¹ Dengantu, su ndaˈ pa mbaali gekleb langit buˈ lupaˈ, kini si Isus, daan na. Iin sug duma nu Megbebayaˈ. Gelalen su Taluˈ mukaˈ iin dademai Megbebayaˈ. ² Genat di pikpuunan nug launanen, iinig duma nu Megbebayaˈ. ³ Adin su binaal, pibaal nu Megbebayaˈ diniin. Ndaˈiduni mibaal, iini minaal dun. ⁴ Ki Taluˈ kini, iini pikpuunan nu ketubuˈ. Kagina iini mekpetubuˈ tu getaw, mekpedelag tug delendeman nu nga getaw. ⁵ Dumilag su tiag dig dialem medelem, ndaˈ magaw nu medelem.

⁶ Naa duuni getaw tinduˈ nu Megbebayaˈ, ngalanen si Juan. Kini si Juan, sinuguˈ nu Megbebayaˈ ⁷ mangay megukit di nga getaw mekatag di getaw piningalan dun su tiag, adun medengeg nilan mukaˈ metuudan ilan dun, launan nilan. ⁸ Kanaˈ nu tiag, laak sinuguˈ ukitanen su nga getaw mekatag di tiag. ⁹ Su tantu tiag si Isus, luminusad na dinig lumbang mekpedelag dig delendeman nug launan getaw.

¹⁰ Mendadi si Isus, gelalen su Taluˈ, midinig lumbang kini. Laak, pia pibaal diniin nu Megbebayaˈ sug lumbang, ndaˈ mailala nu nga kilawan. ¹¹ Minangay ditug daan benwanen, laak ndaˈ penembaˈay nu nga samanen getaw Judea. ¹² Pia maˈantu, duuni minembaˈ diniin. Adin su nga minembaˈ diniin, su nga mikpetuud gupia diniin, diadia bigayanen pegbayaˈ betaˈen nu Megbebayaˈ. ¹³ Mikendutaˈi kebataˈ dinilan? Kanaˈ gasal getawi puunanen. Ndaˈ ilan pegigetaw ngag bataˈ nu kinilawan, puˈ su Megbebayaˈ nai tantu Gamaˈ nilan.

¹⁴ Mendadi ki Taluˈ kini, miksibaluy getaw. Suminala dinami megbenwa, kaas minitaˈ nami su kelengas nu pegbayaˈen, puˈ sabaˈ iinig buntung Bataˈ nu Gamaˈ ta Megbebayaˈ. Ndaˈiduni gikteben su tulungen di nga getaw mukaˈ su ketuuden.

¹⁵ Naa si Juan kiin, duuni gendaw miktaluˈ mekatag di Taluˈ kini. Minekeg mektaluˈ, laungen, “Kini da sug bekna pekteluˈen ku diniu puˈ duuni metuaˈ, mbinayaˈ pa dinaan, laak pia maˈantu, metaas pai pegbayaˈen batul danaan, puˈ su ndaˈ pau pegigetaw, daan nain.”

¹⁶ Naa, kagina ndaˈi giktebeni tulungen dinita, pepianan ita niin gebii gendaw, launan ta. ¹⁷ Dengantu pisuunan ita ni Moises tu Palinta nu Megbebayaˈ, laak nemun, pibian dini Isukristu, mbianan ta su tulungen mukaˈ su ketuuden. ¹⁸ Ndaˈi getaw mikaitaˈ ditu Megbebayaˈ. Su da laak buntung Bataˈen, sug duma nu Gamaˈen Megbebayaˈ, iini mikpesuun dun tu nga getaw.

¹⁹ Naa mendadi su nga kaunutan nu nga getaw Judea tu Jerusalem, suminuguˈ ilan di ngag belian nilan mukaˈ nga sapuˈ ni Levi meditu ni Juan kia, adun saaken nilan diniin, “Naa yaˈa, alanduni gelal mu?”

²⁰ Mendadi kini si Juan, ndaˈ pegbelibad sumbag dun, miglegintuud gupia, laungen, “Kanaˈu nu Tinduˈ nu Megbebayaˈ Meglekaunutan.”

