¹ Genat itu, migawaˈ si Pablo diag Atenas, minundas dayun tu Corinto. ² Mitaanganen dia sala tawan getaw Judea, ngalanen si Aquila, daan benwanen su Ponto. Begu dateng si Aquila dia Corinto genat tug Italia, ilan nu sawanen si Priscila, puˈ pinalinta nu tampusan gadiˈ si Claudio, subay mawaˈ diag Roma su kelaun getaw Judea. Naa linaawan ni Pablo si nga Aquila kia, ³ dayun migbebenwa dinilan, migduma dinilan mengimbaal, puˈ miksamaig bian nilan malap ketubuˈan nilan, panday ilan megbaal bebelayan luna. ⁴ Dayun kada Gendaw Pelali, migyaga si Pablo dia simbaan nu getaw Judea, pengmetuudanen su nga getaw Judea sampay su nga getaw Grecia.

⁵ Naa dekag minateng si Silas mukaˈ si Timoteo genat ditu Macedonia, minamal megukit si Pablo ditu nga getaw Judea, takesiˈanen dinilan puˈ si Isus su Tinduˈ nu Megbebayaˈ Meglekaunutan. ⁶ Dagid benaˈ pimilas nu nga getaw Judea kia su tinaluˈ ni Pablo dakus pinampalaksaan nilan iin, ikpagan dayun ni Pablo su penepetenen, tuˈus tumiliud dadema dinilan. Kaliˈ pektaluˈ si Pablo dinilan, “Naa, saˈ ndiˈ namu duaten nu Megbebayaˈ, metibabaˈ da laak niu. Naan, ndaˈ nai salaˈu dun. Mendadi genat nandaw, iin nai pegukitan ku ki nga kanaˈ getaw Judea.” ⁷ Saˈ maˈnia, migawaˈ dayun si Pablo dia, miditu pelum balay ni Tito Justo, kanaˈ getaw Judea laak megbasa tu Megbebayaˈ. Sug balayen, misaing dia simbaan nu getaw Judea. ⁸ Naa si Crispo, su kaunutan di simbaan kia, mikpetuud tu Kaunutan si Isus, kampuˈ nu tibuuk salapenanen. Melaun dademaig duma getaw dia Corinto mikedengeg ditu taluˈ ni Pablo dakus mikpetuud dun, mikpebunag ilan dayun tubig.

⁹ Mendadi duuni gebii, mikpaitaˈ dini Pablo su Kaunutan Megbebayaˈ. Kaliˈ pektaluˈ dini Pablo su Kaunutan, “Naa mendadi, ndiˈa mendek. Penamala megukit, ndiˈ mu mesikpaˈay. ¹⁰ Puˈ naanig duma mu. Ndaˈi sala tawan mekekaˈid diniˈa. Puˈ melaun pai baalen ku piglegetawan ku dinig lunsud kini.” ¹¹ Maˈantu, migbebenwa pa si Pablo dia setaun buˈ ginengaˈ, megukit di taluˈ nu Megbebayaˈ tu nga getaw dia.

¹² Mendadi su timpu ni Galio gubirnadur tinduˈ nu nga getaw Roma dia Grecia, ki nga getaw Judea, piksalabuukan nilan lumpakay si Pablo, pinguit nilan dayun iin tu pengukuman. ¹³ Kaliˈ ilan pektaluˈ, “Ki getaw kini, pengmetuudanen sia su nga getaw, adun dunutan nilan kig betad mektamuy tu Megbebayaˈ, ki binandu ditu palinta!”

¹⁴ Saˈ sumbag na sia si Pablo, kaliˈ pektaluˈ si Galio di nga getaw Judea kia, “Ay, yamu di nga getaw Judea, saˈ pinenggiˈ mikesalaˈ atawaka migdupangi getaw kini, naa mesuˈat da sia mektigelu diniu. ¹⁵ Laak kagina piglisuˈan laak ini mekatag di penggelal mukaˈ gelal dakus palinta niu, naa yamui metau dun. Mpauku misala di maˈnia!” ¹⁶ Piawaˈen ilan dayun dia pengukuman. ¹⁷ Ginapus dayun nu nga sakup ni Galio si Sostenes, su kaunutan di simbaan nu getaw Judea, pimbedasan nilan dayun diag lenuˈan nu pengukuman. Laak ndaˈ pengebetay ni Galio kia.

¹⁸ Tubus itu, duuni santaˈ gebii migbebenwa pa dia kepetedan si Pablo. Migudas dinilan dayun miditu Cencrea, adun sumakay pangay tu Siria. Migdunut diniin si Priscila mukaˈ si Aquila. Laak su dia pa Cencrea si Pablo, mikpekis dimpulu, tuˈus pinuuden su pinasaden tu Megbebayaˈ. ¹⁹ Naa minateng ilan diag Efeso, dia ilan dayun miksuay ni nga Aquila. Si Pablo, sumiled tu simbaan nu getaw Judea dia, migyagayaga dayun dinilan. ²⁰ Ginuut nilan sia diniin ndiˈ pa mundas, laak ndaˈ peliag si Pablo. ²¹ Saˈ migudas dinilan, laungen, “Saˈ iin su mauyaˈan nu Megbebayaˈ, mpuliˈ dau dini niu.” Saˈ maˈnia, suminakay na pelum genat diag Efeso.

²² Benaˈ minateng si Pablo dia Cesarea, tumiwad dayun ditu Jerusalem, mingumbelayan pa dia pikumpungan nu nga sakup ni Isus, dayun minundas ditug Antioquia. ²³ Naa benaˈ minibeniben dia, mipanaw na puliˈ si Pablo, mingepitan diag benwa Galacia mukaˈ Frigia, paisegenen su kesalig nu kelaun sakup ni Isus dia.

²⁴ Naa duuni getaw Judea ngalanen si Apolos, daan benwanen sug Alejandria, mituaˈ diag Efeso. Kini si Apolos, metau megdalan di teluˈenen, mukaˈ miulugen gupia su Misulat Taluˈ nu Megbebayaˈ. ²⁵ Piktuˈunan dadema dig Bianan nu Kaunutan si Isus, kaas gilaˈeni ginaanen megukit mukaˈ mekpetuˈun mekatag dini Isus. Lumbus metuud su gukitenen, laak daal dai misuunanen, gikteb tu kegbunag tubig piktuˈun ni Juan. ²⁶ Mendadi misasal megukit si Apolos dia simbaan nu getaw Judea. Laak saˈ midengeg ni Priscila kia mukaˈ ni Aquila, iwit nilan ditug balay nilan, pigiseg nilan dayuni sinuunanen mekatag dig Bianan nu Megbebayaˈ. ²⁷ Tubus itu, pigdelendem ni Apolos dumipag ditug benwa Grecia. Pinguliksegan nu kepetedan diag Efeso, mikpuit ilan dayun sinulat tu nga sakup ni Isus ditu Grecia, puˈ adun telimaˈen nilan si Apolos. Naa benaˈ minateng dia Grecia si Apolos, su nga mikpetuud ditu sekat tu tulung nu Megbebayaˈ, ibanganen gupia. ²⁸ Puˈ miulakanen taluˈ su nga getaw Judea, minalap tuˈusen dun dia Misulat Taluˈ nu Megbebayaˈ puˈ si Isus su Tinduˈ nu Megbebayaˈ Meglekaunutan.