2
Su Kelusad nug Balakat nu Megbebayaˈ
1 Naa benaˈ sungu mateng su keglinggwang nug lumpuk nu getaw Judea piningalan dun Pentecostes, mikpungun di salabuuk balay su nga mikpetuud dini Isus. 2 Mendadi benaˈ migingkud ilan dia, mitekaw nilan medengegi maaˈ migbegembuti metikteg genus genat tug langit, mileep dia seled balay kia. 3 Mukaˈ minitaˈ nilani maaˈ ligaˈ gapuy, mitukid dayun melabuˈ dinilan. 4 Dayun ilan pengepuˈay nug Balakat nu Megbebayaˈ, launan nilan. Diadia mikektaluˈ, masiˈ sala nai pikebitanen, puˈ miksekat dig Balakat nu Megbebayaˈ kia.
5 Naa duuni nga getaw Judea pegbebenwa dia Jerusalem mikpetuud gupia ditu Megbebayaˈ, genat ilan di kelaun benwa dig dibabaw lumbang. 6 Ilan, benaˈ midengeg nilan ki gelang diag balay kia, minampuˈ dailan dema dia. Benaˈ mikineeg ilan di taluˈ kia nu nga peneligan, diadia midengegen sug daniin pikebitan, misasaw dayuni ginaa nilan. 7 Misebuˈan ilan patiˈ, laung nilan, “Ki getaw kini mektaluˈ, lumbus ilan laak getaw Galilea! 8 Naa saˈ maˈnia, mauma dema ini, midengeg ta dinilanig launan pikebitan ta? 9 Puˈ ita, getaw Partia ita, getaw Media, getaw Elam. Duuni getaw genat di Mesopotamia, duuni getaw Judea, getaw Capadocia, getaw Ponto mukaˈ getaw Asia, 10 getaw Frigia, getaw Panfilia, getaw Ehipto, getaw Libya sakup Cirene, mukaˈ duuni megbebenwa dini genat tug Roma. 11 Duuni getaw Judea tantu mukaˈ su laak miginetaw na Judea. Duuni getaw Creta mukaˈ getaw Arabia. Dagid launan ta, medengeg tai nga pikebitan ta kini, pigukit dun nu nga getaw Galilea kini ki nga mekesalebuˈ gulaula nu Megbebayaˈ!” 12 Saˈ maˈnia, misebuˈan ilan lamug milibuleng ilan, kaliˈ ilan peksinaakay, “Alanduni guluganen ki mipenggulaula kini?”
13 Laak sug duma getaw, piksudiˈan nilan su nga mikpetuud dini Isus, laung nilan, “Baa, migbebulek laak ilan!”
Su Kegwali ni Pedro
14 Laak dagid si Pedro, migindeg, ilan nu ngag dumanen sepuluˈ buˈ sala tawan. Tuminubang si Pedro ditu nga getaw minampuˈ, minekeg dayun mektaluˈ, laungen, “Yamu nu nga samau getaw Judea mukaˈ launan niu migbebenwa dini Jerusalem, talentenay niui taluˈu kini, puˈ ulugen ku diniu ki mipenggulaula kini. 15 Ki nga getaw kini, kanaˈ ilan migbebulek, maaˈ nug delendeman niu dun, puˈ ginengaˈ menaik pa laaki gendaw. 16 Sinangkaliˈ ki mipenggulaula kini, iin su kenuud na tuˈu nu pisulat dengantu nu Megbebayaˈ ditu Taluˈen, su sinulat nu pimuunanen si Joel, laungen,
17 ‘Saˈ sungu melengkebig benwa,’ maaˈ laung nu Megbebayaˈ,
‘pepengapuˈu kig Balakatu tu kelaun bansa nu getaw.
Kaas su nga sumumpat diniu libun laki, ukiten nilan dayun ki pemuun ku dinilan.
Su ngag begu getaw, duuni paitaˈu dinilan mekesalebuˈ,
mukaˈ su mekegulang, duun dademai peteginepu dinilan.’
