¹ Naa duuni gendaw si Pedro mukaˈ si Juan, pegangay ilan ditug Balay Pengedapan tu Megbebayaˈ, puˈ betad nilan mangay ilan menenabi saˈ meginengaˈ menaugi gendaw. ² Naa dia gengaˈan nu Pengedapan piningalan dun su Melengas Gengaˈan, duuni getaw pilung, mipilung sikna mbataˈen. Ki pilung kini, gendawgendaw pegbuligan nu ngag dumanen dia mesempel gengaˈan nu Pengedapan kia, adun menengi limus ditu nga getaw suled dia. ³ Naa mendadi ki pilung kia, benaˈ minitaˈen si Pedro mukaˈ si Juan sungu suled dia, minengi dayun limus dinilan. ⁴ Pingenlengan ni Pedro mukaˈ ni Juan, laung dayun ni Pedro, “Pegbentayay mu ami!” ⁵ Migbantay dinilan su pilung, puˈ laungen dun, begayan. ⁶ Laak dagid kaliˈ pektaluˈ si Pedro, “Naa ndaˈiduni kwartau bulawan atawaka pelata, dagid adin sug duun dinaan, iinig begayu diniˈa. Miksekat di pegbayaˈ ni Isukristu su getaw Nazaret, taluˈu diniˈa, panawa!”

⁷ Piguidan ni Pedro ki pilung kini dig lintu kemeten, biwaten dayun. Tekaw mipeduunan sekegi geksuden. ⁸ Mikpalintuk dayun ki pilung, mikepanawpanaw na. Migdunut dayun dini Pedro mukaˈ dini Juan suled tu Pengedapan tu Megbebayaˈ, migleksuleksu mukaˈ migenal tu Megbebayaˈ.

⁹ Naa su ngag launan getaw dia, minitaˈ nilan su kamun pilung, sia, mikepanaw na, dunut inalen su Megbebayaˈ. ¹⁰ Benaˈ miˈilala nilan puˈ iin su migingkud menengi limus ditu Melengas Gengaˈan, mipatiˈ ilan mesebuˈay ditu mipenggulaula diniin.

¹¹ Naa dia Pengedapan tu Megbebayaˈ, duuni sala balay piningalan dun nu getaw su silungen, Silung ni Salomon. Naa dia Silung ni Salomon kia, su kamun pilung, ginapusen si Pedro mukaˈ si Juan. Migdedaliˈ dayun mekpungun dia su nga getaw. ¹² Mendadi si Pedro, benaˈ minitaˈen su nga getaw mipungun, laungen dinilan, “Yamu nu nga getaw Israel, mauma dema misebuˈan amu di mipenggulaula kini? Mauma pelum penentengan niu ami? Laung niu dun ba, mekepanaw nai getaw kini miksekat di ginuung nami atawaka su kepagen nu kekpetuud nami? ¹³ Su Megbebayaˈ, su piktamuy nu ginepuˈay ta si Abraham, si Isaac, mukaˈ si Jacob, puun diniin migleep sug dengegan nu Sesuguˈenen si Isus. Laak dagid kini si Isus, pigwakil niu ditu gubirnadur si Pilato, dayun niu pemelaway ditu gedapan nu gubirnadur. Pia beluyen sia ni Pilato, tigel niu si Pilato, ndiˈen beluyen. ¹⁴ Pimilas niu si Isus, ki mekesuun mukaˈ leliagen dun su Megbebayaˈ, puˈ inubug niu dini Pilato, beluyeneni memunuˈan, sabayaˈ ni Isus. ¹⁵ Su puun nu ketubuˈ, pinatay niu. Dagid pitubuˈ puliˈ iin nu Megbebayaˈ. Yami kini, miketakesiˈ ami dun. ¹⁶ Mendadi si Isus kia, miksekat di pegbayaˈeni sekeg nu pilung kini minitaˈ niu. Miuliˈani getaw kini miksekat di kesalig nami dini Isus. Miduaˈ mata na niu nandaw, launan niu.”

¹⁷ Kaliˈ padun pektaluˈ si Pedro, “Mendadi, yamu nu kepetedan ku, suunan ku puˈ su kekpatay niu dini Isus, yamu nu nga kaunutan niu, ndaˈ niu mesuunay saˈ taˈ alanduni gasalen. ¹⁸ Laak minuud dun su pisulat dengantu nu Megbebayaˈ ditu Taluˈen, su sinulat nug launan pimuunanen puˈ ki Tinduˈen Meglekaunutan, subay mayan dig lesayan. ¹⁹ Kaas peksikesuun amu, lingay amu ditu Megbebayaˈ, adun ugasanen su nga salaˈ niu. ²⁰ Saˈ meksikesuun amu, tatap dayun pepianay nu Kaunutan Megbebayaˈi ginaa niu, mukaˈ pelusadenen su Tinduˈen Meglekaunutan si Isus, su gandang pimiliˈen megabang diniu. ²¹ Laak dagid subay pegelatan pa ni Isus ditu gekbus langit su gendaw pegupianan nu Megbebayaˈ su gekleb langit buˈ lupaˈ, ki pisuun nu Megbebayaˈ dengantu pebian di nga pimiliˈen pimuunanen. ²² Puˈ sinulat ni Moises, laungen, ‘Suguˈen nu Kaunutan Megbebayaˈ diniu ki pemuunanen maaˈ dinaan, ki samataw ta dig bansa ta. Ki pemuunanen kia, adin su teluˈenen, talentenay niu. ²³ Adin su ndiˈ mektalenten diniin, ukuman nu Megbebayaˈ di patay, adun mbeleng ditu piglegetawan nu Megbebayaˈ.’ ²⁴ Naa su kelaun pimuunan nu Megbebayaˈ, genat dini Samuel sampay di nga mibinayaˈ pa diniin, mikpesuun ilan di gulaula nemun.

²⁵ “Naa, yamui sapuˈ nu nga pimuunanen kia. Adin su pinasad nu Megbebayaˈ dinilan, pinasad dadema diniu. Iini pinasad nu Megbebayaˈ dini Abraham, laungen, ‘Ki sapuˈ mu kiin, pepiananen sug launan bansa di tibuuk lumbang.’” ²⁶ Diksuˈ ni Pedro, “Naa bekna, sinuguˈ nu Megbebayaˈ diniu su Sesuguˈenen, adun pepianan amu niin, saladuaˈ diniu, peteliudenen tu salaˈen.”