^1-3 Naa ki nga Pariseo kini, midengeg nilan puˈ melaun getaw daw pisakup ni Isus mukaˈ binunaganen tubig, melaun pa dig dani Juan. (Asa kanaˈ si Isusi mimunag tubig, su laak nga sakupen.) Naa benaˈ misuunan ni Isus su teluˈen nu nga Pariseo, migawaˈ dayun diag benwa Judea, ilan nu nga sakupen, minuliˈ ilan tu Galilea. ⁴ Laak subay minayan ilan tug benwa Samaria.

⁵ Benaˈ dia na Samaria si Isus, midepet tug lunsud Sikar, mesempel dig lupaˈ bigay dengantu ni Jacob tug bataˈen si Jose. ⁶ Dia pa sug delungan pigbaal ni Jacob. Dayun migingkud si Isus dia gupid nug delungan kia, puˈ bilayan sabaˈ nu kepanawen. Duun saan miktui gendaw.

⁷ Mendadi, duunig libun mituaˈ diag delungan kia, puˈ mangay tubig. Laung ni Isus diniin, “Begayay mau di tubig kiin.” ⁸ (Naa su nga sakupen, minundas ilan tug lunsud menaluy gaan.)

⁹ “Aba,” simbag nug libun kia, “mauma pinengian mau tubig, asa yaˈa, getaw Judeaa, mukaˈ naan, getaw Samaria mau?” (Puˈ su nga getaw Judea mukaˈ getaw Samaria, migbanta ilan.)

¹⁰ Kaliˈ sembag si Isus, “Naa saˈ misuunan mu siaig begay nu Megbebayaˈ di nga getaw, mukaˈ saˈ miˈilala mu sia ki minengi diniˈa kini tubig, naa yaˈa siai menengi dinaan tubig. Begayu dayun diniˈa ki tubig mekpetubuˈ di getaw.”

¹¹ “Naa Sir,” laung nug libun, “ndaˈiduni sigeb mu, medalem dademaig delungan kini. Adin mu elapay ki tubig mekpetubuˈ di getaw? ¹² Mukaˈ keduaˈen, su ginepuˈay nami si Jacob, pingumbilinen dinamiig delungan kini, iin dademai ginumanen, ilan nu ngag bataˈen, pia su nga petubuˈenen. Yaˈa, metaasa pa ba dini Jacob?”

¹³ Sumimbag si Isus, “Adin su minum di tubig dig delungan kini, kuaun da puliˈ. ¹⁴ Dagid adin su minum di tubig begayu, ndiˈ na puliˈ kuaun. Kig begayu diniin, mbaluy maaˈ nu tebud dig dialem delendeman nu getaw, puˈ mekegbegay gupia diniin ketubuˈ ndaˈi tamanen.”

¹⁵ “Sir!” laung nug libun. “Saˈ mesuˈat, begayay mau dun ki tubig kiin, adun ndiˈ nau kuaun puliˈ, mukaˈ ndiˈ nau megangay tubig dini.”

¹⁶ Kaliˈ sembag si Isus, “Naa, laaway mu deliˈ su sawa mu, peduma mu dayun mpuliˈ dini.”

¹⁷ Kaliˈ sembag, “Ndaˈiduni sawau.”

Laung ni Isus, “Waˈa daan, metuud, ndaˈiduni sawa mu. ¹⁸ Lima tawani minginsawa diniˈa, mukaˈ kig duma mu kiin nemun, kanaˈ amu bilaˈi. Metuudi tinaluˈ mu kia.”

¹⁹ “Masiˈ daan, Sir,” laung nug libun, “pimuunan ka nu Megbebayaˈ. ²⁰ Naa su ginepuˈay nami, miktamuy ilan tu Megbebayaˈ dinig bentud kini. Laak yamu nga getaw Judea, laung niu subay ditu da daw Jerusalem pektemuyay su Megbebayaˈ.”

²¹ Kaliˈ pektaluˈ si Isus, “Aa lai, petuud mau, duuni gendaw mateng, su nga getaw, ndiˈ nailan mektamuy tu Gamaˈ ta dinig bentud kini sampay ditu Jerusalem. ²² Yamu nu nga getaw Samaria, ndaˈ niu mesuunay su tantu pektemuyen niu. Yami nu nga getaw Judea, misuunan nami su pektemuyen nami, puˈ su keglegawen di kilawan, mikpuun di getaw Judea. ²³ Laak duuni gendaw mateng, mektamuy su nga getaw tu Megbebayaˈ meksekat di ginuung nug Balakaten, pektemuyen nilan su tantu Diwata. Maˈantu su kektamuy nilan, iin sug betad mauyaˈan nu Gamaˈ ta Megbebayaˈ. Mukaˈ ki gendaw kia, minateng na tuˈu. ²⁴ Ndiˈ maitaˈ su Megbebayaˈ, kaas su nga mektamuy dun, subay meksekat dig Balakat nu Megbebayaˈ su kektamuy nilan diniin, puˈ adun pektemuyen nilan su tantu Diwata.”

²⁵ Laung nug libun, “Naa misuunan ku duuni gendaw, mateng su Tinduˈ nu Megbebayaˈ Meglekaunutan, su piningalan dun si Kristu. Naa saˈ mateng iin, pesuunenen daw dinita sug launanen.”

²⁶ Kaliˈ pektaluˈ si Isus, “Kig duma mu kini megabitabit, iin naini, naan ma.”

²⁷ Naa iin dademai kedateng puliˈ nu nga sakup ni Isus. Misebuˈan ilan dun gupia puˈ dumanen megabitabit, libun. Laak ndaˈi mekakuˈ sumaak tug libun saˈ taˈ mai tuyuˈen, atawaka sumaak dini Isus saˈ taˈ mai migabitabit ilan dun.