18 Laung nu Megbebayaˈ, ‘Metuud ia, su nga sesuguˈen ku libun laki,
pepengapuˈu dinilan kig Balakatu di gendaw kiin,
adun pelaktag nilan su pemuun ku dinilan.
19 Paitaˈu demai nga mekesalebuˈ tuˈus dig langit
mukaˈ nga mekesalebuˈ penggulaula dig benwa.
Metuaˈig duguˈ, mukaˈ gapuy, buˈ melabung gebel.
20 Su gendaw, dulem.
Sug bulan, palasen maaˈ duguˈ.
Tubus itu, mateng ki mekesalebuˈ Gendaw kiin, su Gendaw nu Kengukumu tu tibaˈan getaw, naan su Kaunutan Megbebayaˈ.
21 Mendadi adin su getaw mekpaingabang dinaan nu Kaunutan Megbebayaˈ, guunen ku iin.’”
22 Laung padun ni Pedro, “Mendadi yamu nu nga samau getaw Israel, talentenay niui taluˈu diniu. Kini si Isus, getaw Nazaret, pinilala diniu puˈ bigayan iin nu Megbebayaˈ pegbayaˈ, puˈ melaun ginuung mukaˈ tuˈus pinggulaula nu Kaunutan Megbebayaˈ pebian diniin. Kia, misuunan niu gupia, puˈ miduaˈ mata na niu. 23 Mendadi si Isus kiin, pibunuˈ niu di nga kanaˈ megbasa tu Megbebayaˈ, pilansang niu di kurus. Laak dagid saˈ kanaˈ genat tu Megbebayaˈ, pia su kedaap niu dun, ndiˈ niu sia megaga. 24 Dagid pitubuˈ puliˈ nu Megbebayaˈ si Isus, biluyen di kelegenayen, puˈ ndiˈ megdadi mbilin iin di gengkeman nu kepatay. 25 Maˈantu dadema su sinulat dengantu ni David mekatag diniin ditu Misulat Taluˈ nu Megbebayaˈ, laungen,
‘Tatapu maitaˈ su Kaunutan di gedapan ku,
tatapu niin penendingay, kaas ndiˈu mendek.
26 Mendadi gempiai ginau,
liliagu gupia.
Naan, pia kilawanu, mekpedatengu ndiˈ melasakig lawasu,
27 ndiˈ mu belengen su gimuudu ditug bayaˈ.
Meseligan sesuguˈen mau, kaas ndiˈ mu begay melasak diag lebengig lawasu.
28 Pisuun mu dinaan kig dalan pangay tu ketubuˈ ndaˈi tamanen.
Ndiˈ mau na pesuay, kaas liliagu gupia.’”
29 Laung padun ni Pedro, “Mendadi yamu kepetedan ku, taluˈu tuˈu diniu puˈ ki megdedengeg ginepuˈay ta si Adiˈ David, suunan ta puˈ minatay iin dakus libeng. Su pantiunen, deksuˈ nemun dia pa, ndaˈ pa peglaat.a 30 Laak si David kia, pimuunan nu Megbebayaˈ. Misuunanen su gempagen pinasad nu Megbebayaˈ diniin puˈ tenduˈen nu Megbebayaˈ ki sala tawan sapuˈen meglegadiˈ, maaˈ ni David kia. 31 Mendadi misuunan ni David ki penggulaulaan nu Megbebayaˈ dig binayaˈ gebii buˈ gendaw. Kaas suminulat si David mekatag di ketubuˈ puliˈ nu Tinduˈ nu Megbebayaˈ Meglekaunutan, laungen,
‘Ndaˈ belengay ditug bayaˈ su gimuuden,
mukaˈ ndaˈ melasak diag lebengig lawasen.’”
