¹ Naa si Saulo kia, sinanguˈen su kepatay dini Esteban kia.

Naa mendadi su gendaw kia, pikpuunan gupia peglegetay su pikumpungan nu nga mikpetuud dini Isus dia Jerusalem. Ki nga piglegetan kia, mipelak ilan dayun di tibuuk Judea mukaˈ Samaria, iin laaki mibilin dinilan dia Jerusalem su nga sepuluˈ buˈ duaˈ tawan peneligan ni Isus. ² Naa duuni nga getaw mikpetuud gupia tu Megbebayaˈ, miglebeng ilan tug bangkay ni Esteban, lilekan nilan gupia iin.

³ Mendadi si Saulo kia, piglegetanen patiˈ su pikumpungan nu sakup ni Isus. Minamal suled di ngag bilayan, pimintengen su nga mikpetuud libun laki, dayunen uitay dia pirisuan.

⁴ Laak su nga mipelak kiin, pia adin ilan mekangay, minamal ilan megukit di Gempia Petenday. ⁵ Si Felipe kiin, minangay dig lunsud sakup Samaria, pigukiten tu nga getaw ditu puˈ si Isus su Tinduˈ nu Megbebayaˈ Meglekaunutan. ⁶ Benaˈ midengeg nu melaun getaw su ginukit ni Felipe mukaˈ minitaˈ nilan su mekesalebuˈ pinggulaulanen, piktalentenan nilan gupia su taluˈen. ⁷ Melaun menenulay pingutidan ditu getaw piglegetan nilan, menekeg mektegas su menenulay selian nilan mautid. Melaun dadema getaw miuliˈan minatay seputul lawasen, sampay ngag duma mipilung. ⁸ Saˈ maˈnia, liliag gupia su nga getaw Samaria kia.

⁹ Naa diag lunsud kia duuni getaw mensaled, ngalanen si Simon. Kini si Simon, miniben na mesebuˈay su nga getaw Samaria ditu penggulaulanen. Inangkenen metaasi tindegen. ¹⁰ Ndaˈig datuˈ ndaˈi pusuk, migelaˈ mektalenten diniin su nga getaw dia. Laung nilan, “Su ginuung nu getaw kiin, ginuung nu Megbebayaˈ. Su gelalen, ‘Su Mekesalebuˈ Ginuung.’” ¹¹ Tinalentenan gupia nu nga getaw si Simon, puˈ miniben nailan mesebuˈay tu nga kenaleden. ¹² Laak dagid benaˈ mikpetuud ilan ditu Gempia Petenday ginukit ni Felipe mekatag di Keglekaunutan nu Megbebayaˈ dakus mekatag dini Isukristu, suminakup ilan dayun tu Megbebayaˈ, binunagan ilan dayun tubig, libun laki. ¹³ Sampay si Simon kini, mikpetuud na pagid. Tubus bunagay tubig si Simon, migduma dini Felipe. Saˈ minitaˈen su nga mekesalebuˈ mipenggulaula mukaˈ tuˈus, misebuˈan dun gupia si Simon.

¹⁴ Naa su nga peneligan ni Isus ditu Jerusalem, benaˈ midengeg nilan puˈ dinawat na nu getaw Samaria su Gempia Petenday nu Megbebayaˈ, sinuguˈ nilan si Pedro mukaˈ si Juan meditu Samaria. ¹⁵ Benaˈ minateng ditu si Pedro mukaˈ si Juan, pinenebian nilan su nga mikpetuud dini Isus dia, adun pengepuˈan ilan nug Balakat nu Megbebayaˈ. ¹⁶ Puˈ ndaˈ pa lusad di nga getaw kia sug Balakat nug Megbebayaˈ, binunagan ilan laak tubig, tuˈus di kesakup nilan dini Isus. ¹⁷ Mendadi benaˈ pindepenan ni Pedro mukaˈ ni Juan su nga getaw Samaria kia, pingepuˈan ilan dayun tuˈu nug Balakat nu Megbebayaˈ.

¹⁸ Naa kia si Simon, benaˈ minitaˈen puˈ saˈ depenan nu nga peneligan ni Isus su nga mikpetuud, pengepuˈan ilan dayun nug Balakat nu Megbebayaˈ, miktulun sia si Simon kwarta dini nga Pedro. ¹⁹ Kaliˈ pektaluˈ dinilan, “Saˈ mesuˈat, begayay niau di ginuung niu kiin, adun saˈ duuni getaw depenan ku, pengepuˈan ilan dadema nug Balakat nu Megbebayaˈ.”