²¹ Sinaak nilan, “Saˈ maˈnia, alanduni gelal mu? Si Eliasa?”

Simbag ni Juan, “Kanaˈen.”

Sinaak na nilan pelum, “Su ba pedetengen nami Pimuunan nu Megbebayaˈ?”

“Kanaˈ,” simbag ni Juan.

²² “Mendadi,” laung nilan, “pesuun mu dinami saˈ taˈi gelal mu, adun mesembag nami su nga suminuguˈ dinami medini niˈa. Taˈi ketaluˈ mu mekatag dig lawas mu?”

²³ Saˈ maˈnia, inalap dayun ni Juan sembagen su sinulat dengantu ditu Misulat Taluˈ nu Megbebayaˈ nu pimuunanen si Isaias, laungen,

²⁴ Naa su nga sinuguˈ kia, sinuguˈ ilan nu pikumpungan nu getaw Judea piningalan dun Pariseo. ²⁵ Kaliˈ ilan saak pelum dini Juan, “Naa mauma dema memunaga tubig tu getaw, saˈ kanaˈ yaˈa su Tinduˈ nu Megbebayaˈ Meglekaunutan mukaˈ kanaˈa ni Elias, mukaˈ kanaˈa dadema nu Pimuunan nu Megbebayaˈ?”

²⁶ Kaliˈ sembag si Juan, “Naan kini, megbunagu laak tubig tu nga getaw. Dagid duuni megduma diniu, ndaˈ niu mailala. ²⁷ Iin, mbinayaˈ pa dinaan, laak pia su sepatusen, kanaˈu bantang megubad dun diniin.”

²⁸ Naa kig launanen kia, ditug Betania mipenggulaula, tug dipag Jordan, dia tandaˈ mimunag si Juan tubig tu nga getaw.

²⁹ Mendadi benaˈ migendaw, kini si Isus, minitaˈ tuˈu ni Juan misebang pangay dia niin. Kaliˈ pektaluˈ si Juan, “Aa naa, kiin na tuˈu su piningalan dun Nati Karniru nu Megbebayaˈ, su mbaal guliden tu Megbebayaˈ, puˈ adun mpedasun su salaˈ nu tibaˈan getaw! ³⁰ Iini tinaluˈu sug laung ku, ‘Duuni sungu metuaˈ, mbinayaˈ pa dinaan, laak pia maˈantu, metaas pa gupia dinaan, puˈ su ndaˈ pau pegigetaw, daan nain.’ ³¹ Naa sug bekna,” laung pa ni Juan, “ndaˈu iin mailala. Laak dagid iini mituaˈu dun memunag tubig tu getaw, puˈ adun pailalau iin di nga getaw Israel.”

³² Mendadi tinakesiˈan ni Juan si Isus, laungen, “Minitaˈu sug Balakat nu Megbebayaˈ luminusad genat tu gekbus langit, miglanguban di maˈniin palas limuun, dayun ndaˈ na awaˈ diniin. ³³ Ndaˈu pain mailala, dagid su Megbebayaˈ, su suminuguˈ dinaan memunagu tubig tu nga getaw, daan na miktaluˈ dinaan, ‘Maitaˈ mu sug Balakat nu Megbebayaˈ lumusad mukaˈ ndiˈ na mawaˈ di getaw. Mendadi ki getaw kiin, iin su bunagenen tu nga getaw sug Balakat nu Megbebayaˈ.’” ³⁴ Diksuˈ ni Juan, “Naa kagina minitaˈu tuˈu, taluˈu diniu, iinen na tuˈu sug Bataˈ nu Megbebayaˈ.”

³⁵ Naa benaˈ miksala gendaw, dia na puliˈ pegindeg si Juan, ilan nu sakupen duaˈ tawan. ³⁶ Mendadi, minitaˈ ni Juan si Isus minayan dia. Kaliˈ pektaluˈ si Juan, “Naa, bentayay pa daan niu, kia na su Nati Karniru nu Megbebayaˈ!”

