7
Si Isus mukaˈ su nga Pateden
1 Genat itu, mipanaw si Isus dia laak benwa Galilea. Ndaˈ peditu Judea, puˈ su nga kaunutan nu getaw Judea ditu, mekpatay ilan sia diniin. 2 Mendadi, sungu na mektelipuun sug lumpuk nu nga getaw Judea piningalan dun sug Lumpuk ngag Bebelayan. 3 Kaliˈ pektaluˈ dini Isus su nga pateden, “Tumuˈ awaˈa dini, dituun ka Judea, adun maitaˈ nu nga sakup mu ditu ki penggulaulaan mu. 4 Puˈ su getaw saˈ mekpededengeg, ndiˈen egluden su penggulaulaanen. Ki nga penggulaulaan mu kini, subay pedayag mu tu tibaˈan getaw!” 5 (Iini tinaluˈ dun nu nga patedeni maˈnia, puˈ pia ilan, ndaˈ ilan pekpetuud diniin.)
6 Kaliˈ pektaluˈ si Isus, “Paa, naan, ndaˈ pa dateng ki gendawu. Yamu, pia taˈ endaway dun, megdadi da. 7 Ndiˈ amu mesengay nu nga kilawan, dagid naan, misengayu nilan, puˈ penluksaden ku dinilan melaatig betad nilan. 8 Mendadi, yamu nai peditug lumpuk. Naan, ndiˈu meditu, puˈ ndaˈ pa dateng ki gendawu.” 9 Saˈ maˈniai tinaluˈen, mibilin dia Galilea si Isus.
Su Kangay ni Isus tug Lumpuk ngag Bebelayan
10 Mendadi benaˈ miditug lumpuk su nga pated ni Isus mukaˈ duuni santaˈ gebii, miditu dadema si Isus, laak dagid ndaˈ pailagilag dia. 11 Naa ki nga kaunutan nu getaw Judea, pekpenengaun nilan si Isus diag lumpuk, sinaak nilan tu nga getaw, “Adin main?”
12 Su nga melaun getaw suminaup, miglelekemeday ilan patiˈ mekatag dini Isus. Duuni miktaluˈ, “Gempia getaw iin,” duun dademai miktaluˈ, “Kanaˈ ma da, peglimbunganen su nga getaw.” 13 Laak pigbuni nilan su teluˈen nilan kia, puˈ mindek ilan tu nga kaunutan nu getaw Judea.
14 Mendadi benaˈ miginengaˈ na saan sug lumpuk, miditu si Isus Balay Pengedapan tu Megbebayaˈ, piktuˈunanen su nga getaw dia. 15 Ki nga kaunutan nu getaw Judea, misebuˈan ilan dun, kaliˈ ilan peksinaakay, “Paa, ki getaw kini, pikendun ma dun metaasi sinuunanen, asa ndaˈ ma petuˈunay di Palinta ta?”
16 Mendadi kaliˈ pektaluˈ si Isus, “Ki tinituluˈu kini, kanaˈ danaan delendeman, segaga danu suminuguˈ dinaan. 17 Adin su getaw delendemanen penggulaulaanen su mauyaˈan nu Megbebayaˈ, mesuunanen saˈ taˈi pigenatan nu tituluˈu, saˈ genat ba tu Megbebayaˈ, saˈ mikpuun bain tug danaan laak pegbayaˈ. 18 Adin su mekpetuˈun puun dig daniin laak pegbayaˈ, mekpenalenal da, laak dagid adin su mekpetuˈun adun pegleleepenenig dengegan nu Megbebayaˈ, su suminuguˈ diniin, iini tantu mekpetuˈun, kanaˈ belusen. 19 Maˈniin ni Moises, bigayanen amu Palinta nu Megbebayaˈ dengantu, laak dagid, ndaˈiduni getaw diniu dinunutanen gelaˈ su Palinta kia. Puˈ saˈ sia duun diniui getaw dinunutanen gelaˈ su Palinta, mauma dema naan, petain ma niau sia, asa duuni pinalinta ni Moises, ndiˈ mekpatay?”
