¹ Naa benaˈ mitubus menenabi si Isus gumiwaˈ dia, ilan nu nga sakupen, duminipag ilan tu sapaˈ Kidron. Duuni pegimulanan gayu dia, sumiled dayun dia si nga Isus. ² Naa kini si Judas, su mektipu dini Isus, misuunaneni pegimulanan gayu kia, puˈ tatap pekpungunay ni Isus, ilan nu nga sakupen. ³ Mendadi, minangay si Judas dia pegimulanan, inunutanen diai nga sundalu nu getaw Roma mukaˈ nga pegingat tu Pengedapan tu Megbebayaˈ, ki sinuguˈ nu nga kaunutan nug belian nu getaw Judea mukaˈ nu nga Pariseo. Misangkap ilan besi mukaˈ tilaw. ⁴ Mendadi si Isus, kagina daanen na mesuunay sug launan mpenggulaula diniin, suminungkak dinilan, kaliˈ saak dinilan, “Taˈ taway duni pekpenengaun niu?”

⁵ Kaliˈ ilan sembag, “Si Isus, getaw Nazaret.”

“Naan main,” laung ni Isus.

Naa pegindeg dia si Judas, su mektipu diniin, kampuˈ nu melaun dumanen kia. ⁶ Sikna mitaluˈ ni Isus dinilan, “Naan,” mingegdud ilan, mikedingkalang ilan tanan. ⁷ Sinaak puliˈ ni Isus dinilan, “Taˈ taway dun daani penengaun niu?”

Laung nilan puliˈ, “Si Isus, getaw Nazaret.”

⁸ Kaliˈ dayun pektaluˈ si Isus, “Naa, tinaluˈu na daan diniu puˈ naan main kini. Mendadi saˈ naan da laaki penengaun niu, ndiˈ da niu peduma ki ngag dumau kini.” ⁹ (Kaas maˈniai tinaluˈ ni Isus, puˈ adun menuud ki kinenabinen kamun, laungen, “Uu Amaˈ, su nga piglegetawan ku bigay mu dinaan, pia sala tawan, ndaˈi mibeleng dun dinaan.”)

¹⁰ Naa si Simon Pedro, duunig badungen. Binakuten dayun, tinigbaseni gulipen nu Tampusan Metaas Belian nu getaw Judea. Miseksipi sedibaluy telinganen, dapit lintunen. Su ngalan nu gulipen kia, si Malco. ¹¹ Kaliˈ pektaluˈ si Isus dini Pedro, “Baa, gumaˈ muig badung mu kiin! Ki tasa mipenuˈ kelegenay pininum dinaan nu Gamaˈu, ndiˈu ba tebuken?”

¹² Mendadi dinaap si Isus nu nga sundalu mukaˈ nu nga kaunutan nilan sampay su nga pegingat sinuguˈ nu getaw Judea. Pinalik nilan dayun. ¹³ Bekna, inagak nilan tu ni Anas, iin su penugangan ni Caifas, su Tampusan Metaas Belian nu getaw Judea di taun kia. ¹⁴ Naa si Caifasi miktaluˈ kiin tu nga kaunutan nu getaw Judea puˈ papas sala tawani gumantiˈ di kepatay nu tibaˈan getaw.

¹⁵ Naa kini si Pedro, miglendug dini Isus, dumaneni sala tawan samasakupen. Kagina minilala nu Tampusan Metaas Belian su sala sakup ni Isus kia, mikegdunut iin dini Isus suled diag lenuˈan nug balay nu Tampusan Metaas Belian. ¹⁶ Laak si Pedro, pegindeg pa dia liu, mesempel tu gengaˈan nug lenuˈan. Dayun puliˈ gumiwaˈ su sala sakup kia, migabitabit dayun tug delaga migingat tu gengaˈan, piseleden dayun si Pedro diag lenuˈan. ¹⁷ Sinaak dayun nug delaga kia dini Pedro, “Kanaˈa ba sakup dadema nu getaw kiin?”

“Baa, kanaˈ lai,” laung ni Pedro.

¹⁸ Naa su nga sesuguˈen mukaˈ su nga megingat dia, miguklak ilan musing, puˈ metegdaw dia. Pemegindeg ilan menalang dia, luminamug dayun dinilan pegindeg si Pedro, menalang dadema.

¹⁹ Mendadi su Tampusan Metaas Belian, sinaakanen si Isus mekatag di nga sakupen mukaˈ tu tinituluˈen. ²⁰ Kaliˈ sembag si Isus, “Ki tinaluˈu, pinluksadu tu tibaˈan getaw. Lelayunu mikpetuˈun dia nga simbaan nu getaw Judea mukaˈ ditu Pengedapan tu Megbebayaˈ, dia tandaˈ pekpungunan nu kelaun getaw. Ndaˈi taluˈu mileglud. ²¹ Naa mauma dema sinaakan mau? Melengas iini penenaakan mu, su nga mikedengeg tu tinaluˈu kitu, saˈ taˈ alanduni tinaluˈu dinilan. Puˈ misuunan nilani tinaluˈu.”

