¹ Benaˈ misikpaˈ su kesasaw kia, si Pablo, pinungunen su nga sakup ni Isus. Mingamuˈ dayun si Pablo dinilan, dayun migudas dinilan mukaˈ mipanaw pangay tu Macedonia. ² Naa selianen mian di ngag benwa di gelet Efeso mukaˈ Macedonia, pinemalanen penguliksegay su nga sakup ni Isus dia. Maˈantu, minateng tu Grecia, ³ migbebenwa dayun dia seled telu bulan. Benaˈ sungu sumakay si Pablo pangay tu Siria, midengegen puˈ duunig delendeman nu nga getaw Judea, petain nilan iin sia. Kaliˈ pegleketau si Pablo, miksimpuliˈ mian dia Macedonia. ⁴ Tumindug diniin si Sopater getaw Berea, bataˈ ni Piro, dakus duaˈ tawan getaw Tesalonica si Aristarco mukaˈ si Segundo, si Gayo getaw Derbe, duaˈ tawan getaw Asia si Tiquico mukaˈ si Trofimo, dayun su tampusanen si Timoteo. ⁵ Miguna ilan dinami mpanaw, pigelatan ami nilan ditu Troas. ⁶ Benaˈ miglinggwang sug Lumpuk di Pan ndaˈ Petulinay, suminakay ami dia Filipos. Benaˈ lima endaw ami meksakay, midepetan nami ilan ditu Troas. Minapit ami dayun dia lagaˈ sala simana.

⁷ Naa benaˈ gebii Sabadu, mikpungun ami maan dig lebungan kiin gindan di kepatay ni Isus. Si Pablo, miktituluˈ di nga getaw mipungun, miniben mektaluˈ, depet miginengaˈi gebii, puˈ delendemanen, mpanaw na saˈ megendaw. ⁸ Melaun suluˈ dia sugud pikpungunan nami diag ditaas.

⁹ Mendadi, duunig begu getaw pegingkud diag dungawan, ngalanen si Eutico. Benaˈ metaas gupiaig yaga ni Pablo, tulugen gupia si Eutico kini, mitenangan dayun mukaˈ milabuˈ tu silung, genat di ketelu angkaˈen. Kaliˈ nilan ingebangay, masiˈ minatay na. ¹⁰ Dagid pinaugan dayun ni Pablo si Eutico kini, dinungguˈanen, dayunen epelay. Kaliˈ pektaluˈ si Pablo tu ngag dumanen dia, “Ndiˈ amu melibuleng, puˈ kini da su gimuuden.” ¹¹ Mendadi minaik na pelum si Pablo, pimetanen su pan, dayun ilan maan. Bineeg ni Pablo megabitabit dinilan, sampay migendaw. Mipanaw dayun si Pablo. ¹² Sug begu getaw milabuˈ, inated nu ngag dumanen tug balayen, mitubuˈ na. Miamuˈ dayun gupia su ginaa nu ngag dumanen.

¹³ Mendadi iini sabut nami, meguna ami sumakay tug Ason, dayun si Pablo, sumakay saˈ mateng dia. Puˈ daniin, mian dig lupaˈan. ¹⁴ Naa benaˈ mipekitaˈ nami tuˈu si Pablo diag Ason, pisakay nami, dayun ami mundas pangay tu Mitilene. ¹⁵ Genat tu Mitilene, suminakay ami puliˈ, dayun sendaw pa, minateng ami ditu Quio. Benaˈ sala gendaw na pelum, dumingguˈ ami ditu Samo. Di keduaˈ endawen, midepet ami ditu Mileto. ¹⁶ Puˈ delendeman ni Pablo, liaun nami sug lunsud Efeso, adun ndiˈ ami melangan dia prubinsya Asia. Puˈ megdedaliˈ si Pablo, taginaanen mateng ami sia ditu Jerusalem, megdeksuˈ sug Lumpuk Pentecostes.

¹⁷ Naa si Pablo, su diin pa Mileto, mimuun tu nga kaunutan di pikumpungan nu nga sakup ditug Efeso, sinabinen ilan. ¹⁸ Naa benaˈ minateng ilan, kaliˈ pektaluˈ si Pablo dinilan, “Naa mendadi, kig betadu saanan ku dumuma diniu genat tu gendaw nu kedatengu dini prubinsya Asia, misuunan na niu gupia. ¹⁹ Pinuudu su suguˈan nu Kaunutan Megbebayaˈ dinaan. Minegduˈ patiˈig luaˈu, pibabaˈuig lawasu, saanan migleginis su kengindan dinaan sekat di kegleget dinaan nu nga getaw Judea. ²⁰ Misuunan da niu dema puˈ gilaˈu teluˈay diniu su mpianan amu dun, piktituluˈan ku amu di gedapan sampay ditu ngag balay niu. ²¹ Su nga getaw Judea mesama su kanaˈ, mikpegadu dinilan puˈ subay meksikesuun ilan, subay lumingay ilan tu Megbebayaˈ mukaˈ sumalig tu Kaunutan ta si Isus.”

