¹ Maˈantu, minundas puliˈ si nga Pablo ditug Derbe mukaˈ Listra. Duuni sakup ni Isus diag Listra, ngalanen si Timoteo. Su ginaˈen, getaw Judea mikpetuud na dini Isus, laak su gamaˈen, getaw Grecia. ² Si Timoteo kini, inal nu kepetedan diag Listra mukaˈ Iconio. ³ Mendadi mauyaˈan ni Pablo, tendugen padun si Timoteo. Pisirkunsisu dayun ni Pablo si Timoteo, iini pikpuunanen su kesirkunsisunen dun, puˈ adun ndiˈ mpemilas nu nga getaw Judea. Puˈ sug launan getaw Judea dia, misuunan nilan puˈ su gamaˈ ni Timoteo, getaw Grecia. ⁴ Mendadi saanan nilan mengepitan dia ngag lunsud, tinituluˈan nilan tu nga mikpetuud dia su nga pigdelendem kia nu nga peneligan ni Isus mukaˈ nu nga kaunutan di pikumpungan nu sakupen ditu Jerusalem. ⁵ Saˈ maˈnia, migiseg su kekpetuud nu pikumpungan nu nga sakup dia. Mukaˈ gendawgendaw, migdugang ilan.

⁶ Mendadi minian laak si nga Pablo dig benwa Frigia mukaˈ Galacia, puˈ pimaag ilan nug Balakat nu Megbebayaˈ megukit taluˈen dia prubinsya Asia kia. ⁷ Benaˈ minateng ilan tug dulunan nug benwa Misia, minundas ilan sia tu prubinsya Bitinia, laak ndaˈ buang dinilan nug Balakat ni Isus. ⁸ Saˈ maˈnia, minian laak ilan dayun diag benwa kia, tumigbeng ilan tu Troas. ⁹ Mendadi selian nilan dia Troas, duuni gebii, duuni pinitaˈ nu Megbebayaˈ dini Pablo, getaw Macedonia pegindeg megubug diniin, laungen, “Dipag amu dini Macedonia, ebangay niu ami!” ¹⁰ Benaˈ mipaitaˈ dini Pablo ia, migdedaliˈ ami dayun mundas tu Macedonia, puˈ mituudan ami dun, tinduˈ ami nu Megbebayaˈ megukit di Gempia Petenday tu nga getaw ditu.^a

¹¹ Naa suminakay ami dayun genat ditu Troas, minandeng ami dumipag ditu Samotrasia. Benaˈ sala gendaw, minundas ami ditu Neapolis. ¹² Genat dia Neapolis, tumiwad ami pangay ditug lunsud Filipos, gembagel gupia lunsud dia Macedonia, lunsud sakup Roma. Duuni santaˈ gebii migbebenwa ami dia Filipos kia. ¹³ Benaˈ su Gendaw Pelali, lumiu ami dig lunsud kia, miditu ami geksid tubig, puˈ delendeman nami, duuni pektebuˈan nu getaw Judea dia saˈ menenabi ilan. Naa benaˈ mingingkud ami dia, mingukit ami tu ngag libun mipungun dia. ¹⁴ Mendadi duuni sala tawan di nga mikineeg dinami kia, ngalanen si Lydia, getaw Tiatira, mendedagang penepeten tininaˈ gempula. Kini si Lydia, megbasa tu Megbebayaˈ. Naa pidelendem nu Megbebayaˈ diniin, pektalentenanen gupia su taluˈ ni Pablo. ¹⁵ Binunagan dayun tubig si Lydia, ilan nu nga gapenen. Benaˈ mitubus, inggat ami dayun ni Lydia, laungen dinami, “Saˈ laung niu suminaligu tuˈu tu Kaunutan, ditu amu balayu pegbebenwa.” Miguut ami dayun niin.

¹⁶ Naa duuni gendaw, selian pegangay pami dia penenebian nu nga getaw, duuni misungkak nami delaga. Kig delaga kini, gulipen, pingepuˈan menulay, kaas mengengatuk. Duminatuˈ dayun su nga getaw mingulipen diniin miksekat di kengatuken. ¹⁷ Mendadi tumindug dayun dinami ni Pablo sug delaga kia, kaliˈ pegbeksay, laungen, “Ki nga getaw kini, sesuguˈen ilan nu Tampusan Metaas Megbebayaˈ! Petenday nilan diniu kig bian nu kegawen diniu!” ¹⁸ Gendawgendaw, iin nai migbatag ia. Mendadi duuni gendaw, misesawan dun si Pablo. Liningayen dayun kig delaga kini, tiluˈanen dayun su pegibaˈanen, “Di pegbayaˈ ni Isukristu, suguˈen ku yaˈa, pegawaˈa diniin!” Iin dayuni kegawaˈ nu menulay. ¹⁹ Dagid saˈ misuunan nu nga migulipen dun puˈ ndaˈ nai melaam nilan dun, pidaap nilan si Pablo mukaˈ si Silas, dayun nilan biglasay tu tebuˈan adun padap nilan tu nga kaunutan. ²⁰ Benaˈ piadap nilan tu nga kuis, laung nilan dayun, “Ki nga getaw kini, getaw Judea. Miksamuk ilan dig lunsud ta kini. ²¹ Mikpetuˈun ilan betad ndiˈ ta medawat, mukaˈ ndiˈ ta dema mpia dunutan, puˈ sakup Roma ita.” ²² Migabang dayun lumumpak dini nga Pablo su nga melaun getaw.

