¹ Kaliˈ pektaluˈ si Pablo, “Yamu nga Mekegulang mukaˈ yamu nga Mingumpated, kelelaat kineegay niu ki sembagu kini!” ² Benaˈ midengeg nilan si Pablo megyaga dinilan di pikebitan nilan Hinebreo, labi nailan miamed. Kaliˈ gusay pektaluˈ si Pablo,

³ “Mendadi naan, getaw Judea mau, migigetawu tu Tarso sakup Cilicia, laak diniinu Jerusalem mibagel. Piktuˈunanu ni Gamaliel, piktuˈunen gupia dinaan su Palinta dinunutan nu ginepuˈay ta. Minamalu mekpetuud ditu Megbebayaˈ, maˈniin nu kenamal niu mekpetuud dun, launan niu dini nandaw. ⁴ Piglegetan ku su nga sakup nug Bianan kiin sampay ginaa nilan. Pimbaludu ilan mukaˈ pinirisuu, libun laki. ⁵ Meketakesiˈ dun ki Tampusan Metaas Belian mukaˈ su tibuuk Pikumpungan nu Metaas Gukum kini. Puˈ bigayanu nilan sulat uiten ku sia tu kepetedan ta ditug Damasco. Saˈ maˈantu, mipanawu tuˈu pangay ditu, puˈ adun daapen ku pa pagid sia su nga sakup ni Isus dia, pembeluden ku ilan sia mukaˈ pengeteden ku dini Jerusalem, adun ukumen ilan.”

⁶ Pibundas gusay ni Pablo su taluˈen, laungen, “Mendadi sabaˈu mpanaw, benaˈ sunguu mesebang diag Damasco, mabuˈ taasendaw saan, mitiaganu tekaw tiag genat tug langit. ⁷ Mibelilidu dayun tug lupaˈ. Duun dayuni midengegu tingeg, laungen, ‘Uu Saulo! Mauma dema peglegetan mau?’ ⁸ Kaliˈu sembag, ‘Taˈ taway dun ka?’ Kaliˈ pelum sembag, ‘Naan si Isus, getaw Nazaret, ki peglegetan mu.’

⁹ “Naa ki tiag kia,” maaˈ laung padun ni Pablo, “minitaˈ nu nga tendugu, laak ndaˈ nilan medengeg su taluˈ nu mikabit dinaan. ¹⁰ Sinaaku dayun, ‘Mekendutaˈ mau dun, uu Kaunutan?’ Kaliˈ sembag dinaan su Kaunutan, ‘Pegbuata, bundasa diag Damasco, dayun saˈ mateng ka dia, teluˈen diniˈa ki kelaunan tinduˈ diniˈa baalen mu.’” ¹¹ Laung ni Pablo, “Naa kagina minlamengi pegbantayu sabaˈ nu tiag kia, inulipitu laak nu ngag dumau kia mundas diag Damasco.

¹² “Naa duuni getaw diag lunsud kia ngalanen si Ananias, megbasa tu Megbebayaˈ, mekesuun getaw, puˈ dinunutanen gupia su Palinta ni Moises. Kini si Ananias, pegbesaan gupia nug launan getaw Judea pegbenwa diag Damasco. ¹³ Iini mituaˈ dinaan, migindeg dia gupidu, kaliˈ pektaluˈ dinaan, ‘Uu Mingumpated Saulo, mekengitaˈa na!’ Mitekawu dayun mekengitaˈ, minitaˈu dayun iin. ¹⁴ Kaliˈ pektaluˈ si Ananias, ‘Su Megbebayaˈ, su pektemuyen nu ginepuˈay ta, tinduˈa niin adun pesuun diniˈa kig delendemanen, dakus maitaˈ mu ki mekesuun Sesuguˈenen kiin sampay medengeg mui tantu tingegen. ¹⁵ Puˈ yaˈa dayuni tumakesiˈ diniin tu tibaˈan getaw, iini ukiten mu su minitaˈ mu mukaˈ su midengeg mu. ¹⁶ Mendadi, taˈ mai kelangan ta kini? Pegbuata, bunagan ka tubig, maugasan dayun su salaˈ mu puun tu kengamuˈ mu diniin.’”

