¹ Tubus itu, miglumpuk su nga getaw Judea ditu Jerusalem adun mektamuy tu Megbebayaˈ, mukaˈ suminaup dadema si Isus. ² Naa dia Jerusalem duunig bulenaw, mesempel di gengaˈan nug lunsud piningalan dun su Gengaˈan nu Karniru. Piningalan dun di Hinebreo sug bulenaw kia, Betsata. Lima buuki kemalig binaal dia, ³ megbelilid dia su nga pegladu. Melaun gupia pemegladu dia, duuni ngag buta, duun dademai nga mipilung mukaˈ nga minatay seputul lawasen. [Pegelatan nilan ki keglibual nu tubig, ⁴ puˈ taang dun, duuni sesuguˈen nu Megbebayaˈ getaw langit lumusad dia tubig, meglibual dayun su tubig. Genat tu keglibual nu tubig, adin dayuni getaw mauna sugbu dia, mauliˈan dayun, pia alandunig leduunen.] ⁵ Naa duuni sala tawan dia, telu puluˈ buˈ walu taun na migladu. ⁶ Mendadi si Isus, benaˈ minitaˈen ki pegladu kini mukaˈ misuunanen miniben na megladu, sinaaken diniin, “Mauyaˈan mu ma mauliˈan ka?”

⁷ Kaliˈ sembagi pegladu kia, “Waˈa sia, Sir, laak saˈ meglibual su tubig, ndaˈi megabang dinaan sugbu dia, kaas saanan ku sugbu sia, maunanan nau dumau.”

⁸ “Naa, pegbuata,” laung ni Isus. “Sikwat mui sinampuyuan diniˈa kiin, mukaˈ panawa.” ⁹ Mitekaw dayun mauliˈay. Sinikwaten tuˈu su sinampuyuan diniin kia, dayun mpanaw.

Naa su kauliˈay nu getaw kia, mitaang di Gendaw Pelali. ¹⁰ Mendadi ki nga kaunutan nu getaw Judea, kaliˈ ilan pektaluˈ tu piuliˈan, “Naa, Gendaw Pelali maini. Binandu ma ditu Misulat Palinta nu Megbebayaˈ, uiten mu nandawi sinampuyuan diniˈa kiin.”

¹¹ Kaliˈ sembag, “Ki getaw kiin mineguliˈ dinaan, tinaluˈen dinaan, sikwaten kui sinampuyuan dinaan, mukaˈ mpanawu.”

¹² Sinaak nilan pelum diniin, “Naa, taˈ taway duni miktaluˈ dun diniˈa?”

¹³ Naa ki piuliˈan kia, ndaˈen suunay, puˈ migawaˈ na dia si Isus adun meliawen su tebenan getaw.

¹⁴ Mendadi tubus itu ndaˈ maiben, milabet ni Isus ki piuliˈan kia diag Balay Pengedapan tu Megbebayaˈ. Kaliˈ pektaluˈ si Isus diniin, “Naa, bentayay mu pa daan, miuliˈan ka na. Ndiˈa puliˈ pegbaal salaˈ, puˈ tekaw mbuus mbianan mui melaat pa ditug leduun mu kitu.”

¹⁵ Saˈ maˈnia, mipuliˈ su miuliˈan ditu nga kaunutan nu getaw Judea, pisuunen dinilan puˈ si Isusi mineguliˈ dun. ¹⁶ Mendadi, iin dayuni puunan nu kegleget nu nga getaw Judea dini Isus, puˈ mineguliˈ kia metaang di Gendaw Pelali. ¹⁷ Laak sumimbag si Isus dinilan, “Su Gamaˈu Megbebayaˈ, ndaˈi kelalinen. Iin dademai pinunggilingan ku.”

¹⁸ Mendadi ki nga kaunutan nu nga getaw Judea, benaˈ midengeg nilani tinaluˈ kia ni Isus, minamal laakig delendeman nilan petain nilan si Isus. Puˈ pimilasen daw su Gendaw Pelali, mukaˈ inangkenen pa padun, iini Gamaˈen su Megbebayaˈ, saˈitada pilepengenig lawasen tu Megbebayaˈ.

¹⁹ Kaliˈ gusay sembag si Isus di nga kaunutan, “Taman taluˈu diniu, naan kini kig Bataˈen, ndaˈiduni penggulaulaan ku saˈ ndiˈu maitaˈ puˈ iin dademai penggulaulaan nu Gamaˈu. Adin su penggulaulaan nu Gamaˈu, iin dademai penunggilingan ku. ²⁰ Puˈ naan kini, kig Bataˈen, petailenu nu Gamaˈu, kaas pinitaˈen dinaan sug launan penggulaulaanen. Mukaˈ duuni mekesesebuˈ pa dun di kauliˈay nu mipilung kia, paitaˈen pa dinaan, kaas mesebuˈan amu dun gupia. ²¹ Petubuˈen puliˈ nu Gamaˈu su minatay. Naa maˈantu dadema danaan, adin su mauyaˈan ku, petubuˈen ku dadema puliˈ. ²² Kanaˈ na nu Gamaˈui mengukum di nga getaw, puˈ naan nai paukumenen dun, ²³ adun pegbesaanu nu ngag launan getaw maaˈ nu kegbasa nilan tu Gamaˈu. Adin su ndiˈ megbasa dinaan kig Bataˈen, ndiˈ dadema megbasa tu Gamaˈu, puˈ iini suminuguˈ dinaan medini.”

