¹ Naa mendadi, daniˈa, pia taˈ taway dun, saˈ pegdenaˈen mu su ngag duma getaw mekedupang, taˈ mai pegelalan mu dun? Puˈ saˈ pegdenaˈen mu ilan, maleg dig lawas mu, puˈ misama dai gulaula mu. ² Ndiˈ ba metuud, misuunan ta puˈ melegdengi kaukum nu Megbebayaˈ di nga getaw menggulaula di melaat gulaula kia? ³ Naa, saˈ pegdenaˈen mu su menggulaula dun, asal penggulaulaan mu dadema, taˈig batik mu dun, ndiˈa mpeduma di ginukuman nu Megbebayaˈ? ⁴ Mukaˈ maˈniin ndaˈ naig lagaˈen di ginaa mu su gembagel lelaat nu Megbebayaˈ diniˈa, mukaˈ su kektigelen dig dupangan nu nga getaw. Ndaˈ mu ba mesuunay puˈ lelaatan ka nu Megbebayaˈ, adun meksikesuun ka? ⁵ Laaki gaak ginaa mu mukaˈ mpauka gusay meksikesuun, kaas pebegelen mui ginukuman diniˈa nu Megbebayaˈ, saˈ matengi gendaw paitaˈen dig launan getaw su ginukumanen. Puˈ melepengi kengukumen di tibaˈan getaw. ⁶ Puˈ sugdaan nu Megbebayaˈ su nga getaw, saladuaˈ, mbantang tu gulaulanen. ⁷ Maˈantu duuni getaw menamal meksikesuun, adun enalen nu Megbebayaˈ mukaˈ pegbesaanen, mukaˈ begayanen pa pagid ketubuˈ ndaˈi tamanen. Adin su mengmaˈnia, begay diniin nu Megbebayaˈ su ketubuˈ. ⁸ Duun dademai getaw mesaku gupia, mukaˈ gempemilas tu metuud, puˈ adun dunutanen sug limbung. Adin su mengmaˈnia, pelebuˈan nu Megbebayaˈ ginukuman, puˈ mangit dun gupia su Megbebayaˈ. ⁹ Mendadi, pia taˈ taway dun, saˈ menggulaula melaat, peglegetan mukaˈ melegenan, saˈ su getaw Judea, saˈ su kanaˈ getaw Judea, megelaˈ mekebian dun. ¹⁰ Laak dagid, enalen nu Megbebayaˈ mukaˈ pegbesaanen su nga menggulaula tu melengas. Begayan ilan nu Megbebayaˈ kelinaw, puˈ piseksuden ilan diniin mukaˈ tu nga samataw nilan. Duun dademai nga getaw Judea mukaˈ kanaˈ getaw Judea mekebian dun. ¹¹ Puˈ ndaˈidunig lingken petailen nu Megbebayaˈ.

¹² Naa, su nga kanaˈ getaw Judea, ndaˈ ilan pesuunay ni Moises Palinta nu Megbebayaˈ. Pia ndaˈ ilan palintaay, saˈ mekesalaˈ ilan, gukuman dinilan matay di ndaˈi tamanen. Su nga getaw Judea pelum, pisuunan ilan ni Moises kanugdiin Palinta nu Megbebayaˈ. Kaas saˈ mekesalaˈ ilan, su Palintai mukum dun dinilan. ¹³ Puˈ kanaˈ nu mekineeg laak tu Palintai mekeseksud tu Megbebayaˈ. Iini pesikesuunen nu Megbebayaˈ, sug dumunut dun. ¹⁴ Su nga kanaˈ getaw Judea, pia ndaˈ ilan palintaay nu Megbebayaˈ, saˈ dunutan nilan sug betad nu Palintanen puun tug delendeman nilan, mpaitaˈ nilan puˈ mesuunan nilan su gempia baalen mukaˈ su ndiˈ mpia. ¹⁵ Puˈ mpaitaˈ di gulaula nilan puˈ mibetang dig dialem ginaa nilan sug betad nu Palinta nu Megbebayaˈ. Misanguˈ dadema nug delendeman nilan puˈ di ginaa nilan su Palinta, puˈ taang dun, dengaten nug delendeman nilan sug lawas nilan, taang dun, penagalen. ¹⁶ Su gendaw paukum na nu Megbebayaˈ dini Isukristu su giglud delendeman nug launan getaw, maˈantui mpenggulaula. Iini mitaluˈ di Gempia Petenday pigukitu di nga getaw.

