¹ Naa tubus itu, duminipag si Isus dig Linaw Galilea (sala piningalan dun sug Linaw Tiberias). ² Melaun gupia getaw miglendug dini Isus, sabaˈ minitaˈ nilan su nga mekesalebuˈ tuˈus pinggulaulanen saˈ pineguliˈanen su pemegladu. ³ Tumiwad si Isus dig bentud, ilan nu nga sakupen, dayun ilan megingkud dia. ⁴ Naa sungu na mektelipuun sug Lumpuk tug Liniusan. ⁵ Mendadi, benaˈ midayag ni Isus su nga mimeglendug getaw pangay dia niin, sinaaken dini Felipe, “Adin ta ma mesaluyi gaan, sukal paan ta sia di melaun getaw kini?” ⁶ (Naa su piksaak kini ni Isus dini Felipe, pingindananen laak si Felipe, puˈ suunanen ki penggulaulaanen sungu.)

⁷ Kaliˈ sembag si Felipe, “Ndiˈ ta megaga, puˈ pia bali duaˈ gatus denario siai pan, kulang pa dinilan, pia pekaikaˈen gupia.”

⁸ Naa sala tawan sakup ngalanen si Andres, ngudan ni Pedro, laungen dini Isus, ⁹ “Duuni gembataˈ dini migbalun lima buuk pan sebada, mukaˈ duaˈ buuk sedaˈ.^a Laak kendutaˈen ta ma dun pekpaan di nga melaun getaw kini?”

¹⁰ “Naa, pemaingkud niui nga getaw kia,” laung ni Isus. (Puˈ meliwagig lamalama dia.) Saˈ maˈnia, mimegingkud dayun su nga getaw, duun saanig lima ngibu tawan su laak lumbus laki. ¹¹ Inalap dayun ni Isus ki pan kia, mikpaladpalad tu Megbebayaˈ, dayun pikilasilasen tu nga getaw pemegingkud dia. Maˈantu dadema sug duaˈ buuk sedaˈ, pikilasilasen dadema dinilan. Minaan dayun ki kelaun getaw, taman luminukas ilan maan. ¹² Naa benaˈ migelaˈ ilan mbesug, laung ni Isus tu nga sakupen, “Pengikpes niui nga sawad, adun ndaˈiduni mekulaˈulaˈ.” ¹³ Kaliˈ nilan pengikpesay, sepuluˈ buˈ duaˈ dig belanani mipenuˈ pa nu samaˈ tug lima buuk pan sebada ginaan nu nga getaw kia.

¹⁴ Benaˈ minitaˈ nu nga getaw ki mekesalebuˈ tuˈus kia pinggulaula ni Isus, laung nilan, “Kini na tuˈu su Pimuunan nu Megbebayaˈ pedetengen ta lumusad dinig lumbang!” ¹⁵ Laak si Isus, benaˈ misuunanen puˈ sungu lumpakay nu nga getaw adun petegelan nilan sia meglegadiˈ dinilan, laak migawaˈ dia nilan. Minundas salanen tug binentudan.

¹⁶ Naa benaˈ mikagaw gebii buˈ gendaw, duminiksun su nga sakup ni Isus tu geksid linaw. ¹⁷ Duminangan ilan di sekayan, suminakay ilan dayun dumipag pangay tug lunsud Capernaum. Gibii ilan diag linaw, laak ndaˈ pa peglendug dinilan si Isus. ¹⁸ Duminuluki metikteg genus, mimukay sug linaw. ¹⁹ Naa benaˈ pimelulanan nilan, duun saanig lima kilumitrui giniginanen, minitaˈ nilan si Isus, masiˈ pekpanaw diag dibabaw tubig, misebang dia sekayan nilan. Mipatiˈ ilan mendek.

²⁰ Dagid miktaluˈ si Isus dinilan, “Naa, ndiˈ amu mendek. Naan daini!” ²¹ Pisakay nilan dayun iin dia sekayan nilan. Mitekaw dayun mateng tu pegengayan nilan su sekayan nilan kia.