¹⁷ Laung padun ni Pablo, “Naa benaˈ mipuliˈu dini Jerusalem, selian ku menenabi ditu Pengedapan, duuni pinitaˈ nu Megbebayaˈ dinaan, ¹⁸ masiˈ su Kaunutan si Isus, tinaluˈen dinaan, ‘Pegdedaliˈa megawaˈ di Jerusalem, puˈ su takesiˈ mu mekatag dinaan, ndiˈ duaten nu nga getaw dini.’

¹⁹ “Kaliˈu sumpat, ‘Laak dagid uu Kaunutan, su getaw dini Jerusalem, misuunan nilan gupia puˈ su mikpetuud diniˈa, dinaapu ilan dia nga simbaan nu getaw Judea, pinikutan ku ilan dayun mukaˈ pibadasu. ²⁰ Mukaˈ padun su kebunuˈ dini Esteban su tuminakesiˈ diniˈa, naan, diaanu pegindeg, sinanguˈu su kebunuˈ dun, pegingaten ku su nga penepeten nu nga mikpatay dun.’^a

²¹ “Dagid tinaluˈ dinaan nu Kaunutan, ‘Panawa. Suguˈen ku yaˈa mpanaw tu melayuˈ benwa, ditu nga kanaˈ getaw Judea.’”

²² Mendadi piktalentenan nu nga getaw si Pablo, gikteb laak tu tinaluˈen kia puˈ sinuguˈ iin meditu nga kanaˈ getaw Judea. Dagid benaˈ midengeg nilan itu, minekeg ilan patiˈ memeksay, laung nilan, “Petaini getaw kiin! Kanaˈ bantang metubuˈ dig dibabaw lumbang!” ²³ Minamal ilan memeksay, migekpasekpas ilan penepeten nilan dakus mikpalintuk ilan lupaˈ. ²⁴ Su kaunutan nu kelaun sundalu, sinuguˈen peseleden si Pablo diag balay kia mukaˈ petugaˈen sia dig badas, puˈ adun mesuunan nilan su pikpuunan nu kemeksay nu nga getaw mekatag diniin.

²⁵ Dagid benaˈ binalud nilan si Pablo adun bedasen, laung ni Pablo ditu kaunutan di sundalu pegindeg dia, “Ki getaw sakup Roma, kanaˈ ba kuntra balaˈud petugaˈen, saˈ ndaˈ pa ukumay?”

²⁶ Benaˈ midengeg nu kaunutan kia, linaawanen su kaunutan nu kelaun sundalu. Kaliˈ saak diniin, “Paa, taˈ maig baalen mu kiin? Ki getaw kiin, sakup Roma ma!”

²⁷ Mikpesempel dayun dini Pablo su kaunutan nu kelaun sundalu kia, kaliˈ saak diniin, “Naa metuud ba, sakupa Roma?”

Simbag ni Pablo, “Iin da.”

²⁸ Laung nu kaunutan, “Ki kebaluyu sakup Roma, gembagel gupiaig binayadu dun.”

“Dagid naan,” maaˈ laung ni Pablo, “sikna na migigetawu.”

²⁹ Migdedaliˈ dayun megawaˈ dia su nga mekpetugaˈ sia dini Pablo. Su kaunutan kia, benaˈ misuunanen masiˈ mipebaludeni sakup Roma, mindek dema.

³⁰ Naa su kaunutan kia nu kelaun sundalu, mauyaˈanen mesuunanen tantu su pikpuunan nug dinangat nu getaw Judea mekatag dini Pablo. Mendadi benaˈ migendaw, piubadan nu kaunutan si Pablo, mukaˈ pisabinen su nga kaunutan nug belian mukaˈ su tibuuk Pikumpungan nu Metaas Gukum nu getaw Judea. Piateden dayun si Pablo, piˈindegen dia gedapan nilan.