¹ Mendadi benaˈ sikna siselem di gendaw Duminggu, si Maria Magdalena, milapus mangay ditu sangyab, medelemdelem pa. Mendadi benaˈ minateng si Maria, iini minitaˈen, su gembagel batu tinakep tu sangyab, masiˈ inawaˈ na dia. ² Gumibek dayun si Maria, linaawanen si Simon Pedro mukaˈ su sala tawan sakup kiin ni Isus, su petailenen gupia. Kaliˈ pektaluˈ dinilan si Maria, “Inawaˈ nilan tug lebengen su Kaunutan! Ndaˈ nami suunay saˈ adin nilan bitang!”

³ Sikna midengeg ni Pedro mukaˈ su sala tawan sakup kia, miditu ilan dema sangyab. ⁴ Minggebek ilan duaˈ, laak su sala tawan sakup, miunananen si Pedro, iini miuna dateng diag lebeng. ⁵ Benaˈ midepet dia sangyab, migdungguˈ mekselip diag dialem, minitaˈen dia su penepeten kamun pinutus dig bangkay ni Isus. ⁶ Laak ndaˈen suutay su sangyab. Mikelendug si Pedro, suminuut dayun diag dialem sangyab. Minitaˈen dayun dia su penepeten gemputiˈ, ⁷ mukaˈ ki tulapuk kamun pinutus tu gulu ni Isus, dia da pagid, laak ndaˈ melamug dia, mipain da melulun. ⁸ Miglendug dayun suled su sala tawan sakup kia, su miuna dateng dia sangyab. Benaˈ minitaˈeni kebetang nu penepeten, mituudan dun dayun. ⁹ (Puˈ kiin, ndaˈ gusay mesabut nu nga sakup ni Isus kia su sinulat dengantu ditu Misulat Taluˈ nu Megbebayaˈ puˈ subay metubuˈ puliˈ iin.) ¹⁰ Mendadi, minuliˈ dayun sug duaˈ tawan kia sakup ni Isus.

¹¹ Naa si Maria kia, pegindeg diag liu nu sangyab, luminalek. Mendadi selianen lumalek, migdungguˈ mekselip diag dialem sangyab. ¹² Minitaˈen masiˈ diag dialem duaˈ tawan sesuguˈen nu Megbebayaˈ getaw langit mikseluk gemputiˈ, pegingkud ilan dia tandaˈ bililidan dini Isus. Sala tawan, dia dapit gulunanen, sala tawan di sikwayanen. ¹³ Kaliˈ ilan pektaluˈ, “Libun, taˈ mai mingaduya dun?”

Kaliˈ sembag, “Duuni migalap tug bangkay nu Kaunutan ku, mukaˈ ndaˈu suunay saˈ adin bitang!”

¹⁴ Sikna mitaluˈ ni Maria, luminingay. Minitaˈen dayun, si Isus, pegindeg dia gupiden. Laak ndaˈen mailala. ¹⁵ Sinabi ni Isus, “Libun, taˈ mai mingaduya dun? Taˈ taway duni penengaun mu?”

Laung dun dayun ni Maria, kia su megingat tu pegimulanan gayu kia. Laungen diniin, “Naa Sir, saˈ yaˈai migawaˈ dun dini, pesuun mu dinaan saˈ adin mu bitang, adun engain ku.”

¹⁶ “Maria!” laung ni Isus.

Sikna midengegen, minadap diniin, mitaluˈen di Hinebreo, “Rabboni!” (Guluganen, “Mekpetuˈun.”)

¹⁷ “Ndiˈ mau peguiday,” laung ni Isus. “Puˈ ndaˈ pau kelentu puliˈ ditu Gamaˈu. Naa, angaya ditu nga kepetedan ku, taluˈ mu dinilan puˈ luntuu puliˈ ditu Gamaˈu, ki Gamaˈ nilan dema, ditu Megbebayaˈ pektemuyen ku, ki pektemuyen nilan dema.”