³⁷ Naa kig duaˈ tawan kini sakup ni Juan, benaˈ midengeg nilani tinaluˈen kia, lindug nilan si Isus. ³⁸ Luminingay dayun si Isus, minitaˈen ilan miglendug diniin. Sinaaken dinilan, “Taˈ alanduni penengaun niu?”

Kaliˈ ilan sembag, “Rabi, adin ka pektulugan?” (Su gelalen Rabi, guluganen, “Mekpetuˈun.”)

³⁹ Simbag ni Isus, “Tendug amu dinaan, adun niu maitaˈ.” Mendadi tumindug ilan tuˈu diniin, minitaˈ nilan dema su pegbenwananen, lilabung ilan dayun dia niin. (Puˈ ginengaˈ na menaugi gendaw gembabaˈ.)

⁴⁰ Naa sala tawan di nga mikedengeg tu tinaluˈ ni Juan kia dayun miglendug dini Isus, iin si Andres, pated ni Simon Pedro. ⁴¹ Si Andres, linaawanen dayun ki gulangbataˈen si Simon, laungen diniin, “Minitaˈ na nami su Tinduˈ nu Megbebayaˈ Meglekaunutan.” (Naa ki gelalen “Tinduˈ nu Megbebayaˈ Meglekaunutan,” iin su gulugan nu ngalanen si Kristu.) ⁴² Inunutan dayun ni Andres si Simon ditu ni Isus.

Mendadi si Isus, pingenlenganen si Simon, kaliˈ pektaluˈ diniin, “Yaˈa si Simon, bataˈ ni Juan. Dagid genat nandaw, paingalan diniˈa, si Cefas.” (Su ngalan Cefas, guluganen “batu,” sala ngalanen si Pedro.)

⁴³ Benaˈ miksala gendaw, pigdelendem ni Isus meditu Galilea. Mendadi linaawaneni sala tawan si Felipe, kaliˈ pektaluˈ diniin, “Pegdunuta dinaan!” ⁴⁴ (Naa kini si Felipe, getaw Betsaida, sug lunsud dadema ni Andres buˈ ni Pedro.) ⁴⁵ Mendadi si Felipe, linaawanen si Natanael, kaliˈ dayun pektaluˈ diniin, “Minitaˈ na nami su sinulat ni Moises ditu Misulat Palinta nu Megbebayaˈ, su sinulat dadema nu ngag duma pimuunan nu Megbebayaˈ dengantu. Ngalanen si Isus, bataˈ ni Jose, getaw Nazaret.”

⁴⁶ Dagid kini si Natanael, kaliˈ sembag, “Baa, duun bai melengas megenat dig lunsud Nazaret kiin?”

“Naa, tenduga dinaan,” laung ni Felipe, “adun mu maitaˈ.”

⁴⁷ Mendadi kini si Isus, benaˈ minitaˈen si Natanael pegangay dia niin, kaliˈ pektaluˈ di ngag dumanen, “Bentayay pa daan niu, ki getaw kia, tantu getaw Israel. Ndaˈig limbungen!”

⁴⁸ Sinaak ni Natanael dini Isus, “Taˈ mai kailala mu dinaan?”

“Su ndaˈa pa melaaway ni Felipe,” laung ni Isus, “minitaˈu yaˈa minilunga dia gayu igera.”

⁴⁹ “Aa naa, Sir,” simbag ni Natanael, “saˈ maˈantu, yaˈa na gupia sug Bataˈ nu Megbebayaˈ! Yaˈa su Gadiˈ nami nu nga getaw Israel!”

⁵⁰ Kaliˈ pektaluˈ si Isus, “Mituudan ka ba dinaan sabaˈ di tinaluˈu kia puˈ minitaˈu yaˈa saˈ minilunga diag igera? Maitaˈ mu pa ki mekesalebuˈ padun gupia! ⁵¹ Taman taluˈu diniu, maitaˈ pa niu kig langit mpukaˈ, mukaˈ ki nga sesuguˈen nu Megbebayaˈ getaw langit luntu mukaˈ lumusad dinaan kini, kig Bataˈ nu Kilawan.”