²² Naa benaˈ migendaw puliˈ, su nga getaw mibilin ditug dipag, misuunan nilan puˈ salabuuk laaki sekayan midengguˈ dia kalabung, mukaˈ saˈ suminakay su nga sakupen, ndaˈ pegdunut si Isus, su nga sakupen laaki suminakay. ²³ Naa duuni ngag duma sekayan genat tu Tiberias midengguˈ dia tandaˈ mesempel pingaanan nilan nu nga pan kiin saˈ genat mekpaladpalad dun tu Megbebayaˈ su Kaunutan si Isus. ²⁴ Benaˈ misuunan nu nga getaw puˈ ndaˈ na dia si Isus dakus su nga sakupen, suminakay dailan dema di nga sekayan kia, pangay ilan ditu Capernaum, penengaun nilan si Isus.

²⁵ Naa benaˈ mibaangan nu nga getaw si Isus ditug dipag linaw, sinaak nilan diniin, “Sir, nanuun ka minateng dini?”

²⁶ Kaliˈ sembag si Isus, “Taman taluˈu diniu, kanaˈ iini menengaw amu dun dinaan puˈ sabaˈ nu kesabut niu tu tuˈus pinggulaulau. Segaga, iin sungkini menengaw amu dun, puˈ sabaˈ nu kepaˈaan ku diniu kalabung nu pan, mibesug amu dun gelaˈ. ²⁷ Naa ndiˈ namu penamal meksukat gaan mekpetubuˈ dig lawas niu, puˈ kiin, duuni gikteben. Subay penamal amu sukat gaan megbegay ketubuˈ ndaˈi tamanen. Iin su gaan begayu diniu, puˈ pinitaˈ na nu Gamaˈu Megbebayaˈ puˈ bigayanu niin pegbayaˈu, naan kini, kig Bataˈ nu Kilawan.”

²⁸ Kaliˈ ilan saak diniin, “Kendutaˈ mai kedunut nami tu mauyaˈan nu Megbebayaˈ?”

²⁹ Kaliˈ sembag si Isus, “Iini mauyaˈan nu Megbebayaˈ baalen niu, petuuden niu ki sinuguˈen medini niu.”

³⁰ Kaliˈ ilan pektaluˈ, “Naa saˈ maˈantu, paitaˈ mu dinamii mekesalebuˈ tuˈus, adun metuudan ami dun. Taˈ alandun mai penggulaulaan mu? ³¹ Saˈ pinenggiˈ maaˈ nu ginaan nu ginepuˈay ta diag limawaˈ, su gaan genat tug langit, puˈ sinulat dengantu, ‘Bigay ni Moises dinilan gaan genat tug langit.’”

³² Kaliˈ pektaluˈ si Isus, “Taman taluˈu diniu, kanaˈ ni Moisesi migbegay diniu gaan genat tug langit, su laak Gamaˈu. Mukaˈ nemun kini, begay diniu nu Gamaˈu ki tantu gaan genat tug langit. ³³ Puˈ su gaan begay nu Megbebayaˈ, lumusad genat tug langit. Ki gaan kini, iin su megbegay tu tibaˈan getaw ketubuˈ ndaˈi tamanen.”

³⁴ “Sir,” laung nilan, “saˈ megdadi, begayay mu ami lelayun di gaan kiin.”

³⁵ Kaliˈ pektaluˈ si Isus, “Naani gaan kini, puˈ megbegayu tu tibaˈan getaw ketubuˈ ndaˈi tamanen. Adin su getaw mekpaingabang dinaan, ndiˈ na puliˈ megutem. Adin su metuudan dinaan, ndiˈ na puliˈ kuaun.”

