¹ Naa selian megdugang su nga mikpetuud dini Isus, duuni nga sakupen miksual. Su ngag duma sakup, getaw Judea, laak mektaluˈ ilan pikebitan nu nga getaw Grecia, mukaˈ duun dademai sakup mektaluˈ ilan pikebitan nu getaw Judea. Naa laung nu nga sakup kia mektaluˈ pikebitan nu getaw Grecia, gendawgendaw saˈ pekilasen su ketubuˈan, duuni ngag balulibun dinilan meleksawan. ² Mendadi, sinabi nu nga sepuluˈ buˈ duaˈ tawan peneligan ni Isus su tibuuk pikumpungan nu nga mikpetuud. Benaˈ mipungun ilan, kaliˈ pektaluˈ su nga peneligan, “Ndiˈ mpia mundang ami megukit di taluˈ nu Megbebayaˈ, adun mekegilas ami di ketubuˈan. ³ Iini melengas, uu Mingumpated, pemiliˈ amu di ngag duma niu pitu tawan, iini pemiliˈ niu ki melengasig dengeganen, mukaˈ pingepuˈan nug Balakat nu Megbebayaˈ dakus mekesuun gupia. Saˈ mpemiliˈ na niu, tenduˈen nami ilan dayun mekilas di ketubuˈan. ⁴ Naa yami dema, menamal dami menenabi mukaˈ megukit di taluˈ nu Megbebayaˈ.”

⁵ Sinanguˈ dayun nu tibuuk pikumpungan nu nga sakup ki tinaluˈ kia nu nga peneligan ni Isus. Pimiliˈ nilan dayun si Esteban, sala tawan suminalig gupia tu Megbebayaˈ mukaˈ pingepuˈan nug Balakaten. Pimiliˈ nilan pagid si nga Felipe, si Procoro, si Nicanor, si Timon, si Parmenas mukaˈ si Nicolas getaw Antioquia, kanaˈ getaw Judea laak miginetaw Judea. ⁶ Mendadi ki pitu tawan pimiliˈ nilan, inunutan ilan dayun tu gedapan nu nga peneligan ni Isus. Pinenebian ilan dayun nu nga peneligan ni Isus mukaˈ dipenan ilan, tuˈus tinduˈ ilan mekilas di ketubuˈan.

⁷ Maˈantu, minamal megdugang su nga mikedengeg ditu taluˈ nu Megbebayaˈ pigukit nu nga peneligan ni Isus. Migdugang dayun gupia su nga sakup ni Isus dia Jerusalem, melaun dademaig belian nu nga getaw Judea mikpetuud dun.

⁸ Naa si Esteban kia, tinulungan gupia nu Megbebayaˈ mukaˈ bigayanen ginuung, kaas melaun mekesalebuˈ pinggulaula mukaˈ tuˈus binaalen di gedapan nu nga getaw. ⁹ Dagid kini si Esteban, siwal nu sakup di sala simbaan nu getaw Judea, su Simbaan nu nga Gulipen Pibeluy, (iini piningalan dun). Ki nga sakup di simbaan kia, getaw Cirene sug duma, dayun duun pagidi getaw Alejandria, getaw Cilicia, mukaˈ getaw Asia. ¹⁰ Dagid ilan kini, ndaˈ ilan kegaga di telisebutay ni Esteban miksekat tug Balakat nu Megbebayaˈ. ¹¹ Saˈ maˈnia, tinindanan nilani nga getaw megukit dig balus, adun teluˈen nilan, “Midengeg nami si Esteban kiin, mimilas tu palinta ni Moises sampay miksudiˈ tu Megbebayaˈ!” ¹² Maˈnia, sinasaw nilani ginaa nu nga getaw kampuˈ nu nga kaunutan nu getaw Judea mukaˈ su nga mekpetuˈun di Misulat Palinta nu Megbebayaˈ. Mendadi, dinaap nilan si Esteban, iwit nilan dayun tu gedapan nu Pikumpungan nu Metaas Gukum. ¹³ Dekag minateng ilan ditu, duuni sinabi nilan nga tumakesiˈ dig balus mekatag dini Esteban kia. Kaliˈ dayun pektaluˈ su tumakesiˈ kia, “Ki getaw kini, tatap menampalaksa tu Pengedapan ta tu Megbebayaˈ mukaˈ tu Palinta nu Megbebayaˈ pisulaten dini Moises. ¹⁴ Midengeg nami ki tinaluˈen puˈ ki Pengedapan tu Megbebayaˈ kini, gebaˈen daw ni Isus kiin getaw Nazaret, dakus pelinenen daw padun su kelaun betad ta pingumbilin dinita ni Moises!” ¹⁵ Saˈ maˈnia, tintengan gupia si Esteban nu ngag launan kaunutan kia. Pegitaˈ nilan dun su muluˈen, maaˈ danu sesuguˈen nu Megbebayaˈ getaw langit.