17
Ditu Tesalonica si nga Pablo
1 Naa minian si nga Pablo mukaˈ si Silas dig benwa Ampipolis mukaˈ Apolonia, dayun minundas ilan tu Tesalonica, ditu tandaˈ duuni simbaan nu getaw Judea. 2 Mendadi minangay si Pablo tu simbaan, maaˈ dadema nug betaden, dayun taman telu deksuˈ Gendaw Pelali, migyagayaga tu nga getaw dia mekatag di Misulat Taluˈ nu Megbebayaˈ. 3 Pigwali dinilan ni Pablo su taluˈ nu Megbebayaˈ, mukaˈ inalapen duni tuˈusanen dun puˈ su Tinduˈ nu Megbebayaˈ Meglekaunutan, subay minatay mukaˈ mitubuˈ puliˈ. Kaliˈ pektaluˈ si Pablo dinilan, “Kini si Isus, ki petendain ku diniu, iin na tuˈu su Tinduˈ nu Megbebayaˈ Meglekaunutan.” 4 Naa sug duma getaw dia simbaan kia, mituudan ilan dun, minampuˈ ilan dayun dini Pablo mukaˈ dini Silas, sampay melaun libun meketaasi gelalen mukaˈ nga getaw Grecia megbasa tu Megbebayaˈ.
5 Dagid ki nga getaw Judea, mingimbegu ilan dini nga Pablo. Pinungun nilani nga mekelelaˈ getaw medupang, adun semuken nilani tibuuk lunsud kia. Linumpakan nilan dayun sug balay nu sala tawan ngalanen si Jason, puˈ peguaˈen nilan sia dia si Pablo mukaˈ si Silas, uiten nilan sia tu gedapan nu melaun getaw. 6 Benaˈ ndaˈ nilan mbaangay, dindel nilan ditu gedapan nu nga kaunutan dig lunsud si Jason dakus ngag duma mekpetuud. Mimeksay ilan, “Ki nga getaw kini, pisasaw nilan sug liwagan benwa! Naa nandaw, minateng nailan pelum dini, 7 dakus pinembaˈ ilan ni Jason kini diag balayen. Launan nilan, mimilas ilan tu palinta nu tampusan gadiˈ nu getaw Roma si Cesar, laung nilan daw duuni sala gadiˈ, ngalanen si Isus.” 8 Benaˈ midengeg nu nga getaw mukaˈ su nga kaunutan nug lunsud, misasaw gupiai ginaa nilan. 9 Benaˈ pisunggud nilan si nga Jason, biluy ilan dayun.
Su Kelaguy ni nga Pablo tug Berea
10 Mendadi benaˈ miglegebii, pilaguy nu nga mikpetuud si Pablo mukaˈ si Silas tug lunsud Berea. Naa dekag nailan minateng ditu, tuminuun ilan tu simbaan nu getaw Judea. 11 Naa ki nga getaw Judea diag Berea kia, mekesuun ilan, batul nu nga getaw ditu Tesalonica kia. Pinembaˈ nilan gupia su pitenday dinilan, mukaˈ gendawgendaw penilungen nilan su Misulat Taluˈ nu Megbebayaˈ, adun mesuunan nilan saˈ metuud su pekteluˈen ni Pablo, saˈ ndiˈ. 12 Melaun dinilan mikpetuud, duuni ngag libun getaw Grecia metaasi tindegen mukaˈ ngag laki. 13 Dagid ki nga getaw Judea ditu Tesalonica, benaˈ midengeg nilan puˈ megukit padun si Pablo taluˈ nu Megbebayaˈ ditug Berea, miglendug ilan, pisamuk nilan dayun patiˈ su ginaa nu melaun getaw dia. 14 Saˈ maˈantu, pilaguy ganam nu nga mikpetuud si Pablo tu geksid dagat. Laak si Silas mukaˈ si Timoteo, mibilin pailan diag Berea. 15 Su nga tumindug dini Pablo gikteb tu Atenas, saˈ minuliˈ ilan diag Berea, pimuun ni Pablo dinilan, ndiˈ meglangan si Silas mukaˈ si Timoteo meglendug diniin.
Ditug Atenas si Pablo
16 Naa selian ni Pablo megelat dini Silas mukaˈ dini Timoteo diag Atenas, mipatiˈ gupia melibuleng si Pablo saˈ minitaˈen mileep ledawanig lunsud kia. 17 Mendadi, miditu dayun simbaan nu getaw Judea si Pablo, piglantugiˈanen su nga getaw Judea dia, kampuˈ nu nga kanaˈ getaw Judea megbasa dadema tu Megbebayaˈ. Mesama dadema dia nga tebuˈan, adin sug duuni getaw mpekitaˈen.