³⁶ “Naa,” laung padun ni Isus, “iini tinaluˈu diniu puˈ minitaˈ niau laak ndaˈ niau petuuday. ³⁷ Pia na. Adin su tinduˈ nu Gamaˈu sumakup dinaan, mekpaingabang dinaan, mukaˈ lumbus, penembaˈen ku. ³⁸ Puˈ ndaˈu lusad genat tug langit adun petuuden ku sug danaan delendeman. Segaga iini luminusadu dun, petuuden ku su mauyaˈan nu suminuguˈ dinaan. ³⁹ Iini mauyaˈan nu suminguˈ dinaan, ndiˈu mbeleng su nga sakup bigayen dinaan, pia sala tawan dinilan. Dayun saˈ sungu melengkebig benwa, gelaˈen ku ilan petubuˈay puliˈ. ⁴⁰ Puˈ iin pa pagidi mauyaˈan nu Gamaˈu, adin su mekailala dinaan kini, kig Bataˈen, mukaˈ mekpetuud dinaan, naa mpeduunan ketubuˈ ndaˈi tamanen. Mukaˈ saˈ sungu melengkebig benwa, petubuˈen ku puliˈ.”

⁴¹ Mendadi su nga getaw Judea dia, mikunlumunlum ilan, pigbensi nilan dun ki tinaluˈ kia ni Isus, laungen, “Naa, naan laungi gaan kini luminusad genat tug langit.” ⁴² Kaliˈ ilan peksinaakay, “Asa ki getaw kini, kanaˈ bain si Isus, sug bataˈ laak ni Jose? Miˈilala ta gupia su mekegulangen. Maumanen ma teluˈay, iin su genat tug langit?”

⁴³ Kaliˈ pelum pektaluˈ si Isus, “Ndiˈ amu dega pekunlumunlum maˈniin. ⁴⁴ Ndaˈi getaw mekesakup dinaan saˈ kanaˈ iini egaken nu Gamaˈu, su suminuguˈ dinaan. Mukaˈ ki sumakup dinaan, petubuˈen ku puliˈ saˈ sungu melengkebig benwa. ⁴⁵ Ndaˈ ba sulat nu nga pimuunan nu Megbebayaˈ dengantu, laung nilan, ‘Ki tibaˈan getaw, petuˈunan nu Megbebayaˈ.’ Naa adin su mektalenten tu pituˈun nu Gamaˈu, menembaˈ dinaan. ⁴⁶ Laak ndaˈu teluˈay puˈ duuni mikaitaˈ tu Gamaˈu. Naan laaki mikaitaˈ tu Megbebayaˈ, puˈ su Megbebayaˈi pigenatan ku. ⁴⁷ Taman taluˈu diniu, adin su metuudan dinaan, iin laaki mpeduunan ketubuˈ ndaˈi tamanen. ⁴⁸ Puˈ naani gaan, puˈ megbegayu tu tibaˈan getaw ketubuˈ ndaˈi tamanen. ⁴⁹ Naa su nga ginepuˈay niu, saanan nilan ditug limawaˈ, iin daanig lebungan seleman nilan su gaan pilusad dinilan nu Megbebayaˈ. Laak dagid pia maˈantu, benaˈ minatengi gumul nilan, migelaˈ dailan matay. ⁵⁰ Laini tantu gaan lumusad genat tug langit, puˈ adin su maan dun, ndiˈ na matay. ⁵¹ Mukaˈ naani gaan luminusad genat tug langit megbegay ketubuˈ. Saˈ maan su getaw di gaan kini, iini metubuˈ di ndaˈi tamanen. Mukaˈ ki gaan begayu, iini gunedu, begayu adun metubuˈi tibaˈan getaw.”^b

⁵² Benaˈ midengeg nu nga getaw Judea dia, miksinualay ilan patiˈ, kaliˈ ilan pektaluˈ, “Pekendutaˈen dun nu getaw kini kepaˈaanen dinita tu guneden?”

