¹ Naan si Pablo, sesuguˈenu ni Kristu Isus, puˈ inggatu nu Megbebayaˈ mbaal peneliganen. Tinduˈ dau dema niin megukit Gempia Petenday. ² Ki Gempia Petenday, iin sug daansamaˈ pinasad nu Megbebayaˈ tu nga pimuunanen sinuguˈen kanugdiin mukaˈ su sinulat nilan di pegbesaan Misulat Taluˈen. ³ Iin, mekatag dig Bataˈen su Kaunutan ta si Isukristu. Si Isukristu, kilawan, puˈ su kegigetawen, sapuˈ ni David. ⁴ Diniwatai ginaanen, puˈ su ketubuˈen puliˈ, minitaˈ di ketaas ginuungen puˈ iin sug Bataˈ nu Megbebayaˈ.

⁵ Naa naan, pipiananu nu Megbebayaˈ, puˈ bigayanu niin pegbayaˈ peneliganu ni Isukristu, adun enggaten kui getaw dig launan bansa mekpetuud diniin. ⁶ Sampay yamu nga getaw megbenwa ditug lunsud Roma, puˈ inggat amu nu Megbebayaˈ sumakup dini Isukristu.

⁷ Mendadi suminulatu diniu ngag launan petailen nu Megbebayaˈ dia, ginggaten mbaal piglegetawanen. Penenebiin ku tu Gamaˈ ta Megbebayaˈ mukaˈ tu Kaunutan ta si Isukristu, begayan amu nilan tulung mukaˈ pianan ginaa.

⁸ Mendadi yamu, iinig bekna teluˈen ku diniu, puˈ mekpaladpaladu tu Megbebayaˈ sabaˈ di kelaunan niu, puˈ migdedengeg na di tibuukan benwai kekpetuud niu dini Isukristu. Kagina sakupu ni Isukristu, mekpaladpaladu tu Megbebayaˈ su pektemuyen ku. ⁹ Bisan saak tug Diwata, metuudi sinulatu kini. Puˈ saˈ menenabiu, tatapu amu penenebiay ditu Megbebayaˈ su pektemuyen ku di ndiˈ megduaˈduaˈig delendeman ku. Ki kektamuyu, iin su kegukitu di Gempia Petenday mekatag dig Bataˈen. ¹⁰ Iini penenebiin ku, buang nau niin meguliug dia niu, saˈ delendemanen, ¹¹ puˈ mauyaˈan ku gupia mekinitaˈay ita, adun mbegayan ku amu kepia nu Megbebayaˈ. Iini begayan ku amu dun, puˈ adun mpantekig delendeman niu. ¹² Saˈitada, mektinebangay ita di kekpetuud ta dini Isukristu, puˈ mebangan amu nu kekpetuudu, mukaˈ mebangan dau dema nu kekpetuud niu.

¹³ Mingumpated, mauyaˈan ku dadema mesuunan niu puˈ sanu deksuˈ na delendeman ku mangayu dia niu, laak duuni migbelibad dun. Puˈ mauyaˈan ku melaun diniui magaku sumakup dini Isukristu, maaˈ danu kesakup dun nu ngag lain getaw kanaˈ getaw Judea. ¹⁴ Subay ebangan ku na su nga ginis bansa getaw, su nga gindukadu mukaˈ nga ndaˈi sebutenen, su nga metaasi sinuunanen mukaˈ nga ginuranti. ¹⁵ Kaas mauyaˈan ku gupia, ukiten ku dadema diniu su Gempia Petenday, yamu nga getaw megbenwa diag Roma.

¹⁶ Naa, ki Gempia Petenday kini, kanaˈu mpiid dun, puˈ iin su mbaluy ginuung nu Megbebayaˈ mekeglegawen tug launan getaw mekpetuud dun. Pigbeknanan petendayay su nga getaw Judea, dayun su nga kanaˈ getaw Judea. ¹⁷ Puˈ biwasan di nga getaw su kebian di kekpesikesuun dinita nu Megbebayaˈ miksekat di Gempia Petenday. Ki kesalig tai kebianen, puˈ iin su puunanen mukaˈ deksuˈanen. Ndaˈ ba mesulat di Misulat Taluˈ nu Megbebayaˈ kanugdiin, “Adini getaw pemilangen nu Megbebayaˈ mekesuun sabaˈ nu kesaligen, malapen sug begu ketubuˈ.”

