¹ Diniˈa, pegbesaan Teofilo, ki sinulat kini, genat dini Lucas.

Naa sug bekna sinulatu kitu diniˈa, iini miukit dun su kelaunan pinggulaula ni Isus mukaˈ pituluˈen ² sampay di gendaw nu kepelentu diniin nu Megbebayaˈ ditu gekbus langit. Mendadi kini si Isus, su ndaˈ pa pelentu ditug langit, pimituluˈanen su nga pimiliˈen peneliganen. Su pituluˈen dinilan kia, miksekat di ginuung nug Balakat nu Megbebayaˈ. ³ Naa genat di kepatayen gikteb di paat puluˈ gebii, melaun gupia pituˈusen di nga peneliganen kia puˈ mitubuˈ puliˈig lawasen. Miduaˈ mata nilan si Isus, mukaˈ pingukitanen ilan mekatag di Keglekaunutan nu Megbebayaˈ.

⁴ Mendadi, su selian ni Isus dumuma pa di nga peneliganen kia, tinituluˈanen ilan, laungen, “Ndiˈ amu pa pegawaˈ dini Jerusalem, pegelatay pa niu mateng su tinaluˈu diniu kiin, su tulung pinasad nu Megbebayaˈ. ⁵ Puˈ kiin, misuunan niu puˈ si Juan kitu, migbunag laak tubig diniu. Mendadi ndiˈ maiben, maˈniin bunagan amu peluman, puˈ mengapuˈ diniu kig Balakat nu Megbebayaˈ.”

⁶ Naa duuni gendaw mikpungun na pelum ditu ni Isus su nga peneliganen. Kaliˈ ilan saak diniin, “Sir, nemun ini ki ketindeg mu dig bansa ta Israel su Keglekaunutan?”

⁷ Kaliˈ pektaluˈ si Isus, “Su Gamaˈu laak, iini suunanen su gendaw nu kelaun mpenggulaula, puˈ iini megbayaˈ dun. Yamu, ndiˈ niu mesuunan. ⁸ Laak dagid saˈ mengapuˈ na diniu kig Balakat nu Megbebayaˈ, begayan amu niin ginuung. Tumakesiˈ amu dayun dinaan. Tumakesiˈ amu dini Jerusalem mukaˈ di tibuuk Judea, tu Samaria, sampay tu tibuuk lumbang.”

⁹ Benaˈ mideksuˈen teluˈay, pilentu na dayun si Isus ditu gekbus langit. Saanan megbantay su nga peneliganen, milinged na gabun si Isus, ndiˈ na nilan dayun maitaˈ.

¹⁰ Mendadi selian nu nga peneligan ni Isus megangag ditug langit, mitekaw duunig duaˈ tawan pegindeg dia gupid nilan, gemputiˈi penepeten nilan. ¹¹ Laung nug duaˈ tawan kia, “Yamu nga getaw Galilea, mauma dema amu mimegangag tug langit? Si Isus kiin, mpuliˈ da dini. Adin su kelentunen minitaˈ niu kini, maˈantu dadema ki kelusaden puliˈ.”

¹² Tubus itu, minuliˈ ditu Jerusalem su nga peneligan ni Isus genat ditug Bentud nu nga Gayu Olibo. Su pekilayuˈ nug bentud kia mukaˈ su Jerusalem, sala kilumitru. ¹³ Benaˈ minateng su nga peneliganen tug balay pektulugan nilan, minaik ilan dayun tu sugud nilan diag ditaas. Ilan si nga Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago bataˈ ni Alfeo, si Simon su piningalan dun Gembeluˈ Megukit, mukaˈ si Judas bataˈ nu sala Santiago. ¹⁴ Sug launan nilan kia, miksalabuuk ilan menamal menenabi. Duminuma dadema dinilan su ngag libun kampuˈ ni Maria su ginaˈ ni Isus, sampay su nga pated ni Isus.

¹⁵ Naa ndaˈ maiben, duuni gendaw mikpungun puliˈ su nga mikpetuud dini Isus kia, duun saani megatus buˈ duaˈ puluˈ tawan ilan. Mendadi migindeg si Pedro, kaliˈ pektaluˈ dinilan, ¹⁶ “Yamu nga kepetedan ku, subay minuud ki pisulat nug Balakat nu Megbebayaˈ dini David dengantu ditu Misulat Taluˈ nu Megbebayaˈ mekatag dini Judas, su minunut tu nga getaw duminaap dini Isus. ¹⁷ Begudiin si Judas kiin, duma ta di pikumpungan ta, mukaˈ pimiliˈ dadema ni Isus megabang dig baalen ta.”

¹⁸ (Puˈ su tinindan dini Judas ditug limbungen kia, piksaluy dun ni Judas lupaˈ. Milabuˈ dayun si Judas diag lupaˈen kia, migbetui tianen, miliwasagi tinainen. ¹⁹ Naa ndaˈ maiben, misuunan nu kelaun getaw dia Jerusalem su mipenggulaula kia ni Judas, kaas piningalan nilan dun sug lupaˈ kia, Akeldama, guluganen “Lupaˈ nu Kegbinasa di Getaw.”)

²⁰ Laung padun ni Pedro, “Puˈ kiin, duuni misulat ditu pisulat nu Megbebayaˈ piningalan dun ngag Bebat, maˈniniˈ.^a

²¹ “Naa mendadi,” maaˈ laung padun ni Pedro, “kagina maˈantu, subay duunig lain tawan sukli dini Judas. Melengas pemiliˈen tai sala tawan suminalabuuk na dinita su keduma dinita ni Isus ²² genat di kebunag ni Juan diniin tubig sampay di gendaw nu kepelentu diniin tu gekbus langit. Ki mpemiliˈ ta, megabang dayun dinita tumakesiˈ di ketubuˈ puliˈ nu Kaunutan ta si Isus.”

²³ Mendadi, pinindeg dayun nu nga peneliganig duaˈ tawan, si Jose mukaˈ si Matias. Lain ngalan ni Jose kia, si Barsabas. (Sala pa ngalanen, si Justo.) ²⁴ Minenabi dayun si nga Pedro, laung nilan, “Uu Kaunutan Megbebayaˈ, suunan mu sug delendeman nu tibaˈan getaw. Saˈ maˈantu, paitaˈ mu dinami ki pimiliˈ mu sukli dini Judas, saˈ adin dun dig duaˈ tawan kini. ²⁵ Iin nai mbaal peneligan mu mekesukli di kelaun baalen ni Judas bilengen, puˈ si Judas kiin, minuliˈ na ditu guliˈanen.”

²⁶ Piktali dayun ni nga Pedro saˈ taˈ taway duni mpemiliˈ dig duaˈ tawan kia. Iini mipemiliˈ, si Matias. Iin dayuni mitektub ditu sepuluˈ buˈ duaˈ tawan peneligan ni Isus.