4
Si Pedro mukaˈ si Juan tu Gedapan nu nga Metaas Gukum nu Getaw Judea
1 Naa selian ni Pedro mukaˈ ni Juan megwali ditu nga getaw mipungun dia, luminabet dinilan su ngag belian nu getaw Judea mukaˈ su nga Saduseo kampuˈ nu nga kaunutan nu nga pegingat tu Pengedapan tu Megbebayaˈ. 2 Naa ki nga getaw kini minateng, melaati ginaa nilan, puˈ midengeg nilan pigukit ni nga Pedro tu nga getaw puˈ mitubuˈ puliˈ si Isus. Kaas iini delendeman nilan, mbuus peglegintuuden nu nga getaw, metubuˈ puliˈi nga minatay getaw. 3 Mendadi dinaap nilan si nga Pedro, dayun nilan pikutay pa deliˈ, puˈ gebii na. 4 Laak melaun getaw mikedengeg ditu kegwali ni nga Pedro, mituudan ilan dun. Su nga mikpetuud, midepet na saan lima ngibu tawan.
5 Naa benaˈ miglegendaw, mikpungun dia Jerusalem su nga kaunutan nu getaw Judea, su nga gukum, mukaˈ su nga mekpetuˈun di Misulat Palinta nu Megbebayaˈ. 6 Minampuˈ dadema dinilan su Tampusan Metaas Belian si Anas mukaˈ si Caifas, si Juan, si Alejandro, sampay su kelaun betaˈan ni Anas. 7 Mendadi ki nga kaunutan kini, benaˈ inagak nilan si nga Pedro dia gedapan, sinaakan nilan dayun, laung nilan, “Ki pinggulaula niu kia kalabung, kendutaˈi kebaal niu dun? Taˈ taway duni mikpebayaˈ diniu adun mekenggulaula amu di maˈantu kalabung?”
8 Mendadi kini si Pedro, pingepuˈan nug Balakat nu Megbebayaˈ di sembagen. Kaliˈ pektaluˈ si Pedro, “Yamu nga kaunutan mukaˈ gukum, 9 saˈ saakan niu ami mekatag di kepia tu pilung kia, mukaˈ saˈ saaken niu dinami kendutaˈi kauliˈayen, 10 naa melengas sembagen ku amu, adun mesuunan niu dakus mesuunan nu kelaun getaw Israel. Mikegindeg ki getaw kini di gedapan niu sabaˈ miuliˈan miksekat di ginuung ni Isukristu, getaw Nazaret, kig linansang niu di kurus, laak pitubuˈ puliˈ nu Megbebayaˈ. 11 Kini si Isus, iini pisugatan ditu Taluˈ nu Megbebayaˈ, laungen,
‘Kig batu pimilas niu nu nga megbaal balay,
iini mibaal tampusan gempagen gentudan nug balay.’”a
12 Laung pa ni Pedro, “Mendadi, ndaˈidunig lain mekegawen dinita, subay si Isus. Puˈ ndaˈidunig lain getaw dig dibabaw lumbang pipegbayaˈ nu Megbebayaˈ adun guunen ita niin, subay laak si Isus. Ndaˈiduni kegawen dinita subay pebian diniin.”
13 Naa mendadi ki nga gukum kini, benaˈ minitaˈ nilan si Pedro mukaˈ si Juan gembeluˈ gupia sumbag, asa maikaˈi mituˈunan nilan, misebuˈan ilan dun gupia. Miˈilala nilan dayun puˈ pigdumanan ilan ni Isus. 14 Naa ndaˈ maulakay nu nga gukum su simbag ni Pedro, puˈ ki miuliˈan kia, dia ma pegindeg gupid ni nga Pedro. 15 Saˈ maˈantu, ki nga gukum kini, pipeguaˈ nilan deliˈ si nga Pedro dia pengukuman, adun peksebutsebuten nilan ki ginukuman nilan dia mipenggulaula. 16 Laak laung nilan, “Taˈ alandun maig baalen ta di nga getaw kiin? Puˈ ndiˈ ta ma dema mpemilas ki mekesalebuˈ pinggulaula nilan kiin, puˈ misuunan nug launan getaw dini Jerusalem. 17 Tumuˈ pemaagen ta laak ilan, ndiˈ na nilan sembayan ki ngalan ni Isus kiin, pia tu sala tawan, adun ndiˈ mesigwag di nga getawi gukiten nu mipenggulaula kini.”