¹⁸ Linaawan dayun ni Maria su nga sakupen, inukiten dinilan puˈ minitaˈen su Kaunutan, mukaˈ pitendayen dema dinilan ki pimuun kia ni Isus diniin.

¹⁹ Naa benaˈ gebii kia di gendaw Duminggu, mabuˈ duun nai tulug bataˈ, su nga sakup ni Isus, mipungun ilan dia salabuuk balay, piksibaˈan nilan tekepay sug balay, puˈ mindek ilan tu nga kaunutan nu getaw Judea. Mendadi, mitekaw metuaˈ si Isus, suminaing dinilan megindeg. Kaliˈ pektaluˈ, “Naa, gempiai ginaa niu.” ²⁰ Mitubusen teluˈay, pinitaˈen dinilan ki kemeten mukaˈ giliden. Mipatiˈ ilan leliagay sabaˈ minitaˈ nilan su Kaunutan. ²¹ Kaliˈ puliˈ pektaluˈ si Isus dinilan, “Gempiai ginaa niu. Mendadi, suguˈen ku amu mangay megukit, maaˈ nu kesuguˈ dinaan nu Gamaˈu.” ²² Sikna mitaluˈen, pisengawanen ilan ginaa, dunut mektaluˈ, “Tabuk niu ini Balakat nu Megbebayaˈ. ²³ Mendadi yamu, adin su getaw pedesunen niui salaˈen, mpedasun tuˈu. Mukaˈ adin su getaw ndiˈ niu pedesuneni salaˈen, ndiˈ dema mpedasun.”

²⁴ Naa sala tawan di nga sepuluˈ buˈ duaˈ tawan sakup ni Isus, si Tomas (piningalan dun su Gapid), ndaˈ kedunut dinilan su ketuaˈ ni Isus dinilan kia. ²⁵ Mendadi inukitan nu nga samasakupen si Tomas, laung nilan, “Minitaˈ nami su Kaunutan!”

Kaliˈ sembag si Tomas, “Naan, ndiˈu metuudan dun, subay maitaˈu pa ki paliˈ nug lansang dia kemeten mukaˈ mpulegu, sampay mpulegu ki giliden.”

²⁶ Naa tubus itu benaˈ walu gebii na, mipungun puliˈ su nga sakup ni Isus dig dialem balay, minampuˈ dinilan si Tomas. Mendadi, tinakep puliˈ sug balay, laak pia maˈantu, mitekaw na pelum metuaˈ si Isus, suminaing mindeg dinilan, laungen, “Naa, gempiai ginaa niu.” ²⁷ Laung dayun ni Isus dini Tomas, “Bentayay mu pa daan ki kemetu kini, puleg mu tenduˈ mu. Mukaˈ tenggal mui kemet mu, puleg mui gilidu. Ndiˈ mu dega pegduaˈduaˈayig delendeman mu dinaan, petuuda dinaan!”

²⁸ Simbag ni Tomas diniin, “Yaˈai Kaunutan ku, yaˈai Megbebayaˈ pektemuyen ku!”

²⁹ Laung dayun ni Isus, “Mituudan ka ba dinaan sabaˈ minitaˈ mau? Labi na leliagen ki nga getaw ndaˈ mekaitaˈ dinaan, laak mukaˈ mituudan ilan dinaan!”

³⁰ Naa, melaun pai tuˈus pinggulaula ni Isus di gedapan nu nga sakupen, laak ndaˈ mesulat dig libru kini. ³¹ Laak su gikteben kini, sinulat adun metuudan amu dun puˈ si Isus su Tinduˈ nu Megbebayaˈ Meglekaunutan, sug Bataˈ nu Megbebayaˈ. Puˈ saˈ metuudan amu dun, naa mpeduma amu tu ketubuˈ ndaˈi tamanen meksekat tu pegbayaˈen.