¹ Mendadi si Isus, benaˈ mideksuˈ mektaluˈ, migangag tug langit, kaliˈ penenabi, laungen, “Amaˈ, mitektak na su sesaˈ. Paitaˈ mu di nga getaw su kelengas nu pegbayaˈu, naan kig Bataˈ mu, adun paitaˈu dinilan su kelengas nug daniˈa. ² Puˈ bigay mu megbayaˈu di tibaˈan getaw, adun begayan ku ketubuˈ ndaˈi tamanen su nga getaw pisalig mu dinaan. ³ Adin su getaw mekesuun diniˈa, su tantu Diwata, mukaˈ mekesuun dinaan, si Isukristu ki sinuguˈ mu medinig lumbang, iini mpeduunan ketubuˈ ndaˈi tamanen. ⁴ Su kelengas nu pegbayaˈ mu, pinitaˈu na di nga kilawan dinig lumbang kini, puˈ gilaˈu tubusay su pipenggulaula mu dinaan. ⁵ Uu, Amaˈ! Su ndaˈ pa mbaalig lumbang, miksalabuuk ita di kelengas nu pegbayaˈ ta. Nandaw, uliˈ mu dinaan su kelengasen.

⁶ “Naa, ki nga getaw kini pisakup mu dinaan pimiliˈ mu tu nga kilawan, pisuun ku dinilan ki gasal mu. Bekna, sakup mu ilan, dayun pisakup mu ilan dinaan. Pituud nilan dadema su tinaluˈ mu. ⁷ Mukaˈ nemun, misuunan nilan puˈ yaˈai pigenatan nug launan taman nug bigay mu dinaan. ⁸ Pitendayu dinilan su pimuun mu dinaan, mukaˈ dinawat nilan ia, kaas misuunan nilan tuˈu puˈ yaˈai pigenatan ku. Mituudan ilan dun puˈ suminuguˈa dinaan medini.”

⁹ Laung pa ni Isus, “Naa ki nga bigay mu dinaan, penenebian ku ilan diniˈa, puˈ ilan, daniˈa tuˈu. Kanaˈ nu tibaˈan getaw dig lumbang kinii penenebian ku. ¹⁰ Kig launan danaan, daniˈa dadema. Sug launan daniˈa, danaan da pagid, kaas maitaˈ na su kelengas nu pegbayaˈu pebian dinilan nu nga sakup bigay mu dinaan. ¹¹ Mekauliˈ nau tu niˈa, mekawaˈu dinig lumbang kini, laak ki nga sakupu kini, dini pailan lumbang. Uu Amaˈ, mekesuun ka, Amaˈ! Ingat mu ilan, pebian di ginuung nu ngalan mu, ki ngalan bigay mu dinaan, adun meksalabuuk ilan maˈniin nu keksalabuuk ta. ¹² Sinegay diin pau nilan, iningatu ilan gupia pebian di ginuung nu ngalan mu bigay mu dinaan. Pilayuˈu ilan tu melaat, kaas ndaˈi mbeleng, subay su getaw tinduˈan dun mbeleng tuˈu. Iini mbeleng adun menuud su sinulat dengantu di Misulat Taluˈ mu. ¹³ Nandaw sunguu muliˈ tu niˈa, kaas su saanan ku dini pa lumbang, pekteluˈen ku ini, adun meleep di nga sakupuig leliagu mukaˈ megelaˈig leliag nilan. ¹⁴ Pitendayu dadema dinilan su pimuun mu dinaan. Kaas binanta ilan nu nga kilawan dig lumbang kini, puˈ kanaˈ nailan duma nu nga kilawan, maˈniin dinaan, kanaˈu duma nu nga kilawan. ¹⁵ Mendadi, kanaˈ iini pekpenenebiin kui kekpawaˈ mu dinilan dig lumbang kini, puˈ iini pinenabiu diniˈa, pelayuˈ mu ilan di Palin, adun ndiˈ ilan metalin. ¹⁶ Kanaˈu duma nu nga kilawan dig lumbang kini. Mesama da, kanaˈ dailan dema duma ditu. ¹⁷ Pegwakil mu ilan dig lawas mu pebian di metuud. Iini metuud su taluˈ mu. ¹⁸ Sinuguˈu ilan mekpelak ilan di tibuuk benwa maaˈ nu kesuguˈ mu dinaan kediniin ku lumbang. ¹⁹ Mukaˈ pegwakilu diniˈaig lawasu gumantiˈ di kepatay nilan, adun mpegwakil dailan dema diniˈa tantu.

²⁰ “Naa ki nga sakupu kini, kanaˈ laak ilani penenebian ku, puˈ duun pai nga metuudan dinaan sabaˈ nu gukiten nilan. Naa, ilan pai penenebian ku, ²¹ adun megelaˈ ilan meksalabuuk, maˈniin nu keksalabuuk ta di ginaa. Iini mauyaˈan ku, Amaˈ, salabuuk ilan di ginaa, launan nilan, puˈ adun metuudan dun su nga kilawan dig lumbang puˈ yaˈai suminuguˈ dinaan tuˈu medini. ²² Su kelengas nu pegbayaˈu bigay mu dinaan, bigayu dadema dinilan, adun meksalabuuk dailan dema maˈniin keksalabuuk ta. ²³ Miksalabuuku dinilan mukaˈ suminalabuuka dinaan, puˈ adun mengganget su keksalabuuk nilan. Mesuunan dayun nu nga kilawan puˈ sinuguˈ mau medini mukaˈ pitail mu su nga sakupu maaˈ nu kepetail mu dinaan.”

²⁴ Diksuˈ ni Isus ki kenenabinen, “Naa, uu Amaˈ! Iini mauyaˈan ku dadema, su nga sakup bigay mu dinaan, dumunut ilan dinaan pia tandaˈu, adun maitaˈ nilan su kelengas nu pegbayaˈu bigay mu dinaan sabaˈ nu kepetail mu dinaan, saˈ ndaˈ pa mbaalig lumbang. ²⁵ Amaˈ, mekesuun ka! Ndaˈ sambat su nga kilawan diniˈa, laak dagid naan, suminambatu diniˈa mukaˈ ki nga sakupu kini, misuunan nilan puˈ sinuguˈ mau. ²⁶ Inukitan ku ilan mekatag diniˈa mukaˈ ukitan ku pa gusay, adun mengganget dig delendeman nilan su kepetail mu dinaan, mukaˈ adun meksalabuuk ami nu nga sakupu kini.”