¹⁸ Naa, su nga getaw mimilas tu Megbebayaˈ mukaˈ miglimbung tu samatawen, pisuun na nu Megbebayaˈ puˈ ilan, melabuˈ ilan gelaˈ di ginukumanen, su nga getaw megbebelabag tu metuud mekatag di Megbebayaˈ sabaˈ nu kemilasen. ¹⁹ Diadia melabuˈ di ginukuman nu Megbebayaˈ, puˈ pia pimantek nu Megbebayaˈ diniin su kekpesuun mekatag di Megbebayaˈ, pimilasen. ²⁰ Ndiˈ ba metuud? Genat tu kegbuat nu Megbebayaˈ dinig lumbang kini, su gasal nu Megbebayaˈ ndiˈ maitaˈ mukaˈ su ginuungen ndaˈi tamanen, mesuunan nu getaw puun tug biwaten. Kaas ndaˈi katadenganen dun su kemilasen. ²¹ Pia misuunanen puˈ su Megbebayaˈig Diwata, ndaˈen pegbesaay su mbantang tu Megbebayaˈ, mukaˈ ndaˈen peladpeladay di kepianen diniin. Kaas sug delendemanen, ndaˈ nai pantagen, lumbus laak benguˈbenguˈen. ²² Pia maaˈ laungen dun metaasi sinuunanen, mibaluy benguˈbenguˈen. ²³ Mukaˈ pa pagid, piktamuyeni ngag ledawan binaal maaˈ palas nu kilawan mukaˈ nu manukmanuk mukaˈ nu metetubuˈ, sabayaˈ su Megbebayaˈ, su ndaˈi gumulen.

²⁴ Mendadi, kagina midupangi nga getaw, biwang nu Megbebayaˈ diadia megdusa mikpuun tu melaat gayaken, su tampusan mekepiidpiid. ²⁵ Pigbelesen tug balus su kedawaten tu metuud mekatag di Megbebayaˈ. Pingadapen mukaˈ piktamuyen sug binaal nu Megbebayaˈ, sabayaˈ su Minaal dun, su gempia pegdedengegen di ndaˈi gikteben. Amen.^{a 26} Kagina mikteliud su getaw tu Megbebayaˈ, biwang nu Megbebayaˈ penggulaulanen su gayaken mekepiidpiid. Pia su ngag libun, diadia ndaˈen pektalentenay sug betaden pekelibun. ²⁷ Su ngag laki dadema, diadia tiliudanen sug betaden mayak tug libun, puˈ mitutung gayaken tu samalakinen. Pinggulaulanen tu samalakineni mekepiidpiid gupia. Mbiananen dayun su mitibabaˈ mbantang ginukuman nu Megbebayaˈ. ²⁸ Kagina laung dun nu getaw puˈ ndiˈen mpia pektalentenan su tantu sinuunan mekatag di Megbebayaˈ, biwang diniin nu Megbebayaˈ dunutanen su kanaˈ gempia delendeman. Kaas penggulaulanen dadema su ndiˈ mpia penggulaulaan. ²⁹ Melenduˈan kedupang. Megdusa. Mesaku gupia. Melaat gupiai pigbetaden. Melaat gupiaig delendemanen. Mengimbegu. Memunuˈan. Meksual, melimbung, mengumpiid, menlibak. ³⁰ Peglaatanen sug dengeg nu samatawen, bentaanen su Megbebayaˈ. Mekpelegbas gulaulanen. Mekpelabawlabaw. Menakabul. Daal daig delendemanen, su ginis melaat gulaulanen. Mesandeng tu nga mekegulangen. ³¹ Megbuˈangbuˈang gupia. Ndaˈi saligen, ndaˈig lelaaten tug dumanen. ³² Misuunanen su Palinta nu Megbebayaˈ puˈ adini getaw menggulaula dun, ginukuman dun nu Megbebayaˈ lagaˈ na ginaanen. Pia misuunanen ia, pinemalanen penggulaulaay su melaat, mukaˈ dedialanen pa pagid su ngag duma getaw menggulaula dun.