20 Kaliˈ sembag su melaun getaw, “Pingepuˈan ka menulay! Pia ndaˈi miksaad matay diniˈa.”
21 Kaliˈ padun sembag si Isus dinilan, “Naa, mainsan pinggulaulaui mekesalebuˈ, mitekawan amu dun, launan niu. 22 Bentayay pa daan niu. Pinalinta diniu ni Moises pentuˈusan niuig bataˈ niu puˈ getaw Judea nailan, kaas megbaal amu tuˈus, pia di Gendaw Pelali (laak kanaˈ ni Moisesi pigenatanen, su laak nga ginepuˈay niu).a 23 Naa, saˈ sirkunsisuuni getaw di Gendaw Pelali, puˈ adun medunutani palinta ni Moises, taˈ mai mangit amu dun dinaan saˈ pineguliˈan ku gupiaig lawas nu getaw kiin di Gendaw Pelali? 24 Mendadi, ndiˈ amu pegdedaliˈ mengukum di minitaˈ niu, subay unaan pa niu pegdelendem saˈ gempia ba su pinggulaula, saˈ melaaten ba.”
Si Isus ba su Tinduˈ nu Megbebayaˈ Meglekaunutan?
25 Naa duuni nga getaw Jerusalem miktaluˈ, “Ki getaw kini, kanaˈ bain su petain sia nu nga kaunutan? 26 Laak bentayay pa daan niu, megyaga iin di gedapan, laak ndiˈ nilan pemaagen! Aa, mabuˈ misuunan ba nilan puˈ iinen tuˈu su Tinduˈ nu Megbebayaˈ Meglekaunutan? 27 Dagid saˈ mateng daw su Tinduˈ nu Megbebayaˈ, ndaˈ dawi mekesuun dun ki pegenatanen. Naa kig launan ta kini, misuunan ta su pigenatan nu getaw kini.”
28 Mendadi, selian ni Isus mekpetuˈun dia Pengedapan tu Megbebayaˈ, minekeg mektaluˈ, laungen, “Naa, laung niu dun puˈ miˈilala ba niau mukaˈ misuunan ba niui pigenatan ku? Kanaˈ danaan delendeman su kediniin ku. Metuud, duuni Megbebayaˈ mukaˈ iini suminuguˈ dinaan, laak iin, kanaˈ niu mailala. 29 Dagid naan, mikesuunu diniin, puˈ iini pigenatan ku, mukaˈ iini suminuguˈ dinaan medini.”
30 Mendadi ki nga kaunutan kia, sikna midengeg nilan, daapen nilan sia si Isus, laak ndaˈi mekedaap dun, puˈ ndaˈ pa dateng ki gendawen. 31 Laak melaun getaw dia, mituudan ilan dini Isus, laung nilan, “Saˈ metuaˈ su Tinduˈ nu Megbebayaˈ Meglekaunutan, melaun pai mekesalebuˈ penggulaulaanen, sabayaˈ nu getaw kini?”
Su Keksuguˈ Daapen sia si Isus
32 Naa ki nga Pariseo, midengeg nilan su kaunlumunlum kia nu nga melaun getaw mekatag dini Isus. Saˈ maˈnia, ilan kia mukaˈ su nga kaunutan nug belian nu getaw Judea, sinuguˈ nilan dayuni nga megingat tu Pengedapan tu Megbebayaˈ, adun daapen nilan si Isus. 33 Kaliˈ pektaluˈ si Isus, “Dumuma pau diniu ndiˈ maiben, dayun megawaˈu dini, mpuliˈu ditu suminuguˈ dinaan. 34 Dayun penengaun niau, laak ndiˈ niau mbaangan, puˈ ndiˈ amu mekeditu pegengayan ku.”
