¹ Naa maˈantu, ki nga getaw suminalabuuk dini Kristu Isus, ndiˈ na nilan mbianan su ginukuman dun nu Megbebayaˈ. ² Puˈ iinig betad nug Balakat nu Megbebayaˈ. Kagina pisalabuuk ita niin dini Kristu Isus, bigayan daita dema niin begu ketubuˈ. Ginawen naita di pegbayaˈ nu gasal ta mekesalaˈ pangay ditu kepatay. ³ Kagina ndiˈ ta megaga su kekinilawan ta, ndiˈ ta medunutan su Palinta, kaas ndiˈ ta mbelengig betad ta mekesalaˈ. Laak megaga nu Megbebayaˈ. Mendadi iini sinuguˈ dun nu Megbebayaˈ sug Bataˈen medini, puˈ adun uaˈenen di ginaa getaw su pegbayaˈ nug betad mekesalaˈ. Miksibaluy getaw kig Bataˈen kini, kaas mipeduunan kekinilawanen maaˈ danita nga getaw mekesalaˈ, adun mbiananen su ginukuman sia dinita nu Megbebayaˈ mukaˈ uaˈenen su salaˈ. ⁴ Iini pinggulaula dun nu Megbebayaˈ, adun megelaˈ ta mpenggulaula su kepianan mauyaˈan nu Megbebayaˈ, maaˈ dadema nu tinituluˈ di Palintanen. Megelaˈ ta mpenggulaula saˈ pektalentenan ta su tinituluˈ nug Balakaten, kanaˈ nu kekinilawan ta. ⁵ Puˈ su getaw mektalenten laak tu gayak nu kekinilawanen, mekpebayaˈ di ginaanen tu kekinilawanen. Laak su getaw pektalentenanen su mauyaˈan nug Balakat nu Megbebayaˈ, pebayaˈen su ginaanen diniin. ⁶ Saˈ su kekinilawan tai megbayaˈ dig delendeman ta, deksuˈanen ia, kepatay ta di ndaˈi tamanen. Saˈ su mauyaˈan nug Balakat nu Megbebayaˈi megbayaˈ dig delendeman ta, malap taig begu ketubuˈ mukaˈ pianan ginaa. ⁷ Kaas kumuntrai getaw tu Megbebayaˈ saˈ su kekinilawaneni megbayaˈ dig delendemanen, puˈ ndiˈen penggulaulaan su tinituluˈ di Palinta nu Megbebayaˈ, mukaˈ ndiˈ mekegdunut dun. ⁸ Su getaw mekpetuud tu kekinilawanen laak, ndaˈig leliagen dun su Megbebayaˈ.

⁹ Laak yamu pasiˈ, pektalentenan niu su mauyaˈan nug Balakat nu Megbebayaˈ, sabayaˈ di gayak nu kekinilawan niu, saˈ metuud, pigbenwanan nug Balakaten su ginaa niu. Adin su ndaˈ pegbenwanay nug Balakat ni Kristu, kanaˈ sakup ni Kristu. ¹⁰ Laak dagid, kagina metuud puˈ pigbenwanan ni Kristui ginaa niu, puun tu kemilang diniu nu Megbebayaˈ mekesuun, ki ginaa niu, petubuˈen nug Balakaten pia mekangayig lawas niu tu kepatay sabaˈ nu salaˈ. ¹¹ Kagina migbenwa di ginaa niu sug Balakaten, petubuˈen puliˈ nu Megbebayaˈ sug lawas niu pebian dig Balakaten migbenwa na di ginaa niu, puˈ pitubuˈ puliˈ nu Megbebayaˈ si Kristu Isus.

¹² Kaas uu Mingumpated, subay iini pegbetaden ta, su mauyaˈan nug Balakat nu Megbebayaˈ, kanaˈ nu mauyaˈan nu kekinilawan ta. ¹³ Puˈ saˈ pegbetaden niu su kekinilawan niu, mekangay amu tu kepatay niu. Laak dagid, saˈ pebian di gabang nug Balakaten teliudan niu su melaat gulaula, maˈniin niu pinatay su pigbetad niu kinilawan. Malap niu dayuni ketubuˈ ndaˈi tamanen. ¹⁴ Su nga getaw inagak nug Balakat nu Megbebayaˈ, bataˈ nailan nu Megbebayaˈ. ¹⁵ Puˈ sug Balakaten bigay diniu nu Megbebayaˈ, ndiˈ mengulipen diniu, mukaˈ ndiˈ mekpengendek diniu. Puˈ pibataˈ ita niin tu Megbebayaˈ. Kaas puun tu pegbayaˈ nug Balakaten, iini ingelanan ta dun su Megbebayaˈ, laung ta “Uu Amaˈ, Gamaˈ nami.” ¹⁶ Kig Balakaten kia, suminalabuuk di ginaa ta mukaˈ miglegintuud dun dadema di ginaa ta puˈ bataˈ ita nu Megbebayaˈ. ¹⁷ Kagina bataˈ ita niin, mpeduunan ita kepianan tinaguˈen begay tu nga piglegetawanen ditug binayaˈ gebii buˈ gendaw. Mukaˈ mpeduma daita dema dini Kristu saˈ malapen su tinaguˈ nu Megbebayaˈ begay pa diniin. Puˈ saˈ mpeduma ita di kelegenay ni Kristu, mpeduma daita dema di kegdedengegen.