¹⁷ Naa yamu, tinaluˈ niu puˈ getaw Judea amu mukaˈ siligan daw niu su Palinta nu Megbebayaˈ pesalabuuken amu niin daw diniin. Pingangyaˈ niu su kesambat niu tu Megbebayaˈ. ¹⁸ Misuunan daw niu saˈ taˈ alanduni mauyaˈan nu Megbebayaˈ baalen niu. Kagina mituˈunan amu Palintanen, misuunan da niu dema su tantu kepianan. ¹⁹ Mituudan amu dun puˈ mekpenuluˈ daw amu tu nga getaw maaˈ nu mibuta, puˈ ndaˈ ilan mpalintaay. Maˈniin daw amu tilaw nu nga getaw mideleman, adun maitaˈ nilan sug bianan pangay ditu Megbebayaˈ. ²⁰ Mektituluˈ amu tu ngag benguˈbenguˈen, mukaˈ mekpetuˈun damu dema di nga maikaˈ pai misuunanen, puˈ migelaˈ palintaay diniu su sinuunan mukaˈ su metuud mitaluˈ di Palinta nu Megbebayaˈ. ²¹ Yamu nga getaw Judea, piktuˈunan niu sug duma getaw, mauma dema ndaˈ niu pektuˈunay sug lawas niu? Migwali amu puˈ ndiˈ mpia megdaaw, asal masiˈ megdaaw damu dema. ²² Tinaluˈ niu tu getaw puˈ subay ndiˈ menlelingay, mauma dema menlelingay amu? Pigliaw daw niu su nga sagya diwata, mauma dema suled mamu tug balay tandaˈ bitangan ledawan nu sagya diwata, adun megdaaw amu dia? ²³ Yamu getaw Judea, mingangyaˈ amu puˈ yamu dawi piwitan nu Megbebayaˈ Palintanen. Mauma dema pingumpiid niu su Megbebayaˈ, puˈ pimilas niu gupia su Palintanen? ²⁴ Ndaˈ ba mesulat kanugdiin, “Sabaˈ diniu nga getaw Judea, piksudiˈan su Megbebayaˈ nu nga kanaˈ getaw Judea.”

²⁵ Naa, ki kesirkunsisu diniu tuˈus puˈ getaw Judea amu, duun daani pantagen saˈ laak dunutan niu su kelaun pinalinta nu Megbebayaˈ.^a Laak saˈ pemilasen niu su Palintanen, ki tuˈus kiin, ndaˈi pantagen, lepeng ndaˈ damu peginetaw Judea. ²⁶ Mendadi, saˈ duun dayuni getaw kanaˈ getaw Judea, laak medunutanen sug betad nu Palinta nu Megbebayaˈ, pemilangen nu Megbebayaˈ tantu getaw Judea. ²⁷ Pia kanaˈ getaw Judea mukaˈ ndaˈ mbaalay tuˈus puˈ getaw Judea, dinunutanen sug betad Palinta. Maˈnia, paitaˈen puˈ yamu pasiˈ, ukumen amu nu Megbebayaˈ mekatag di kektalenten niu dun, puˈ mimilas amu, pia mipalintaan amu nu misulat Palinta nu Megbebayaˈ mukaˈ mituˈusan amu dig betad getaw Judea. ²⁸ Puˈ adin ma su tantu getaw Judea mukaˈ su tantu tinuˈusanen? Kanaˈ nu getaw mituˈusan dig lawas laak. ²⁹ Iini, tantu getaw Judea, su meginetaw Judea dig delendemanen. Saˈitada, su mikpetuˈus dig delendemanen. Kiai ketuˈus dun nug Balakat nu Megbebayaˈ, kanaˈ nug betaden getaw Judea. Su getaw maˈnia, iini mekpenal diniin, su Megbebayaˈ, kanaˈ nu getaw.