¹ Genat itu, si Isus, mikpaitaˈ na pelum di nga sakupen diag Linaw Tiberias. Kiniig bian nu mipenggulaula. ² Si Simon Pedro, si Tomas (piningalan dun su Gapid), si Natanael (getaw Cana sakup Galilea), sug duaˈ tawan bataˈ ni Sebedeo, mukaˈ duaˈ tawan pai sakup, mipungun ilan dia geksid linaw. ³ Mendadi laung ni Simon Pedro tu ngag dumanen, “Naan, menegutusu.”

“Megdunut ami diniˈa,” laung nu ngag dumanen. Luminulan ilan dayun di sekayan. Piglegendawan ilan dayun memaling, ndaˈ ilan tanan mekelaam. ⁴ Benaˈ dumilag na, pegindeg si Isus dia geksid linaw, laak ndaˈ mailala nu nga sakupen kia. ⁵ Kaliˈ tawag si Isus, “Naa lai, mikelaam damu?”

“Baa, ndaˈ,” simbag nilan.

⁶ Kaliˈ pektaluˈ si Isus, “Dia niu ektakayig baling niu dapit lintu nu sekayan niu kia. Mekelaam amu dayun.” Iktak nilan tuˈu sug baling, dayun ndaˈ nilan megaga betunay puliˈ, sabaˈ kelaun sedaˈ milaam nilan.

⁷ Naa sala tawan dinilan, ki sakup ni Isus kiin petailenen gupia, kaliˈ pektaluˈ dini Pedro, “Su Kaunutan maia!” Sikna midengeg ni Pedro puˈ su Kaunutan si Isus, mikseluk dayun suuben (puˈ migluas suub kamun), suminampak dayun dia tubig, luminanguy. ⁸ Su ngag dumanen, suminakay ilan dema pangay dia geksid, pegbintengen nilan sug baling mipenuˈ sedaˈ. Mesempel dailan di geksid, mabuˈ lima puluˈ depa saanig layuˈen. ⁹ Benaˈ mikekawas ilan tu geksid, minitaˈ nilani guklak musing, duuni sedaˈ tinitiˈ mukaˈ duun dademai pan dia. ¹⁰ Laung ni Isus dinilan, “Uit niu dinii santaˈ buuk di sedaˈ kia milaam niu.”

¹¹ Mendadi duminangan puliˈ si Simon Pedro tu sekayan, biniglasen dayun di pentadan sug baling, mipenuˈ mekebagel sedaˈ, megatus buˈ lima puluˈ buˈ telu buukig launen. Laak pia maˈantu, ndaˈ peglegetus sug baling. ¹² Laung dayun ni Isus dinilan, “Pedini amu, maan naita.” Naa, ndaˈiduni mikakuˈ sumaak diniin saˈ taˈ taway dun iin, puˈ misuunan nilan iin su Kaunutan. ¹³ Mendadi, inimud ni Isus su pan, dayunen pentulunay dinilan. Maˈantu dadema su sedaˈ.

¹⁴ Kiai ketelunen mekpaitaˈ si Isus di nga sakupen genat tu kepetubuˈ puliˈ diniin.

¹⁵ Naa benaˈ mitubus ilan maan, sinaak ni Isus dini Simon Pedro, “Uu Simon, bataˈa ni Juan, petailen mau ba, labi pa di kepetail dinaan nu ngag duma mu kini?”

“Waˈa, Kaunutan,” simbag ni Pedro, “suunan mu puˈ petailen ku yaˈa.”

Kaliˈ pektaluˈ si Isus, “Naa saˈ maˈantu, tagikul mu ki nga maaˈ nu nati karniruu.” ¹⁶ Sinaak puliˈ ni Isus, “Simon, bataˈa ni Juan, petailen mau ba?”

“Waˈa, Kaunutan,” simbagen puliˈ, “suunan mu puˈ petailen ku yaˈa.”

Kaliˈ puliˈ pektaluˈ si Isus, “Naa, ingat mu su nga karniruu.” ¹⁷ Ketelu deksuˈen na sumaak si Isus, laungen, “Simon, bataˈa ni Juan, petailen mau ba?”

Sikna midengeg ni Simon Pedro su ketelunen sumaak, “Petailen mau ba?” milegenan dun. Laung ni Pedro, “Uu Kaunutan, misuunan mu sug launanen, kaas suunan mu puˈ petailen ku yaˈa!”

Kaliˈ pektaluˈ si Isus diniin, “Tagikul mu daan su nga karniruu. ¹⁸ Mukaˈ taman taluˈu diniˈa, su begu getawa pa, mimakesa, dayun pia adini mauyaˈan mu gengayan mu, medituun ka dayun. Laak dagid saˈ megulanga na, subay tenggalen muig baingken mu, adun mbaluda nug lain getaw, dayun ka egakay tu kanaˈ mu mauyaˈan gengayan.” ¹⁹ (Naa ki tinaluˈ kia ni Isus, pisuunen diniin kig bian nu kepatay ni Pedro, adun megleepig dengegan nu Megbebayaˈ.) Laung ni Isus dini Pedro, “Naa, dunuta dinaan!”

²⁰ Naa kini si Pedro, miglingay, minitaˈen dayun meglendug ki sakup kia ni Isus su petailenen gupia, su pegingkud dia gupid ni Isus su pingaanan nilan nu gebii kiin mukaˈ sinaaken, “Uu Kaunutan, taˈ taway duni tumipu pa diniˈa?” ²¹ Sikna minitaˈ ni Pedro ki sala tawan sakup kia, sinaaken dini Isus, “Naa Kaunutan, ki getaw kia, taˈi mpenggulaulanen?”

²² Kaliˈ sembag si Isus dini Pedro, “Saˈ mauyaˈan ku puˈ metubuˈ iin sampay matengu puliˈ, naa taˈ maig labet mu dun? Yaˈa, dunuta dinaan!”

²³ Mendadi duun dayuni gukiten mipelak tu nga sakup ni Isus, ndiˈ daw matay ki sakupen kia. Laak dagid ndaˈ metaluˈ ni Isus puˈ ndiˈ matay. Iini tinaluˈen, “Saˈ mauyaˈan ku puˈ metubuˈ iin sampay matengu puliˈ, naa yaˈa, taˈ maig labet mu dun?”

²⁴ Naa su sakupen kia, iinen iin su suminulat dun ini, mukaˈ piglegintuuden sug launan mipenggulaula. Misuunan ta puˈ metuudi pingukiten.

²⁵ Naa melaun pa pinggulaula ni Isus. Saˈ sia gelaˈen sulatay, mabuˈ ndiˈ megelaˈ dig dibabaw lumbang ki ngag libru mesulat.