²² Laung ni Pablo, “Mendadi, mangay nau tuˈu tu Jerusalem, penuuden ku su suguˈan dinaan nug Balakat nu Megbebayaˈ. Naa ndiˈu suunan ki mpenggulaula dinaan saˈ matengu ditu. ²³ Suunan ku laak su pigad dinaan nug Balakat nu Megbebayaˈ puˈ medetengan ku tu kelaun lunsud mbianan ku, pirisuunu dia mukaˈ peglegetanu. ²⁴ Dagid danaan, ndiˈu petailen su ketubuˈu, bilangen ku ndaˈi gatagen, saˈ laak mpenuudu ki sinuguˈan dinaan, megelaˈu tubusay su pibaal dinaan nu Kaunutan ta si Isus, saˈitada su kegukitu di Gempia Petenday mekatag di tulung nu Megbebayaˈ.”

²⁵ Kaliˈ padun pektaluˈ si Pablo, “Naa mendadi naan, migleepleepu diniu, migukitu diniu mekatag di kesakup tu Keglekaunutan nu Megbebayaˈ. Mendadi, misuunan ku puˈ pia sala tawan diniu, ndiˈ na niau pelum mpekitaˈ puliˈ. ²⁶ Kaas paladpalad taman taluˈu diniu nandaw, saˈ duun diniui mbeleng tug linaw gapuy, kanaˈ na danaan salaˈ. ²⁷ Puˈ kiin, gilaˈu pesuun diniu su tibuuk delendeman nu Megbebayaˈ. ²⁸ Kaas talentenay niu ki ndiˈ mpalini kekpetuud niu, mukaˈ talentenay da niu dema su nga samasakup niu, su pibayaˈ diniu nug Balakat nu Megbebayaˈ. Ingatay niu su nga maaˈ karniru nu Megbebayaˈ, su binaalen piglegetawanen pebian di kegantiˈ dun nu ginaa nug Bataˈen. ²⁹ Naa misuunan ku saˈ megawaˈ nau diniu, duun dayuni lumamug diniu nga malig metetubuˈ mendapaˈ di karniru, ndiˈ nilan lelaatan su nga karniru nu Megbebayaˈ.^{a 30} Duun dademai nga samasakup niu mekpetuˈun diniu melaat, adun sia pesuain nilan su nga sakup ni Isus, mesakup nilan dayun. ³¹ Kaas peglengilam amu, mukaˈ ndiˈ niu selingawan puˈ gebii gendaw seled telu taun, miktituluˈu diniu sampay minegduˈig luaˈu.”

³² Mendadi, diksuˈ na ni Pablo su taluˈen, laungen, “Mendadi nandaw, saligu namu ditu Megbebayaˈ mukaˈ ditu pitenday diniu mekatag di tulungen, su mekpaiseg tu kekpetuud niu mukaˈ megbegay diniu kepianan pitengeden di nga kelaun pinaas piglegetawanen. ³³ Su kegdumau diniu, ndaˈu mayak tu gaˈus nu getaw, pia su kwartanen bulawan atawaka pelata sampay su penepetenen. ³⁴ Suunan niu puˈ pikulaˈan gulasu, adun naani meksukat tu ketubuˈan ku mukaˈ tug danu ngag dumau. ³⁵ Su kelaun pinggulaulau, pinitaˈu dun diniu puˈ subay meglasay ita adun mebangan ta su nga ndiˈ mekegaga. Puˈ subay ndiˈ ta selingaway su tinaluˈ kiin nu Kaunutan si Isus, laungen, ‘Ki getaw megbegay, iini liliag, batul nu getaw begayan.’”

³⁶ Benaˈ mideksuˈ teluˈay ni Pablo, migelaˈ ilan dayun menginlulud mukaˈ menenabi. ³⁷ Mikengaduy dayun su nga kelaun dumanen, dunut ipel nilan si Pablo mukaˈ pingelekan nilan. ³⁸ Iini miubaˈ ilan dun patiˈ, puˈ sabaˈ nu tinaluˈ ni Pablo kia puˈ ndiˈ na nilan puliˈ mpekitaˈ. Inated nilan dayun ditug bangkaˈen si Pablo.