18 Mendadi, sinabi puliˈ nu nga kaunutan si Pedro mukaˈ si Juan. Pimaag nilan dayun, adun ndaˈidun nai pegukit nilan, ndaˈiduni pektuˈun nilan, sembayan nilan su ngalan ni Isus kiin. 19 Dagid sumimbag si Pedro mukaˈ si Juan, laung nilan, “Naa, yamui petitengaˈ dun, saˈ alanduni gempia di pegitaˈen nu Megbebayaˈ. Mekpetuud ami diniin, atawaka mekpetuud ami diniu? 20 Puˈ ndiˈ nami metigel saˈ ndiˈ nami pegukiten tu nga getaw ki minitaˈ nami mukaˈ ki midengeg nami mekatag dini Isus.”
21-22 Naa pisilutan sia nu nga kaunutan si nga Pedro, laak ndiˈ mesuˈat, puˈ mbuus sumugut dini nga Pedro su nga getaw, kagina migleep di nga kelaun getaw sug dengegan nu Megbebayaˈ sabaˈ nu pilung kia miuliˈan, minayan na paat puluˈi taunen. Maˈantu, pingimeekan patiˈ nu nga kaunutan si nga Pedro, mukaˈ biluy ilan dayun.
Minenabi su nga Mikpetuud adun Meksibeluˈ ilan Megukit
23 Naa dekag biluy si Pedro mukaˈ si Juan, mipuliˈ ilan ditu ngag duma nilan, inukit nilan dayun ditug launan ki tinaluˈ dinilan kia nu nga kaunutan nug belian mukaˈ nu ngag duma kaunutan nu getaw Judea. 24 Mendadi benaˈ midengeg nu nga mikpetuud, miksalabuuk ilan dayun menenabi ditu Megbebayaˈ, laung nilan, “Uu Megbebayaˈ, yaˈai Mikleb tug langit, Miwat tug lupaˈ, Minunag tug dagat, Minaglis tu tubig, mukaˈ Mitang dig lumaun bitang dun! 25 Ki ginepuˈay nami si David, sesuguˈen mu, pisulat nug Balakat mu, laungen,
‘Mauma dema mimeluˈ su nga kanaˈ getaw Judea?
Mauma dema iini delendeman nu nga samatawu su ndaiˈ gatagen?
26 Su nga gadiˈ dema dig lumbang kini, mingandam ilan,
su nga kaunutan padun, mikpungun ilan,
adun lumpakan nilan su Kaunutan Megbebayaˈ mukaˈ su Tinduˈen Meglekaunutan.’”
27 Kaliˈ gusay penenabi su nga mikpetuud, “Naa, uu Megbebayaˈ, mikpungun na tuˈu dinig lunsud kini si Herodes mukaˈ si Poncio Pilato, kampuˈ nu nga getaw Israel mukaˈ su nga kanaˈ, suminugut ilan kumuntra ditu pimiliˈ Sesuguˈen mu si Isus, su Tinduˈ mu Meglekaunutan. 28 Laak dagid sug launan mipenggulaula nilan kia, lumbus daniˈa pegbayaˈ mukaˈ delendeman mpenggulaula. 29 Mendadi nandaw, uu Kaunutan, talentenay mu su kengimeek nilan dinami, yami nga sesuguˈen mu, mukaˈ begay mu dinami meksibeluˈ ami megukit tu taluˈ mu. 30 Peduma mu dun pagid paitaˈ di nga getaw su ginuung mu mekpauliˈ dun su nga megladu, mukaˈ menggulaula mekesalebuˈ mukaˈ tuˈus pebian di pegbayaˈ nu pimiliˈ Sesuguˈen mu si Isus.”
31 Mendadi benaˈ mitubus menenabi su nga mikpetuud, mikelegyug sug balay piglumpukan nilan. Dayun ilan gelaˈ pengepuˈay nug Balakat nu Megbebayaˈ. Minibeluˈ ilan dayun megukit tu taluˈ nu Megbebayaˈ.
Pinungun su Kelaun Gimu nu nga Mikpetuud
32 Naa su pikumpungan nu nga mikpetuud, miksalabuuk ilan dig delendeman sampay di ginaa. Ndaˈiduni minangken nga pimetangen, miktinebangay laak ilan. 33 Su nga peneligan ni Isus, bigayan ilan ginuung tumakesiˈ di ketubuˈ puliˈ nu Kaunutan si Isus, mukaˈ migelaˈ pepianay nu Megbebayaˈ su nga mikpetuud. 34 Ndaˈi sala tawan di pikumpungan nilan ndaˈiduni kulangen, puˈ adin sug duunig lupaˈen atawaka balayen, piksaluyen, dayunen uitay su galinen 35 pigwakil ditu nga peneligan ni Isus. Pikilas nilan dayun, adin sug duuni kulangen, bigayan nilan di sukal diniin.