18 Naa duun pagidi nga mekpetuˈun, piningalan dun ngag Epikureo mukaˈ ngag Estoiko, miglantugiˈ ilan pagid dini Pablo. Sinaak nu ngag duma, “Alandun siai pekteluˈen ni metakabul getaw kini?” Simbag nug duma, “Mamaˈ megukit mekatag di ngag diwata ndaˈ ta pa mailala.” Iini mitaluˈ nilan duni maˈnia, puˈ migukit si Pablo mekatag dini Isus mukaˈ pagid mekatag di ketubuˈ puliˈ nu getaw. 19 Mendadi, iwit nilan si Pablo tu gedapan nu nga kunsial nug lunsud nilan, piningalan dun su pikumpungan nilan kia, sug Areopago. Kaliˈ ilan pektaluˈ dini Pablo, “Mauyaˈan nami sia, ulugen mu dinami kig begu tinituluˈ mu kiin. 20 Ki ngag duma teluˈen mu, iin pa nami medengeg, kaas mesuunan nami sia su guluganen.” 21 (Puˈ su nga getaw Atenas kia sampay su ngag lain getaw migbenwa dia, ndaˈ pai dunig lain pinggulaula nilan, megukit laak ilan mukaˈ mekineeg dig begu sinuunan.)
22 Mendadi, migindeg si Pablo dia gedapan nug Areopago kia, kaliˈ pektaluˈ, “Yamu nga getaw Atenas, minitaˈu su kegbasa niu gupia tu ngag diwata. 23 Puˈ su kepanawpanawu dinig lunsud niu, pegbentayan ku su nga pengamuyuˈan niu, duuni minitaˈui gentudan gilak sinulatan, ‘Pengamuyuˈan tug Diwata ndaˈ nami Mailala.’ Naa mendadi,” maaˈ laung padun ni Pablo, “kig diwata pektemuyen niu kiin, su laung niu ndaˈ niu mailala, iinen na gupiaig diwata petendain ku diniu. 24 Su Megbebayaˈ, su Miwat dig lumbang mukaˈ Mitang tug launan bitang dun, su Kaunutan di gekleb langit buˈ lupaˈ, ndiˈ megbenwa di pengamuyuˈan pigbaal nu kilawan. 25 Iin, ndiˈ dadema ebangan nu getaw, puˈ ndaˈi kulangen, kagina iini megbegay ketubuˈ mukaˈ ginaa mukaˈ kelaunanen di tibaˈan getaw. 26 Iin dademai miwat dig launan bansa nu getaw, sala tawan dai pikpuunanen dun. Tinduˈen dadema su timpu nu nga nasud, mukaˈ pigbatalbatalen su gikteb dulunan nug benwa nilan di tibuuk lumbang. 27 Iini pinggulaulanen duni maˈantu, puˈ adun penengaun nilan su Megbebayaˈ, adun sia mbaangan nilan iin, sabaˈ ilan menelubatik diniin. Laak dagid su Megbebayaˈ, kanaˈ melayuˈ dinita, saladuaˈ. 28 Maˈantu su misulat,
‘Iini puun nu ketubuˈ ta, iini puun nu kekuleg ta mukaˈ ginaa ta.’
Maaˈ danu tinaluˈ nu menenubad diniu, laung nilan,
‘Bataˈ ita tuˈu nu Megbebayaˈ.’”
29 Laung padun ni Pablo, “Naa mendadi, kagina bataˈ ita nu Megbebayaˈ, ndiˈ ta mpia pegdelendemen puˈ su Megbebayaˈ, mamaˈ ledawan binaal nu getaw, kig binaal bulawan, bulawan selapiˈ, atawaka batu, lumbus tinawan laak nu kilawan. 30 Su ndaˈ ta pa mailala su Megbebayaˈ, ndaˈen pengebetay su gulaula ta. Laak dagid nandaw, pinalintanen puˈ subay meksikesuun su tibaˈan getaw di tibuuk lumbang. 31 Puˈ miksesaˈ su Megbebayaˈ di gendaw peglepengenen ukumay su tibaˈan getaw pebian di sala tawan getaw tinduˈen mengukum dun. Ki sala tawan kiin, tinuˈusan nu Megbebayaˈ, iini tinuˈusen dun, pitubuˈen puliˈ ki getaw kiin!”
32 Naa benaˈ midengeg nu nga getaw su tinaluˈ ni Pablo mekatag di ketubuˈ puliˈ nu minatay, miksudaw dini Pablo sug duma. Laak laung nu ngag duma, “Mekineeg pami puliˈ diniˈa mekatag di teluˈen mu kini.”