¹ Naa dekag ami migudas, suminakay ami, minandeng ami dumipag ditu Cos. Benaˈ migendaw, minundas pami ditug Rodas. Genat dia, minundas ami ditu Patara. ² Dia Patara, mibaangan namiig bangkaˈ pegangay tu Fenicia, suminakay ami dayun. ³ Benaˈ midayag namii puluˈ Cipre, luminikuˈ ami dapit lintu, minundas ami dayun ditu Siria. Dumingguˈ ami dia Tiro, puˈ duunig lulan pelusaden dia. ⁴ Pinengaw namii nga mikpetuud dia, pitu gebii ami dayun minapit dia nilan. Naa duuni nga sakup dia, ginuungan ilan puun tug Balakat nu Megbebayaˈ, kaas minegul ilan dini Pablo puˈ ndiˈ na mundas tu Jerusalem. ⁵ Dagid benaˈ mipapasi guliug nami dinilan, migudas ami, puˈ minundas ami gusay. Launan nilan, migelaˈ ilan dumunut dinami diag liu nug lunsud, kampuˈ nu nga sawa nilan mukaˈ bataˈ nilan. Minginlulud ami dayun dia pentad dagat menenabi, ⁶ dayun ami megudas. Benaˈ suminakay ami, minuliˈ ilan dema.

⁷ Mendadi genat dia Tiro, minundas ami ditu Tolemaida. Linaawan nami su kepetedan dia, sendaw ami mingumbalay dia nilan. ⁸ Benaˈ migendaw, sumikat ami pelum, minundas ami ditu Cesarea. Benaˈ minateng ami dia, mingintulugan ami dayun ditug balay ni Felipe su megukit di Gempia Petenday, sala tawan di pitu tawan kiin pimiliˈ kanugdiin dia Jerusalem mekilas di ketubuˈan. ⁹ Duuni paat tawan bataˈ ni Felipe lumbus delaga, metau ilan megwali di taluˈ nu Megbebayaˈ. ¹⁰ Mendadi, selian nami dia nga santaˈ gebii, duuni getaw tumigbeng dia genat tu Judea, ngalanen si Agabo, pimuunan dadema nu Megbebayaˈ. ¹¹ Mikpesempel dinami si Agabo kia, inalapen sug baling ni Pablo, iin dayuni binaluden dig baingkenen mukaˈ di geksuden. Kaliˈ pektaluˈ, “Kinii tinaluˈ nug Balakat nu Megbebayaˈ. Ki gapuˈ nug baling kini, maˈniniˈi kegbalud diniin nu getaw Judea dia Jerusalem, dayun nilan pegwekilay tu nga kanaˈ getaw Judea.”

¹² Benaˈ midengeg nami ki tinaluˈ kia ni Agabo, ginuut nami sia si Pablo, yami nu kepetedan dia, puˈ ndiˈ sia mundas ditu Jerusalem. ¹³ Dagid sumimbag si Pablo, “Mauma dema ini, mingaduy mamu mukaˈ piubaˈ niui ginau? Naan kini, minuyaˈ nau, saˈ kanaˈ laak pikutanu dia Jerusalem, pia matayu dia sabaˈ nu kesakupu tu Kaunutan si Isus.”

¹⁴ Mibulugan laak ami megleguut dini Pablo, misikpaˈ nami. Laung nami dayun, “Adin sug liagan nu Kaunutan Megbebayaˈ, iini penuuden.”

¹⁵ Tubus itu ndaˈ maiben, mingikpes ami, minundas ami dayun tuˈu pangay tu Jerusalem. ¹⁶ Duuni nga sakup dia Cesarea migdunut dinami, inated ami nilan ditug balay ni Masun, getaw Cipre, puˈ pektulugan namiig balayen. Miniben na si Masun mikpetuud.

¹⁷ Mendadi su kedateng nami ditu Jerusalem, didialan ami gupia nu kepetedan dia. ¹⁸ Benaˈ migendaw, minangay ami ni Pablo kumitaˈ dini Santiago, mikpungun dadema dia su kelaunan kaunutan di pikumpungan nu nga sakup. ¹⁹ Benaˈ mitubus ilan ni Pablo pegbesaay, gilaˈen gupia ukitay dinilan su kelaun pinggulaula nu Megbebayaˈ di nga kanaˈ getaw Judea pebian diniin. ²⁰ Benaˈ midengeg nilan, inal nilan su Megbebayaˈ. Kaliˈ ilan pektaluˈ dini Pablo, “Uu Mingumpated Pablo, misuunan mu puˈ kanaˈ laak santaˈ ngibu tawani sama ta getaw Judea mikpetuud na. Ilan, minamal pailan dumunut tu Palinta nu Megbebayaˈ pisulaten dini Moises. ²¹ Dagid duuni pisuun dinilan daw puˈ piktuˈunan mu daw su kelaun getaw Judea megbenwa dig lain benwa, belengen daw nilan ki Palinta kia, ndiˈ mu na daw pesirkunsisu su ngag bataˈ nilan, mukaˈ ndiˈ mu ilan daw pedunuten tug betad nu getaw Judea. ²² Naa endutaˈen ta ma dun? Puˈ gempantek, medengeg pa nilan su kedateng mu dini. ²³ Mendadi danami, melengas pemaˈniniˈ mu. Duuni paat tawan kini, duuni pinasad nilan ditu Megbebayaˈ. ²⁴ Melengas dumunuta dinilan mangay mekanu, pekanu amu dayun adun mawaˈ su kelemuˈay niu, dayun yaˈai gumastu dun saˈ mekpekis ilan dimpulu nilan. Saˈ maˈnia, mesuunan dayun nug launan getaw puˈ su midengeg nilan mekatag diniˈa, ndaˈi metuud dun, puˈ yaˈa, dinunutan mu dadema su Palinta ni Moises. ²⁵ Laak ki nga kanaˈ getaw Judea kia mikpetuud na, piwitan nami ilan sulat, adun mesuunan nilan sug delendeman nami puˈ ndiˈ mpia aanen kig betang ginilak dig ledawan, sampay sug duguˈ mukaˈ su pinatay dig lengek. Mukaˈ pegliaun nilan kig dusa.”