²⁰ “Baa, ukuman ka nu Megbebayaˈ,” simbag ni Pedro, “yaˈa mukaˈ su kwarta mu kiin! Masiˈ delendeman mu, kig begay nu Megbebayaˈ, megdadi seluyay? ²¹ Ndaˈig labet mu dun su penggulaulaan nami. Puˈ kig delendeman mu kiin, ndiˈ pia di pegitaˈen nu Megbebayaˈ. ²² Pegbiksuˈay mui melaat delendeman mu kiin. Penenebiay mu saˈ megdadi, pedesunen ka nu Megbebayaˈ dig delendeman mu melaaten. ²³ Puˈ misuunan ku migbayaˈ gupia dig delendeman mu su kengimbegu mu, mibaluda nu salaˈ mu.”

²⁴ Laung dayun ni Simon dini Pedro mukaˈ dini Juan, “Kelelaat penenebiay niau tu Kaunutan Megbebayaˈ, ndiˈ na mpenggulaula ki kelaun tinaluˈ niu kia.”

²⁵ Tubus itu, tuminakesiˈ si Pedro mukaˈ si Juan ditu nga getaw, mukaˈ migukit ilan di taluˈ nu Kaunutan si Isus. Benaˈ mitubus, minuliˈ ilan ditu Jerusalem. Selian nilan dig dalan pegangay dia Samaria, inukit da nilan dema su Gempia Petenday dia melaun lunsud mibianan nilan.

²⁶ Naa mendadi si Felipe kiin, duuni sesuguˈen nu Megbebayaˈ getaw langit suminuguˈ diniin, laungen, “Pengikpesa, angaya dia dapit gilidan gendaw, dia karsada pegangay ditu Gasa genat dini Jerusalem.” (Ki karsada kia, mikebian di meliwag limawaˈ.) ²⁷ Saˈ maˈnia, benaˈ mideksuˈ mektaluˈ su getaw langit, migbuat si Felipe, mipanaw tuˈu. Naa duuni getaw Etiopia, metaas pegwekilan ni Candace, sug libun meguit tu getaw Etiopia, trisurirunen. Ki trisuriru kini, miditu Jerusalem mektamuy tu Megbebayaˈ. ²⁸ Mendadi saˈ minuliˈ pelum ditug Etiopia, suminakay prada, dunut pegbasa libru, su Misulat Taluˈ nu Megbebayaˈ pisulaten dengantu tu pimuunanen si Isaias. ²⁹ Mendadi selian nu trisuriru megbasa dun, kini pelum si Felipe, tiluˈan nug Balakat nu Megbebayaˈ, laungen, “Pekpesempela di prada kia, tenduga dun.” ³⁰ Pingeted dayun ni Felipe su prada, mukaˈ midengegeni getaw kia, pegbesaanen su sinulat kia nu pimuunan nu Megbebayaˈ si Isaias. Sinaakan dayun ni Felipe su trisuriru, laungen, “Mesabut mu dai pigbasa mu kiin?”

³¹ Kaliˈ sembag ki getaw Etiopia kia, “Kendutaˈi kesabutu dun, subay duuni megluas dun dinaan?” Inggaten dayun si Felipe menaik megingkud dia gupiden. ³² Iinig binasanen ditu Misulat Taluˈ nu Megbebayaˈ, laung,

³⁴ Laung nu getaw Etiopia dini Felipe, “Naa saˈ megdadi, ki sinulat kini, pesuun mu dinaan saˈ taˈ taway duni misugat ini nu pimuunan nu Megbebayaˈ. Iinen da su suminulat dun, atawaka lain tawan saan?” ³⁵ Mendadi si Felipe, pikpuunanen pegweliay su sinulat kia, dayunen pegukit dia trisuriru su Gempia Petenday mekatag dini Isus. ³⁶ Naa mukaˈ kebaal nilan mundas dia karsada, midepet nailan di tubig. Miktaluˈ su trisuriru, “Naa, tayay pa daan, duuni tubig. Mabuˈ megdadi, bunaganu tubig.”

[\v 37 Kaliˈ sembag si Felipe, “Megdadi da bunagan ka dun, saˈ gelaˈen mui ginaa mu di kekpetuud mu.”

Kaliˈ sembag, “Aa, naa, mikpetuudu lai. Mituudanu dun puˈ si Isukristu, iinig Bataˈ nu Megbebayaˈ.”]

³⁸ Pitenlen dayun nu trisuriru su prada. Minaug ilan duaˈ, dayun minlusad ilan tu tubig. Binunagan dayun ni Felipe su trisuriru. ³⁹ Benaˈ guminawen ilan dia tubig, inabay dayun si Felipe nug Balakat nu Megbebayaˈ megawaˈ dia. Ndaˈ na maitaˈ nu trisuriru. Minundas nain, mipatiˈ na leliagay.

⁴⁰ Naa si Felipe, dia na mitandaˈ lunsud Asoto. Genat diag Asoto, minundas tu Cesarea. Adin su ngag linunsudan gembiananen, pengukiten ni Felipe dia su Gempia Petenday.