¹⁸ Naa, ki nga kelegenay mbianan ta dini nemun, pimilangu kanaˈ mbantang peguntay tu kepianan buasan dinita ditug binayaˈ gebii buˈ gendaw, puˈ mpeduma ita nu Megbebayaˈ tu kegdedengegen. ¹⁹ Bisan sug launan biwat nu Megbebayaˈ, pegelatan pa nilan gusay su pedetengen nilan puˈ paitaˈ nu Megbebayaˈ su ngag bataˈen mektetubuˈ di ndaˈi tamanen. ²⁰ Puˈ binukaˈ nu Megbebayaˈ su ngag biwaten, ndaˈ nai gatagen. Laak kanaˈ danilan delendeman, puˈ miuyaˈan da nu migbukaˈ dun, ²¹ puˈ pedetengeneni gendaw lekatenen su kelaun biwaten tu gasal nilan mpapas da. Mukaˈ pedumanen dailan dema di ngag bataˈen, su ngag pebeluyen, sampay mbianan nilan su melengas kebeluy dun di tibaˈan megbalud dinilan. ²² Puˈ misuunan ta milegenan gupia sug launan biwat nu Megbebayaˈ sampay nandaw, sinegay pegelatan pa nilan su gendaw kia. ²³ Kanaˈ laak ilani milegenan. Ita padun nu nga bigayan Balakaten, sug inunaanen begay dinita, milegenan daita dema, sinegay pedetengen ta su gendaw metubus nu Megbebayaˈ su kebaalen dinita ngag bataˈen, mukaˈ ki keglekaten dig lawas ta. ²⁴ Maˈantu, migawen naita di ginukuman dinita, laak pedetengen ta pa puˈ megelaˈ menuud, sampay kegawen nug lawas ta. Naa, saˈ upama maitaˈ ta na su pedetengen ta, kanaˈ paingalan dun pedetengen, puˈ maitaˈ ma. Ndaˈi getaw mekpelab tu minitaˈen na. ²⁵ Saˈ ndiˈ ta maitaˈ su pedetengen ta, laak saˈ pekpelaban ta gusay, mektigel daita dema di kegelat ta dun.

²⁶ Maˈnia dadema kig Balakat nu Megbebayaˈ, lumusad dini adun ebangan ita niin saˈ kulangi kesalig ta. Saˈ pinenggiˈ, ndiˈ ita gupia metau menenabi tu Megbebayaˈ, iini mekpedialem mengamuyuˈ dun dinita tu Megbebayaˈ, di taluˈ ndaˈ dinita. ²⁷ Laak misuunan gupia nu Megbebayaˈ su ginaa getaw, kaas mesabuten sug delendeman nug Balakaten mekatag dinita, puˈ su kengamuˈen di nga piglegetawanen, megdunut gupia tu mauyaˈan nu Megbebayaˈ.

²⁸ Misuunan ta puˈ sug launan getaw mekpetail diniin, pegebangan nu Megbebayaˈ, adun mpianan ilan di kelaun mbianan nilan. Iini inggaten dun su mekpetail diniin, puˈ daansamaˈ pigdelendemen. ²⁹ Su nga ginggaten, daansamaˈ tinduˈen pesamanen ilan dig Bataˈen, adun iin dayuni mbaal gulangbataˈ nu melaun mekpated. ³⁰ Kaas su nga tinduˈen, inggaten ilan sumakup diniin, pimilangen ilan mekesuun, mukaˈ pidumanen ilan di kekpededengeg diniin nu ngag launan.

³¹ Saˈ maˈantu, taˈ alandun dayuni gempia ta teluˈen? Kagina megabang dinita su Megbebayaˈ, taˈ mai mekakuˈ mengatu dinita? ³² Puˈ pia sug Bataˈen, ndaˈen belibad gumantiˈ di kepatay ta. Kaas misuunan ta begayan ita niin launan kepianan, di ndaˈi sugda ta dun. ³³ Naa, taˈ mai mekakuˈ dumangat dinita tu Megbebayaˈ, ita nga tinduˈen sakupen, asa ndaˈi ginukuman dun nu Megbebayaˈ? ³⁴ Kaas duun bai mekaukum dinita lagaˈ na ginaa ta? Si Kristu Isus, mukum ma dinita? Ndiˈ lai mesuˈat, puˈ iini minatay dayun pitubuˈ puliˈ, bitang na tu gupid nu Megbebayaˈ, tandaˈ pekpenenebian ita niin gebii gendaw. ³⁵ Duun ma dayuni mekebelabag dig lelaat ni Kristu dinita? Mekebelabag dun ba saˈ melegenan ita, saˈ peglegetan ita? Saˈ mbianan tai gembagel gutem ba, saˈ gempubri baita gupia, saˈ mbianan tai mekekaˈid ba, saˈ pegbunuˈ? ³⁶ Ndaˈ ba mesulat kanugdiin,