²⁴ Laung padun ni Isus, “Taman taluˈu diniu, adin su mekedengeg tu teluˈen ku mukaˈ mekpetuud tu suminuguˈ dinaan, iini mpeduma tu ketubuˈ ndaˈi tamanen. Ndiˈ maukuman, puˈ migawen na di kepatayen mukaˈ mialapenig begu ketubuˈ. ²⁵ Taman taluˈu diniu, sungu matengi gendaw mekedengeg di tingegu su nga minatay, puˈ naanig Bataˈ nu Megbebayaˈ. Adin su mekedengeg di tingegu, mpeduma dayun di ketubuˈ ndaˈi tamanen. Mukaˈ ki gendaw kia, minateng na. ²⁶ Naa su Gamaˈu, iini puun nu ketubuˈ. Maˈnia dadema naan, kig Bataˈen. Bigayanu niin pegbayaˈu, puun dau dema nu ketubuˈ. ²⁷ Bigayan dau niin dema pegbayaˈu mengukum tu nga getaw, puˈ naanig Bataˈ nu Kilawan. ²⁸ Mauma dema mesebuˈan amu dun su tinaluˈu diniu? Bentayay pa daan niu, duun daani gendaw mateng medengeg nug launan minatay su tingegu ²⁹ mukaˈ megbuat ilan tu ngag lebeng nilan. Dayun adin su melengasi pigbetaden, iini metubuˈ puliˈ di ndaˈi tamanen. Mukaˈ adin su melaati pigbetaden, megbuat tug lebengen, dayun iini ginukuman dun gupia, segbuun ditug linaw gapuy.”

³⁰ Laung gusay ni Isus, “Ndaˈiduni penggulaulaan ku mikpuun tu pegbayaˈu, laak dagid saˈ mengukumu, iini pektalentenan ku, su da teluˈen dinaan nu Gamaˈu, kaas melegdengi kengukumu, puˈ medunut tu mauyaˈan nu Gamaˈu suminuguˈ dinaan, kanaˈ nug danaan laak mauyaˈan.

³¹ “Naa saˈ upama naani tumakesiˈ mekatag dig lawasu, ndiˈ kambat medawat su teluˈen ku. ³² Laak tumuˈ duunig duma tumakesiˈ mekatag dinaan. Misuunan ku dadema puˈ metuudi teluˈenen mekatag dinaan. ³³ Naa si Juan, saˈ piksaakan niu iin, miglegintuud mekatag dinaan. ³⁴ Laak naan, kanaˈu seligan takesiˈanu nu nga getaw. Mitaluˈu da dun diniu su mekatag dini Juan kia, adun megawen amu. ³⁵ Si Juan kiin, iin su maaˈ nu suluˈ mikpedelag diniu, pisuunanen amu tu metuud. Miuyaˈan niu su piktuˈunen diniu, laak ndaˈ maiben. ³⁶ Duun pai metaas takesiˈ di tinakesiˈan ni Juan kiin. Adin su pipenggulaula dinaan nu Gamaˈu, iini takesiˈ mekatag dinaan puˈ sinuguˈu nu Gamaˈu Megbebayaˈ medini. ³⁷ Tuminakesiˈ dadema dinaan su Gamaˈu suminuguˈ dinaan, laak ndaˈ niu mainsan medengeg su tingegen, mukaˈ ndaˈ niu mainsan maitaˈ su palasen. ³⁸ Ndaˈ niu pa pagid pektalentenay su taluˈ nu Gamaˈu, puˈ ndiˈ amu metuudan dun su sinuguˈen medini. ³⁹ Penilung niu su Misulat Taluˈ nu Megbebayaˈ, puˈ laung niu dun saˈ penemalan niu gupia besaay, mpeduma amu tu ketubuˈ ndaˈi tamanen. Laak dagid ki sinulat kiin, miketakesiˈ dademai dinaan. ⁴⁰ Laak dagid pia mitakesiˈanu dun, ndaˈ amu pekpaingabang dinaan, adun mpeduma amu sia tu ketubuˈ ndaˈi tamanen.”

⁴¹ Diksuˈ ni Isus su taluˈen, “Naa, kanaˈu tuyuˈ penalanu nu nga getaw. ⁴² Laak yamu nu nga kaunutan, misuunan ku sug betad niu, misuunan ku dadema puˈ ndiˈ amu mekpetail tu Megbebayaˈ. ⁴³ Pigwekilanu nu Gamaˈu medini, laak dagid ndaˈ niau penembaˈay. Saˈ upama lain tawani medini mekpuun tu pegbayaˈen laak, iini penembaˈen niu. ⁴⁴ Iini mauyaˈan niu, mpenalan amu nu ngag duma niu, laak mpauk amu penalan nu Megbebayaˈ salanen da, kaas mekendutaˈ mai kekpetuud niu dinaan? ⁴⁵ Naa mabuˈ laung niu dun dengaten ku amu tu Gamaˈu. Ndiˈu. Iini dumangat, si Moises, su siligan niu tantu. ⁴⁶ Laung niu dun mituudan amu ditu sinulat ni Moises, laak dagid saˈ iin siai pituud niu, pituud niau dadema sia, puˈ itu su sinulaten mekatag dinaan. ⁴⁷ Mendadi kagina ndiˈ amu mekpetuud ditu sinulat ni Moises, ndiˈ damu dema mekpetuud ditu petuˈun ku.”