⁵³ Mendadi diksuˈ ni Isus su taluˈen dinilan, “Taman taluˈu diniu, saˈ ndiˈ niu aanen su guned nug Bataˈ nu Kilawan, mukaˈ saˈ ndiˈ niu inumen sug duguˈen, naa ndiˈ niu malap su ketubuˈ ndaˈi tamanen. ⁵⁴ Naa naan kini, kig Bataˈ nu Kilawan, adin su getaw maan di gunedu mukaˈ minum dig duguˈu, iini mpeduma tu ketubuˈ ndaˈi tamanen. Saˈ sungu melengkebig benwa, petubuˈen ku dadema iin puliˈ. ⁵⁵ Puˈ iini tantu gaan su gunedu, mukaˈ kig duguˈui tantu ginumen, ⁵⁶ kaas adin su getaw maan di gunedu mukaˈ minum dig duguˈu, dumangen dini naan, mukaˈ naan, diin dau dema niin. ⁵⁷ Suminuguˈ dinaan su Gamaˈu. Kagina tetubuˈ iin, metubuˈ dau dema. Maˈantu dadema, adin su maan dinaan, metubuˈ dadema iin. ⁵⁸ Mendadi naan laaki tantu gaan luminusad genat tug langit, kanaˈ maaˈ nu ginaan nu nga ginepuˈay niu, puˈ minatay dailan. Adin su maan di gaan tantu kini, metubuˈ di ndaˈi tamanen.”

⁵⁹ Tinaluˈ ia ni Isus sinegayen mekpetuˈun dia simbaan nu getaw Judea ditu Capernaum.

⁶⁰ Benaˈ midengeg nu nga sakup ni Isusi tinaluˈen kia, melaun dinilani miktaluˈ, “Ndiˈ ta muitani tinaluˈen kini. Taˈ mai mekesanguˈ dun ini?”

⁶¹ Mendadi, kini si Isus, misuunanen su kegbensi nu nga sakupen kia pia ndaˈ pesuun dun. Kaliˈ pektaluˈ dinilan, “Mauyaˈan ba niu mundang amu sabaˈ nu tinaluˈu kia? ⁶² Saˈ maitaˈ niu kig Bataˈ nu Kilawan, naan kini, luntuu puliˈ ditu pigenatan ku, melegenan pa bamu gusay? ⁶³ Kanaˈ nu pegbayaˈ nu getaw megbegay ketubuˈ tu getaw, su laak Balakat nu Megbebayaˈ. Naa, ki tinaluˈu kini, iini meguit diniu Balakat nu Megbebayaˈ megbegay ketubuˈ. ⁶⁴ Laak duun diniui ndiˈ metuudan dinaan.” (Kaas maˈniai tinaluˈ ni Isus, puˈ genat tu puunanen, misuunanen su nga ndiˈ metuudan dun, mukaˈ misuunanen dadema ki tumipu diniin.) ⁶⁵ Kaliˈ padun pektaluˈ si Isus di nga sakupen kia, “Kaas maˈniai tinaluˈu diniu, puˈ ndaˈi mekenembaˈ dinaan, subay pedelendem dun nu Gamaˈu.”

⁶⁶ Mendadi genat tu ketaluˈen dun kia, melaun sakup ni Isus tumiliud diniin, ndaˈ nailan dunut diniin. ⁶⁷ Saˈ maˈnia, suminaak si Isus tu sepuluˈ buˈ duaˈ tawan peneliganen, laungen, “Mendadi yamu, tuliud damu dema dinaan?”

⁶⁸ Sumimbag si Simon Pedro, “Uu Kaunutan, saˈ tuliud ami diniˈa, taway dun bai pegengagan nami? Sug daniˈa taluˈ laaki mekegbegay tu ketubuˈ ndaˈi tamanen. ⁶⁹ Mukaˈ mituudan ami gupia diniˈa, suunan nami puˈ yaˈa na gupia su Pimiliˈ nu Megbebayaˈ.”

⁷⁰ Kaliˈ sembag si Isus, “Naa kanaˈ ba metuud, pimiliˈu amu nu sepuluˈ buˈ duaˈ tawan? Dayun sala tawan diniu, menulay!” ⁷¹ Ki tinaluˈ kini ni Isus, pilebuˈanen dun si Judas, kig bataˈ ni Simon Iscariote kiin. Puˈ pia sala tawan si Judas di nga sepuluˈ buˈ duaˈ tawan peneliganen, iini tumipu pa dini Isus.