¹ Kaliˈ gusay pektaluˈ si Isus, “Naa yamu, ndiˈ amu melibuleng. Salig amu tu Megbebayaˈ, salig damu dema dinaan. ² Sug balay nu Gamaˈu, melauni suguden. Megunau ditu, endamen ku su nga pegbenwanan niu. Saˈ kanaˈ metuud, ndiˈu na sia ukit diniu. ³ Saˈ ditu nau, mandamu dayun su ngag daniu, mpuliˈu dini engain ku amu, adun pia tandaˈu, ditu damu dema. ⁴ Mukaˈ mesuunan niuig bianan pangay ditu pegengayan ku.”

⁵ Naa sala tawan dinilan si Tomas, kaliˈ pektaluˈ, “Sir, ndaˈ nami suunay su pegengayan mu. Kendutaˈ mai kesuun nami dun sug bianan?”

⁶ Kaliˈ sembag si Isus, “Naa, naan laig bianan megbuas tu metuud mekatag di Megbebayaˈ, mukaˈ naani megbegay tu nga getaw ketubuˈ ndaˈi tamanen. Ndaˈi getaw mekangay ditu Gamaˈ ta, subay mekebian dinaan. ⁷ Kagina suminambat amu dinaan, suminambat damu dema tu Gamaˈu. Genat nandaw sumambat amu gupia diniin, mukaˈ minitaˈ na niu su Gamaˈu.”

⁸ Naa sala tawan dinilan pelum si Felipe, kaliˈ pektaluˈ, “Sir, saˈ mesuˈat, paitaˈ mu dinami su Gamaˈ mu, iini sukal dinami.”

⁹ Kaliˈ sembag si Isus, “Kitui kaibenen duminumau diniu, Felipe, laak ndaˈ mau pa gusay tantu mailala? Adin su mikaitaˈ dinaan, mikaitaˈ dadema tu Gamaˈu. Taˈ mai teluˈan mau dun paitaˈu diniu su Gamaˈu? ¹⁰ Masiˈ, Felipe, ndaˈa pa metuuday dun puˈ naan mukaˈ su Gamaˈu, iin da tanan? Su pekteluˈen ku diniu, kanaˈ laak delendeman ku, su Gamaˈu sumalabuuk dinaan, iini mikpepenggulaula dun dinaan. ¹¹ Subay metuudan amu dun ki tinaluˈu puˈ salabuuk ami nu Gamaˈu di ginaa. Laak saˈ ndiˈ amu metuudan dun, subay metuudan amu sabaˈ nu pinggulaulau. ¹² Taman taluˈu diniu, adin su suminalig dinaan, penunggilinganen su pinggulaulau, mukaˈ mekesalebuˈ pai penggulaulaanen, puˈ muliˈu tu Gamaˈu. ¹³ Pia alanduni penenebiin niu, saˈ sumalabuuk amu dinaan, naa penggulaulaan ku, adun megleepig dengegan nu Gamaˈ ta Megbebayaˈ. ¹⁴ Pia alanduni penenebiin niu dinaan, saˈ sumalabuuk amu dinaan, naa penggulaulaan ku.”

¹⁵ Kaliˈ gusay pektaluˈ si Isus, “Naa, saˈ mekpetail amu dinaan, subay petuuden niu su nga suguˈan ku. ¹⁶ Penengiin ku dayun tu Gamaˈ ta begayan amu niin sala pa Mengingabang, su dumuma lelayun diniu. ¹⁷ Iin sug Balakat nu Megbebayaˈ, su megbuas diniu tu metuud mekatag di Megbebayaˈ. Iin, ndiˈ mpenembaˈ nu ngag duma kilawan dinig lumbang kini, puˈ ndiˈ nilan maitaˈ, mukaˈ ndiˈ ilan sumambat diniin. Laak yamu, suminambat amu diniin, puˈ suminala na diniu, mukaˈ bigay na diniu.

¹⁸ “Naa, mekawaˈu pasiˈ dini, laak ndiˈu amu belengan maaˈ nu gidu, puˈ mpuliˈ dau dini niu. ¹⁹ Ndiˈ maiben, ndiˈ nau gusay maitaˈ nu nga kilawan, laak dagid yamu, maitaˈ pa niau puliˈ. Kagina metubuˈu, metubuˈ damu dema di ndaˈi tamanen. ²⁰ Saˈ mateng ki gendaw kia, mesuunan niu puˈ naan mukaˈ su Gamaˈu, iin da, mukaˈ salabuuk daita dema di ginaa.

²¹ “Adin su dumawat tu suguˈan ku mukaˈ mekpetuud dun, iini mekpetail dinaan. Mukaˈ dema adin su mekpetail dinaan, iini petailen dadema nu Gamaˈu. Melelaat dau dema diniin mukaˈ mekpaitaˈu dun gupia.”

²² Naa sala tawan dinilan si Judas (sangay ni Judas Iscariote), kaliˈ pektaluˈ, “Sir, taˈ mai mekpaitaˈa dun dinami, laak dagid ndiˈa mekpaitaˈ tu tibaˈan getaw?”

²³ Kaliˈ sembag si Isus, “Adini getaw mekpetail dinaan, dunutanen su tituluˈan ku. Melelaat dun dayun su Gamaˈu mukaˈ meditu ami niin. Puˈ yami duaˈ nu Gamaˈu, sumala ami diniin megbenwa. ²⁴ Naa, adin su ndiˈ mekpetail dinaan, ndiˈen dunutan su tituluˈan ku. Su teluˈen ku medengeg niu, kanaˈ danaan laak delendeman, puˈ danu Gamaˈu, su suminuguˈ dinaan.

²⁵ “Naa, su saanan ku dini niu, pekteluˈen ku ia diniu. ²⁶ Saˈ mpalus nau dini niu, kig Balakat nu Megbebayaˈ, su Mengingabang, suguˈen nu Gamaˈu medini niu, puˈ iini meksalabuuk gupia dinaan. Pektuˈunan amu niin dayun dig launanen, mukaˈ tegyungen amu niin tug launan tinaluˈu diniu.

²⁷ “Mendadi, iini pengumbilin ku diniu, ki pianan ginaa, maˈniin nug danaan. Kanaˈ maaˈ nu kebegay dun nu kilawan, kaas ndiˈ amu melibuleng mukaˈ ndiˈ amu mendek. ²⁸ Midengeg niu su tinaluˈu puˈ mpalus nau dini niu mukaˈ mpuliˈ dau dini. Saˈ mekpetail amu gupia dinaan, leliagen amu dun sia saˈ muliˈu tu Gamaˈu, puˈ iini metaas pa dinaan. ²⁹ Iini tinaluˈu dun diniu su ndaˈ pa mpenggulaula, puˈ adun saˈ mpenggulaula na, sumalig amu dinaan. ³⁰ Naa, ndiˈu paibeneni teluˈen ku diniu, puˈ peksebang na dini su kaunutan nu tibaˈan getaw, su Palin. Ndaˈi pegbayaˈen dini naan. ³¹ Laak dagid penggulaulaan ku laak su sinuguˈan dinaan nu Gamaˈu, adun mesuunan nu nga kilawan puˈ petailen ku su Gamaˈu.

“Kaas pegbuat amu, puˈ guaˈ ita dini.”