²² Sikna mitaluˈ ni Isus, dinapiˈ dayun nu sala tawan pegingat migindeg dia, laungen, “Masiˈ mekakuˈa sumbag maˈnia di Tampusan Metaas Belian?”

²³ Kaliˈ sembag si Isus, “Saˈ mikektaluˈu melaat, melengas peglegintuud mu di nga getaw kini. Dagid saˈ metuudi tinaluˈu, naa mauma dema depiˈen mau dun?”

²⁴ Mendadi, sinuguˈ dayun ni Anas egaken si Isus, pinalik pa gusay, ditu ni Caifas, su sala Tampusan Metaas Belian.

²⁵ Naa kini si Simon Pedro, pegindeg pa diag lenuˈan ni Anas, bineeg menalang. Sinaak nu ngag dumanen dia, “Kanaˈa ba sakup pa pagid nu getaw kiin?”

Dagid mimalaw puliˈ si Pedro, laungen, “Baa, kanaˈ lai.”

²⁶ Naa duuni sesuguˈen nu Tampusan Metaas Belian dia, betaˈan nu getaw kia tinigbas ni Pedroi telinganen. Iin, suminaak pelum dini Pedro, “Kanaˈ ba yaˈa su minitaˈu dumanen ditu pegimulanan gayu kitu?”

²⁷ “Baa, kanaˈ lai!” laung ni Pedro. Iin na demai keguni manuk.

²⁸ Naa benaˈ putiˈ delagay, su nga kaunutan nu getaw Judea, inagak nilan si Isus tug balay nu gubirnadur genat diag balay ni Caifas. Laak ndaˈ nilan dayun seledayig balay kia, adun ndiˈ ilan melemuˈan, mbuus ndiˈ ilan mekaˈaan tug Lebungan gindan ditug Liniusan. ²⁹ Mendadi ki gubirnadur kia si Pilato, lumiu dia gedapan nilan, sinaakanen dayun ilan, laungen, “Mendadi, taˈ alandunig dangat niu mekatag di getaw kini?”

³⁰ Kaliˈ sembag su nga kaunutan kini, “Naa saˈ kanaˈ da mikesalaˈi getaw kiin, ndiˈ nami sia pegwakil diniˈa.”

³¹ Kaliˈ sembag si Pilato, “Naa saˈ maˈantu, uit niu iin adun ukumen niu mekatag dig balaˈud niu.”

Kaliˈ ilan sembag, “Naa ndiˈ mesuˈat, puˈ ndaˈi pegbayaˈ nami ukuman namii getaw lagaˈ na ginaanen.” ³² (Kinii mipenggulaula, adun menuud ki tinaluˈ kiin ni Isus, su pisuunen pedaan kig bian nu kepatayen.)

³³ Saˈ maˈnia, sumiled puliˈ si Pilato diag balayen, sinabinen si Isus. Mendadi suminaak dayun si Pilato diniin, “Naa, metuud ba, yaˈai gadiˈ nu getaw Judea?”

³⁴ Kaliˈ sembag si Isus, “Ki sinaak mu kini, daniˈa da delendeman, atawaka lain getaw mai miktaluˈ dun diniˈa mekatag dinaan?”

³⁵ Kaliˈ sembag si Pilato, “Laung mu dun getaw Judea mau? Su nga kaunutan niu mukaˈ su nga kaunutan nug belian niui migwakil diniˈa dinaan. Naa, taˈ alanduni melaat pinggulaula mu?”

³⁶ Kaliˈ pektaluˈ si Isus, “Ki keglekaunutan ku, kanaˈ miksekat dig lumbang kini. Saˈ upama miksekat sia dig lumbang kini, naa sumugut sia su nga sakupu, adun ndiˈu mpegwakil tu nga kaunutan nu getaw Judea. Dagid ki keglekaunutan ku, kanaˈ daan miksekat dig lumbang kini!”

³⁷ Sinaak pelum ni Pilato, “Mendadi, gadiˈa ba?”

Kaliˈ sembag si Isus, “Yaˈa mai miktaluˈ dun puˈ gadiˈu. Iini migigetawu dun mukaˈ iini luminusadu dun dinig lumbang, puˈ adun peglegintuuden ku su metuud. Adin su getaw mektalenten tu metuud, mekineeg tu taluˈu.”

³⁸ Laung ni Pilato, “Naa saˈ maˈantu, taˈ mai metuud?”

Benaˈ mideksuˈ mektaluˈ si Pilato kia, lumiu puliˈ dia gedapan nu nga getaw Judea. Kaliˈ pektaluˈ dinilan, “Ki getaw kini, ndaˈidun mai misimaˈu salaˈen. ³⁹ Dagid kagina duunig betad niu beluyen kui sala tawan pinikutan metaang dig Lumpuk niu gindan tug Liniusan, naa taˈ ma? Mauyaˈan niu beluyen ku diniu ki gadiˈ nu getaw Judea?”

⁴⁰ Mimeksay ilan dayun sumbag, laung nilan, “Kanaˈ iin! Si Barabasi mauyaˈan nami!” (Naa si Barabas kia, tulisan.)