²⁶ Mendadi kini si Pablo, duminunut tuˈu di nga paat tawan kia. Benaˈ migendaw, mikanu ilan tuˈu adun mawaˈ su kelemuˈay nilan. Dayun sumiled si Pablo tu Pengedapan tu Megbebayaˈ, adun siudenen su gendaw nu kepapas nu kelemuˈay nilan, puˈ ilakan dayun betangig lawas nilan.

²⁷ Mendadi benaˈ sungu mpapasi pitu endaw, duuni nga getaw Judea genat tu prubinsya Asia, minitaˈ nilan si Pablo dia Pengedapan tu Megbebayaˈ. Sinasaw nilan dayun su nga melaun getaw, mukaˈ ginapus nilan si Pablo. ²⁸ Mimeksay ilan, laung nilan, “Uy, yamu getaw Israel! Ebangay niu ami! Puˈ ki getaw kini, iin su migleleep dig benwa mekpetuˈun di tibaˈan getaw adun meksudiˈ ilan dinita nu getaw Judea mukaˈ meksudiˈ dailan dema di Palinta ni Moises sampay di Pengedapan kini tu Megbebayaˈ. Pidag pa, duuni nga kanaˈ getaw Judea giwiten dini Pengedapan tu Megbebayaˈ, milemuˈan dun ki pinaas Pengedapan kini.” ²⁹ (Iini tinaluˈ nilan dun maˈantu, puˈ mundiin, minitaˈ nilan si Trofimo, getaw Efeso, tumindug dini Pablo diag lunsud, kaas laung nilan dun, iwit ni Pablo suled dia Pengedapan tu Megbebayaˈ.)

³⁰ Misasaw dayun su tibuuk lunsud Jerusalem. Mibaluˈ dayun dia Pengedapan su kelaun getaw, ginapus nilan si Pablo, biniglas nilan dayun diag liu nu Pengedapan, tinakep dayun su gengaˈanen. ³¹ Benaˈ petain na nilan sia si Pablo, inukitan su kaunutan nu kelaun sundalu puˈ misasawi tibuuk Jerusalem kia. ³² Iin, suminambut dayun mekpungun sundalu mukaˈ nga kaunutan nilan, minggebek ilan dayun dia tebenan getaw. Benaˈ minitaˈ ilan nu nga melaun getaw kia, miksikpaˈ ilan membadas dini Pablo. ³³ Mikpesempel dayun dini Pablo su kaunutan kia nu kelaun sundalu, dinaapen dayun si Pablo mukaˈ sinuguˈen beluden kadina duaˈ buuk. Sinaak dayun nu kaunutan, “Adin getaw ini kini, mukaˈ taˈi salaˈen?” ³⁴ Sug duma getaw, salai teluˈenen, sug duma, sala pelum. Benaˈ ndiˈ melaam nu kaunutan sundalu su metuud sabaˈ nu sasak nilan, sinuguˈen uiten si Pablo diag balay sundalu. ³⁵ Benaˈ minateng ilan dia tugdaˈ egdan, subay sinipit si Pablo nu nga sundalu, puˈ mbuus mesabaˈ nu nga getaw misasaw. ³⁶ Migelaˈ dailan gusay meglendug, kaliˈ ilan pemeksay, “Petain! Petain!”

³⁷ Naa saˈ sungu na peseleday si Pablo diag dialem balay, sinaaken di kaunutan kia, “Megdadi saˈ duuni teluˈen ku diniˈa?”

Laung dayun nu kaunutan, “Aw, metawa mektaluˈ pikebitan nu getaw Grecia? ³⁸ Masiˈ kanaˈa nu getaw Ehipto kitu, su mingatu di gubirnu sug diin, dayun inagaken tug limawaˈ su paat ngibu tawan kitu, lumbus memunuˈan?”

³⁹ Kaliˈ sembag si Pablo, “Naan, getaw Judea mau, daan benwau su Tarso, sakup Cilicia, sakupu di gembagel lunsud. Naa penengiin ku diniˈa saˈ megdadi, megyaga pau di nga getaw kini.”

⁴⁰ Benaˈ mibukaˈ nu kaunutan, migindeg si Pablo dia gegdan, pipengameden su nga getaw. Benaˈ mingamed ilan, miktaluˈ si Pablo dinilan di Hinebreo.