentu dayun ditu gekbus langit, piˈingkud dayun nu Megbebayaˈ diin dapit lintunen. ²⁰ Dayun su nga peneliganen, mipanaw ilan tuˈu, lineep nilan su tibuukan benwa, pingukit nilan su Gempia Petenday. Ibangan ilan gupia nu Kaunutan Megbebayaˈ, bigayan ilan niin ginuung megbaal mekesalebuˈ tuˈus, adun metakesiˈan dun, metuud ki gukiten nilan.]

[ ⁹ Naa mendadi, su ngag libun kia minangay ditug libengan dini Isus, linaawan nilan tuˈu si nga Pedro, inukit nilan dayun dedaliˈ dinilan su kelaun tinaluˈ nug begutaw ditug dialem sangyab.

¹⁰ Mendadi, pimuunan ni Isus gupia su nga peneliganen, adun ukiten nilan ditug launan getaw ki Gempia Petenday. Pilaktag ni Isus dinilan dini tibuukan benwa su Gempia Petenday, genat diin dapit silangan sampay ditu dapit sindepan. Ki Gempia Petenday kini, ndaˈi kebelengen sampay saumul. Puˈ kini, puun tu Megbebayaˈ. Adin su getaw mekpetuud dun, megawen di salaˈen di ndaˈi tamanen.]