¹ Kaliˈ pektaluˈ si Isus tu nga sakupen, “Mendadi, naani tantu puun nu pimula. Su Gamaˈui megingat dun. ² Adin su pangau ndiˈ megbunga, tenluun nu Gamaˈu, mukaˈ adin su megbunga, timpadanen, adun meksilaun paig bunganen. ³ Naa, yamu nu nga sakupu, maˈniin namu nu miugasan nu tinaluˈu diniu. ⁴ Kaas salabuuk amu gusay dinaan. Salabuuk dau dema diniu. Puˈ saˈ su panga nu pimula, ndiˈ mekegbunga saˈ suuay tu puunen. Maˈantu damu dema, ndiˈ niu mpenggulaulaani gempia, subay sumalabuuk amu dinaan gusay.

⁵ “Naa, naani puun nu pimula, yamui nga panganen. Adin su sumalabuuk dinaan lelayun, mukaˈ sumalabuuk dau dema diniin, iini megbunga melaun. Puˈ saˈ kanaˈ da naan, ndiˈ niu mpenggulaula. ⁶ Naa, saˈ duuni getaw ndiˈ sumalabuuk dinaan, mesama tu panga belengen kaas megangu dayun. Pungunen dayun sug launan migangu, pemiglaken tu gapuy adun metutung. ⁷ Saˈ sumalabuuk amu dinaan gusay, mukaˈ mengganget pa padun dig delendeman niu ki teluˈen ku, pia alanduni penenebiin niu, begay diniu nu Gamaˈu. ⁸ Puˈ saˈ penggulaulaan niui gempia, megleep dayunig dengegan nu Gamaˈu, mukaˈ mekpalas su kesakup niu dinaan. ⁹ Naa, melelaatu diniu maaˈ nug lelaat nu Gamaˈu dinaan. Yamu dema, subay salig amu lelayun tug lelaatu diniu. ¹⁰ Saˈ petuuden niu su nga tinituluˈu diniu, sumalig damu dema dayun dig lelaatu diniu. Maˈniin dinaan, pituudu su tinituluˈ nu Gamaˈu, mukaˈ suminalig dau dig lelaaten dinaan.

¹¹ “Naa tinaluˈu ia diniu, adun meleep diniuig leliagu, mukaˈ megelaˈig leliag niu. ¹² Iini pinalintau diniu, pekpinetailay amu lepeng di kepetailu diniu. ¹³ Su tampusan petailan, iin saˈ upama duuni getaw sumaliunung tu sambaten, iin, lamig da dun matay sabaˈ tu petailanen. ¹⁴ Naa yamu, sambatu amu saˈ penggulaulaan niu su nga tinituluˈu diniu. ¹⁵ Ndiˈu na paingalan diniu nga sesuguˈen ku, puˈ paingalan ku diniu nga sambatu. Saˈ upama ki sesuguˈen, ndiˈen suunani penggulaulaan nu tuminindan diniin, laak yamu, migelaˈu pesuun diniu su midengegu di Gamaˈu. ¹⁶ Kanaˈ yamui mimiliˈ dinaan. Naani mimiliˈ diniu, mukaˈ tinduˈu amu mangay amu menggulaula gempia, maˈniin memunga amu ngag bunga ndaˈi gikteben. Kaas adin su penenebiin niu tu Gamaˈ ta, saˈ sumalabuuk amu dinaan, begayen diniu. ¹⁷ Iin dayuni tituluˈu diniu, pekpinetailay amu.”

¹⁸ Laung padun ni Isus, “Naa, su nga kilawan, saˈ megbanta ilan diniu, ndiˈ niu selingaway puˈ miunau nilan bentaay. ¹⁹ Saˈ sia duma amu nu nga kilawan dig lumbang kini, mekpetail ilan sia diniu, puˈ metau ilan melelaat tu samataw nilan. Kagina pimiliˈu amu di nga kilawan mukaˈ pinaasu amu dinilan, bentaan amu nilan. ²⁰ Ndiˈ niu selingaway su tinaluˈu diniu puˈ su sesuguˈen, kanaˈ metaas pa di suminuguˈ dun. Kaas saˈ peglegetanu nu nga kilawan, peglegetan damu dema nilan. Laak dagid saˈ dunutan nilan su tinituluˈu, dunutan da nilan dema su tituluˈ niu. ²¹ Iini puun gupia nug launan kegleget nilan diniu, puˈ sabaˈ sakupu amu mukaˈ ndaˈ nilan mesuunay su suminuguˈ dinaan medini niu. ²² Saˈ sia ndaˈu pedini mekpetuˈun dinilan, ndaˈ siai salaˈ nilan. Laak nemun ndaˈig lapal nilan di nga salaˈ nilan. ²³ Adin su getaw megbanta dinaan, megbanta dadema tu Gamaˈu. ²⁴ Saˈ ndaˈ nilan sia maitaˈ su pinggulaulau ndaˈ mainsan penggulaulaay nug lain getaw, ndaˈ siai salaˈ nilan. Laak gembagel nai salaˈ nilan, puˈ minitaˈ na nilan su mekesalebuˈ pinggulaulau, laak ndaˈ nilan petuuday, kaas bentaanu nilan mukaˈ su Gamaˈu. ²⁵ Su kebanta nu nga kilawan, iini mipenggulaula dun adun menuud su sinulat dengantu di Palinta nilan. Puˈ ndaˈ ba mesulat, ‘Ndaˈi sabaˈu dun ki kebanta nilan dinaan.’”

²⁶ Laung pa ni Isus, “Naa, su Mengingabang suguˈen ku medini niu, sug Balakat nu Megbebayaˈ, saˈ mateng nain, peglegintuudenu niin di nga getaw, puˈ buasanen su metuud mekatag di Gamaˈu. Pigenatanen padun su Gamaˈu. ²⁷ Yamu dema, peglegintuuden niau tu nga getaw, puˈ genat di pikpuunanen, suminalabuuk amu dinaan.”