32 Laung padun ni Pedro, “Naa si Isus kiin, pitubuˈ puliˈ nu Megbebayaˈ. Launan nami kini, miketakesiˈ ami gupia di ketubuˈen puliˈ. 33 Mendadi, pilentu na si Isus tu gupid nu Gamaˈen Megbebayaˈ ditu gekbus langit, di dapit lintunen. Pipengapuˈ dun nu Gamaˈen Megbebayaˈ sug Balakaten, maaˈ dadema nu pinasaden. Mendadi adin su minitaˈ niu dini nandaw mukaˈ ki midengeg niu, iin su tinulung dinami nug Balakat nu Megbebayaˈ.
34 “Laak suunan ta puˈ si David, kanaˈ iini lumintu kia ditu gekbus langit. Puˈ si David, iin sungkini suminulat dun maˈniniˈ,
‘Tinaluˈ nu Kaunutan Megbebayaˈ ditu Kaunutan ku,
Pegingkuda dini gupidu, dini dapit lintuu,
35 sampay di gendaw pelebaun ku yaˈa daagen mu
su nga kuntra mu.’”
36 Diksuˈ ni Pedro, “Mendadi pesuun ku dema tuˈu diniu nga samau getaw Israel, kini si Isus, sug linansang niu di kurus, iin tuˈui su gilal nu Megbebayaˈ Tinduˈen Meglekaunutan, mukaˈ gilalen dadema su Kaunutan!”
37 Naa benaˈ midengeg nu nga getaw minampuˈ dia su tinaluˈ kia ni Pedro, milegenan ilan patiˈ.b Sinaak nilan dini nga Pedro, “Plii lai, mekendutaˈ nami dun?”
38 Kaliˈ sembag si Pedro dinilan, “Saladuaˈ diniu, subay meksikesuun amu, mukaˈ mekpebunag amu tubig tuˈus di kesakup niu dini Isukristu, adun pedesunen su salaˈ niu. Begay dayun diniu, pengepuˈan amu nug Balakat nu Megbebayaˈ. 39 Puˈ pinasad nu Megbebayaˈ, pengepuˈan amu nug Balakaten mukaˈ pengepuˈanen dadema su nga gembataˈ niu, sampay su nga melayuˈ getaw, pia adini ginggat nu Kaunutan ta Megbebayaˈ sumakup diniin.”
40 Naa melaun pai tinaluˈ ni Pedro ditu nga getaw mipungun dia. Tinituluˈanen ilan, laungen, “Pekpesuay amu tu nga melaat getaw nemun, puˈ adun ndiˈ amu mpeduma di ginukuman dinilan!”
41 Naa su nga mikpetuud ditu taluˈ ni Pedro, mikpebunag ilan dayun tubig. Su gendaw kia, duun saani telu ngibu tawan midugang ditu pikumpungan nu nga sakup ni Isus. 42 Minamal ilan dayun mektuˈun, pituˈunan ilan nu nga peneligan ni Isus, suminalabuuk dailan dema dinilan. Dumingan ilan maan ditug lebungan gindan tu kepatay ni Isus, mukaˈ migduma dailan dema menenabi.
Su Pigbetad nu nga Mikpetuud dini Isus
43 Naa melaun ginuung mukaˈ mekesalebuˈ tuˈus pinggulaula nu nga peneligan ni Isus. Misebuˈan dun patiˈ sug launan getaw. 44 Ki ngag launan mikpetuud, miksalabuuk ilan gupia, mukaˈ adin sug duuni sukaten, migbegay ditu ndaˈig daniin. 45 Su ngag duma, piksaluyenig lupaˈen mukaˈ pimetangen, dayunen begayay dun su gendaˈi kwartanen, bigayen duni sukal diniin. 46 Gendawgendaw mikpungun ilan ditug Balay Pengedapan tu Megbebayaˈ, mukaˈ dia ngag balay nilan, dumingan dailan dema maan ditug lebungan gindan tu kepatay ni Isus. Pikilas nilan dema su nga gaan nilan, mukaˈ gempia gupiai ginaa nilan. 47 Inal nilan su Megbebayaˈ, mukaˈ pigbesaan ilan pagid nu nga kelaun getaw. Mukaˈ gendawgendaw, adin su migawen nu Kaunutan Megbebayaˈ, midugang di pikumpungan nu nga mikpetuud.