35 Naa ki nga kaunutan nu getaw Judea kia, miksinaakay ilan dayun, laung nilan, “Adin ma saan angayi getaw kini, ndiˈ ta mbaangan? Mabuˈ mangay ditu ngag duma ta misigwag, su luminamug tu nga getaw Grecia, puˈ adun petuˈunanen pelum su nga getaw Grecia? 36 Taˈ mai guluganen ki tinaluˈen kia puˈ penengaun ta, laak ndiˈ tain mbaangan, puˈ ndiˈ ita mekeditu daw pegengayanen?”
Su Tubig Mekegbegay Ketubuˈ ndaˈi Tamanen
37 Naa benaˈ sug deksuˈan nug Lumpuk nug Liniusan, si Isus, migindeg di gedapan nug launan getaw, minekeg dayun mektaluˈ dinilan, “Pia adini getaw kuaun, mekangay minum dini naan. 38 Ndaˈ ba mesulat di Misulat Taluˈ nu Megbebayaˈ, ‘Adin su metuudan dinaan, duuni maaˈ nu tebud dig dialem ginaanen menelegan megbegay ketubuˈ ndaˈi tamanen.’” 39 Naa, ki tinaluˈ ni Isus kia, iini mekatag di penggulaula nug Balakat nu Megbebayaˈ, su sungu begay tu nga mekpetuud diniin. Ndaˈ pa ia begay, puˈ ndaˈ pa lentu si Isus ditu gekbus langit adun maitaˈ nug launan biwat su kelengas nu pegbayaˈen.
Su Sumpakiˈ nug Delendeman nu nga Getaw
40 Naa benaˈ midengeg nu nga melaun getaw ki tinaluˈ kia ni Isus, duuni miktaluˈ, “Ki getaw kini, iinen na tuˈu su pedetengen ta Pimuunan nu Megbebayaˈ!”
41 Saˈ sug dumai mektaluˈ, laung nilan, “Iinen na tuˈu su Tinduˈ nu Megbebayaˈ Meglekaunutan!”
Dagid duun pa pagidi mektaluˈ, “Su Tinduˈ nu Megbebayaˈ Meglekaunutan, kanaˈ ma genat tu Galilea! 42 Iini sinulat ditu Misulat Taluˈ nu Megbebayaˈ, su Tinduˈ nu Megbebayaˈ Meglekaunutan, sapuˈ ni Adiˈ David, kaas genat dig Betlehem, sug lunsud ni David.” 43 Iin dayuni sumpakiˈ nug delendeman nu nga getaw mekatag dini Isus. 44 Sug duma, mauyaˈan nilan sia daapen iin, laak ndaˈ pai kedaap diniin.
Su Kemilas nu nga Kaunutan nu Getaw Judea
45 Naa su nga megingat tu Pengedapan kiin, benaˈ mipuliˈ ilan ditu nga kaunutan nug belian mukaˈ tu nga Pariseo kia, sinaakan ilan, “Naa, mauma dema ndaˈ ma niu iin uitay?”
46 Kaliˈ sembag su nga megingat, “Puˈ iin pa duuni getaw mikiteluˈay maaˈ nu getaw kiin!”
47 “Apelai!” sinaak nu nga Pariseo. “Milimbungan damu niin dema? 48 Saˈ yami nu nga kaunutan mukaˈ Pariseo, duun bai misuunan niu sala tawan dinami mituudan di getaw kiin? 49 Baa, nga melaun getaw kini! Ndaˈ nilan mesuunay su Palinta nu Megbebayaˈ pisulaten dini Moises, kaas inukuman nailan nu Megbebayaˈ!”
50 Naa sala tawan di nga Pariseo kia, si Nicodemo, su miditu ni Isus sug diin kiin. Kaliˈ pektaluˈ si Nicodemo, 51 “Asa binandu ditu Palinta ta, ukumani getaw subay unaan pa biselaay.”