²⁸ Mendadi binilin nug libun dia sug bandi bitanganen tubig, minuliˈ dayun tug lunsud, inukitanen dayun su nga getaw dia, laungen, ²⁹ “Dunutay niau, paitaˈu diniu ki migukit dinaan tu kelaun mipenggulaulau genat kaikaˈayu. Taˈ ma, kanaˈ ba iinen na saan su Tinduˈ nu Megbebayaˈ Meglekaunutan?” ³⁰ Benaˈ midengeg nu nga getaw su tinaluˈ nug libun kia, migawaˈ ilan diag lunsud, miditu ilan ni Isus.

³¹ Mendadi su keteliud nug libun, ginuut sia nu nga sakupen si Isus, laung nilan, “Sir, aan ka deliˈ!”

³² Dagid simbag ni Isus dinilan, “Duun nai gaan ku, ki ndaˈ niu mesuunay.”

³³ Benaˈ midengeg nu nga sakupen, miksinaakay ilan, laung nilan, “Aw, masiˈ duuni migilak diniin saanan ta ditug lunsud?”

³⁴ Laak kaliˈ pektaluˈ si Isus, “Iini maˈniin gaan ku, su kegdunutu tu mauyaˈan nu suminuguˈ dinaan, mukaˈ su ketubusu di pibaalen dinaan. ³⁵ Duuni peneluˈen niu puˈ paat bulan dekag pai meglegani.^a Laak taluˈu diniu, pengmata amu, pegbentayay niu su ngag binaalan duminalag na, mpia na geniin. ³⁶ Su meglegani, sukayan, puˈ empunenen su ginani, su bigayan di ketubuˈ ndaˈi tamanen. Su memula taluˈ nu Megbebayaˈ di ginaa nu nga getaw, mukaˈ su meglegani, meksamasama ilan dayun leliagay. ³⁷ Metuud su peneluˈen niu puˈ sala laungi memula, salai gumani. ³⁸ Sinuguˈu amu gumani dinig benwa ndaˈ niu pengimbaalay. Lain tawani mingimbaal dini, laak miˈilasan amu di sengkuˈen.”

³⁹ Mendadi, melaun getaw Samaria dig lunsud kia mikpetuud dini Isus sabaˈ nu tinaluˈ nug libun kia, “Inukiten dinaan su kelaun pinggulaulau genat kaikaˈayu.” ⁴⁰ Saˈ maˈnia, benaˈ minangay dia ni Isusi nga getaw Samaria kia, ginuut nilan tunlen pa dia nilan, miduaˈ gebii pa si Isus dia nilan.

⁴¹ Mukaˈ melaun pa padun getaw Samaria mikpetuud dini Isus saˈ midengeg nilan su taluˈen na gupia. ⁴² Laung nilan tug libun kia, “Bekna, mikpetuud ami sabaˈ nu ginukit mu. Laak nemun, telinga na namii mikedengeg di piktuˈunen, kaas mituudan ami gupia, iini tantu Meglegawen tu tibaˈan getaw.”

⁴³ Benaˈ mipapas naig duaˈ gebii kia, minundas si nga Isus tu Galilea. ⁴⁴ Selian nilan mpanaw, kaliˈ pektaluˈ si Isus, “Ki pimuunan nu Megbebayaˈ, ndiˈ pegbesaan diag daan benwanen.” ⁴⁵ Laak benaˈ minateng ilan dia Galilea, pinembaˈ si Isus nu nga getaw dia, puˈ mikesaup ilan tug Lumpuk kiin tug Liniusan ditu Jerusalem, kaas minitaˈ nilan su kelaun pinggulaula ni Isus saanan nug lumpuk kitu.

⁴⁶ Naa mipuliˈ si Isus tu Cana, sakup Galilea, sug lunsud tandaˈ pibaluyen penginumeni tubig. Naa duuni getaw dia metaasi gelalen, pegladu kig bataˈen ditu Capernaum. ⁴⁷ Mendadi benaˈ midengeg nu metaas getaw kia su kedateng ni Isus dia Galilea genat tu Judea, linaawanen si Isus, pinenginen dayun diniin meditu Capernaum meneguliˈ tug bataˈen, pekagawinaa na. ⁴⁸ Dagid kaliˈ pektaluˈ si Isus diniin, “Paa, yamu pa di getaw, saˈ ndiˈ niu maitaˈi mekesalebuˈ penggulaula mukaˈ tuˈus, ndiˈ amu mekpetuud.”

⁴⁹ “Sir,” laung nu kaunutan, “dunuta dema tuˈu dinaan, puˈ mbuus matayig bataˈu.”

⁵⁰ Kaliˈ sembag si Isus diniin, “Naa, uliˈa na. Metubuˈ da kig bataˈ mu!”

Mituudan dun dayun ki getaw kia tu tinaluˈ ni Isus, dayun muliˈ. ⁵¹ Mendadi saananen muliˈ tug benwanen, suminungkak diniin su nga sesuguˈenen, laung nilan, “Mitubuˈ da sug bataˈ mu!” ⁵² Sinaaken dayun dinilan saˈ taˈ urasay dun mikpuuni kepia ginaa nug bataˈen. Kaliˈ ilan sembag, “Kalabung di palisi gendaw ki kawaˈ panasen.” ⁵³ Milabuˈ dayun dig delendeman nu gamaˈen, mitaang dun gupia su ketaluˈ ni Isus diniin, “Metubuˈ da sug bataˈ mu.” Mikpetuud dayun dini Isus, sampay su nga kelaun gapenen.

⁵⁴ Kinii keduaˈ mekesalebuˈ pinggulaula ni Isus sikna minateng dia Galilea genat tu Judea.