Mendadi, pinggedit nu nga kuis su penepeten ni Pablo mukaˈ ni Silas, sinuguˈ nilan dayun pembedasen ilan. ²³ Benaˈ melaun na badas dinilan, pinirisu ilan dayun. Tinituluˈ tu pegingat tu pirisuan, peksibaˈan ilan peligenay. ²⁴ Saˈ miteluˈan su pegingat dia pirisuan, bitangen si nga Pablo dia mititengaˈ sugud nu pirisuan, dakus pitungi geksud nilan.

²⁵ Mendadi duun saan miginengaˈi gebii, minenabi si Pablo mukaˈ si Silas dakus migbebat ilan kegenal tu Megbebayaˈ, pikineegan ilan nu ngag duma pinikutan. ²⁶ Mitekaw dayun meglinug metikteg, mikegyug su gintudan tu pirisuan. Migelaˈ dayun mpukaˈ su nga takep, mukaˈ milengaˈ dadema su ngag balud nu nga pinikutan.

²⁷ Naa ki migingat dun kia, benaˈ mitanud mukaˈ minitaˈen su nga takep mipukaˈ na, laungen dun migelaˈ mbeluy su nga pinikutan. Saˈ maˈnia, bikutanen sug badungen, megeget sia. ²⁸ Dagid si Pablo, minekeg megbeksay, laungen, “Ndiˈa pegeget! Kini dami, launan nami!”

²⁹ Miksaak suluˈi megingat kia, migapas dayun suled dia sugud kia. Miglaub dayun di gedapan ni nga Pablo, sinaaban patiˈ. ³⁰ Inagaken ilan dayun megawaˈ dia pirisuan. Sinaaken dayun dinilan, “Sir, alandun mai baalen ku, adun megawenu?”

³¹ Kaliˈ ilan sembag, “Petuuda tu Kaunutan si Isus, adun megawen ka, sampay su gapen mu.” ³² Dayun ukitay ni nga Pablo su taluˈ nu Megbebayaˈ tu megingat kia, kampuˈ nug launan getaw diag balay kia. ³³ Naa, pia miklak na meginengaˈi gebii, minangay mengugas di gangel ni nga Pablo su megingat kini. Dayun mikpebunag tubig, kampuˈ nu kelaun gapenen. ³⁴ Iwit dayun nu megingat si Pablo mukaˈ si Silas ditug balayen, dayun nilan ilakay di gaan. Naa liliag dayun gupia su megingat di pirisuan, ilan nu tibuuk salapenan kia, sabaˈ mikpetuud nailan tu Megbebayaˈ.

³⁵ Mendadi benaˈ miglegendaw, suminuguˈ su nga kuis di nga pulis mangay ditu megingat tu pinirisu, pimuun nilan diniin, beluyenen si nga Pablo. ³⁶ Benaˈ midengeg nu megingat kia, laungen dini Pablo, “Pimuun nu nga kuis, beluyen amu. Naa panaw amu, gempia dai ginaa niu.”

³⁷ Dagid kaliˈ pektaluˈ si Pablo di nga pulis kia, “Paa, pimbadas ami nilan di gedapan nu nga getaw, ndaˈ ami ukumay. Asa sakup Roma ami! Pinirisu ami nilan dayun. Naa nandaw, beluyen bami nilan di meleglud? Paa, ndiˈ mesuˈat! Su nga kuis kia, subay medini ilan megbeluy dinami!”

³⁸ Saˈ maˈantu, inukit nu nga pulis ditu nga kuis ki tinaluˈ kia ni Pablo. Benaˈ misuunan nu nga kuis puˈ sakup Roma si Pablo mukaˈ si Silas, mindek ilan. ³⁹ Miditu ilan ni nga Pablo, minengi ilan pedasun dinilan. Pibeluy nilan dayun si nga Pablo mukaˈ pinengi nilan dun, guaˈ ilan dig lunsud kia. ⁴⁰ Migawaˈ dia pirisuan si nga Pablo, mipuliˈ ilan ditug balay ni Lydia. Benaˈ mingulikseg ilan di kepetedan dia, mipanaw na si Pablo mukaˈ si Silas.